Tatou te Le Gauai Atu, E Le Mafai Ona Tatou Gauai Atu
Ia e ola i ou faatulagaga. Ia e tu atu mo le mea ua e talitonu i ai.
Ou te lagolagoina faatasi ma outou i le agaga faafetai le finagalo o le Atua mo Lona nuu. Faafetai atu Peresitene Monson mo le mama o lou loto.
Ina ua ta’u atu e le taulealea o Iosefa Samita le mea moni e uiga i lona aafiaga paia i le togavao, sa sauaina ma inosia o ia. Sa faaaoga e le tiapolo le tauemuina e avea ma auupega e tetee atu ai ia te ia. “O au o se tama le taulia, … ae sa matua uunaia tagata e tagata tulaga maualuluga ia tetee ia te au, ma faatupuina sauaga faigata.” 1
Na ola ae o ia i le onosai, o le faautauta ma le faatuatua, e ui i le i ai o ona fili i soo se mea. I upu a Iosefa lava ia: “E ui ua galulue faatasi le tiapolo ma faiga taufaasese a tagata e faataumaoi ai tagata taumamaina, … ae o le Talalelei i lona mamalu e faaauauina pea.”2 E le mafai e se lima e le paia ona taofia le galuega mai lona alualu i luma.”3
E oo lava i aso nei, o loo i ai i latou e le o malamalama i la tatou mataupu ma luitauina le le masuia o tulaga faatauaina lea o loo tatou talosagaina ina ia ola ai.
Na oo atu la’u uo talavou o Ethan i lona tina ma se fesili matuia lava. O Ethan, e pei o le toatele o talavou, e manao e tutoatasi, e faalagolago ia te ia lava ma sa siomia e ni uo lelei. E taumafai e fai e ia ana lava filifiliga lelei. E matuai toa lava, e galue malosi i ona togi i le aoga ma e suesue i tusitusiga paia i aso taitasi. E pei lava o le toatele o talavou, o loo feagai ia Ethan ma ni faaosoosoga maoae. E auala mai i totonu o lana lava aoga, i luga o le Initoneti, i tifaga faapea ma musika. E mafai ona lagonaina i gagana masoa ma vaaia i lavalava mataga. O mea e sese e masani ona faafoliga mai e sao. O le popole ma le fefe i le teenaina o mea ia e taatele i le autalavou. O faatosinaga a uo e masani ona matuai faigata ona tetee. Sa lagonaina e Ethan le osofaia o ia e nei aafiaga leaga e tetee i ona faatulagaga.
O le fesili lenei na ia faia i lona tina: “Tina, pe moomia ona ou tuuina i lalo o’u faatulagaga faaletalalelei ina ia faatumauina ai pea a’u uo?”
O se fesili taua tele mo i tatou taitoatasi ina ia mafaufau i ai i tulaga uma o le olaga. Pe o tatou tuuina ea i lalo o tatou faatulagaga ina ia fetaui ma o tatou tuaoi? Pe o tatou fesuiaia ea o tatou tulaga faatauaina ina ia fetaui i le galuega pe ina ia lauiloa ai i le aoga?
Sa tali atu le tina alofa o Ethan i se tali mautu o le leai.
Ou te tali atu foi au ma le manino, “Aua e te faia lena mea Ethan. Aua nei galo ia te oe o oe o se atalii o le Atua ma e alofa o Ia ia te oe. Ia e ola i ou faatulagaga. Ia e tu atu mo le mea ua e talitonu i ai. O nisi taimi e le faigofie ma atonu e mafai ona e te tu na o oe mo se taimi. Ia vaai ni uo e faaalia le amio sao ma uiga lelei, ona alu lea i ai ma faailoa atu ia i latou le faafetai mo a latou faataitaiga. Atonu e mafai foi ona e mauaina se tasi o loo lagonaina le tuuatoatasi e pei o oe. Ia tatalo mo le taitaiga ma le puipuiga a le Alii. O le a Ia lagolagoina oe. O le a avea o Ia ma se uo faatuatuaina ma o le a e iloaina ai o lau faataitaiga o le a tosina mai ai ni uo se toatele o le a latou maua le lototele mai le malosi o lou tagata.”
Na aoao mai e Nifae ia i tatou se mataupu faavae faigofie ma le mamana i le toe faamatalaina lea o le miti a lona tama i le laau o le ola. Sa ia faamatalaina se ala sao ma le vaapiapi e tau atu i se laau faapea ma se fale tele ma le vateatea. O lenei fale o loo faatumulia i tagata sa matua lelei le faiga o o latou ofu. Sa latou tauemu uma mai ma tusitusi o latou lima ia i latou o e na aai i le fua o le laau. Sa latou faatosinaina i latou o loo saili lo latou ala ina ia ulufale atu i le fale. Mai vaaiga uma lava, o tagata o loo i totonu e foliga mai o loo matuai fiafia lava. O se vaaiga e manatua pea o faaosoosoga ma le taufaifai. I upu a Elder Neal A. Maxwell, “O le talie a le lalolagi ua na o se leo o tagata ua tuuatoatasi o loo taumafai e faamautinoa i latou lava.”4
“Ma ua toatele le motu o tagata ua ulufale i lena fale uiga ese… . Ona latou tusi lea le tamatamai lima o le tauemuga ia te au ma e o aai i le fua o le laau; a ua matou le amanaia i latou.”5
O loo i ai i le faaiuga o le fuaiupu le mataupu faavae mamana a Nifae, o se tali i faatosinaga e le manaomia a uo: “A ua matou le amanaia i latou.”
