COVID-19 ha templo-kuéra
Peñongatúke tenondete pene konvénio ha umi templo-gua jehovasa pene akã ha pene korasõme. Pendejeroviarekóke umi konvénio pejapova’ekuépe.
Che hermano ha hermana-kuéra pohayhuetéva, añetehápe jarekókuri peteĩ karuguasu espiritual. Cheaguyjeterei umi ñembo’e, mensahe ha purahéire opa ko conferencia-hápe. Aguyje peẽme peteĩteĩ pejoaju haguére orendive, peime peimehápe.
Oñepyrũvo ary ohasava’ekue, Covid -19 pandemia rupi ha ha’ese haguére yvoragua tavayguakuéra iguénova, rojapyhy pe decisión hasýva rombotývo opaite templo temporalmente. Umi mése ohasávape, roñeñandu inspirado ro’abri mbeguekatu hag̃ua, jesarekópe. Templo-kuéra oje’abri hína irundy fase-pe, ojerrespeta mbaretévo umi reglamento ha protocolo de segurida umi gobierno local omoĩva.
Templo-kuéra oĩva fase 1-pe, umi paréha orekóva umi oñeikotevẽva ha ohupytymava’ekue iñinvestidura ikatu ojesella ména ha tembirekóicha.
Umi templo oĩva fase 2-pe, ojejapo opa umi ordenánsa oikovévare, jepe investidura, ména ha tembireko sellamiénto, ha sellamiénto umi ta’ýra tuvakuéra ndie. Ramoite romoambue umi fase 2 disposición ha oñepermiti ñande mitãrusukuéra, umi miembro pyahu ha ambuekuéra oguerekóva peteĩ recomendación uso limitado rehegua toparticipa umi bautismo vicario-pe ijypykuérare.
Umi templo oĩva fase 3-pe, orekóva cita previa ikatu oparticipa ndaha’éi umi ordenansa oikovévare añómente, ha katu avei opa umi ordenánsa vicaria umi ypykue omanomava’ekuére.
Fase 4-pe oĩ jeýma templo activida plena ha regular-pe.
Oreaguije pene paciencia ha servicio dedicado-re ko ñemoambue ha desafio époka aja. Añembo’e pende petupãituse ha peservise hag̃ua templo-pe tahendyve ko’ág̃a araka’evégui.
Oiméne peñeporandu hína araka’épa peho jey kuaáta templo-pe. Ñembohovái: pene templo oje’abríta oheja vove umi reglamento pende gobierno local-gua. Pene templo oje’abri jeýta pe Covid-19 incidencia pende área-pe oĩ vove umi límite seguro ryepýpe. Pejapo opa ikatúva oñemomichĩ hag̃ua Covid pende áreape, ikatu hag̃uáicha pene oportunida peho hag̃ua templo-pe okakuaa.
Upéva aja, peñongatúke tenondete pene konvénio ha umi templo-gua jehovasa pene akã ha pene korasõme. Pendejeroviarekóke umi konvénio pejapova’ekuépe.
Ñamopu’ã hína ko’áĝa ára oútavape g̃uarã! Ko’áĝaite oĩ cuarenta y un templo oñemopu’ã térã oñembopyahúva hína. Pe ary ohasávapente, jepe upe pandémia, ojejapo paláda ñepyrũ veintiún templo pyahúpe!
Romo’ag̃uiseve gueteri Ñandejára Róga ñane miembrokuérape, oguereko hag̃ua privilegio sagrado ohóvo templo-pe py’ỹiete ikatuháicha.
Aanunsiávo ore plan oñemopu’ã hag̃ua 20 templo pyahu, ajepyamongeta ha amomorã pionerokuérape — ymaguare ha ko’ág̃agua— hekovekuéra oñekonsagrava’ekue oipytyvõ ojejapo hag̃ua historia ko árape. Peteĩ templo pyahu oñemopu’ãta ko’ã tendápe: Oslo, Noruega; Bruselas, Bélgica; Viena, Austria; Kumasi, Ghana; Beira, Mozambique; Ciudad del Cabo, Sudáfrica; Singapur, República de Singapur; Belo Horizonte, Brasil; Cali, Colombia; Querétaro, México; Torreón, México; Helena, Montana; Casper, Wyoming; Grand Junction, Colorado; Farmington, Nuevo México; Burley, Idaho; Eugene, Oregón; Elko, Nevada; Yorba Linda, California; y Smithfield, Utah.
Templo-kuéra ha’e peteĩ mba’e imba’eguasúva Jesucristo evanhélio plenitu restauración-pe. Umi templo-gua ordenánsa omyenyhẽ ñande rekove pu’aka ha mbaretégui, ndaikatúiva japupyty ambuéicha. Ñame’ẽ aguyje Tupãme umi jehovasapýre.
Opakuévo ko conferencia, roipyso jey ore mborayhu pende ári. Roñembo’e Tupãme toñohẽ Hovasapy ha ñemo’ã peteĩteĩ pende ári. Oñondivepa ñaime Iservicio sagrado-pe. ¡Py’aguasúpe, ñamba’apo ko ára Ñandejára rembiapo ojajáivape! Upévare añembo’e, Jesucristo réra sagrado-pe . Amén.