Toe Tepa i Tua ma Agai i Luma
Tatou fetuleni faatasi atu i luma e faia Lana galuega.
Ou te manatu o se sauniga ofoofogia lenei. O savali sa musuia; o musika sa matagofie, o molimau e faamaoni. Ou te manatu soo se tagata lava na auai i lenei sauniga o le a le galo lava—ona o le Agaga sa tatou lagonaina.
O’u uso e ma tuafafine pele, i le silia ma le 44 tausaga talu ai, ia Oketopa o le 1963, sa ou tulai ai i le pulelaa i le Tapeneko, faatoa uma lava lena ona lagolagoina o au o se tasi o le Korama a Aposetolo e Toasefululua. I lena faatasiga sa ou ta’ua ai se faailoilo laitiiti sa ou vaaia i luga o se tasi pulelaa. O upu o lena faailoilo e faapenei: “O le e tulai i lenei pulelaa, ia lotomaualalo o ia.” Ou te faamautinoa atu ia te outou sa faalotomaualaloina au e lo’u valaauga i le Toasefululua i lena taimi. Ae peitai, a o o’u tulai ai i lenei pulelaa i le asō, ou te lauga atu ia te outou mai le ta’ele o le lotomaualalo. Ua ou matuai lagonaina lava lo’u faalagolago i le Alii. Ou te saili ma le faamaualalo i le taitaiga a le Agaga a o o’u faasoa atu lagona o lo’u loto.
Ua lua nei masina talu ai sa tatou faamavae atu ai i la tatou uo pele ma le taitai, o Gordon B. Hinckley, le Peresitene lona 15 O Le Ekalesia a Iesu Keriso o le Au Paia o Aso e Gata Ai, o se amepasa maoae o le upumoni i le lalolagi atoa ma e pele o ia i tagata uma. Ua tatou misia lava o ia. E silia ma le 53,000 alii, o tamaitai ma fanau sa autovaa mai i le Api o Perofeta i totonu o lenei lava fale e momoli atu la latou toe faaaloalo i lenei tamalii maoae o le Alii ua avea nei ma se talafaasolopito.
O le tuumalo o Peresitene Hinckley, sa faataapeina ai le Au Peresitene Sili. O i maua ma Peresitene Eyring, o e sa avea ma fesoasoani ia Peresitene Hinckley, na ma toe foi atu i o ma nofoaga i le Korama a Aposetolo e Toasefululua, ma avea ai lena korama ma pulefaamalumalu o le Ekalesia.
I le Aso Toonai, 2 Fepuari 2008, sa faataunuuina ai sauniga o le falelauasiga o Peresitene Hinckley i totonu o lenei Maota maoae mo Konafesi—o se fale o le a tu pea e avea ma faamanatu o lana tofamamao ma le faaaliga vaaia. I le gasologa o le falelauasiga, sa faapea ona molimoli atu ai ni saafiafiga matagofie e uiga i lenei tamalii o le Atua.
O le aso na sosoo ai, sa faapotopoto uma ai Aposetolo faauuina e 14 o loo soifua i luga o le fogaeleele i le afeafe aupito a luga o le Malumalu o Sate Leki. Sa matou feiloai i se agaga o le anapogi ma le tatalo. I lena faatasiga mamalu ma le paia, na toe faatulagaina ai le Au Peresitene o le Ekalesia e tusa ai ma le faatulagaga ua faavaeina lelei, le faatulagaga lea na faataatia e le Alii lava Ia.
Sa potopoto faatasi tagata o le Ekalesia i le lalolagi atoa ananafi i se potopotoga paia. Sa sii o outou aao e lagolagoina, ina ia faamaonia ai le faatinoga sa faia i lena fonotaga i le malumalu lea sa ou ta’ua. A o sii o outou aao i luga i le lagi, sa ootia lava lo’u loto. Sa ou lagonaina lo outou alolofa ma le lagolago, e faapea foi la outou tautinoga i le Alii.