Na toe faamamafa mai talu ai nei e Peresitene Packer lenei lava mataupu faavae taiala: “Ae peitai, e tusa lava po o le a lo tatou foliga mai tatou te le o ogatasi ma faatulagaga a le lautele, e tusa po o le a le tauemuina o o tatou faatulagaga, e tusa po o le a le gauai atu o isi i faaosoosoga, o le a tatou le gauai atu lava, e le mafai ona tatou gauai atu.”6
Pe tatou te iloaina ea le faaosoosoga pe a matuai faafoliga lelei?
Pe o tatou naunau ea e tauina se taua e le manaomia?
Na manino ona lapatai mai Paulo faapea e le tatau ona tatou “pei o e faafiafia i tagata, a ia faapei o auauna a Keriso, o e fai le finagalo o le Atua ma le loto.”7
Ua oo mai le taimi ua tatau ai ona tatou tu i se tulaga e le gauai atu ai. E tatau ona tatou faamalolosia o tatou faavae faaleagaga, faalogo i perofeta a le Atua, ma mulimuli i a latou fautuaga.
Fai mai Paulo ia Timoteo: “Aua ua le foaiina mai e le Atua ia te i tatou le Agaga e mata’u ai, a o le Agaga e faamalosi ai, ma alofa ai, ma mafaufau tonu ai. O lenei, aua e te ma i le molimau i lo tatou Alii.”8
E moomia ai le lototele e faia faaiuga lelei, e tusa lava pe ese le mea e filifili e isi o loo siomia i tatou. A tatou faia ia filifiliga amiotonu i lea aso ma lea aso i nai mea iti, o le a faamalosia i tatou e le Alii ma fesoasoani ia i tatou e filifili le mea tonu i taimi faigata.
O aoaoga ma mea e faatauaina ua sili ona tatou faapelepele i ai e le o taliaina e le lalolagi. Ina ia faatumauina se tulaga mautu mo i tatou lava ma a tatou fanau, e tatau ona mauaa le savali o le talalelei toefuataiina i o tatou loto ma aoaoina i o tatou aiga.
O Apinati, o se perofeta sa Nifae, e pei ona tusia i ni nai itulau mamana i le Mosaea, o loo aoaoina ai i tatou i ni lesona e le masuia lea e fetaui lelei ma luitau o le seneturi 21.
O Apinati o se tagata e le maluelue le lototele o le sa tulai mo le upumoni i se taimi ua matuai le manaomia ai lava. A o ia valaau atu ma le lototele i le nuu ina ia salamo, sa ia iloa ua pagatia foi lona ola. I lou vaai faalemafaufau atu i ai, e mafai ona e iloaina atu le maofa o le vaaiga ia Apinati o le ua faatoa uma ona faailoa atu i ai le sala oti o le a oo ia te ia. Sa ia maua le avanoa e faasaoina ai o ia lava e ala lea i le teenaina o lona faatuatua ma lana molimau, e ala i le tuuina i lalo o ona faatulagaga, ae sa ia folafola atu ma le le fefe, “Ou te fai atu ia te outou, ou te le faafoia a’u upu ua ou tautala atu ai e faatatau i lenei nuu, aua ua moni.”9
Atonu tatou te le tuuina atu o tatou ola i le puipuiga o le upumoni ae tatou te mafaia, e pei o faia e Apinati, ona tatou tutu maualuga, ma le loto ma le malosi atoa, ma folafola atu ma le lototoa o Iesu Keriso o lo tatou Faaola. O Ia o le Alo o le Silisiliese. O loo soifua o Ia ma e alofa o Ia ia i tatou.
A o tatou mulimuli ia te Ia, o le a mafai ona tatou faia ni osigataulaga ma tausia a tatou feagaiga paia. Ua fetalai mai le Alii ia i tatou: “O le mea lea, aua le matatau, le lafu mamoe itiiti e; ia faia mea lelei; ia tuu i le lalolagi ma seoli e autasia oulua, aua afai ua faavaeina oulua i luga o la’u papa, latou te le mafai ona manumalo… . Ia faalagolago ia te au i manatunatuga uma; aua le masalosalo, aua le fefe.”10
E tatau ona tatou faamalolosia i tatou lava. O lena faamalosiga faaleagaga o loo maua i upu e lua—Iesu Keriso. Ou te molimau ai ia te Ia ma le lotomaulalo lava, i le suafa o Iesu Keriso, amene.