Tatalaina o o Tatou Loto
Ia tatou faia o se vaega o a tatou taumafaiga i aso uma le tatala o o tatou loto i le Agaga.
O le asō o le a ou talanoa atu ai i le taua o le tatalaina o o tatou loto i le Agaga Paia.
Pe a uma le papatisoga e faamauina i tatou ma tuuina mai le Agaga Paia. O se meaalofa paia lenei. O le Agaga Paia na te faamafanafana, aoao, lapatai, faamalamalama, ma musuia i tatou. Na faaupuina faapenei e Nifae: “Afai tou te ui atu i le ala ma talia le Agaga Paia, na te faaali ia te outou mea uma e tatau ona outou faia.”1 Tatou te manaomia le fesoasoani a le Agaga Paia ina ia mafai ai ona tatou ui atu ma le saogalemu i le mea e pei ona taua e le Aposetolo o Paulo o “aso faigata”2 o loo tatou ola ai nei.
O le Agaga Paia o se peresona o agaga, lea ua mafai ai ona nofo o Ia i totonu o o tatou loto ma fesootai tonu mai i o tatou agaga.3 O le leo o le Agaga ua faamatalaina o se leo itiiti ma le filemu, o loo musumusu atu.4 E mafai faapefea e se leo ona filemu? Aisea ua faatusaina ai i se musumusu? Aua e toeitiiti lava o taimi uma e talanoa mai ai le Agaga i o tatou mafaufau ma o tatou loto5 nai lo o tatou taliga. Na saunoa mai Peresitene Boyd K. Packer, “O le Agaga Paia e tautala mai i se leo e te lagonaina ae e te le faalogo i ai.”6
Tatou te lagonaina mea i o tatou loto. I tusitusiga paia, ua aoao mai ai perofeta, o faaaliga faaletagata lava ia e vavalalata le fesootaiga ma le loto. Mo se faataitaiga:
Na aoao mai Mamona, “Ona o le agamalu foi ma le lotomaulalo e oo mai ai le asiasiga a le Agaga Paia.”7
Fai mai Alema, “E maua ai e le ua faamaaa lona loto o le tufaaga itiiti o le upu; a o le ua le faamaaa lona loto, e avatua ia te ia le tufaaga tele o le upu.”8
Na tusi atu Mamona i sa Nifae, “[Na faatumuina o latou loto] i le olioli ma ua faamafanafanaina … ona ua latou tuuina atu o latou loto i le Atua.”9
Ona tusia lea e faapea e le Fai Salamo, “Ua latalata mai Ieova i e ua loto momomo.”10
Pe le o se mea ea lena o loo tatou sailia uma, uso e ma tuafafine—ina ia asiasia e le Agaga Paia, ia latalata atili mai le Alii ia i tatou, ia maua le olioli ma le faamafanafanaga i o tatou olaga? Afai o lea, o lona uiga, o le iloiloina ma le toto’a o tulaga o o tatou loto o se tasi lea o mea aupito taua e mafai ona tatou faia i lenei olaga.
O le loto o se nofoaga maaleale. E aapo i le tele o faatosinaga, o le lelei ma le leaga. E mafai ona faatiga e isi. E mafai ona faaumatia e le agasala. E mafai ona faamaluluina e le alofa. I le popofou o o tatou olaga, tatou te aoao ai e puipuia o tatou loto. Na pei sa tatou atiina se pa e si’o ai o tatou loto ma se faitotoa e sao atu i ai. E leai se tasi e mafai ona ulu atu i lena faitotoa sei iloga tatou te faatagaina ai o ia.
I nisi o tulaga, o le pa tatou te atiina e si’o ai o tatou loto, e mafai ona faatusaina i se tamai pa laupapa e maamaai tumutumu o pou, e i ai se faailoga Afio Mai i luga o le faitotoa. O isi loto ua matuai faatiga pe matuai faaumatiaina e le agasala, ua faapea ai ona latou tuuina se pa uaea e valu futu (2.5-m) le maualuga ma ni uaea maamaai i le tumutumu e si’o ai. O le faitotoa, ua lokaina i se loka ma i ai i luga se faailoga tele lava Ua Sa.
Sei o tatou faatatauina le manatu o se faitotoa i le loto i le mauaina o faaaliga a le tagata lava ia. Na aoao mai Nifae, “A tautala atu le tagata i le mana o le Agaga Paia, e moliooina ai i le mana o le Agaga Paia i loto o le fanauga a tagata.”11 Na taua e Elder David A. Bednar le faaaogaina o le upu i: “Faamolemole ia matau le ala e molioo atu ai e le Agaga le savali i le loto ae le o totonu o le loto… . Mulimuli ane, … na pau le auala e oo atu ai i totonu o le loto le aano o se savali ma le molimau a le Agaga Paia, o le faatagaina lea e se tagata ia ulu atu i ai.”12
Aisea ua na o le i le loto [e moliooina ai]? O le saolotoga o le tagata lava ia e ese le paia, o lea e le mafai ai e le Tama Faalelagi ona faamalosia le loto o le tagata, e tusa lava pe o loo i ai Lona mana e le iu. Atonu e taumafai le tagata e faamalosi, ae e le faia e le Atua. I se isi faaupuga, ua faatagaina i tatou e le Atua e avea ma leoleo, po o le leoleo faitotoa, o o tatou lava loto. E tatau, e tusa ai ma o tatou lava loto fuatiaifo, ona tatala o tatou loto i le Agaga, aua Na te le faamalosia o Ia lava ia i tatou.
