“Che Evanhélio principio-kuéra”
(Doctrina ha Konveniokuéra 42:12)
Peteĩ evanhélio principio ha’e peteĩ guía oñemopyendáva doctrina-pe ojeipuru joja haĝua pe albedrío moral.
Jesucristo Tupao Santokuéra Ára Pahapegua Conferencia General octubre 1849-pe oñehenói élder John Taylor, Cuórum de los Doce Apóstoles-guápe omoñepyrũ haĝua pe Jesucristo Evanhélio ñembo’e Francia retãme. Hembiapo apytépe oĩ ojapo pe tupaogua publicación periódica oficial peteĩha upe tetãme. 1851-pe el élder Taylor ombosako’i ha oguenohẽ peteĩ artículo ombohováivo umi porandu ojejapóva jepi chupe tupao rehe. ha opakuévo upe jehai ogueromandu’a ko jehasapyre:
“Ojapo heta ary, Navoo-pe, ahendu peteĩ karai, asamblea legistativa miembro-pe, oporandúvo José Smith-pe mba’éichapa ha’e oisambyhykuaa heta hentekuérape ha oguereko peteĩ órden iperféctova, he’ivévo avei Gobierno-pe hasyetereiha ojapo upéicha ambue tendápe. Karai Smith ombohovái isensilloitereiha. ‘¿Mba’éicha piko?’ Oporandu upe karia’y. ‘Oréve ĝuarã hasyeterei’. Upévape Karai Smith ombohovái jey: ‘Che ambo’e chupekuéra umi principio oĩporãva ha ha’ekuéra oñeisambyhy ijupe.’”1
Añembo’e Espíritu Santo tañanemoarandu ha ñanemopu’ã opavave ñandéve amohesakã aja pe tembiapo imba’eguasúva oguerekóva umi principio Jesucristo evanhélio rrestaurádope.
Principio-kuéra
Ñandejára orrevela proféta José Smith-pe “ko tupaogua élder, presbítero ha maestro-kuéra, ombo’éta umi che evanhélio principio, oĩva Bíblia ha Mormón Kuatiañe’ẽme, oguerekóva che evanhélio plenitu.”2 He’i avei Santokuéra Ára Pahapegua “oñemoaranduporãvéva’erã teoría, principio, doctrina, evanhélio ley, opa mba’e ha’éva Tupã rréino rehegua, oĩporãva [chupekuéra] toikuaa.”3
Ambue ñe’ẽme, peteĩ Evanhélio principio ha’e peteĩ teko oñemopyendáva doctrina-pe ojeiporu porã haĝua pe albedrío moral. Umi principio ou Evanhélio añeteguakuéra ipyrusuvéva ha ome’ẽ ñandéve dirección ha sambyhy jaha aja tenonde gotyo umi konvénio rapére.
Rembiecharã, umi mbohapy Articulos de Fe ñepyrũha ombo’e umi mba’eguasuvéva Jesucristo Evanhélio rrestaurádope: pe Trinidad naturaleza Artículo de fe peteĩha, Adán ha Eva je’a ogueruva’ekue, Articulo de fe mokõiha, ha umi jehovasa oúva Jesucristo expiasiõ rupi, Artículo de fe mbohapyha.4. Ha Artículo de Fe irundyha ojeikuaauka umi principio peteĩha – mba’éichapa oñemomba’apo Jesucristo-re jerovia ha pe arrepetimiento – ha umi sacerdocio ordenánsa peteĩha ojapóva Jesucristo expiasiõ tomba’apo porã ñande rekovépe.5
Pe Palabra de Sabiduría ha’e ambue tembiecharã peteĩ principio-gui ñemoarandu ramo. Pemañamíke umi Doctrina ha Konveniokuéra sección 89versículo ñepyrũha rehe:
“Oñeme’ẽva peteĩ pricipio orekóva promesa ramo, ojegueropu’akakuaáva pe ikangýva ha ikangyvéva santokuéra apytépegui, umi ha’éva térã oñehenoikuaáva santo-re.
