Elder D. Todd Christofferson
O Le Korama a Aposetolo e Toasefululua
E i ai se mea e mafai ona e aoaoina mai tagata uma,” o le saunoaga lea a Elder David Todd Christofferson, le uso fou faatoa valaauina o le Korama a Aposetolo e Toasefululua. “E leai se tagata ou te lei fetaui i ai—i totonu po o fafo atu o le Ekalesia—e lei mafai ona ou maua mai ai se mea na faaleleia atili ai au.”
O le aoaoina mai mea sili na ofoina mai e isi o se mea lea sa faia e Elder Christofferson i lona olaga atoa, e amata mai i ona matua.
Na soifua mai i ona matua o Paul Vickery Christofferson ma Jeanne Swenson Christofferson i le aso 24 Ianuari, 1945, o Elder Christofferson na soifua ae i Pleasant Grove ma Lindon, Iuta, ISA. Na ia saunoa faapea sa latou matuai fiafia lava ma ona uso laiti i se olaga a o laiti sa “filemu” ma “faamaoni.”
“Sa matou maua se olaga faaleaiga sili ona saogalemu,” na ia manatua ai. “Sa faaali mai e Tama ma Tina ia i matou le auala e ola ai e tusa ma le faatulagaga o le talalelei.”
I le amataga o le aoga maualuga, sa siitia atu loa ia Elder Christofferson ma lona aiga i Somerset, New Jersey, ISA. O iina na ia maua ai ni nofoaga fou, o ni tagata fou, ma ni avanoa fou.
“Sa ou fiafia i faauoga ma sootaga faatasi ma tagata mai soo se mea faapea ma ituaiga talitonuga faalelotu eseese,” na ia saunoa ai. “O fegalegaleaiga sa matuai lelei lava.”
Ina ua maea le aoga maualuga, sa auai atu loa ia Elder Christofferson i le Iunivesite o Polika Iaga mo se tausaga a o lei malaga o ia e auauna atu i se misiona i Atenitina. Fai mai o ia, o iina sa ia aoao mai ai i ni “peresitene maoae se toalua o le misiona,” o Peresitene Ronald V. Stone mo nai masina muamua o lana misiona ma Peresitene Richard G. Scott (lea ua Elder Scott nei, o se tasi o le Korama a Aposetolo e Toasefululua) mo le taimi na totoe o lana misiona.
E uiga ia Elder Scott, e manatua ai e Elder Christofferson: “Sa matou aoao ai ina ia matou matuai mautinoa e uiga ia i matou lava, e pei foi o ia. E taulai atu pea o ia i vaega maualuluga e mafai ona i ai o le tuputupu ae atili ma faia ni mea e sili atu ma ausia ni mea e sili atu. Talu ai ona o lena aoaoga, sa amata ai ona matou vaai atu i se vaaiga e sili atu i o matou lava tagata, o le galuega, ma mea e mafai ona matou ausia.”
Ina ua taliu mai o ia mai Atenitina, sa toe lesitala ia Elder Christofferson i le BYU, lea sa ia suesue ai i le Igilisi ma aofia ai i le pulega o tamaiti aoga faapea ma tauvaga afeleti. Sa ia feiloai atu ai foi ma faaipoipo ai ma lona faletua, o Katherine (Kathy) Thelma Jacob; sa la faaipoipo i le faaiuga o o la tausaga tolu i le aoga i le aso 28 o Me, 1968, i le Malumalu o Sate Leki. O le taimi nei ua toalima o la alo faapea ma fanau a fanau e toavalu.
Sa faauu Elder Christofferson mai le BYU ma se faailoga o le tagata malaga i le 1969 ona sailia lea o se faailoga faaloia i le Iunivesite o Duke. Ina ua faauu mai i le 1972, sa faafaigaluega loa o ia o se failautusi o tulafono mo le alii Faamasino o John J. Sirica, sa galue ai i le taimi o taualumaga o le Watergate.
