Tupã ñande apytépe.
Tupã oĩ ñande apytépe—ha ha’ete voi omba’apo ñande rekovépe ha ogia kyre’ỹ Ita’yrakuérape.
Opa ára pukukue aja Tupã oñe’ẽva’ekue Hembiguaikuéra, umi proféta, rupive.1 Ko pyharevépe, jarekókuri privilegio ñahendúvo Tupã proféta oñe’ẽvo opa yvórape. Ore rohayhu presidente Nelson, ha amokyre’ỹ opavavépe opa hendápe o’estudia ha ojesareko hag̃ua ne ñe’ẽnguérare.
Akumli mboyve 12 áño, ore familia okañyva’erã ore rógagui mokõi jey ha roñepyrũ jeyva’erãkuri sarambi, kyhyje ha jeikuaa’ỹ pa’ũme, ñorairõguasu ha polítika ñemombyte rupive. Chéve g̃uarã peteĩ py’arasy épokakuri, ha katu oiméne ningo che tuvakuéra okyhyjetéraka’e.
Che sy ha che ru okomparti orendie, irundy ita’yrakuéra, michĩmi upe kárgagui. Oguerohasa hikuái pe py’apy ha jehasa’asy ikatu porãveháicha. Oiméne ningo pe kyhyje ojopy’asy chupekuéra, ho’úvo umi hi’aravo ha omboguévo iñeha’arõkuaa.
Upe ñembyasyete époka Segunda Guerra Mundial rire oheja ipypore múndope. Oheja ipypore cherehe.
Upéramo, che’añoite jave, py’ỹi añeporandu jepi: “Oĩ gueteri piko ñeha’arõkuaa ko yvórape?”
Angel-kuéra ñande apytépe
Ajepy’amongeta aja ko ñeporandúre, apensa umi ñande misionero mitãrusu Estados Unidos-guáre oservíva’ekue ore apytépe umi áñope. Oheja hikuái hogakuéra ñemo’ã, mombyrýva yvóra mbytéicha, ha oho Alemania-pe, umi ihayhu’ỹhára ramoitegua retãme, oikuave’ẽ hag̃ua ñeha’arõ divíno ore tavayguakuérape. Ndoúi hikuái oporokulpa, oporoja’o ni oporomotĩ hag̃ua. Ome’ẽ hikuái ijeheguireínte hekove mbykymi opensa’ỹre yvy arigua jehepyme’ẽ rehe, oipytyvõsévonte ambue tapichápe ohupyty hag̃ua tory ha py’aguapy ha’ekuéra oñanduva’ekue.
Chéve g̃uarã, ko’ã mitãkuimba’e ha mitãkuña iperfecto. Oiméneningo oreko hikuái idefecto, ha katu chéve g̃uarã nahániri. Akóinte chéve g̃uarãta yvyporakuéra tuichaitereíva; anhelkuéra ohesape ha ojajáiva, poriahuvereko, py’aporã ha añetegua ministro.
Yvóra ojahoga aja cinismo, py’aro, jehayhu’ỹ ha kyyjépe, ko’ã mitãkaria’y ñehekombo’e ha rembiesarã chemyanyhẽ ñeha’arõkuaágui. Pe Evanhélio mensáhe oikuave’ẽva chéve hikuái ohasa polítika, historia, py’aro, ñembopochy ha umi yvypóra potapy ári. Ome’ẽ ñembohovái umi porandu imba’eguasúvape roguerekóva umi ára hasyete aja.
Upe mensáhe ha’ékuri Tupã oikoveha ha ojepy’apyha ñanderehe, jepe umi py’ajopy, apañuãi ha sarambi árape. Ha’e añetehápe ojehechaukahague ñande árape omoĩ jey hag̃ua añetegua ha tesape— Iñevanhélio ha Itupao. Ha’e oñe’ẽ jeyha profetakuérape; Tupã oĩha ñande apytépe— ha ha’ete voi omba’apo ñande rekovépe ha ogia kyre’ỹ Ita’yrakuérape.