Ua ou iloa e aunoa ma le tau fesiligia, o’u uso e ma tuafafine, o loo soifua le Atua. Ou te molimau atu ia te outou o Lana galuega lenei. Ou te molimau atu foi o lo tatou Faaola o Iesu Keriso o loo i le ao o lenei Ekalesia lea o loo tauaveina ai Lona suafa. Ua ou iloa o aafiaga sili ona matagofie i lenei olaga atoa o le lagonaina lea o Ana musumusuga a o Ia taitaiina i tatou i le faalauteleina o Lana galuega. Sa ou lagonaina na musumusuga a o avea au ma se epikopo talavou, sa taitai atu ai au i fale sa i ai se manaoga faaleagaga—po o le faaletino foi. Sa ou toe lagonaina foi a o avea ai ma se peresitene o le misiona i Toronto, Kanata, i le galulue faatasi ai ma faifeautalai lelei o e sa avea ma molimau ola ma tautinoga i le lalolagi e paia lenei galuega ma o loo taitaia i tatou e se perofeta. Sa ou lagonaina i le taimi atoa o la’u auaunaga i le Toasefululua ma le Au Peresitene Sili faapea ma le taimi nei i le avea ai ma Peresitene o le Ekalesia. Ou te molimau atu e mafai e i tatou uma taitoatasi ona lagonaina musumusuga a le Alii pe a tatou ola agavaa ma tauivi e auauna atu ia te Ia.
Ua ou matuai malamalama lelei i tamalii e 15 o e na muamua atu ia te au sa avea ma Peresitene o le Ekalesia. O le toatele o i latou sa ou matuai iloaina lelei. Sa ou maua le faamanuiaga ma le avanoa e auauna atu ai o se fesoasoani i le toatolu o i latou. Ou te faafetai mo le talatuu mautu na tuua e nei tamalii uma e 15. Ua ou maua le malamalama mautinoa, e pei ona ou mautinoa sa latou maua foi, e taitaia e le Atua Lana perofeta. O lau tatalo faatauanau ina ia mafai ona ou faaauau pea ona avea ma se tufugaaao tauaogaina i le tauaveina o lenei galuega tele ma faataunuuina ia tiutetauave e tele lea e o mai faatasi ma le tofi o le Peresitene.
Ou te faafetai i le Alii mo fesoasoani lelei. O Peresitene Henry B. Eyring ma Peresitene Dieter F. Uchtdorf o ni alii maoae talenia ma tumu i le malamalama. O i laua o ni fesoasoani i le uiga moni o le upu. Ou te faatauaina a la faaiuga. Ou te talitonu na saunia i laua e le Alii mo tofiga ua i ai nei i laua. Ou te alofa i uso o le Korama a Aposetolo e Toasefululua ma faatauaina a matou fegalegaleaiga ma i latou. O i latou foi, o ni tagata ua tuuto i le galuega a le Alii ma o loo faaaluina o latou soifuaga i Lana galuega. Ua ou tulimatai atu e galulue faatasi ai ma Elder Christofferson, o le ua valaauina nei i lena korama ma ua ia tauaaoina foi la outou lagolago. Na saunia foi o ia i lena tofiga lea ua valaauina nei i ai. O se fiafiaga pea le auauna faatasi ai ma uso o korama a Fitugafulu faapea le Au Epikopo Pulefaamalumalu. Sa valaauina ma lagolagoina ananafi ni uso fou o le Au Fitugafulu, ma ua ou tulimatai atu i fegalegaleaiga faatasi ma i latou i le galuega a le Matai.
O loo i ai se agaga manaia o le lotogatasi i le Au Pulega Aoao. Na folafola mai e le Alii, “Afai e le tasi outou e le a a’u outou.”1 O le a matou faaauau pea ona aufaatasi i le faamoemoe e tasi—ua taua lea, o le faalauteleina o le galuega a le Alii.
Ua ou lagona e momoli le faafetai i lo’u Tama Faalelagi mo le anoanoai o Ana faamanuiaga ia te au. E mafai ona ou faapea atu, e pei o Nifae anamua, na fanaua au e ni matua lelei, o o la matua ma matua o matua sa faapotopotoina mai eleele o Suetena ma Sikotilani ma Egelani e ni faifeautalai faamaoni. A o tuuina atu e na faifeautalai faamaulalo ia molimau, sa latou pa’i atu i loto ma agaga o o’u augatama. Ina ua maea ona papatisoina i le Ekalesia, sa agai atu loa nei alii ma tamaitai mamalu ma fanau i le vanu o le Vaituloto Masima Tele. E tele luitau ma lotonutimomoia sa latou fetaiai i le ala.
