Auauna Atu, o se Uiga Auaumama Paia
O i latou e auauna atu o le a taumafai e faamamaluina, fausia, ma siitia o latou uso a tagata.
O mea uma lava na faia e Keriso mo lo tatou faaolataga e tulaga ese. Sa mafai ona Ia faataunuuina Lana galuega faaola i le tusa ma le tolu tausaga o lana misiona. O le aso ou te fia faamamafaina atu faamoemoega e tolu na soifua ai le Faaola i le fogaeleele.
1. O Lana Taulaga Togiola
O le faamoemoega muamua ma le aupito sili o le tofiga e le mafaatusalia ma le ofoofogia na Ia maua mai Lona Tama: ia faataunuu se taulaga e le iu ma faavavau mo tagata uma.
I le avea ai o le Alo e Toatasi o le Tama Faalelagi i le tino, na Ia maua uma ai uiga paia auaumama o Lona Tama, ma mai Lona tina faalelalolagi, o Maria, na maua ai tulaga faaletino.
Ua na o Lana taulaga lava e mafai ona laveai ai i tatou mai lo tatou tulaga faaletino ma le pau (tagai Alema 34:8–14). Na afio mai o Ia i le lalolagi ma le faamoemoega patino e ofoina mai Lona soifua, talu ai e na o Lona soifua lava e mafai ai ona tatou maua le ola faavavau.
E leai se isi tagata soifua, i le taimi ua fano, taimi nei, po o le lumanai i le i ai o le fogaeleele, na soifua po o le a soifua foi e faataunuuina le Togiola mo a tatou agasala. O Ia o lo tatou Faaola ma le Togiola (tagai Ioane 3:16).
O le a toe foi mai o Ia e pule ma nofotupu ia i tatou ma le mana uma ma le mamalu.
2. O Lana Aoaoga Faavae
O le faamoemoega lona lua sa nofo ai o Ia faatasi ma i tatou, o le aoao mai lea o le aoaoga faavae na Ia aoaoina mai Lona Tama, lea e aofia ai sauniga ma feagaiga o le faaolataga ma le faaeaga (tagai Mareko 1:27; Ioane 7:16).
O Lana aoaoga faavae o le aoaoga o le alofa, faamagalo atu, ma le alofa mutimutivale. O le auala e ola ai i le filemu ma le fealofani ma tagata, ma le auala e toe foi atu ai e mau faatasi ma le Atua.
3. O Lana Auaunaga i le Fanau a le Atua.
O lona faamoemoe lona tolu o le fausia lea o le malo e ala i le auauna atu i isi. O se ituaiga taitaiga ese lea. O le auauna atu o se uiga o Ona soo—o se uiga auaumama paia.
“Tou te ta’ua mai au o le aoao ma le Alii; ua lelei foi la outou e fai maina, aua o au lava lea.
“O lenei, afai o au le Alii, ma le aoao, ua ou mulumuluina o outou vae, e tatau ona outou femulumuluai o outou vae.
“Aua ua ou avatu le faaaoao ia te outou, e pei ona ou faia ia te outou, ia faapea lava e outou ona fai” (Ioane 13:13–15).
Sa soifua o Ia e folafola atu le talalelei o le malo ma faamalolo ituaiga ma’i eseese (tagai Mataio 4:23–24). O le aoao atu o Lana aoaoga faavae ma auauna atu i o tatou uso a tagata, o tiutetauave ia e lua sa tatou taliaina ina ua tatou papatiso. O le mea lena na liua ai i tatou e avea ma auauna moni a Keriso.
I se tasi taimi ina ua maea ona aoao atu Lana aoaoga faavae, sa ia te Ia le alofa mutimutivale i tagata ma sa ia faia ai se vavega o le faateleina o potoi areto ma le i’a ma fafagaina ai le motu o tagata, ma faaalia mai ai ia i tatou Lona uiga o le alofa ma le tautua. O le aso na sosoo ai, na toatele atu le motu o tagata ona o meaai sa latou mauaina. Sa Ia aoao atu ia te i latou ma le naunautai faapea foi le vaaiga mamao i le faavavau:
“E lei saili mai outou ia te au, aua na outou vaai mai i faailoga, ae peitai ua outou aai i areto, ma outou maoona ai.