“Péina ápe, añetehápe, péicha he’i peẽme Ñandejára: Umi mba’e ñaña ha rembipota vai oĩva ha oĩva’ekue yvyporakuéra heembiapo ñemíva korasõme ára pahápe, pomomarandu ha porohesape’a, ame’ẽvo peẽme ko Palabra de Sabiduría rrevelasiõ rupi.”6
Umi ñemoarandu inspirado oúva ko ñemoñepyrũ rire ome’ẽ guía ijapyra’ỹva ñeimeporã físico ha espiritual-rã ha otestifika umi jehovasa ojepytasóvagui ñande jeroviareko umi principio rehe.
Ñañemoarandu, ñantende ha javivívo Evanhélio principio-kuéra, ñande Jerovia pe Salvador-re oñemombarete, ñane Tupã rayhu oñembopypuku ha ñainvita hetaitereirasa jehovasa ha dones espirituales tou ñande rekovépe. Umi tekojoja principio avei ñanepytyvõ ñamaña haĝua amogotyove ñane rembipota personal-gui ha umi potapy ñandéve ĝuarãitévante, ome’ẽvo ñandéve pe ñemaña pukuve imba’eguasúva añetegua eterno gotyo ñambohovakévo umi jehasapy, ñera’ã, jeiporavo ha experiencia ko tekove terrenal rehegua.
Ko’áĝagua rembiecharã ñambo’ekuaaháicha umi principio ijojáva.
Pe proféta José Smith ñe’ẽnguéra umi principio joja rehe ikatu ha’e peteĩ umi hekombo’e apytégui oñemoherakuãvéva. Ko’ã árape jajuhu rembiecharã hechapyrãva umi ñemoarandu modelo inspirado-gui oúva Ñandejára rembiguaikuéra ojeautorisáva juru rupi.
Pe principio Jesareko’ỹ rehegua.
Peteĩ conferencia general 1998-pe, presidente Dallin H. Oaks oñe’ẽ tembiapo orekóva umi Sacerdocio Aarónico guerekoha Santa Cena ñembosako’i ha ñeme’ẽme. Upépe omombe’u pe principio jesareko’ỹ rehegua ha he’i peteĩ Sacerdocio Aarónico guerekoha araka’eve ndoipotaichéne oĩ iñemondéme ha hembiapópe mba’e ombojesareko’ỹtava peteĩ miembro-pe tupãitu ha ikonveniokuéra ñembopyahúgui. Presidente Oaks avei ombohesakutu umi principio ohóva órden, potĩngue, reverencia ha dignida rehe.
Presidente Oaks nome’ẽi umi hombres jóvenes-pe peteĩ lista puku umi mba’e ojapokuaáva ha ndojapokuaáivagui, ha katu omohesakã upe principio oñeha’arõvo ha’ekuéra, ituvakuéra ha imbo’eharakuéra ikatuha oiporu ha oiporuva’erãha ikritério ha inspirasiõ teete osegi haĝua upe ñemoarandu.
Ha’e he’i: “Nda’emo’ãi pesegiva’erãha umi regla detallada, umi circunstancia iñambuégui ñande Tupao mundial barrio ha rramakuérape peteĩ regla especifica ikatúva oñeikotevẽ peteĩ hendápe noĩporãi ambuépe ĝuarã. Uvei añe’ẽta peteĩ principio oñemopyedáva rehe doctrina-kuérape. Opavave ontendérõ ko principio ha ojapo he’iháicha, pokã oñeitekotevẽta umi regla. Oñeikotevẽro regla térã ñehekombo’e umi káso individual-pe, líderes locales ome’ẽkuaa umíva, oĩporãva umi doctrina ha principio ohoporãva hese.”7
Dia de Reposo principio peteĩ señal ramo.