I le tautotogo o le 1848, o matua o matua o matua o matua o o’u matua, o Charles Stewart Miller ma Mary McGowan Miller, o e na auai i le Ekalesia i lo latou atunuu o Sikotilani, na tuua lo latou aiga i Rutherglen, Sikotilani, ae malaga mai i St. Louis, Misuri, ma se vaega o le Au Paia, ma taunuu iina i le 1849. O se tasi o a la’ua fanau e 11, o Margaret, lea na avea ma o’u tupuaga.
A o i ai le aiga i St. Louis e galulue ai e saili se tupe ia lava e faaauau ai le latou malaga i le Vanu o Sate Leki, sa matuai pepesi le faamai o le kolela i le nuu atoa, ma sa na o le oti ma le loto faavauvau na oo mai ai. Sa matuai afaina ai lava le aiga o Miller. I totonu o le lua vaiaso, e toafa tagata o le aiga na fano ai. Na muamua lava, i le aso 22 o Iuni, 1849, o William e 18 tausaga le matua. I le lima aso mulimuli ane na maliu ai Mary McGowan Miller, le tina o le tina o lo’u tinamatua, ma o le tina o le aiga. E lua aso na sosoo ai, ae maliu ia Archibald e 15 tausaga le matua, ae lima aso talu ona mavae lona maliu, ae maliu lo’u tamamatua, o Charles Stewart Miller, o le tama o le aiga. O fanau na totoe na tuua ua matuaoti, e aofia ai le tina o le tina o lo’u tina o Margaret, sa 13 ona tausaga i le taimi lena.
Talu ai ona o le tele o maliu i le eria, sa le i ai ni pusa maliu na maua ai, i soo se tau, lea e tanumia ai tagata maliliu o le aiga. O le tamaitiiti matua sa ola na talaina le sai o povi a le aiga e fai ai ni pusa maliu mo tagata o le aiga na maliliu.
E laitiiti ni mea o loo faamaumauina i le loto faavauvau ma tauiviga na feagai ma le fanau e toaiva a Miller sa totoe ai a o latou faaauau ona galulue ma sefe mo lena malaga ua le faaauauina e o latou matua faapea o latou uso po o tuagane. Ua matou iloa na latou tuua ia St. Louis i le tautotogo o le 1850 faatasi ai ma povi e fa ma le taavale toso e tasi, ma taunuu atu ai i le Vanu o Sate Leki i le tausaga lava lena.
Na feagai foi isi o o’u augatama ma faigata faapea. Ae peitai, e ui i nei mea uma, sa tumau mausali pea a latou molimau. Sa ou maua mai ia i latou uma se talatuu o le tuuto atoatoa i le talalelei a Iesu Keriso. O nei agaga faamaoni, ua mafua ai ona ou tulai atu i o outou luma i le asō.
Ou te faafetai i lo’u Tama o i le Lagi mo la’u soa faapelepele o Frances. O Oketopa o le tausaga nei o le a ma faailogaina ai le 60 tausaga o le ma mafutaga. E ui sa vave amata la’u tautua i le Ekalesia i lou laitiiti, ae lei faitio o ia i se taimi e tasi pe a ou tuua le aiga ae auai atu i fonotaga pe faataunuu se tofiga. O le tele o tausaga i o’u tofiga o se tasi o le Toasefululua ou te alu ese ai ma le Aai o Sate Leki, e masani lava—e ta’ilima vaiaso i isi taimi—ae tuua ai na o ia e tausia le ma fanau laiti ma lo matou aiga. Na amata mai ina ua avea au ma epikopo i le 22 o ou tausaga, sa tau le maua se avanoa e nonofo faatasi ai i se sauniga a le Ekalesia. E le mafai ona ou talosagaina se isi soa e sili atu ona faamaoni, alofa, ma malamalama.
Ou te faailoa atu la’u faafetai i lo’u Tama Faalelagi mo le ma fanau e toatolu ma a latou soa, faapea a latou fanau lelei e toavalu ma fanau a fanau a le ma fanau aulelei e toafa.
