Idu Tinsab Lesta Biex Tgħinna
Hekk kif nersqu lejn Ġesù Kristu bil-fidi, Hu dejjem ikun jinsab hemm.
Meta kont għadni tifel, bħala familja konna morna vaganza f’bajja mal-kosta ta’ art twelidi, iċ-Ċili. Kont ħerqan biex nqatta’ ftit jiem ingawdi s-sajf mal-familja tiegħi. Ħassejtni mill-aktar eċċitat li issa stajt ningħaqad ma’ ħuti u nagħmel dak li iż-żewg ħuti akbar minni normalment jagħmlu fuq l-ilma.
Jum fost l-oħrajn, ħuti marru jilagħbu fejn il-mewġ beda jħabbat, u ħassejtni kbir u matur biżżejjed biex immur warajhom. Hekk kif bdejt nersaq viċin tagħhom, indunajt li l-mewġ kien ferm akbar milli deher minn max-xatt. F’daqqa waħda ġiet fuqi mewġa għallgħarrieda. U ħassejt li jiena ġejt melgħub mil-qawwa tan-natura li ħatfu l-kontroll fuqi, u ġejt imkaxkar f’qiegħ il-baħar. Ma stajtx nara jew nagħmel sens ta’ xejn hekk kif kont qed niġi mitfugħ taħt il-mewġ tal-baħar. Hekk kif ħsibt li ħajti f’din id-dinja setgħet waslet fi tmiemha, ħassejt id tiġbidni lejn il-wiċċ. Fl-aħħar, stajt nara x-xemx u nieħu n-nifs.
Meta ħija Claudio nnota bl-isforzi tiegħi biex inġib ruħi ta’ adult, ġie għall-għajnuna tiegħi. Ma kontx ’il bogħod mix-xatt. Għalkemm l-ilma kien baxx u x-xatt kien viċin, kont wisq diżorjentat biex ninduna li stajt ngħin lili nnifsi. Claudio qalli li kelli noqgħod attent u jekk irrid, jista’ jgħallimni ngħum. Minkejja li blajt ħafna ilma, il-kburija u x-xewqa tiegħi li nuri li jien raġel kienu aktar b’saħħithom, u ħassejt li hekk ħa nagħmel.
Claudio qalli li għandi bżonn ngħum kontra l-mewġ. Għidt lili nnifsi li hija battalja mitlufa żgur kontra dak li deher bħal ħajt enormi ta’ ilma.
Hekk kif bdiet riesqa mewġa oħra lejja, Claudio qalli fil-pront, “Ħares lejja; li għandek tagħmel hu dan.” Claudio ġera lejn il-mewġa dieħla u qabeż għal rasu ġo fiha qabel ma laħqet ix-xatt. Tant kont impressjonat bl-għadsa tiegħu li lanqas biss rnexxieli ninduna bil-mewġa li jmiss. Għal darb’oħra, spiċċajt f’qieħ il-baħar mitfugħ f’qieħ il-baħar, nitqalleb ’lhawn u ’l hemm fil-baħar mill-forzi tan-natura. Wara ftit sekondi taħt l-ilma, id oħra ħatfitni minn idi, u erġajt ġejt miġbud lura ’l fuq lejn wiċċ l-ilma fejn stajt nieħu n-nifs. Il-fjamma ta’ kburiti tiegħi spiċċat infiet.
Din id-darba, ħija stedinni biex nogħdos miegħu. Bi tweġiba għall-istedina tiegħu, imxejt warajh, u għodosna flimkien. Ħassejtni bħallikieku qed negħleb l-aktar sfida kkumplikata. Bla dubju, ma kienet faċli xejn, imma rnexxieli, grazzi għall-għajnuna u l-eżempju li wera miegħi ħija. Jiena ġejt meħlus darbtejn permezz ta’ jdejh; l-eżempju tiegħu wrieni kif għandi niffaċċja u negħleb l-isfida tiegħi dakinhar.
Il-President Russell M. Nelson stedinna biex naraw li ħsibijietna jkunu ċelestjali, u nixtieq nieħu l-parir tiegħu u napplikah fl-istorja tas-sajf tiegħi.
Il-Qawwa tas-Salvatur fuq l-Avversarju
Jekk aħna naraw li ħsibijietna jkunu ċelestjali, nifhmu li fil-vjaġġ ta’ ħajjitna se niffaċċjaw ċerti sfidi li jidhru akbar mill-kapaċità tagħna li negħlbuhom. Tul il-ħajja mortali tagħna, aħna suġġett għall-attakki tal-avversarju. Bħall-mewġ li ħatafni f’dak il-jum sajfi, nistgħu nħossuna bla qawwa u rridu nċedu għal destin aktar b’saħħtu. Dak “il-mewġ malizzjuż” kellu l-qawwa li jixħetna minn naħa għall-oħra. Iżda tinsewx minn għandu s-setgħa fuq dak il-mewġ, u fil-fatt, fuq kull ħaġa oħra. Is-Salvatur tagħna, Ġesù Kristu. Hu għandu l-qawwa biex jeħlisna minn kull kundizzjoni miżerabbli jew sitwazzjoni mill-aktar diffiċli. Irrispettivament jekk inħossuna qrib tiegħu jew le, Hu xorta waħda jista’ jilħaqna, aħna fejn aħna, aħna kif aħna.
Hekk kif nilħquh bil-fidi, Hu dejjem ikun jinsab hemm, u skont l-orarju tiegħu, Hu se jkun dejjem lest biex jaqbadna minn idejna u jiġbidna ’l fuq għal post sigur.