Presidente Russell M. Nelson ñanembo’e Conferencia General Abril 2015-pe “[pe] dia de reposo” ha’e peteĩ delicia”8 Omyesakã mba’éichapa ha’e ohechakuaa personalmente peteĩ principio básico mba’éichapa ña’onrrava’erã pe día de Reposo:
¿Mba’éichapa ñasantifika pe día de reposo? Che mitãme astudía umi lista ambuéva ojapova’ekue mba’épa ikatu ha mba’épa ndaikatúi ojejapo pe día de reposo-pe. Ndaha’éi térã tenondeve a’aprendékuri umi Escritura’gui pe ajapóva ha pe che actitud pe día de reposo-pe ha’eha peteĩ señal che ha che Ru Yvagagua ndive. Upe kuaapy reheve, naikotevẽvéima peteĩ lista mba’épa ikatu térã ndaikatúi ojejapo pe día de reposo-pe. Ajapótaramo peteĩ decisión umi actividad ha’épa térã ndaha’éi apropiado día de reposo-pe ĝuarã, simplemente añeporandu che jupe: “‘¿Mba’e señal-pa ame’ẽse Tupãme?”‘. Upe porandu ojapo umi che opción día de reposo peĝuarã tahesakã porã”.9
Upe presidente Nelson sencillo ha katu magnífico porandu ojapo hincapié peteĩ principio oipe’ava oimeraẽ incertidumbre mba’épa he’ise pe dia de reposo rehegua ha mba’épa jajapova’erã ñasantifika haĝua. Iporandu orresumi peteĩ pauta ha peteĩ norma ñanderovasakuaáva opa ñane circunstancia-pe.
Pe principio jaheja haĝua Tupã taipu’akapa.
Ojapo sei mese, conferencia general-pe presidente Nelson omombe’u vy’a oñanduva’ekue ohechakuaávo peteĩ significado pyahu pe ñe’ẽ Israel-gui. He’i ñandéve hi’angare opoko oikuaávo pe Israel réraite he’ise peteĩ persona oĩva dispuesta ohejávo Tupã taipu’akapa hekovépe.”10 Presidente Nelson upéi omyesakã umi mba’eguasu oúva upe jeikuaágui.
Imensahe tañaime dispuesto jahejávo Tupã taipu’akapa ha’e peteĩ ehemplo hechapyrãva ñambo’évo principio ijojáva ikatuhaĝuaicha ñañeisãmbyhy ñandejupe; Ha ojapohaguéicha imensáhepe jajapo dia de reposo-gui peteĩ delicia rehegua, presidente Nelson ojapo porandu oñemopyendáva umi principio-pe oservíva guía ha norma ramo opavave ñandéve ĝuarã.
“¿Reimépa nde dispuesto rehejávo Tupã taipu’akapa nde rekovépe? ¿Reimépa nde dispuesto rehejávo Tupã taha’e influencia imba’eguasuvéva nde rekovépe?”
Ha’e okontinua:
“Ekonsiderami mba’éichapa upe disposición nderovasakuaa. Neremendairõ gueteri ha reheka hina peteĩ kompañero(a) eterno(a), ha’eserõ Israel-gua neipytyvõta reiporavo haĝua máva ndive ha mba’éichapa resẽta.
“Remendámaramo ha ne cónyuge ojapyhara ikonveniokuéra, reimerõ dispuesto(a) rehejávo Tupã ta’ipu’akapa nde rekovépe ohejáta ne konveniokuéra Tupã ndive topyta intacto. Pe Salvador omomgueráta ne korasõ rasy. Yvaga ojeipe’áta rehekávo mba’éichapa rehóta tenonde gotyo. Natekotevẽi reikorei ni reduda.
“Reguerekórõ porandu evanhélio térã tupao rehegua, reiporavorõ reheja Tupã taipu’akapa, rejeguiáta rejuhu ha reikũmbykuaa haĝua umi añetegua absouto ha etérnova oguiátava nde rekove ha nepytyvõta repyta haĝua ñemova’ỹme pe konveniokuéra rapére.
“Rembohovakévo jeipy’ara’ã, nekane’õitereívo jepe, térã reñeñandu ne’año térã nanentendéi hikuái, eñeimaginami py’aguasu ikatúva rembyaty rehejárõ Tupã taipu’akapa nde rekovépe ha rejerure’asy chupe tanemombarete.