“Aua tou te galulue i mea e ‘ai e pala, a o mea e ‘ai e tumau i le ola e faavavau, e foaiina atu ia te outou e le Atalii o le tagata” (Ioane 6:26–27).
I le avea ai o se Ekalesia, e ao ona tatou fafaga i e fia aai, avatu le mapusaga i e o mamai, faaoofu i e ua le lavalava, ma avatu se malutaga i e ua leai ni mea e nonofo ai. O le taulaga anapogi, tatou te avatu ai le faamama avega i tulaga manaomia muamua ma se taimi vave mo tagata o le ekalesia, ma o le fuafuaga o le uelefea tatou te fesoasoani ai e taulima manaoga mo se taimi umi. A oo ina i ai faalavelave faalenatura, o le tautua o fesoasoaniga mo tagata e ala atu ai la tatou fesoasoani mo o tatou uso ma tuafafine e le auai i la tatou tapuaiga.
E aunoa ma le tuulafoaia o nei manaoga faaletino, O Le Ekalesia a Iesu Keriso o le Au Paia o Aso e Gata ai, e ala i le poloaiga a le Alii, e faatumauina le auaunaga aupito ofoofogia ma le tamalii, lea e faamanuiaina ai tagata uma e ala i le aoaoina o i latou i le aoaoga faavae a Keriso ma valaaulia i latou ina ia mauaina sauniga faaola, ina ia mafai ai ona latou maua le “tino ola pea ma le ola faavavau” (Mose 1:39).
O Se Suiga o le Mafaufau ma Uiga Faaalia
Ou te iloa e alofa le Atua ia i tatou. Ua Ia faatagaina i tatou e faaaoga la tatou filifiliga saoloto tusa lava pe tatou te faaaogaina sese. Ua Ia faatagaina i tatou e faia a tatou lava faaiuga.
E le mafai ona fesoasoani mai Keriso ia i tatou pe afai tatou te le faatuatua ia te Ia; E le mafai ona Ia aoaoina i tatou pe afai tatou te le auauna atu ia te Ia. O le a Na le faamalosia lava i tatou e faia le mea sa’o, peitai o le a Ia faaali mai ia i tatou le ala pe afai lena tatou te filifili e auauna atu ia te Ia. O le mea moni, mo i tatou ina ia auauna atu i Lona malo, e manaomia e Keriso ona tatou maua se suiga o le mafaufau ma uiga faaalia.
“Aua pe faapefea ona iloa e le tagata le alii e lei auauna i ai o ia, o le tagata ese foi ia te ia, ma ua mamao i manatu ma manao o lona loto?” (Mosaea 5:13).
Faamanuiaga o le Auauna Atu
Ou te molimau atu o le auauna atu i uso a tagata, tatou te iloa ai le Alii.
O le auauna atu tatou te malolosi ai i lo tatou faatuatua ma tauaogaina i Lona malo. O le auauna atu tatou te maua ai le faamoemoega ma le lototele i le olaga. Tatou te latalata atu ai i le Atua ma fesoasoani ai e faaleleia atili lo tatou natura paia. E aoao ai i tatou ia alolofa ma malamalama i o tatou uso a tagata, ma e fesoasoani tatou te faagalo ai i o tatou faanaunauga faaletagata, e aveesea ai le manatu faapito, faamaualuga, ma le le lotofaafetai. E aoao ai i tatou e mafaufau i mea o manaomia e isi, lea e mafai ai ona tatou atiina ae uigaatua o loo i ai i le Faaola.