Is-Salvatur u l-Eżempju tal-Ministeru Tiegħu
Jekk aħna naraw li ħsibijietna jkunu ċelestjali, nagħrfu lil Ġesù Kristu bħala eżempju perfett fil-ministeru. Hemm mudell għalina fl-Iskrittura meta Hu jew id-dixxipli tiegħu jilħqu lil xi ħadd li għandu bżonn l-għajnuna, is-salvataġġ, jew barka hekk kif jestendu idejhom. Fl-istorja tiegħi, jien kont naf li ħija kien hemm, iżda li kien hemm sempliċement ma kienx biżżejjed. Claudio kien jaf li kont fl-inkwiet, u ġie biex joħroġni mill-ilma.
Xi kultant aħna naħsbu li rridu nkunu hemm biss għal xi ħadd fil-bżonn, iżda l-verità hija li ħafna drabi ikun hemm aktar li nistgħu nagħmlu. Li jkollna perspettiva eterna tista’ tgħinna nirċievu r-rivelazzjoni biex noffru l-għajnuna tagħna lil oħrajn fil-mument tal-bżonn. Aħna nistgħu nafdaw fil-gwida u l-ispirazzjoni tal-Ispirtu s-Santu biex inkunu kapaċi nagħrfu x’tip ta’ għajnuna hija meħtieġa, kemm jekk ikun is-sapport temporali bħal faraġ emozzjonali, ikel, għajnuna fil-ħidma ta’ kuljum, jew il-gwida spiritwali biex ngħinu lil ħaddieħor fil-vjaġġ tagħhom biex jippreparaw, jagħmlu, u jonoraw patti sagri.
Is-Salvatur Lest li Jsalvana
Meta Pietru, l-Appostlu anzjan, “qabad jimxi fuq l-ilma u jersaq lejn Ġesù … baża’, ħabat jegħreq,” imbagħad “beda jgħajjat u jgħid: Salvani, Mulej.” Ġesù kien jaf il-fidi li eżerċita Pietru biex mar għandu fuq l-ilma. Kien ukoll konxju mill-biża’ ta’ Pietru. Skont ir-rakkont, Ġesù “Malajr Ġesù medd idu u qabdu,”filwaqt li qallu l-kliem li ġej: “Bniedem ta’ fidi żgħira, qallu, għaliex iddubitajt?” Kliemu ma kienx biex iċanfar lil Pietru iżda biex ifakkru li Hu, il-Messija, kien miegħu u mad-dixxipli l-oħra.
Jekk aħna naraw li ħsibijietna jkunu ċelestjali, nirċievu l-konferma f’qalbna li Ġesù Kristu huwa fil-fatt is-Salvatur tagħna, l-Avukat tagħna mal-Missier, u l-Feddej tagħna. Hekk kif aħna neżerċitaw il-fidi fih, Hu jsalvana mill-istat mitluf tagħna, lil hinn mill-isfidi, mid-dgħufija, u mill-bżonnijiet tagħna f’din il-ħajja temporali, u jagħtina l-akbar fost ir-rigali kollha, li hija l-ħajja eterna.
Is-Salvatur Ma Jaqtax Qalbu Minna
Dakinhar, ħija ma kienx qata’ qalbu fuqi, iżda baqaʼ jippersisti biex jien nitgħallem kif nagħmel l-istess. Hu kompla jippersisti għal darba, minkejja li kien hemm bżonn li jeħlisni darbtejn. Hu kompla jippersisti, anke meta ma fhimtx mill-ewwel. Hu kompla jippersisti, ħalli nkun nista’ negħleb dik l-isfida b’suċċess. Jekk aħna naraw li ħsibijietna jkunu ċelestjali, aħna nirrealizzaw li s-Salvatur tagħna jkun preżenti kull darba li nkunu neħtiġuh biex jipprovdilna l-għajnuna jekk irridu nitgħallmu, ninbidlu, negħlbu l-isfidi, inkampaw, u nirnexxu f’dak kollu li jġibilna l-ferħ dejjiem f’ħajjitna.
Idejn is-Salvatur
L-iskrittura iżżomm ħaj is-simbolu u sinifikat ta’ idejn is-Salvatur. Fis-sagrifiċċju espjatorju tiegħu, idejh ġew imtaqqbin bl-imsiemer biex jiġi msallab mas-salib. Wara l-Qawmien tiegħu mill-Imwiet, Huwa deher lid-dixxipli tiegħu f’ġisem perfett, iżda f’idejh il-marka ta’ l-imsiemer tibqa’ bħala tifkira tas-sagrifiċċju infinit tiegħu. Idu dejjem tkun hemm lesta għalina, anke jekk aħna għal l-ewwel ma nsitgħux narawha jew inħossuha, għax Hu ġie magħżul minn Missierna fis-Smewwiet, il-Feddej tal-bnedmin kollha.
Within Our Grasp, minn Jay Bryant Ward
Id Alla, ta’ Yongsung Kim
Jekk jiena nara li ħsibijiet tiegħi jkunu ċelestjali, inkun naf li f’din il-ħajja aħna m’aħniex weħidna. Filwaqt li jeħtieġ niffaċċjaw ċerti sfidi u provi, Missierna fis-Smewwiet jaf x’inhuma l-kapaċitajiet tagħna u jaf li aħna nistgħu negħlbu u nikkumbattu d-diffikultajiet tagħna. Jeħtieġ li nagħmlu l-parti tagħna u nduru lejh bil-fidi. Ibnu l-Maħbub, Ġesù Kristu, huwa dak li jsalvana u dejjem sa jkun hemm għalina. Fl-isem sagru ta’ Ġesù Kistu, ammen.