“Ne rembipota tuichavéva ha’erõ reheja Tupã taipu’akapa, ha reformaserõ parte Israel-gui, hetaite ambue decisiõ hasy’ỹve. ¡hetaite problema ndaha’evéima problema! Reikuaaporãve mba’éicha reje’arregla porãveta; Reikuaa mba’e rema’ẽ ha remoñe’ẽta, moõpa rehasáta ne tiempo ha máva ndive rejoajúta; Reikuaa mba’épa rehupytyse; Reikuaa mba’eichagua personapa reipota oiko ndehegui.”11
Pehechakuaami mboy jeiporavo tuicha ha jehasa imba’eguasúva ikatu oñeinflui pe principio rehe “jaheja Tupã taipu’akapa”: ñasẽ jajegusta haĝua ha ñemenda, umi porandu ha duda evanhélio rehe, jeipy’ara’ã, ñemoapesỹi, mba’e ñamaña ha ñamoñe’ẽ, mo’õpa jahasa tiempo, mava ndie jajoaju ha hetaiteve mba’e. Umi Presidente Nelson porandu inspirado omoĩ énfasis peteĩ principio isensíllova ome’ẽva dirección peteĩ teĩ ñande rekove parte-pe ha ojapo ñañeisambyhykuaa ñandejupe.
Peteĩ timón michĩmi
José Smith oĩ aja Liberty ka’irãime, ohai kuatiajehai omomarandu haĝua tupaogua lideer ha miembro-kuérape, ha omomandu’a chupekuéra “peteĩ yga guasu oĩporã peteĩ yvytuvai mbytépe, peteĩ timón michĩmi reheve omoĩporãva chupe pe yvytu ha olakuéra ñembokachápe”12
Peteĩ “timón” oguereko peteĩ rrueda térã peteĩ barra ha pe equipo ohóva hese, ha oservi odirihi haĝua peteĩ yga térã embarcación. Ha “oñemoĩporã pe yvytu ha ola-kuéra ñembokachápe” ohechauka mba’éichapa oñeisambyhy pe yga peteĩ yvytu’atã aja opyta joja haĝua ojaparo’ỹre.
Pe Evanhélio principio-kuéra ha’e chéve ha peẽme ĝuarã pe timón ha’éva pe ygápe ĝuarã. Umi principio ijojáva ñanepytyvõ jajuhu haĝua pe tape ha japyta haĝua mbarete ha ñemova’ỹme ipype, ani haĝua javava ha ja’a umi ypytũ ha apañuãi aravai oĩva ko’ã ára pahápe.
Heta jajehovasa ko conferencia general-pe jaikuaavévo umi principio eterno-gui Ñandejára rembiguaikuéra oje’autorisáva rupive. Ko’áĝa, ñande responsabilida ha’e ñañeisambyhy ñandejupe umi añetegua rupive ha’ekuéra otestifikava’ekuégui.13
Testimónio
Presidente Ezra Taft Benson ombo’e: “Umi sei mese oúvape, pe revista Liahona oñegueronohẽhápe umi conferencia-gua mensahekúera oĩva’erã pende escriturakuéra ndive py’ỹi pemoñe’ẽ haĝua.”14
Opa che ánga mbarete reheve poinvita opavavépe peikuaa, pevivi ha pehayhu haĝua umi tekojoja principio-kuéra. Umi Evanhélio añetegua añónte ohejakuaa jajapo “tetia’épe opa mba’e jaikatúva” jaha haĝua tenonde gotyo konveniokuéra rapére ha “jahecha Tupã salvasiõ ha tojehechauka ijyva”15
Che aikuaa Jesucristo evahélio doctrina ha principio-kuéra ha’eha pe ykua imba’eguasuvéva ome’ẽva dirección ñande rekovépe ha vy’apavẽ oduráva ko tekove yvy ariguápe ha avei eternidápe. Ha ko Pascua domingo ojajáivape, vy’ápe atestifika ñande Salvador oikovéva ha’eha pe ykua osyrývagui ko’ã añetegua. Upévagui atestifika Ñandejára Jesucristo réra sagrado-pe. Amén.