E Faitau Miliona na Lagolagoina Taitai Fou o le Ekalesia i le Potopotoga Paia
Na faatasitasi tagata o le Ekalesia i le lalolagi atoa i falelotu ma fale o aiga e ala i le satelite, televise, leitio, po o le Initoneti e lagolagoina i le potopotoga paia le Peresitene fou ma le Au Peresitene Sili O Le Ekalesia a Iesu Keriso o le Au Paia o Aso e Gata Ai i le aso 5 o Aperila, 2008.
O le Susuga a Peresitene Thomas S. Monson ma ona fesoasoani i le Au Peresitene Sili o Peresitene Henry B. Eyring ma Peresitene Dieter F. Uchtdorf, sa fofogaina mai i le aso 4 o Fepuari 2008, ina ua mavae le tuumalo o Peresitene Gordon B. Hinckley i le aso 27 o Ianuari. Ae peitai, o le lona 178 o Konafesi Aoao a le Ekalesia na faia i le aso 5 ma le 6 o Aperila, 2008, o le avanoa muamua lea na lagolagoina ai e tagata o le Ekalesia atoa o latou taitai fou.
Sa lagolagoina ai foi uso o le Korama a Aposetolo e Toasefululua i le potopotoga paia lea na faia i le Maota Autu mo Konafesi i le Aai o Sate Leki. O le Susuga a Elder D. Todd Christofferson sa lagolagoina e avea ma uso fou o lena korama. Sa lagolagoina ai foi isi Au Pulega Aoao ma taitai aoao o ausilali a le Ekalesia.
O le Susuga a Elder L. Whitney Clayton o le Korama Muamua a Fitugafulu sa valaauina e faatumuina le avanoa i le Au Peresitene o Fitugafulu ona o le valaauga o Elder Christofferson.
E sefululima alii sa lagolagoina o ni uso fou o le Korama Muamua ma le Lua a Fitugafulu, faatasi ai ma le lagolagoina o le au peresitene aoao fou o Tamaitai Talavou. (Tagai i faamatalaga o soifuaga o loo auina atu faatasi ai.) E toalua uso o le Korama Lona Lua a Fitugafulu, o Elder Craig C. Christensen ma Elder William R. Walker, sa lagolagoina i le Korama Muamua a Fitugafulu. E le gata i lea, e 38 Fitugafulu Eria fou sa valaauina e auauna atu i a latou eria atofaina o le Ekalesia. (Tagai i itulau 4–7 mo se lisi atoa o e na valaauina ma faamaloloina i le konafesi aoao.)
O Peresitene Monson o le Peresitene muamua lea o le Ekalesia ua lagolagoina i se potopotoga paia ua faia i totonu o le Maota Autu mo Konafesi. E tusa ai ma le saunoaga a Elder Marlin K. Jensen o le Fitugafulu, o le tausi talafaasolopito ma le tusitalafaamaumau o le Ekalesia, o le Perofeta o Iosefa Samita ma lana au peresitene sa lagolagoina i se potopotoga paia sa faia i le Malumalu o Katelani i le aso 27 o Mati, 1836. O Polika Iaga ma lana au peresitene sa lagolagoina muamua i le aso 27 o Tesema, 1847 i le Tapeneko o Kanesville i Council Bluffs, Iowa. Na amata ia Peresitene Ioane Teila i le aso 10 o Oketopa, 1880, o Peresitene uma lava sei vagana ai Peresitene Monson sa lagolagoina i se potopotoga paia sa faia i le Tapeneko o Sate Leki.
“E ui o tagata o le Ekalesia i uluai potopotoga paia e faatoa mafai ona faatasi ai pe a auai i totonu o le Tapeneko,” na saunoa ai Elder Jensen, “ae i tausaga e lei leva atu sa faatasi ai ia faapotopotoga i le lalolagi atoa e ala i faasalalauga o le satelite, faatasi ai ma au peresitene o siteki e mataituina le lagolagoina e faapotopotoga. Na amata i le 1945, o tagata o le Ekalesia sa faalogologo i taualumaga o le konafesi i o latou fale sa talosagaina e lagolagoina le Peresitene i soo se mea sa mafai ona latou i ai.”
O loo tusia i le Feagaiga Tuai na poloaiina e le Alii tagata Isaraelu ina ia faia ia potopotoga paia i le Tausamiga o le Paseka (tagai Esoto 23:14–17; Teuteronome 16:8, 16) ma le Tausamiga o Fale Apitaga, e taua foi o le Tausamiga o le Faaputuga, o le Tausamiga o le Seleselegasaito, po o le Sukota (tagai Levitiko 23:33–36; Neemia 8:18).
“Mo tagata o le Ekalesia, o le lagolagoina o taitai o le Ekalesia e le na o se tuuina atu o se palota,” o le saunoaga lea a Elder Jensen. “O le lagolagoina i se potopotoga paia e faailoa atu ai se naunautaiga e ofoina atu le faatuatua, tatalo, ma le lagolago faifai pea mo le Peresitene fou o le Ekalesia.”
Na faailoa mai e Elder Jensen e faapea o se potopotoga paia e le na o le pau lea o le taimi e talosagaina ai tagata o le Ekalesia e lagolagoina ia taitai o le Ekalesia. O se palota lagolago e faia o se vaega o konafesi aoao, konafesi a siteki, ma konafesi a uarota ma paranesi.
“A o lagolagoina e le aunoa e tagata o le Ekalesia ia taitai o le Ekalesia, o le a latou maua le avanoa e faafou ai ia tautinoga sa latou faia i lenei potopotoga paia,” na saunoa ai Elder Jensen.
E silia ma le 100,000 sa auai i sauniga i le Maota Autu mo Konafesi, faatasi ai ma le fia miliona sa maimoa pe faalogologo i faasalalauga i le televise, leitio, satelite, ma le Initoneti.
O sauniga o le konafesi aoao ia Aperila sa faaliliuina ma faasalalauina atu i gagana e 92, ua sili atu nai lo se isi konafesi aoao na muamua atu.