Elder Gary E. Stevenson
O Le Fitugafulu
Ina ua mavae le mea sa ia faamatalaina “o se aafiaga o le tau le mafai ona tu i luga,” e faafetaia ai e Elder Gary Evan Stevenson le valaauga e auauna atu ai i le Korama Muamua a Fitugafulu.
“Ua tatou faalogo soo e faapea o le a faaagavaaina e le Alii i latou o e Na te valaauina, ma o le a Ia faia lena mea mo au.”
Na soifua mai Elder Stevenson i le aso 6 o Aokuso, 1955, i Ogden, Iuta, ISA, i ona matua o Evan Stevenson ma Jean Stevenson. Sa aoga o ia i le Iunivesite a le Setete o Iuta, lea sa ia faauu mai ai i le puleaina o pisinisi ma feiloai ai foi ma lona faletua o Lesa Jean Higley. Sa faaipoipoina i laua i le aso 20 o Aperila, 1979, i le Malumalu o Idaho Falls Idaho ma e toafa o laua alo tama.
Na faavaeina faatasi e Elder ma Sister Stevenson se mamanu o le auauna atu i o la olaga ma e talitonu maumaututu e faapea o le fiafia moni e maua lea i le auauna atu i isi. “Afai e te auauna atu i isi, ua e auauna atu foi i le Alii,” o le saunoaga lea a Elder Stevenson. “Afai e faalofia o tatou olaga i lena mataupu, o le a mafai ona tatou aumaia le olioli i isi ma i tatou lava.”
Sa la taufai auauna atu talu ai nei o ni faiaoga o le Aoga Sa i le la uarota i Providence, Iuta, ISA. Sa auauna atu foi Elder Stevenson o se peresitene o le Misiona a Iapani Nagoya e faaopoopo atu i le auauna atu o se faifeautalai talavou i le itu i saute o Iapani, o le avea ma se epikopo, ma le avea ma se tasi o le au peresitene o le siteki.
O le ola ae i se fale sa faaautu i le talalelei, e faamamaluina ai e Elder Stevenson ia ni matua maelega mo le vave aoaoina o ia i le galue malosi. I le avea ai o ia ma peresitene o se kamupani o masini mo le soifua maloloina ma le malosi lea sa ia fesoasoani e amataina ae faatoa faauu mai le kolisi, e talitonu ai Elder Stevenson o le galue malosi o se mataupu faavae taua i laasaga uma o le olaga.
“O le galue malosi e faatatau i a tatou galuega ma valaauga o le Ekalesia ma e i ai sona faatatauga tele lava i le galuega faafaifeautalai,” na ia saunoa ai. “Atonu e le mafai ona faamanuiaina i tatou i ni malosiaga sili atu ona maoae, ae mafai e soo se tasi ona galue malosi ma ausia ni mea maoae.”