E faigata ia te au ona saili upu e molimoli atu ai ia te outou, o’u uso e ma tuafafine, lo’u agaga talisapaia o soifuaga o loo outou soifua ai, mo le lelei o loo outou faia, ma molimau o loo outou tuuina atu. O loo outou feauaunaai ma le loto i ai. O loo outou tuuto atu i le talalelei a Iesu Keriso.
I le gasologa o le silia ma le 44 tausaga o le avea ai ma se Pulega Aoao, sa ou maua ai le avanoa e faimalaga atu ai i le lalolagi atoa. O se tasi o o’u fiafiaga sili o le feiloai lea ma outou, o tagata o le ekalesia, po o fea lava o outou i ai—ina ia lagonaina lo outou agaga ma lo outou alofa. Ou te tulimatai atu i nisi avanoa se tele faapena.
I le gasologa o le faigamalaga i le ala o le olaga, o loo i ai i latou ua leiloloa. O nisi ua o ese mai faailoilo o le ala lea e faasino agai i le ola e faavavau, ae faatoa iloaina mulimuli o le auala ’alo na filifilia, e gata. O le le manatu popole, o le faatalale, o le manatu faapito ma le agasala e i ai uma lo latou tau i olaga o tagata.
E mafai ona oo mai le suiga mo le lelei i tagata uma. I le tele o tausaga sa matou tuuina atu ai pea le talosaga i e ua le toe toaaga, o e ua tiga, o e faitio, o e solitulafono—ina ia foi mai. “Foi mai ma talisua i le laoai a le Alii, ma toe tofo i le mananaia ma le faamalieina o fua o le faaaumeaina faatasi ma le Au Paia.”2
I le malamalama mama o le tagata lava ia, o loo taoto ai lena agaga, le naunautaiga lena e aveese le tagata tuai ae tulai mai i le tulaga moni o se tagata malosi. I lena lava agaga, matou te toe tuuina atu ai lena valaaulia faamomoiloto: Foi mai. Matou te aapa atu ia te oe i le alofa mama o Keriso ma faailoa atu lo matou mananao e lagolago ia te oe ma ia toe taliaina oe i le faaaumeaina atoatoa. Ia i latou o e o loo manunua faaleagaga po o e o loo tauivi ma le fefe, matou te faapea atu, Tuu mai sei o matou fesoasoani ia te oe ma faafiafia oe ma faatoafilemu ou popolega. Ia manatu sao i le valaaulia a le Alii, “Ia outou o mai ia te au, o outou uma o e tigaina ma mafatia i avega, o au foi e malolo ai outou. Ia outou amoina la’u amo, ma ia outou faaaoao ia te au; aua o au le agamalu ma le loto maulalo: ona maua lea e outou o le malologa mo outou agaga. Aua e avegofie la’u amo, o la’u avega foi e mama ia.”3
Na taua faapea e uiga i le Faaola sa Ia “femaliuai ma agalelei … aua sa ia te ia le Atua.”4 Ia tatou mulimuli i lena faataitaiga atoatoa. I nisi taimi i lenei malaga lē saogalemu i le olaga faaletino, ia tatou mulimuli foi i le fautuaga mai le Aposetolo o Paulo lea o le a fesoasoani e faatumauina i tatou ia saogalemu ma ia i luga o le ala: “O mea uma ua tauleleia, o mea uma ua tonu, o mea uma ua mama, o mea uma ua matagofie, ma mea uma ua logoleleia, afai foi o se isi amio lelei, po o se tasi mea e viia, ia outou manatunatu i ia lava mea.”5
Ou te uunaia tagata o le Ekalesia i soo mea o outou i ai, ina ia faaali atu le agalelei ma le faaaloalo i tagata uma i soo se mea. O le lalolagi o loo tatou nonofo ai ua tumu i mea eseese. E mafai ona tatou faaalia lo tatou faaaloalo i isi e ese o latou talitonuga mai ia i tatou.
