Elder Eduardo Gavarret
O Le Fitugafulu
I le mafaufau atu i lona valaauga i le Korama Muamua a Fitugafulu, na tautino mai ai e Elder Eduardo Gavarret, “O nisi taimi o mea e tutupu e foliga mai e le taua e o mai faatasi e pei o se paso ina ia saunia ai oe.”
Na soifua mai Elder Gavarret i le aso 11 o Me, 1956, i Minas, Iurukuei, i ona matua o Juan Gavarret ma Elsa Inzaurralde Gavarret. Sa ia auauna atu o se faifeautalai i Parakuei ma Iurukuei mai le 1975 e oo i le 1977 ma o lona taliu mai sa ia faaipoipo atu ai i a Norma Beatriz Gorgoroso i le aso 20 o Oketopa, 1978. Sa faamauina mulimuli ane i laua i le Malumalu o São Paulo Pasila.
Na faauu mai Elder Gavarret i le puleaina o pisinisi mai le Escuela Superior de Administracion Empresas i le 1986. O le 2000 na ia maua ai se faailoga o le matuaofaiva i le puleaina o pisinisi mai le INPG (Instituto Nacional de Pos-graduacã i Pasila.
“I le toe tepa i tua, ua mafai ona ou vaaia le aao o le Alii i lo’u olaga, i le aveina atu o au mai lea nofoaga i le isi nofoaga ma mai le tasi valaauga i le isi valaauga ina ia mafai ai ona sili atu ona lelei lo’u auauna atu ia te Ia,” o le saunoaga lea a Elder Gavarret.
A o avea o ia ma epikopo i Parakuei, sa faigaluega o ia i se kamupani o vailaau faafomai lea na siitia atu ai o ia i Polevia e amataina se lala fou. O iina na valaauina ai o ia e avea ma peresitene o se siteki fou, ona sosoo ai lea ma le avea ma se sui risone. Ina ua siitia atu e le kamupani le aiga i Peru e tatalaina se isi lala fou, sa valaauina o ia e avea o se Pule Eria. Ona toe siitia foi lea o latou e le kamupani, ae o le taimi lenei ua siitia atu i Pasila, lea sa ia auauna atu ai o se Fitugafulu Eria.
“O valaauga e fesoasoani ai ia i tatou ina ia latalata atu ai ia Keriso. O ni auala e oo atu ai i se taunuuga, ae le o le mutaaga. O valaauga e tatau ai ona tatou sailia ia musumusuga, aoao ia tatalo, ma taulai atu i isi nai lo i tatou lava.”
E oo mai i le taimi o lona valaauga, o loo avea o ia ma pule sili o se kamupani mo vailaau faafomai i Lima, Peru. E toatolu le la fanau ma lona faletua.
“Afai e avea Keriso ma totonugalemu o o tatou olaga, o le a sologa lelei lava isi mea uma,” na saunoa ai Elder Gavarret. “O loo pule o Ia i mea uma.”