Hechapyrãite umi mba’e ña’aprendekuaáva ñamañaporãvérõ pe ñande Ru Yvagagua plan salvasiõ ha exaltasiõ rehegua, pe vy’a rehegua plan, Ita’yrakuérape g̃uarã. Ñañandúvo ndajavaleiha, ñañemboykéva ha hesaraipyréva, ña’aprende ikatuha ñaime segúro Tupã ndahesaraihague ñandehegui—añetehápe, Ha’e oikuave’ẽ opa Ita’yrakuérape peteĩ mba’e oñeimo’ã’ỹva: toiko ñandehegui “Tupã heredero ha coheredero Cristo-ndi.”2
Mba’e he’ise upéva?
Jaikovetaha tapiaite g̃uarã, jahupytýtaha peteĩ vy’apavẽ paha,3ha jaguerekotaha potencial “jahupytývo trono, rréino, principado ha potestade-kúera.”4
Ñanemomirĩ jaikuaávo upe tekove tenonderã hechapyrãitéva ha imba’eguasúva ikatuha jahupyty, ndaha’éi mávarepa ñande, ha katu máva haguére Tupã.
Jaikuaávo kóva, mba’éichapa ikatu jakaguai térã ñandepy’aro? Mba’éicha piko ñamaña yvy gotyo upe Rey de reyes ñane’invita vove peteĩ tekove tenonderã ñaimo’ã’ỹvape henyhẽva vy’apavẽ divínogui?5
Pe salvasiõ ñande apytépe
Tupã mborayhu perfecto orekóva ñanderehe rupi ha Jesucristo jehasa’asy ijapyra’ỹva rupi, ñane angaipakuéra, umi tuicha ha michĨva, oñemboguekuaa ha noñemandu’avéima.6 Ikatu ñañembo’y Henondépe potĩ, tekojoja ha marangatu reheve.
Che korasõ henyhẽ aguyjégui che Ru Yvagagua rehe. Ahechakuaa Ha’e nokondenaiha Ita’yrakuérape ohasa haĝua jehasa’asýre ko tekove aja oreko’ỹre ñeha’arõkuaa peteĩ tekove renonderã hechapyrã ha ijapyra’ỹvare. Ha’e ome’ẽ momarandu ohechaukáva pe tape ñandegueraháva Hendápe. Ha opa mba’e mbytépe oĩ Ita’ýra Ohayhuetéva, Jesucristo,7ha pe Isakrifísio ñanderehe.
Pe Salvador expiasiõ opave’ỹva omoambuepaite mba’éicha jahechakuaa umi ñande rekovai ha ñane kangy. Japytarãngue ipype ha ñañandu ndaikatuiha jajesalva térã ñeha’arõkuaa’ỹme, ñañemoarandukuaa chuguikuéra ha ñañandu ñeha’arõkuaáme.8 Pe arrepentimiento don oporomopotĩva oheja ñambotapykue ñane angaipa ha ñapu’ã tekove pyahúicha.9
Jesucristo rupi, umi ñande jejavy nañandefiníri. Umíva ikatu ñanerrefina.
Peteĩ músico oha’ãháicha umi eskála, ñande jahechakuaa umi ñande jejavy, tekovai ha angaipakuéra oportunidáramo jajekuaa porãve hag̃ua ñandejupe, jahayhu añete ha pypukuve hag̃ua ñande rapichakuérape ha ñañerrefinave hag̃ua arrepentimiento rupi.
Ñañearrepentirõ, umi jejavy nañandeskalifikái. Umíva ha’e ñande ñemongakuaa pehẽ.
Opavave ñanemitã gueteri ñañembojojárõ umi tekove jajái ha tuichaite rehe ikatúva oiko ñandehegui. Avave yvypóra ndohasái ñepoñýgui jeguata ha ñeñaníme ñepysanga, ñembota ha ñehunga meme’ỹre. Upéicha ñañemoarandu.
Ñañembokatupyrývo jahávo, ñañeha’ã memévo ñakumpli hag̃ua Tupã rembiapoukapykuéra ha ñamoĩvo ñane ñeha’ã ñañearrepenti, jagueropu’aka ha ja’aplika hag̃ua umi ña’aprendeva’ekue, línea por línea, ñamono’õta tesape ñane ángape.10 Ha jepe ndajahechakuaapái ko’ág̃a ñane potencial, “jaikuaa, [pe Salvador] ojehechaukávo”, jahecháta Hova ñandejehe ha jahecháta chupe ha’ehaichaite.”11
Mba’e promesa igloriosoitévapa!