Ia tatou faaali atu foi le agalelei ma le alofa i totonu o o tatou lava aiga. O o tatou aiga e ao ona avea ia sili atu nai lo na o ni sulufaiga; e tatau foi ona avea ma nofoaga e mafai ona mafuta ai le Agaga o le Atua, lea e gata ai le ita i le faitotoa, ae nofotupu ai le alofa ma mafutaina e le filemu.
E mafai ona avea le lalolagi i nisi taimi ma nofoaga taufaafefe e nonofo ai. O uiga mama o le lalolagi e foliga mai ua matuai faatoilaloina lava i se saoasaoa e faapopoleina ai. E leai ma se tasi—e tusa pe laitiiti pe matua pe faaleogalua—e tuusaunoa mai le oo atu i nei mea lea e i ai le malosiaga e tosoina ai i tatou i lalo ma faaumatia ai. O loo faapito lava ona feagai o tatou talavou, o a tatou talavou faapelepele, ma faaosoosoga lea e toetoe a le mafai ona tatou malamalama i ai. E foliga mai ua le malolo le galulue a le tiapolo ma ana ‘au ina ia faatoilalo i tatou.
O loo tatou tau ma le agasala, o’u uso e ma tuafafine, ae le moomia ona tatou lotovaivai. O se taua tatou te mafaia ma o le a tatou manumalo. Ua tuuina mai e lo tatou Tama o i le Lagi ia auupega tatou te moomia e tau ai. O loo tu o Ia i le foe. E leai se mea tatou te fefefe ai. O Ia o le Atua o le malamalama. O Ia o le Atua o le faamoemoe. Ou te molimau atu e alofa o Ia ia i tatou—i tatou taitoatasi.
O le olaga faaletino o se taimi e suesueina ai, o se taimi e faamaonia ai lo tatou agavaa e toe foi atu i le afioaga o lo tatou Tama Faalelagi. Ina ia suesueina, e tatau ona tatou feagai i nisi taimi ma luitau ma faigata. E i ai taimi e foliga mai ua leai se mutaaga i o tatou faafitauli. Tatou te lagonaina le siomia o i tatou e tiga o le loto nutimomoia, o le faanoanoa, o miti ua le taulau, ma le lotovaivai i faamoemoega ua le tini. Tatou te aufaatasi i le olega faatusi paia “E leai ea ni pulu pasama i Kiliata?”6 Tatou te matele e vaai atu i o tatou lava faigata i se tulaga e foliga mai ua sili atu le leaga nai lo le mea o loo i ai. Tatou te lagona le tuulafoaiina, loto nutimomoia, ma le tuuatoatasi. Afai e te iloaina lou i ai i se tulaga faapea, ou te aioi atu ia te oe ina ia e liliu atu i lou Tama Faalelagi i le faatuatua. O le a Ia sii a’e oe ma taitai ia te oe. Na te le aveeseina i taimi uma ou faigata mai ia te oe, ae o le a Ia faamafanafana ma taitai oe i le alofa i soo se faigata e te lua feagai.
Faatasi ai ma lo’u loto atoa ma le faamaoni o lo’u agaga, ou te sii ae ai lo’u leo i le molimau i le aso, o se molimau faapitoa ma tautino atu o loo soifua le Atua. O Iesu o Lona Alo, le Alo e Toatasi o le Tama i le tino. O Ia o lo tatou Togiola; o Ia o lo tatou Puluvaga i le Tama. E alofa o Ia ia te i tatou i se alofa e le mafai ona tatou malamalama atoa i ai, ma talu ai e alofa o Ia ia te i tatou, o lea na Ia ofo mai ai Lona soifua mo i tatou. O lo’u lotofaafetai mo Ia e le mafaamatalaina.
Ou te talosagaina Ana faamanuiaga i o outou luga, o’u uso e ma tuafafine pele, i o outou aiga, i a outou galuega, i la outou auaunaga o le tasi i le isi ma le Alii lava Ia. Tatou fetuleni faatasi atu i luma e faia Lana galuega.
Ou te tautino atu lo’u ola, o lo’u malosi—o mea uma ua ia te au e ofoina atu—e auauna ai ia te Ia ma le taitaiga o mataupu a Lana Ekalesia e tusa ai ma Lona finagalo e ala i Ana musumusuga, ma ou te faia ai i Lona suafa paia—le Alii o Iesu Keriso—amene.