O Se Tusi ua i ai se Folafolaga
Ou te tatalo ina ia faaauau pea ona tatou faaaoga le Tusi a Mamona: O Se Tasi Molimau ia Iesu Keriso, e faasoa atu ai le savali o le talalelei i aiga ma uo.
Ou uso e ma tuafafine pele, o se avanoa paia lo tatou auai faatasi i le lagolagoina o Peresitene Thomas S. Monson, o ona fesoasoani i le Au Peresitene Sili, ma Aposetolo e Toasefululua o ni perofeta, tagatavaai, ma talifaaaliga. Ou te molimau atu o perofeta “e tautala atu e pei ona musuia ai i latou i le Agaga Paia.
“Soo se mea foi o le a latou tautala atu ai pe a musuia i latou i le Agaga Paia o le a faia ma tusitusiga paia, ma loto o le Alii, … ma le mana o le Atua i le faaolataga” (MFF 68:3–4).
I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua manuia i tatou ma faamanuiaina i tusitusiga paia ola e pei ona fofogaina mai e na perofeta ua lagolagoina, faapea foi mau paia o loo maua i le Tusi Paia, o le Tusi a Mamona, le Mataupu Faavae ma Feagaiga, ma le Penina Tau Tele. Sa tusia e le Perofeta o Nifae, “E fiafia lo’u agaga i tusi paia, ua mafaufau foi i ai lo’u loto ma ua ou tusi ai mo le aoaoina ma le aoga i a’u fanau” (2 Nifae 4:15). O mau tusitusia, aemaise lava i le Tusi a Mamona, tatou te talitonu ai i le Atua ma “ia faalelei ma ia i le togiola a Keriso, o lona Alo e Toatasi” (Iakopo 4:11).
I ni nai masina talu ai, sa ma maua ai ma se uo le avanoa e tuuina atu ai ni tusitusiga paia i se uo, e le o se tagata o le Ekalesia. I le iloa ai atonu o se mea lea o le a suia ai lona olaga—ma i maua foi—sa ma faaavanoa ai se taimi e lolomi ai lona igoa i tusi taitasi. Ina ua ma tuuina atu nei tusi paia ia te ia, sa mafai ona ma iloa atu ua matuai ootia lava lona loto i le tulaga ese ma le faamaoni o la ma meaalofa. Sa tele se taimi na ia autiloa taitasi ai tusi e aunoa ma se tala, ma oloolo lona lima i le faavaa ma susue ni nai itulau.
Ina ua ma iloaina le taua o le taimi, o lea sa ma fesoasoani atu ai ia te ia e susue le itulau faaulutala o le Tusi a Mamona ma amata faamalamalama atu ia te ia o le Tusi a Mamona o se tasi lea o tautinoga, po o molimau, ia Iesu Keriso. Ona fesili mai lea i se fesili e fia faalogo uma lava i ai tagata o le ekalesia e mafaufau faafaifeautalai: “Aisea tatou te manaomia ai nisi molimau ia Iesu Keriso e ese mai i le Tusi Paia?” Nai lo le tali vave atu i ai, sa ma fesili atu ia te ia pe aisea ua manatu ai e taua lenei mea. O lana tali na foliga mai e sili atu ona musuia nai lo lana fesili. Sa ia manatu ona talu ai e foliga mai ua matuai tele naua Tusi Paia eseese ma ana aoaoga, o lea ua tatou manaomia ai se ituaiga leo e faamanino ai, se mea o le a fesoasoani tatou te malamalama atili ai i le Tusi Paia. O lana faamatalaga na tatalaina ai le faitotoa mo i maua e faasoa atu ai o maua lagona ma molimau e faatatau i le Tusi Paia ma le Tusi a Mamona.
