Elder Marcos A. Aidukaitis

O Le Fitugafulu

Ina ua valu tausaga o le atalii matua o Elder Marcos Antony Aidukaitis, sa ia tusia ai se ata o lona aiga mo se galuega faatino i le aoga. O le taimi lena, sa tele ni itula sa tuuina atu e Elder Aidukaitis i le avea ai ma pule sili o se kamupani i São Paulo, Pasila. “Sa ou matuai galue malosi lava ma sa ou malaga foi i le tele o nofoaga i le lalolagi,” na ia toe manatuaina ai.

Na iloagofie lava le misia o Elder Aidukaitis mai le ata a lona atalii. “O fea lou tama?” sa fesili atu ai le faiaoga i le tamaitiiti. “Oi, o loo faigaluega,” na ia tali atu ai.

O lea mea na tupu o se fafagu lea mo Elder Aidukaitis. “Sa sui au galuega ma faalelei le mea e ao ona faaleleia,” na ia saunoa ai, i le faafouina lea o ana taumafaiga ina ia faamuamua le aiga.

Na soifua mai Elder Aidukaitis i ona matua o Antony Aidukaitis ma Maria Dittrich Aidukaitis i le aso 20 o Aokuso, 1959, i Porto Alegre, Pasila. O lona tama, sa papatisoina i le 1940, o le tagata muamua lava lea o le Ekalesia i lona aiga, e faapea foi i le faletua o Elder Aidukaitis, o Luisa Englert Aidukaitis. Sa faaipoipoina ia Elder ma Sister Aidukaitis i le aso 13 o Ianuari, 1986, ae lei atoa lena o se masina talu ona ia papatisoina lona faletua. Sa faamauina i laua i le Malumalu o Provo Iuta i le tausaga na sosoo ai. O i laua o ni matua o se fanau e toalima.

O Elder Aidukaitis, o le sa auauna atu i le Misiona a Pasila São Paulo i Saute mai le 1979 e oo i le 1981, na saunoa faapea o lana misiona na suia ai lona olaga. Na faalauteleina ai lona alofa mo le Faaola, na saunia ai o ia e auauna atu i lona aiga ma lona Tama Faalelagi, ma, na ia saunoa, “na ou maua ai le lototele e aoao ma papatiso lo’u toalua.”

Ina ua mavae lana misiona, sa ia maua se faailoga o le tagata malaga i le enisinia o afi ma se MBA, na maua uma mai le Iunivesite o Polika Iaga, lea sa ia taalo ai i le au soka. Ina ua maea ona faauu sa ia alu atu loa ma faigaluega o se pule mo ni kamupani se tele, na muamua lava i le Iunaite Setete ona sosoo ai lea ma Pasila, na iu ai ina ua tatalaina ma lana lava pisinisi.

A o lei valaauina o ia i le Korama Muamua a Fitugafulu, sa avea Elder Aidukaitis ma peresitene o le Misiona a Pasila Brasilia, o se Fitugafulu Eria, o se peresitene o le siteki, sui o le uelefea i le risone, ma se fautua maualuga.