Heẽ, yvóra ipy’atarovahína. Ha, heẽ ñanekangy. Ha katu natekotevẽi ñañakãity py’aropúpe, ikatúgui jajerovia Tupãre, jajeroviakuaa Ita’ýra Jesucristo-re ha ñamog̃uahẽkuaa pe Espíritu don ñandegia hag̃ua ko tapére ñandegueraháva tekove henyhẽvape vy’apavẽ ha tetia’e divínogui.12
Jesús ñande apytépe
Py’ỹi añeporandu: Mba’e ombo’éne ha ojapóne Jesús oĩrõ ñande apytépe ko árape?.
Oikove jey rire, Jesucristo okumpli Ipromesa ovisitataha “ambue Ijovechakuérape.”13
Mormón Kuatiañe’ẽ: Ambue Jesucristo Testamento oñe’ẽ upe ijehechauka rehe umi tavayguakuéra Amerikaguápe. Jaguereko ko jehaipyre imba’eguasuetéva pe Salvador rembiapo testimonio ramo.
Mormón Kuatiañe’ẽmegua tavayguakuéra oiko ambue yvóra ládope—ijehasapyre, heko ha polítika iñambueterei pe Jesús omobo’eva’kuégui Iministerio terrenal aja. Upevére, Ha’e ombo’e avei heta mba’e ombo’eva’ekue pe Tierra Santa-pe.
Ha mba’ére ojapóne upéva?
Pe Salvador okoiete ombo’e umi añetegua ijapyra’ỹva. Ohoporãva yvypóra oimeraẽ eda ha circunstancia-vape g̃uarã.
Imensáhe ha’ékuri mensáhe ñeha’arõkuaa ha pertenencia rehegua; peteĩ testimonio ñande Ru Yvagagua ndohejareíriha Ita’yrakuérape.
Tupã oĩha ñande apytépe!
Ojapo 200 ary pe Salvador ou jey ko yvýpe. Tupã pe Túva ndive, Ha’e ojehechauka José Smith-pe, oguerekóvo 14 áño. ha omarka pe evanhélio ha Jesucristro Tupao rrestaurasiõ ñepyrũ. Upe ára guive, yvága ojepe’a ha umi mensahéro yvagagua oguejy umi tenda jajai opave’ỹvagui. Pe tesape ha jeikuaa heñói umi trono yvagaguágui.
Ñandejára Jesucristo oñe’ẽ peteĩ jeyve yvórape.
Ha mba’e he’i?
Ha’e peteĩ jehovasa ñandéve g̃uarã heta umi Iñe’ẽ oĩha Doctrina ha Konveniokuérape, ikatu hag̃uáicha opa yvypóra omoñe’ẽ ha o’estudia ojaposérõ. Hechapyrãite ko’ã ñe’ẽ ko’ã árape ñandéve g̃uarã.
Ha nañanesorprendeiva’erã jahecha Salvador ombo’e jeýramo Iñevanhélio mensáhe mbytete: “Rehayhúta Ñandejára nde Tupãme opa ne korasõ, opa ne ánga, opa ne ménte ha opa ne mbarete reheve; ha Jesucristo rérape reservíta chupe.”14 Ñanemokyre’ỹ jaheka hag̃ua Tupãme15ha javivi umi hekombo’e he’iháicha Ha’e orrevela haguéicha hembiguaikuéra, umi profétape.16
Ñanembo’e jajohayhuva’erãha ojupe17ha “tañanerenyhẽ karidágui yvyporakuérandie g̃uarã”18
Ñaneinvita ha’e hag̃ua Ipo, jajapo hag̃ua iporãva19 “Ani japorohayhu ñe’ẽme … ha katu tembiapópe ha añetehápe”20
Ha’e ñandedesafia jajesareko hag̃ua Hembiapoukapy guasúre: Jahayhu, ñakomparti, ñainvita opavavépe Iñevangélio ha Itupaópe.21
Ha’e omanda ñandéve ñamopu’ã hag̃ua témplo marangatu ha jaservi ipypekuéra.22
Ñanembo’e oiko hag̃ua ñandehegui Idiscipulo—ñane korasõ noñorairõiva’erãha poder personal, riqueza, aprobación térã posición rehe. Ñanembo’e “[ja]hejáta umi mbaʼe ko mundogua ha rehekáta peteĩ iporãvéva.”23
Ñanemyaña jaheka hag̃ua vy’apavẽ, arandu, py’aguapy, añetegua, tory ha ñemano’ỹ 24ha tekove opave’ỹva promesa.25
Jagueraha kóva peteĩ páso tenondeve. Peimo’ãmi Jesús ouha ko ára pende barrio, pende rráma téra pende rógape. Mba’éichatapa?