Na ma amata i le faamatala atu i ai o lo maua tuuto ma le talitonuga loloto maumaututu i aoaoga faavae ma aoaoga a le Tusi Paia, aemaise lava o le Feagaiga Fou. O le mafai ona faitau i le tele o afioga a le Faaola ao Ia aoao atu le talalelei i le taimi o Lana misiona i le fogaeleele ua faamalolosia ai i tatou, ua fesoasoani tatou te iloa ai o Ia, ma aoaoina ai i tatou e mafai ona tatou avea atili e faapei o Ia. Ona ma tautino atu lea i ai e faapei foi o le Tusi Paia, o le Tusi a Mamona o se mau faaopoopo lea e faamaonia ai e alofa le Atua i Ana fanau uma lava, ma ua saunia se ala mo i tatou e toe foi atu ai e toe mau faatasi ma ia. Sa ma faaaluina le isi itula pe a, e iloilo ai le tele o vaega o le Tusi a Mamona, e aofia ai lona talaaga ma le faapogai paia. Faataga mai au e faasoa atu ni nai mea sa matou talanoaina.
O Se Tusi ua i ai se Folafolaga
Sa muamua ona ma faamatala o le Tusi a Mamona o se tusi ua i ai se folafolaga. E ui lava o lona talaaga e talitonuina ia lava, ae o se tusi faatusi paia tulaga ese e ao ina mauaina ma faitauina i lalo o le uunaiga a le Agaga Paia. O i latou uma e suesue ma mafaufau loloto i ona aoaoga, ua tuuina atu i ai se folafolaga o loo maua i le mataupu mulimuli o le Moronae (tagai Moronae 10:3–4) faapea foi i le faatomuaga o le Tusi a Mamona, lea tatou te faitauina ai: “Matou te valaau atu i alii uma [ma tamaitai] i nuu uma e faitau le Tusi a Mamona, ia mafaufau loloto ai i o latou loto i le savali o loo i ai, ona ole atu lea i le Atua, le Tama Faavavau, i le suafa o Keriso pe moni le tusi. O i latou o e faia lenei mea ma ole atu i le faatuatua o le a mauaina se molimau o lona moni ma le paia e ala i le mana o le Agaga Paia.” Ona ma faaaluina lea o ni nai minute e aoao atu ai e uiga i le tatalo ma le ala e mafai ai ona tulei mai le Agaga Paia i o tatou loto ma faamautu ai e moni le Tusi a Mamona.
O Se Tusi ua i ai se Faamoemoega
Na sosoo ai ma lo ma ta’uina atu o le Tusi a Mamona o se tusi ua i ai se faamoemoega. Mai le itulau faaulutala ua tatou faitau ai o le Tusi a Mamona na “ua tusia ona o le poloaiga” ma “i le agaga o valoaga ma faaaliga” ina ia “oo mai i le mea foaifuaina a le Atua ma lona mana” ina ia faatalitonuina ai i tatou taitoatasi “o Iesu o le Keriso, o le Atua e Faavavau.” I se faamatalaga patino o lenei faamoemoega, na tusia ai e Nifae, o se tasi o tusitala o le Tusi a Mamona, “O lo’u manao atoatoa, ia ou faamanao mai tagata ia o mai i le Atua o Aperaamo, o le Atua foi o Isaako, o le Atua foi o Iakopo, ma ia faaolaina ai” (1 Nifae 6:4).
O Se Tusi o Loo Aoao Mai ai le Ala Sili o le Fiafia
E le gata i lea, sa ma faamatala atu foi i ai o le Tusi a Mamona o se tusi o loo aoao mai ai le “ala sili o le fiafia” (Alema 42:8; tagai foi i f. 5, 13, 31; 2 Nifae 9). I ni faaupuga maoae ae mafai ona malamalama ai, o loo aoao mai ai e le Tusi a Mamona le faamoemoega o le olaga, mai fea na tatou o mai ai, ma po o le a le mea e tupu pe a tatou oti. Ua tatou aoao ai e uiga i le faatuatua ia Iesu Keriso ma Lana taulaga togiola, o le salamo, o le taua o le papatisoga e ala i le faatofuina, ma le meaalofa ma le mana o le Agaga Paia. O le suesue ma le talisua i aoaoga faavae o le Tusi a Mamona, tatou te maua ai “se faamoemoe atoatoa lelei, ma se alofa atu i le Atua atoa ma tagata uma,” faatasi ai ma se naunautaiga e “tumau e oo i le iuga” ina ia tatou “maua ai le ola faavavau” (2 Nifae 31:20).
