Ndaikatúi ipu’akapa hikuái, ndaikatúi ja’a ñande
Jajapóramo ñane pyenda Jesucristo ári, ¡ndaikatúi ja’a!
Ñande profeta jahayhuetéva, presidente Russell M. Nelson, he’i pe conferencia general ohasávape: “Ko’ã ára ivaitéva aja oprofetisahague apóstol Pablo, Satana ni noñeha’ãvéima omokañy umi ijatáke Tupã plan-re. Hetaitereíma upe aña ojejoko’ỹva. Upévare, upe forma año ikatuhápe jaikove espiritualmente ha’e jadesidi jahejávo Tupã taipu’akapa ñande rekovépe, ña’aprende ñahendu Iñe’ẽpu ha jaipuru ñane mbarete ñaipytyvõ hag̃ua Israel ñembyatýpe.”1
Ñakonsiderávo upe profeta invitación ñahendukuaa hag̃ua Tupã ñe’ẽpu, oĩpa ñane korasõ decidido térãpa oñemohatã? Ñanemandu’ami upe konsého oñeme’ẽva Jacob 6:6-pe “Héẽ, ko árape, pehenduséramo iñe’ẽ, ani pemohatã pene korasõ; mba’ére piko pemanose?” Tañaime determinádo jahejávo Tupã toprevalese ñande rekovépe.
Mba’éicha ikatu jaheja Tupã oprevalese ñande rekovépe ha ani ñande adversario? Upe Doctrina y Convenios 6:34-pejalee, “Ani pekyhyje, manada’i; pejapo iporãva; peheja yvy ha añaretã toñekombina pende rovái, peñemopu’ãrõ che ita ári, ndaikatumo’ãi oprevalese” Upéva peteĩ promesa porã. Pe yvy ha añaretã ikatúramo jepe ojoaju ñane kóntrape, ndaikatúi oprevalese jadesidívo jaheja Tupã oprevalese ñamopu’ãvo ñande rekove Ijitaguasu ári.
Oñe’ẽvo Idisípulokuérape, Jesucristo ombo’e peteĩ kuimba’e arandu ha peteĩ kuimba’e ivýrovagui, oĩva Mateo kapítulo 7 Nuevo Testamento-pe. Heta pende apytépe oiméne ohendúmakuri Primaria-gua purahéi “Upe iñarandu ha ivýrova.”2 Pejapyhy rire tiempo pembojoja hag̃ua umi irundy purahéi versíkulo, pejuhúne umi versíkulo 1 ha 2 ojoguaiteha versíkulo 3 ha 4-pe. Upe iñarandúva ivýrovaicha avei ojogapohína. Ome’ẽse ifamiliape peteĩ óga porã ha isegúrova. Oikose vy’ápe oñondive akoiete peteĩ famíliaicha, nde térã cheichagua. Pe situación ojeréva peteĩchante: “Ouama ha ojupi y.” Ropurahéi jepi sei jeyve ropurahéi jave. Pe iñambuehápe ha’e pe iñarandúva ojogapoha itaguasu ári ha hóga opyta, upe ivýrova katu ojogapo yvyku’i ári ha pe hóga oñehundi. Upévare, moõpa oĩ ñane pyenda añete oñeimporta, ha upéva oguerekóta peteĩ efecto decisivo ipahápe ha opave’ỹhápe.
Aha’arõ ha añembo’e opavave jajuhu hag̃ua peteĩ pyenda seguro ha japyta hag̃ua ipype ñamongakuaávo ñande rekove oútava. Ñanemomandu’a Helaman 5:12-pe: “Ha ko’ág̃a, che ra’ykuéra, penemanduʼáke, penemanduʼáke pene Rredentor ita ári, haʼéva Cristo, Tupã Ra’y, pemoĩva’erãha pene pyenda; upéicha pe aña omondo vove ijyvytu vai, heẽ, hakuáva yvytujerépe, heẽ, opa iñamandáu ha hi’arapochy vai pendehavira vove, upéva ani oguereko pu’aka pendegueraha hag̃ua yvykua teko’asy ha jehasa’asy opave’ỹvape, pe ita peñemopuʼãhague ári rupi, haʼéva peteĩ pyenda atã, peteĩ pyenda yvyporakuéra omopuʼãramo hiʼári, ndoʼamoʼãi.”
¡Upéva ha’e Tupã promesa! Jajapóramo ñane pyenda Jesucristo ári, ¡ndaikatúi ja’a! Japerseveráramo jeroviarekópe ipaha peve, Tupã ñaneipytyvõta ñamohenda hag̃ua ñande rekove Ijitaguasu ári, “ha umi añaretã rokẽ ndaikatumo’ãi ipu’akapa [ñande] rehe”(Doctrina y Convenios 10:69). Ikatu nañamoambuepái opa mba’e oútava, ha katu ikatu jaiporavo mba’éichapa ñañembosako’iva’erã oútavape g̃uarã.
Oĩne ñande apytépe opensáva: “Pe Evangelio niko iporã, upéivare tekotevẽ ñamoĩ ñande rekovépe, ikatu peteĩ jey káda semana”. Tupaópe jeho peteĩ jey káda semana ndohupytýi jajogapo hag̃ua itaguasu ári. Opa ñande rekove henyhẽva’erã Jesucristo evangelio-gui. Pe evangelio ndaha’éi ñande rekove párte, ha katu ñande rekove ha’e añete Jesucristo evangelio párte. Pepensami Na’añetéi piko upéva? Ñande rekove yvy ári ha’e peteĩ párte añónte opa upe plan salvación ha exaltasiõ reheguápe.
Tupã ha’e ñande Ru Yvagagua. Ha’e ñanderayhu opavavépe. Ha’e oikuaa porãve ñane potencial jajekuaahágui ñande. Ndaha’éi oikuaánteva umi ñande rekove detálle. Tupã oikuaa umi detálle’ive detállegui ñande rekovégui.
Pesegi pe consejo arandu ñande profeta oikovévagui, presidente Nelson. Oĩháicha pe Doctrina y Convenios 21:5-6-pe:
“Rehupytýta iñe’ẽ jerovia ha py’aguapýpe oúramoguáicha che jurúgui.
“Rejapóramo ko’ã mba’e, umi añaretã rokẽ ndoprevalesemo’ãi nde rovake; héẽ, ha Tupã Ñandejára omosarambíta umi yvypytu pokatu nerenondépe ha omboryrýita yvága ne ñeimeporãrã ha Héra gloria-pe g̃uarã.”
Upévare, ndaikatúi oprevalese ha ñande ndaikatúi ja’a!
Atestifika peẽme Cristo ou jeytaha mokõiha jey ojapo haguéicha ñepyrũra, ha katu ko’ág̃a tuicha gloria ha majesta reheve. Aha’arõ ha añembo’e añembosako’i hag̃ua amog̃uahẽ hag̃ua, taha’e vélo ko’a gotyo térã amo gotyo. Javy’a aja Pascua temporáda porãitépe, aha’arõ, Jesucristo expiasiõ rupive ha pe Irresurresiõ poder (tojehechaMoroni 7:41Ikatúta ajupi ha añembyaty hendie che Apohare ndive ha ha’e Chupe: “Aguyje.” Jesucristo rérape, Amén.