Penemandu’áke tape pehojey hag̃ua Ógape
Ñande jareko Jesucristo ehémplo porãmba jasegi hag̃ua, ha jahakuaa ñande róga eterno gotyo umi Iñehekombo’e, Hekove ha Isakrificio expiatório rupive añónte.
Ary 1946-pe, investigador imitãva, Arthur Hasler oguatávo peteĩ montaña ysyry rembe’ýre, hóga imitãrõ guare ypýpe, orekoakue peteĩ tembiasakue oguerúva jejuhu imba’eguasúva, mba’éicha pirakuéra ojuhu tape oho jey hag̃ua ysyry heñói haguépe.
Ojupívo peteĩ ñontáña, ndaha’éi gueteri pe ychororo imitãmegua ohayhuvévape, Hasler oimo’ã’ỹre ojererahajey peteĩ memória hesaimava’ekuépe. Ha’e he’i, “Peteĩ yvytu piro’i oguerúva musgo ha aguileñakuéra ryakuã oñuáva pe ita guejy, ñeha’arõ’ỹme oupaite che akãme ko ychororo ha pe henda yvyty rováre”.1
Ko’ã tyakuã ombopyahujey mandu’a imitãmegua ha oromandu’a chupe hógare.
Umi tyakuã ikatúramo ogueru chupe umi mandu’a, ha’e opensa umi tyakuã ikatuha avei péicha ojapo salmon-kuérare, heta ary yguasúpe oĩ rire, ohojeýva ysyry heñói haguépe omoĩ hag̃ua hupi’a.
Ko tembiasakue rupi, Hasler, ambue investigador-kuéra ndive, ohechaukákuri umi salmón imandu’aha avei pe tyakuãre, oipytyvõtava chupekuéra oyta hag̃ua miles de kilómetro, ojuhu hag̃ua tape, yguasu guive, ohojey hag̃ua hógape.
Ko ñemombe’u chemopensa, peteĩ mba’e imba’eguasuvéva ikatúva jajapo ko tekovépe ha’eha, jahechakuaa ha ñanemandu’a pe tape jahajey hag̃ua rehe ñande Ru Yvagaguápe, ha jeroviarekópe ha vy’ápe japersevera pe je’ói pukukue aja.
Apensákuri irundy momandu’ére, jaiporu ha ñamoĩ meméramo ñande rekovépe, ikatu ombopyahujey umi temiandu ñande róga yvagapegua.
Primero, Ikatu ñanemandu’a ñande ha’eha Tupã Ra’ykuéra
Ñande jareko erénsia marangatu. Jaikuaávo ñande ha’eha Tupã ra’ykuéra ha Ha’e oipotaha jahajey Hendápe ha’e peteĩva umi paso peteĩha ñande je’óipe jahajeývo ñande róga yvagaguápe.
Peñemomandu’áke ko erénsiare. Py’ỹi pemboyke ára pemombarete hag̃ua pende sistema inmunológico espiritual, penemandu’ávo umi jehovasa pehupytyakuére Ñandejáragui. Pejerovia guía Chugui pehupytyakuére, peho rãngue múndope añónte pemedi hag̃ua pende valor personal ha pejuhu hag̃ua pende rape.
Ndaha’aréi avisita hague peteĩ che ahayhúva, ha’e oĩ rire hospital-pe. Vy’ápe he’i chéve, pe oñeno aja hospital rupápe, opa mba’e ha’e oipotáva ha’ehague tojepuraheimi chupe himno “Soy un Hijo de Dios”. Upe pensamiento ijehegui añónte, ha’e he’i, ome’ẽhague chupe py’aguapy oikotevẽva upe ára ohasa’asy jave.
Jaikuaa mávapa ñande omoambue pe ñañandúva ha pe jajapóva.
Peikũmbúrõ mávapa peẽ añetehápe, penembosako’i porãvéta peikuaa ha penemandu’a hag̃ua pende rape pehojey hag̃ua pende róga yvagaguápe ha peimese hag̃ua upépe.
Segundo, Ikatu Ñanemandu’a Pyenda Ñanemo’ãvare
Ñeñemombarete ñaiméramo tekojojápe, añetépe ha jeroviarekópe ñande Ru Yvagagua ha Jesucristo-pe, jepeve ambuekuéra ndoikuaaséi mba’evete umi tembiapoukapy ha principio de salvación-gui.2
Mormón Kuatiañe’ẽme, Helamán ohekombo’e ta’yrakuérape imandu’a hag̃ua omopu’ã ipyendakuéra Jesucristo-pe, ohupyty hag̃ua mbarete, ogueropu’aka hag̃ua umi aña tentasiõ. Satana yvytu mbarete ha aravai ñanembokacha hína, ha katu umíva ndorekomo’ãi pu’aka ñande guerotyry hag̃ua, ñamoĩramo ñande jeroviapy tenda isegurovehápe—ñane Rredentorpe.3
Che aikuaa che rembiasakue tee rupi, jaiporavóramo ñahendu Iñe’ẽpu ha jasegui Chupe, jahupytýta Ipytyvõ. Jarekóta tuichave perspectiva umi ñane circunstancia-gui, ha ñaikũmby pypukuvéta pe tekove propósito. Ñañandúta umi impresiõ espiritual ñande guiátava ñande róga yvagaguápe.