O Se Tusi o Loo Molimau Mai ai o Iesu o le Keriso
O le mea e aupito sili ona taua, sa ma tautino atu i ai o le Tusi a Mamona o se tusi o loo molimau mai ai o Iesu o le Keriso, o le Faaola o le lalolagi. O perofeta maoae i le Tusi a Mamona ua latou tuuina mai ni molimau paia o Iesu Keriso o le Foafoa o le lalolagi (tagai Mosaea 3:8), o le Togiola o tagata (tagai Helamana 5:9–12), o le Alo e Toatasi o le Tama (tagai 1 Nifae 11:18–21; Iakopo 4:11). Na silafia o Ia e nei perofeta o le Tusi a Mamona, e faapei foi o Aperaamo ma Mose, ma sa la mauaina ma aoao atu Lana talalelei faavavau. A tatou faitauina ma suesue i a latou upu, ona tatou maua lea o se malamalama loloto atu i le alofa le mafaatusalia o le Faaola, o Lona soifua atoatoa ma faaaoaoga, ma faamanuiaga o Lana taulaga sili togiola.
O Se Tusi e Faamaonia Aiai ai le Misiona Faaperofeta a Iosefa Samita
Ona ma molimau atu lea o le Tusi a Mamona o se faamaoniga faitino lea o Iosefa na filifilia e le aao o le Alii e toefuatai mai le Ekalesia i le fogaeleele i nei aso e gata ai. E pei ona ta’ua i le faatomuaga o le Tusi a Mamona. “O i latou e maua [se] molimau paia mai le Agaga Paia [i le paia o le Tusi a Mamona] o le a latou iloaina foi i lena lava mana e tasi, o Iesu Keriso o le Faaola o le lalolagi, o Iosefa Samita o lana talifaaaliga ma le perofeta o nei aso amuli, ma O Le Ekalesia a Iesu Keriso o le Au Paia o Aso e Gata Ai o le malo lea o le Alii ua toe faatuina i le fogaeleele.”
Talu mai le taimi na alu ai Samuelu Samita e talai le talalelei ma ni nai kopi o le uluai lomiga, ua faitau miliona olaga i le lalolagi atoa ua faamanuiaina i le Tusi a Mamona. Ou te tatalo ina ia faaauau pea ona tatou faaaoga le Tusi a Mamona: O Se Tasi Molimau ia Iesu Keriso, e faasoa atu ai le savali o le talalelei i aiga ma uo. Afai tatou te faia lenei mea, e pei ona faia e la ma uo pele, e toatele o le a tali mai ma le naunautai e fia iloa atili e uiga i le soifuaga ma le misiona a le Faaola ma Lana ala sili o le fiafia mo i tatou taitoatasi.
Ou te tuuina atu la’u molimau maua’i e moni le Tusi a Mamona. O se tusi ua aumaia ai le suiga tele i lo’u olaga. Ou te iloa o loo soifua le Atua. O Iesu o le Keriso. Ua toefuatai mai Lana talalelei i le fogaeleele. O Peresitene Thomas S. Monson o Lana perofeta ma le fofoga taumomoli i le taimi nei. O le Agaga ou te lagonaina pe a ou faitauina i aso taitasi, manatunatu loloto, ma tatalo e uiga i le Tusi a Mamona, ua faamalosia ai lo’u malamalama ma le molimau i nei mea, ma ua faamautinoa mai ai ia te au e moni. Ou te faasoa atu ma le lotomaulalo lenei molimau ma la’u mau patino ia te outou i le suafa o Iesu Keriso, amene.