Ñahekombo’évo Ñandejára ohekombo’eháicha
Responsabilidad jasegui hag̃ua Mbo’ehára ehémplo ha Ha’éicha ñahekombo’e hag̃ua, orrekae mayma ñandekuéra ári.
Mbo’eharakuéra Ijoheipyréva
Ojapo mbovy mése, peteĩ che kompañerokue táva Overton, Nevada-pegua chereñoihague, he’i rojapo hag̃ua peteĩ rregálo Navideño ore jardín de infante-gua mbo’ehára rohayhuetévape g̃uarã, nda’aréi ombotyakue 98 áño. Ha’e orembo’eakue orepy’aporã hag̃ua, imba’eguasuha asajekue pytu’u porã, ha vy’a oguerúva kamby galléta he’ẽre je’u, ha rojohayhu hag̃ua. Aguije, Hermana Davis, ha’e haguére mbo’ehára hechapyrãitéva .
Che arekoakue ambue mbo’ehára ijoheipyréva, ahárõ guare Colegio Ricks-pe, ojapo heta ary. Añembosako’iakue aservi hag̃ua peteĩ misiõ, ha apensa chepytyvõtaha aháramo peteĩ clase de preparación misional-pe. Pe ahasava’ekue omoambue che rekove.
Peteĩha clase ára guive, che ahechakuaa aimeha peteĩ mbo’ehára guasu ndive. Pe mbo’ehára ha’ékuri Hermano F. Melvin Hammond. Che aikuaa Hermano Hammond ohayhuha Ñandejárape ha che rayhuha chéve. Ahechakuákuri hováre ha ahenduakue iñe’ẽpúpe. Ha’e ombo’évo, pe Espíritu omohesakãva’ekue che akãmegua. Ha’e ombo’eakue doctrina, ha katu che invita avei aikuaa hag̃ua chejehegui. Iñinvitasiõ che pytyvõakue ahecha porã hag̃ua che rresponsabilida aikuaa hag̃ua Ñandejára doctrina chejehegui. Upe tembiasakue chemoambue tapiaite g̃uarã. Aguije, Hermano Hammond, Ñandejáraicha rembo’e haguére.
Hermano ha hermana-kuéra, opavave ningo orekova’erã kóichagua ñemoarandu rembiasa, ogapýpe ha tupaópe.
Eju, Che segui ñepyrũmby ohechauka mba’épa ikatu ogueru Cristo-ichagua ñehekombo’e. “Opa evanhélio ñekombo’e ha kuaapyhy ohekáva”, he’i, “ha’e ñambopypukuve hag̃ua ñane konversiõ Jesucristo-pe ha ñanepytyvõ jajoguave Chupe. … Evanhélio kuaapyhy omombaretéva ñande jerovia ha ñande reraháva konversiõ milágrope, ndojehúi peteĩ javépe añónte. Ojepyso [pe] aula mboypýri, tekovekuéra korasõ ha rogapy peve.”1
Escritura-kuéra omombe’u Salvador ministrasiõ antigua America-pe oñeñandu mbarete ha isarambipaitégui, “opavave tavayguakuéra oñekonverti Ñandejárape, opa yvy ape ári, mokõivéva, nefita ha lamanita-kuéra, ha ndaipóri joavy ni jeikovai ijapytepekuéra, ha ijoja hikuái peteĩva ambue ndive”.2
Mba’éicha pe ñahekombo’éva ikatu ojapo péichagua efecto umi jahayhúvare? Mba’éicha ikatu ñambo’eve Salvador-cha, ha ñaipytyvõ ambuekuérape oñekonverti mbareteve hag̃ua? Ame’ẽse mbovymi suherénsia.
Jakopia Salvador-pe
Primero ha opa mba’e mboyve, pemoĩ pendejehe rresponsabilida peikuaa hag̃ua opa mba’e ikatúva pe Mbo’eharakuéra Mbo’ehára Teégui. Mba’éicha Ha’e ohechauka mborayhu ambuekuérare? Mba’e oñandu ha’ekuéra Ha’e ombo’e jave? Mba’épa Ha’e ombo’e? Mba’épa Ha’e oha’arõakue umi ombo’évagui? Pejapo rire ko’ãichagua ñeporandu, pehesa’ỹijo ha pehecha umi pehekombo’éva ojoguave hag̃ua Iñehekombo’épe.
Tupaópe oñeme’ẽ heta rrekúrso ñambo’e hag̃ua, aplicación Libreria de la Iglesia ha ChurchofJesusChrist.org-pe. Peteĩ umi rrekúrso héra Enseñar a la manera del Salvador. Po’invita peleé ha pestudia hag̃ua opa ñe’ẽ ipypegua. Umi principio upepegua pene pytyvõta ñeha’ã pejapóvape Cristo-chave pehekombo’e hag̃ua.