Ha’e ohecháta pende korasõite. Ha umi ojehecháva oka gotyo noimportamo’ãvéima. Ha’e pendekuaáta ha’ehaichaite. Ha’e oikuaáta umi pene korasõ oipotáva.
Umi imanso ha imirĩvape Ha’e omopu’ãne.
Umi hasývape Ha’e omongueráne.
Umi odudávape Ha’e ome’ẽne jerovia ha py’aguasu oguerovia hag̃ua.
Ñanembo’éne jaipe’a hag̃ua ñane korasõ Tupãme ha jaipyso ñande po ambuekuérape.
Ha’e ohechakuaa ha omomba’eguasúne pe teko potĩ, ñemoirĩ, integrida, jeroviareko ha karida.
Peteĩ ñema’ẽ Hesápe ha araka’eve ñande ndaha’emo’ãvéima pe ha’eva’ekue. Ñañemoambuéta akoiete g̃uarã. Ñañemoambue jaikuaa pypukúre añetehápe Tupã oĩha ñande apytépe.
Mba’épa jajapóne?26
Amaña tapykue gotyo upe mitãkaria’y ha’eva’ekuére akakuaa aja. Ikatúrõ aha jey ára tapykue gotyo, amoangapyhýne ha ha’e chupe topyta pe tape jojápe ha tosegi ohekávo. Ha ajeruréne chupe toinvita Jesucristo-pe hekovépe, Tupã oĩgui ñande apytépe!
Peẽme, che hermano ha hermana-kuéra ha angirũnguéra pohayhuetéva, ha opavave pehekáva ñembohovái, añetegua ha vy’apavẽ, aikuave’ẽ peẽme upe ñemomarandu: Pehekánte hína gueteri jerovia ha ñeha’arõkuaa reheve.27
Pejerure, ha pehupytýta. Pehenói, ha ojepeʼáta peẽme.28 Pejerovia Ñandejárare.29
Ñande rekove ára ha árape ñane rembiapo tuichavéva ha oportunida ojehovasáva ha’e jajuhu Tupãme.
Ñamboykérõ pe orgullo ha ñañemoag̃ui Itrónore korasõ mirĩ ha espíritu ñembyasýre30Ha’e oñemoag̃uita ñanderehe.31
Ñañeha’ãrõ jasegi Jesucristo-pe ha jaguata pe discipulado rapére, línea por línea, og̃uahẽta ára ñañandútahápe upe don oñeimo’ã’ỹva jahupytývo pe vy’apavẽ paha.
Che angirũnguéra, pende Ru Yvagagua penderayhu peteĩ mborayhu perfecto reheve. Ha’e ohechaukákuri Imborayhu opáicha, ha katu opa mba’e ári ome’ẽvo Ita’ýra Unihénito sacrificio ha don ramo Ita’yrakuérape ikatu hag̃uáicha añetehápe ha’ekuéra oho jey ñande Tuvakuéra Yvagagua rendápe.
Ame’ẽ che testimonio ñande Ru Yvagagua oikoveha, Jesucristo oisambyhyha Itupao, presidente Russell M. Nelson Iprofetaha.
Aipyso peẽme che jehovasa ko Pascua de Resurrección époka rorýpe. Peipe’ávo pene korasõ ñande Salvador ha Redentor-pe, taha’e ha’éva pehasáva hína, jeipy’ara’ã, jehasa’asy térã jejavy; ikatu peikuaa Ha’e oikoveha, penderayhu ha Ha’e rupi, araka’eve napeneañói.
Tupã oĩ ñande apytépe.
Upévagui atestifika ha ame’ẽ testimonio Jesucristo réra sagrado-pe. Amén.