Tercero, Ikatu Ñanemandu’a Ñembo’épe ñaime hag̃ua
Javivi époka, peteĩ toque térã comando de voz-pe, ikatuha jaheka umi mbohovái haimete omeraẽ tema rehegua, hetaiterei dato oñeñongatúvape ha oñemohendáva peteĩ computadora red pyrusu ha hasyetévape.
Ambue hendápe katu, jareko invitasiõ hasy’ỹetéva ñañepyrũ hag̃ua jaheka umi mbohovái yvágagui. “Akóinte eñembo’e, ha Che añohẽta nde ári che Espíritu”. Upérõ Ñandejára opromete, “Ha tuicháta nde jehovasa—héẽ, tuichavéta rehupytyramoguáicha umi mba’ereta yvy arigua”.4
Tupã oikuaapaite opa ñandeheguigua, ha oĩ listo ohendu hag̃ua umi ñane ñembo’e. Ñanemandu’árõ ñañembo’e hag̃ua, jajuhu Imborayhu ñanemombaretéva, ha hetave ñañembo’érõ ñande Ru Yvagaguápe, Cristo rérape, jagueruve Salvador-pe ñande rekovépe, ha jahechakuaa porãve tape Ha’e omarkava’ekue ñande róga yvagagua agotyo.
Cuarto, Ikatu Ñanemandu’a Ambuekuérape Jaservi hag̃ua.
Ñañeha’ãvo jasegui Jesucristo-pe, jaservívo ha jehechaukávo mba’eporã ambuekuérape, jajapo múndogui tenda porãve.
Ñane rembiapo tuicha ohovasakuaa umi ñande jereregua rekove, ha ñande rekove avei. Servicio mborayhupegua omomba’eguasuve pe ome’ẽva ha pe ohupytýva rekove.
Aníke pejapo’i katupyry perekóva pejapo porã hag̃ua mba’eporã ambuekuérare, taha’e penerembiapo servicio térã pene ehémplo servicio rupive.
Servicio amoroso ambuekuérape ñande rehara tape ñande róga yvagagua gotyo—pe tape ha’e hag̃ua ñande Salvador-cha.
Ary 1995-pe, guerra civil káusa, Arnaldo ha Eugenia Teles Grilo, ha ifamiliakuéra, ohejava’ekue hóga ha opa mba’e ha’ekuéra omopu’ãva’ekue dékada hembiapo mbarete rupive. Oujeývo hetã heñoihague Portugal-pe, hermano ha hermana Teles Grilo ohasa mba’e hasýva oñepyrũ pyahujey hag̃ua. Ha katu heta ary upe rire, ojuaju rire Jesucristo Tupao Santokuéra Ára Pahapeguáre, ha’ekuéra he’iakue, “Rohundi opa mba’e rorekoakue, ha katu ha’ékuri peteĩ mba’e porã, oremyañágui rohecha hag̃ua imba’eguasuha umi jehovasa eterno”.5
Ha’ekuéra ohundúkuri hóga terrenal, ha katu ojuhu pe tape ohojey hag̃ua hóga yvagaguápe.
Taha’e ha’e umi pehejava’erã tapykue pesegi hag̃ua tape pende róga yvagagu agotyo, peteĩ ára ndojoguamo’ãi peẽme sacrificio hague.
Ñande jareko Jesucristo ehémplo porãmba jasegui hag̃ua, ha je’ói ñande róga eterno gotyo ikatu oiko, umi Iñehekombo’e, pe Hekove, ha pe Isakrificio expiatório rupive añoite—oĩvape Iñemano ha Ijeikovejey glorióso.
Po’invita peñandu hag̃ua vy’apavẽ ha’éva ñanemandu’a hag̃ua ñande ha’eha Tupã ra’ykuéra, ha Ha’e, múndo ohayhuetégui, ombouakue Ita’ýra6 ohechauka hag̃ua ñandéve pe tape. Po’invita tapenemandu’a pendejeroviareko hag̃ua, pembojere hag̃ua pende rekove Salvador gotyo, ha pemopu’ã hag̃ua pene pyenda Hese. Penemandu’áke peñembo’e meme hag̃ua peje’ói aja, ha peservi ambuekuérape tapére.
Hermano ha hermana-kuéra ojehayhuetéva, ko Domingo de Pascua, che ame’ẽ testimónio Jesucristo ha’eha pe múndo Redentor ha Salvador. Ha’e pe ikatúva ñandereraha peteĩ tekove henyhẽva vy’águi mesápe, ha ñande guiá ñande je’óipe. Tañanemandu’a ha tajasegui Chupe ógape. Jesucristo rérape, Amén.