Pejora Familia-kuéra Pu’aka
Ambue suherénsia ikatu ojehechauka peteĩ tembiasa arekoakue reheve, ojapo mbovy mése, avisitárõ guare peteĩ che angirũ ahayhuetéva. Ahendúkuri hembireko oñe’ẽva hambue hapicha ndive, ha péichagui, pya’ete ajediskulpa ha’e oho jey hag̃ua ifamilia rendápe.
Peteĩ aravo térã uperiremi, og̃uahẽ chéve mensáhe jahipyre hembireko roryetégui: “Hermano Newman, aguije ehasa haguére. Rojerureamo’ãkuri rehasa hag̃ua, ha katu okompartise nendive mba’épa rojapókuri hína. Pandemia oñepyrũvo, roñemongetákuri Eju, Che Segui ore familiakuéra tuichapámavandi, opa Domingo-kue, Zoom rupive. Kóva añetete ojapo hína milágro. Chéve g̃uarã kóva ha’e primerave che memby kuña oleeha hína ijehegui Mormón Kuatiañe’ẽ. Ko ára ha’ékuri ore lección paha Mormón Kuatiañe’ẽme ha rombopa ramoitékuri nde rehasávo guare. … Apensákuri rehendusetaha mba’éichapa Eju, Che Segui, Zoom, ha peteĩ pandemia, ome’ẽakue oportunida, oñemoambue hag̃ua peteĩ korasõ ára porãme. … Añeporandu, mboy milágro michĩmi oiko hína ko’ã ára ojeikuaa’ỹva aja”.
Chéve g̃uarã ko’ãva ha’e promésa ñekumpli, ojapoakue Presidente Russell M. Nelson Octubre 2018-pe. Ha’e he’i pe evanhélio kuaapyhy, ogapýpe oñe’centráva ha Tupao rehe oje’apojáva, “orekoha potencial ojora hag̃ua familia-kuéra pu’aka, káda familia oseguívo hekopete ha jesarekópe, omoambue hag̃ua hogapykuéra peteĩ santuario de fe-pe. Apromete peẽme pemba’apóramo jesarekópe pembopyahu hag̃ua pende rogapy, peteĩ centro de aprendizaje del Evangelio-pe, tiempo ohasávo, pendeDía de reposo añetehápe ha’éta peteĩ delicia. Pendefamilia-kuéra oĩta vy’apópe oikuaa ha ovivi hag̃ua Salvador ñehekombo’ekuéra. … Umi ñemoambue pene familia-pe tuicháta ha hi’aréta”.3 Iporãitéva promesa!
Peteĩ tekove oñemoambue añete hag̃ua, Jesucristo-pegua konversiõ oikeva’erã opa ñane ángape ha ojagarrapaiteva’erã ñande rekove. Péva rupi, oĩva’erã ñande rekove mbytetépe—ñane familia ha ñande rogapýpe.
Penemandu’áke, Konversiõ ha’eha Personal.
Che suherénsia paha ha’e, penemandu’a hag̃ua konversiõ ouva’erãha ñande ryepýgui. Ojehechaukaháicha parábola de las diez vírgenes-pe, ndaikatúi ñame’ẽ ambue tapichápe ñane konversiõ ñandy, jaipotaitéramo jepe. Elder David A. Bednar ombo’e haguéicha: “Ko ñandy porãite ojehupyty góta ha gótare … ñeha’arõkuaa ha jesarekokuaápe. Ndaipóri tape mbyky; ndaikatúi ojejapo útima hora-gua ñembosako’ípe”.4
Eju, Chesegui ojejoko upe añeteguáre. Akompara ánhel oipytyvõakuére Nefi-pe oikuaa hag̃ua Jesucristo-pe, he’ívo, “Ema’ẽ!”5 Upe ánhelcha, Eju, Chesegui ñane’invita ñama’ẽ hag̃ua escritura-kuérape ha umi proféta moderno ñe’ẽre, jajuhu hag̃ua Salvador-pe ha ñahendu hag̃ua Chupe. Nefi-cha, Espíritu rupive jajegiáta, ñamoñe’ẽ ha jajepy’amongeta aja Tupã ñe’ẽre. Eju, Chesegui ha’e jepopoha maymávape ñanepytyvõva jayta pypuku hag̃ua Cristo doctrina ykuéra oikovévape.