“O se aafiaga manaia tele mo se galuega muamua ae faatoa uma le aoga,” na saunoa ai Elder Christofferson. “Sa ou vaai ai i nisi o vaega sili ona lelei ma nisi o vaega sili ona leaga o le galuega faaloia ua fefiloi uma ai. Ae o lena aafiaga na faaali mai ai ia te au ia galuega faaletulafono lelei e mafai ona fai, ma na ou maua ai le lagona mautinoa ma uunaiga.”
Sa galue muamua ia Elder Christofferson i lana galuega faaloia i se ofisa loia ona sosoo ai lea ma le avea ma se faufautua mai le fale mo faletupe ma isi faalapotopotoga, o le tele lava e i le itu i Sasae o le Iunaite Setete. O le mea sa sili ona ia fiafia ai i na tausaga, na saunoa ai Elder Christofferson, “o le fegalegaleaiga lea ma tagata lelei mai soo se vaega o le olaga faapea ma faatuatuaga uma. Na ou iloaina ai o le toatele o tagata e matuai mananao lava e fesoasoani atu i isi ma e tuuto atu foi ina ia tupu lena mea.”
I le 1993 na valaauina ai Elder Christofferson e auauna atu o se uso o le Korama Muamua a Fitugafulu, o se vaitau na ia faamatalaina sa “matuai tele se aafiaga.” O ona tofiga na malaga atu ai o ia mo se taimi puupuu i le Eria o Saute i Sisifo o Amerika i Matu ma le Eria a Mekisiko i Saute.
E manatua lelei e Elder Christofferson lona faatautaia o faatalanoaga i le taimi na toe faatulagaina ai se tasi o siteki patino i Mekisiko. “O se tasi o tagata na matou faatalanoaina o se alii lotomaualalo lava, e faatinoiti. Sa manaia le matou faatalanoaga, ma sa ou abrazo [fusi] ia te ia. Ina ua tuumuli ese atu lenei alii, sa faapea atu o ia i le peresitene o le siteki, ‘La autoridad me abrazó.’ [‘Ua fusi au e le taitai.’] Sa ia faia pea lava pea lena tala. O lena aafiaga na aoaoina ai au i le talisapaiaina o nai mea iti e faia e tagata. Na aoaoina ai foi au e faapea e mafai lava ona e faia se mea e fesoasoani ai i isi ia lagona le taua i le avea ai ma se atalii po o se afafine o le Atua.
“E te matuai mafaia lava ona aoaoina se mea mai soo se fesootaiga ma se fegalegaleaiga lelei,” na ia faaopoopo mai ai. “E faamoemoe, o loo tatou faia foi le mea lea e tasi mo isi.”
I le 1998 na valaauina ai Elder Christofferson o se uso o le Au Peresitene o Fitugafulu, lea sa ia auauna ai seia oo i lona valaauga i le Korama a Aposetolo e Toasefululua. Fai mai o ia ina ua ia uluai maua lona valaauga fou mai ia Peresitene Thomas S. Monson, na foliga mai muamua “e le mafaia.”
“O le tiutetauave e foliga mai e lofituina ai a o ou mafaufau loloto i ai. Ae sa ou maua ni faiaoga lelei a o ou galue ai i le Korama a Fitugafulu faapea ma uso o le Korama a Aposetolo e Toasefululua i le silia ma le 15 tausaga talu ai. Ma sa ou maua le faamautinoaga faaopoopo i le iloa lea e lagolagoina pea au e le Alii. I tulaga faigata uma, i suiga uma, i manaoga uma sa ia te au, sa mafai lava ona maua o Ia e ala i le tatalo. Sa ou faatuatuaina o Ia ma ou te lei faanoanoa ai lava. E mautinoa lava o loo i ai pea Ana folafolaga. Ua ou iloa o le a Ia tuuina mai ia te au le fesoasoani ou te moomia foi iinei.”