E faapefea la ona tatala o tatou loto?
I le Lauga i luga o le Mauga, na fetalai mai ai le Faaola, “Amuia e loto mama: aua latou te iloa atu le Atua.”13 Afai e mama se mea, e le o eleelea pe pisia i mea e le tatau ona i ai. O le loto mama ua mautinoa lava o se tasi lea o tulaga e sili ona taua mo le mauaina o musumusuga mai le Atua. Talu ai ona e leai ni o tatou loto e atoatoa, o le tele lava o lo tatou filiga e taumafai e lafoai mea le mama, pe aveese mea e le tatau ona i ai iina, o le tele foi lena o le tatala o o tatou loto i le Agaga Paia. Faafofoga foi i le folafolaga matagofie lenei a le perofeta o Iakopo: “E! outou uma ua loto mama, inā faaea ia o outou ulu ma talia le afioga malie a le Atua, ma ia fiafia i lona alofa.”14
A o i ai le Perofeta o Iosefa Samita i le Falepuipui o Liperate, na ia tali ai se faaaliga na faamatalaina ai le tulaga [na i ai] nisi o loto:
“Faauta, e toatele e ua valaauina, ae toaitiiti e ua filifilia. E le filifilia foi i latou i se a?
“Aua ua faapea ona manumanu o latou loto i mea o lenei lalolagi, ma manao i viiga mai tagata.”15
Ua toatele tagata i le lalolagi ua nonofo nei i tulaga o le manuia ma le filemu. I le Tusi a Mamona, o le manuia na masani ona taitaieseina ai tagata mai le Alii. Na lapatai mai Mamona, “E mafai ona tatou iloa o le aso ua faamanuiaina ai e ia lona nuu, ioe, i le fua tele mai o latou fanua, ma a latou lafu ma fagaga, i le auro foi ma le ario, ma mea taua uiga eseese, ma gaosiga uiga eseese … , o le aso lava lea latou te faamaaa ai o latou loto, ma faagalogalo foi ia te i latou le Alii lo latou Atua.”16
Na ta’ua e le Alii ia taunuuga masani e tolu o le pupū o le loto o se tagata i mea o le lalolagi: Muamua, tatou te taumafai e ufiufi a tatou agasala nai lo le salamoina. O le isi, tatou te saili e faamalie o tatou faamoemoega faamaualuluga ma le fiasili nai lo le sailia o mea a le Atua. Ma le mulimuli, e amata ona tatou pulea isi tagata ma le amioletonu.17
Ia manatua o le faamaualuga o taunuuga masani lea o le pupū o o tatou loto i mea o le lalolagi. O le faamaualuga e vave lava ona gase ai o tatou loto i uunaiga faaleagaga. Mo se faataitaiga, ua fetalai mai le Alii, “O Au, le Alii, ua ou le fiafia i la’u auauna o Sidney Rigdon; ua ia faamaualugaina o ia lava i lona loto, ma lē talia faatonuga, a ua faatigaina le Agaga.”18 Ia faatusatusa lena [tulaga] i le folafolaga lenei: “Ia e loto maulalo; ona taitaiina ai lea o oe e le Alii lou Atua, ma tali atu i au talosaga.”19
I le faaaliga i le Falepuipui i Liperate, na faamatalaina ai e le Alii ia aafiaga o se loto faalelalolagi: “Faauta, e punitia lava le lagi; e tiga le Agaga o le Alii; ma … faauta, a e le’i iloa e ia, ua tuu lava o ia iā te ia lava.”20 Uso e ma tuafafine, i nei lava “aso faigata,” e le tatau ona tatou faatiga i le Agaga ma tuua ai na o i tatou lava.
Ou te toe faapea atu, o le tulaga o o tatou loto e aafia tonu ai lava lo tatou mataalia i mea faaleagaga. Ia tatou faia o se vaega o a tatou taumafaiga i aso uma le tatala o o tatou loto i le Agaga. Talu ai o i tatou lava o leoleo i o tatou loto, e mafai ona tatou filifili e faia faapea. Tatou te filifili i mea tatou te tuuina i totonu pe taofi i fafo. O le mea e lelei ai, o loo naunau lava le Alii e fesoasoani mai ia i tatou ia filifili ma le poto.
Ou te faaiu i le molimau atu faatasi ma ni folafolaga se lua ua Ia faia ia i latou o e saili e o mai ia te Ia: “O le mea lea, ou uso pele e, ia outou tatalo atu ai i le Tama ma le malosi uma o le loto, ina ia faatumuina outou i [Lona] alofa, … ina ia faamamaina i tatou e pei ona mama o ia.”21
Ma le mulimuli o le folafolaga musuia lenei a le Aposetolo o Paulo: “Ou te mafaia mea uma lava i le faamalosi mai o Keriso ia te au.”22
Talosia ia tatou ole atu e le aunoa ia Keriso e faamalosi i o tatou loto ma faatumuina i Lona alofa o la’u tatalo lea i le suafa o Iesu Keriso, amene.