Tuvakuéra rresponsabilida péicha avei heta hedápe. Mitãnguéra oereda heta mba’e ituvakuéragui, ha katu testimónio ndaha’éi peteĩva. Ndaikatúi ñambohásante ñane testimónio ñane familiakuérape, ndaikatuiháicha ñamongakuaa peteĩ semílla. Ha katu ñame’ẽkuaa peteĩ entorno nutritivo, yvy iporãva reheve, ndorekóiva ñuatĩ “ombojahogáva pe ñe’ẽ.” Ikatu ñañeha’ã ñamoĩ tenda jere iporãva, umi ñane familia—ha ambue tapichakuéra jahayhúva, ojuhu hag̃ua pe semílla rendag̃ua, “[ohendu] hag̃ua pe ñe’ẽ, ha [oikũmby] hag̃ua umíva”6 ha tohecha ijeheguikuéra “iporãha pe semílla”. 7
Ojapóma heta ary, che ha che ra’y Jack rorekohague oportunida rohugávo Old Course, St. Andrés, Escocia kánchape, partido de golf oñepyrũ haguépe. Hechapyrãiteakue ningo! Aju rire, añeha’ã amombe’u ambuekuérape upe tembiasa tuichakue. Ha katu ndaikatúi. Umi foto, video, ha mombe’u porãite ajapóva nde’ipái. Ipahápe ahechakuaa, pe únika forma peteĩ tapicha oikuaa hag̃ua St. Andres tuichakue ha’e ijegui ohasarõmante—ohecha hag̃ua umi tape pyrusuete, orrespira hag̃ua arapytu, oñandu hag̃ua yvytu hováre, ha ojapi hag̃ua unos cuanto tiros rei, yvyku’iguigua kuára puku gotyo, ha umi tojo máta guasúre, ore rojapo porãite’akue.
Péicha avei Tupã ñe’ẽ ndive. Ikatu ñambo’e umíva, japredika umívare, ñamohesakã umíva. Ikatu ñañe’ẽ umívare, ikatu ñamohesakã umíva, ikatu jepe jatestifika umívare. Ha katu pe tapicha noñandúi aja Tupã ñe’ẽ marangatu oñehẽvo hi’ángare, ysapy yvágagui guáicha, Espíritu Santo pu’aka rupive,8 ha’éta oñema’ẽrõ guáicha peteĩ postal térã ambue tapicha vakasiõmegua foto-kuéra rehe. Ñandete ñaimeva’erã upépe. Konversiõ ha’e peteĩ viáhe personal—peteĩ ñembyaty rehegua viáhe.
Opavave ombo’éva ogapy ha tupaópe, ikatu oikuave’ẽ ambuekuérape oportunida oreko hag̃ua iñe’experiencia espiritual tee. Ko’ã experiencia rupive, ha’ekuéra ikatúta “oikuaa añetegua opa mba’e rehegua” ijeheguikuéra.9 Presidente Nelson ombo’eakue, “Rerekóramo ñeporandu añetete evanhélio térã Tupao rehegua, reiporavóramo reheja Tupã taipu’akapa, reñeisãmbyhýta rejuhu ha reikũmby hag̃ua umi añetegua absoluto ha eterno, omboguatátava nde rekove ha nepytyvõta reime hag̃ua ñemova’ỹme konvénio rapépe”.10
Tuicha Oñemehora Tekombo’e
Ajerure líder ha mbo’eharakuérape, opa Tupao organización-gua, peñomongeta hag̃ua konséhope, tuvakuéra ha huventu ndive, tuicha oñemehorave hag̃ua ñehekombo’e opa nivel-pe—estaca, barrio, ha ogapykuérape. Kóva ojehupyty oñehekombo’évo pe doctrina, ha oñe’invitávo pe Espíritu, ha ojejapo ñomongeta henyhẽva Espíritugui, umi añetegua Espíritu Santo ñane rekombo’eakuére, ára py’aguapyete jave, ñande estudio personal-pe.
Che angirũnguéra pohayhuetéva Cristo-pe, rresponsabilida jasegui hag̃ua Mbo’ehára ehémplo ha Ha’éicha ñambo’e hag̃ua, opyta mayma ñandekuéra ári. Hape ha’e tape añetegua! Chupe jaseguírõ, “ha’e ojehechauka vove, ñande ha’e hag̃ua ha’éicha; jahechátagui chupe ha’eháicha; jaguereko hag̃ua ko ñeha’arõ; ñanemopotĩ hag̃ua jepeve ha’e ipotĩháicha”.11 Pe Oikojeyakue rérape, Mbo’eharakuéra Mbo’ehára, Jesucristo, amén.