O le agalelei, alofa, onosai, malamalama, ma le lotogatasi o le a faateleina pe a tatou auauna atu, ae faaitiitia pe mou atu le le onosai, lotoleaga, lotomataua, faaloloto, ma le manatu faapito. O le tele ona tatou tuuina atu o i tatou lava, o le tele foi lena o lo tatou malosi e auauna atu ai, malamalama, ma o le a faatupulaia le alofa.
O i latou e auauna atu o le a sailia e le aunoa e faamalie le finagalo o le Atua ma ola sololelei ai ma Ia. O le a tumu i latou i le filemu; o le a laufofoga fiafia ma i ai se agaga o le agalelei.
O i latou e auauna atu o le a taumafai e faamamaluina, fausia, ma siitia o latou uso a tagata; o lea, o le a latou vaavaai atu ai i mea lelei i isi, ma o le a latou le maua foi se mafuaaga pe i ai se taimi e tiga ai. Latou te atiina ae le amioatua o le tatalo mo i latou o e faitio. Latou te le faamoemoe mo se faalauiloaga po o se taui. Ua ia te i latou le alofa o Keriso.
O i latou e auauna atu o le a naunau pea lava pea e faasoa atu a latou mea o i ai, ma mea ua latou iloa i taimi uma, i nofoaga uma, ma tagata uma.
O i latou e auauna atu e oo lava i taimi pagatia, o le a tausisia se faamoemoe ola o se lumanai e sili atu. O le a tumau pea ona latou mausali i le taulotoaiga o puapuaga ona o lo latou faamoemoe ia Keriso.
O i latou e auauna atu o le a taliaina o latou tofiga ma le lotomaulalo, e iloa o latou mutaaga ae ua faatalitonuina e mafai e tagata e toalua ona faia mea uma ua tuuina atu e fai, pau lava le mea o le tasi o na tagata e toalua, o le Atua.
O musumusuga faalelagi, na tautino atu ai e le Tupu o Peniamina, “Pe a i ai outou i le galuega a o outou uso ua na ona i ai outou i le galuega a le Atua” (Mosaea 2:17). O i latou o e auauna atu o le a tele atu lo latou malamalama i uiga patino ma uiga paia o le Atua.
O i latou e auauna atu ma le tuuto, tusa lava pe le taunuu i le mea latou te mananao ai, e le vave ona lotovaivai, lē lavava, pe faanoanoa aua o le a le aveesea lava mai ia i latou le folafolaga o le filemu o le mafaufau ma le mafutaga a le Agaga Paia.
Auauna atu i le Lalolagi Atoa ma le Lotoifale
I le Ekalesia e fiasefulu afe tagata o le ekalesia o loo auauna atu ma le le manatu faapito i le silia ma le 170 atunuu i le anoanoai o gagana eseese. Ua latou tuuina atu se auaunaga e aunoa ma le manatu faapito e ala i le taitaiga, aoao atu, ma le tausiga o isi, e aunoa ma ni totogi po o ni taui i ni oa, e aunoa foi ma le patipatia po o se faalauiloaga faalelalolagi. Latou te tuuina atu o latou taimi, o a latou taleni, ma a latou punaoa; ua latou ositaulagaina mea uma ua latou maua ma auauna atu ma le atoatoa ma le lelei a’ia’i. A maea se taimi patino, ona faamalolo lea o i latou ina ia tuu atu ai le avanoa i isi e auauna ai.
Ona o Lana aoaoga faavae ma Lana auaunaga, ua faamanuiaina ai e le aunoa e le Ekalesia toefuataiina a Iesu Keriso ia olaga o ona tagata auai. Tatou te faafetai i le Atua mo outou uma na o Au Paia faamaoni, o e ua lagonaina le olioli o le auauna atu, o e o loo lagonaina i le taimi nei, ma e o le a lagonaina lenei olioli a o outou auauna atu i isi. Matou te tatalo ina ia faamanuia pea lava pea outou e le Atua ona o lena mea. I le suafa o Iesu Keriso, amene.