O Le Teugatupe Aupito Sili Ona Lelei
Afai tou te totogiina i taimi uma se sefuluai faamaoni, o le a faamanuia outou e le Alii. O le teugatupe aupito sili lea ona lelei o le a outou faia.
A o ou laitiiti lava, sa i ai se lafu povi taususu a se tasi o o matou tuaoi. Na mate se tasi o povi, ae tuua ai se tamaipovi na faatoa fanau, ma sa ia tuuina mai ia te au. Sa ou vaavaaia le tamaipovi, fafaga, ma tausi. O le aso na aveina atu ai e lo’u tama le povi i le lotoa e tuu ai mo le faatauina atu, o se aso na matuai ou le mautonu ai: Ua mafana la ma mafutaga ma la’u tamaipovi, ae peitai, sa ou tulimatai atu foi i le mauaina o taui o a’u galuega. Na pau lava la’u talosaga, o le tupe na ou maua mai le faatauina o le tamaipovi ia aumai i tai talā siliva. Ou te manatua le sau o lo’u Tama i le fale i lena afiafi ma faatoulu mai tai talā siliva e 20 i o’u lima. Sa faigata lava ona maua ni tupe, ma sa ou faapea ifo ua ia te au tupe uma o le lalolagi. Sa ou faitauina, mata’i, ma polesi ma le faaeteete ia tala siliva taitasi. Ina ua oo i le Aso Sa, sa ou tuuina ma le toa’i ni tala iila se lua i totonu o la’u taga e totogi ai la’u sefuluai. E ui lava i le faigata o le tuuina atu o au tai talā siliva faapelepele i le epikopo, ae ou te manatuaina pea lava le manaia o o’u faalogona i le usiusitai i le Alii.
A o ma o atu i le fale, sa ta’u mai e tina lona mitamita ia te au. Ona ia faapea mai lea, “Sa masani ona ta’u mai e lou tamamatua ia i matou le fanau e faapea, afai matou te totogiina ma le faatuatua se sefuluai faamaoni, o le a faamanuiaina i matou e le Alii ma o se teugatupe aupito sili lea ona lelei e mafai ona matou faia.”
Sa malamalama lo’u tamamatua e faapea “o loo i ai le tulafono, na faavaeina e le matatalaina i le lagi a o lei faavaeina lenei lalolagi, e autu ai faamanuiaga uma lava—pe a tatou maua foi soo se faamanuiaga mai le Atua, e maua ai i le usiusitai i le tulafono lea e autu ai.”1 O le sefuluai o se poloaiga mai le Atua, ma a tatou usitai i Lana tulafono, e noatia o Ia e faamanuia mai i tatou. E tusa lava po o se tamaitiiti e fitu tausaga, ae o se mea lena e mafai ona ou malamalama i ai. Ua saunoa mai Peresitene Thomas S. Monson, e uiga i tulafono a le Atua, e faapea: “A solia tatou te pagatia i taunuuga tumau. A usitaia tatou te maua le olioli e faavavau.”2
O le a outou manatua, i le taimi na aoaiina ai Isaraelu ona o le faoa o mea a le Atua, na fesili ai tagata, “Ni a ea au mea ua matou faoa?” Na sau le tali, “O sefulua’i ma taulaga.” Ma sa faapea ona folafola atu ia Isaraelu afai o le a latou usitai i Lana tulafono o le sefuluai, o le a mafai ona latou maua Ana faamanuiaga. Na fetalai le Alii, “Ina aumaia mea e sefulu a’i a outou mea uma lava i le fale e tuu ai mea … ma ia outou tofotofo mai ai ia te au i lenei mea, ua fetalai mai ai Ieova o au, pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele.”3
Na fetalai atu le Alii ia Isaraelu e tofotofo atu o Ia, e suesue o Ia, ia faatuatua ia te Ia ina ia mafai ona Ia tausia Lana folafolaga ia i latou. O lena poloaiga ma lena lava folafolaga o loo aoga pea i le asō. A tatou tausia le tulafono o le sefuluai, e moni lava folafolaga a le Alii: o le a oo mai faamanuiaga ia i tatou i le faaletino ma le faaleagaga, e tusa ai ma le poto ma le taimi a le Alii.
Sa ma maua ma lo’u toalua o Joan, le faamanuiaga o le nonofo i ni vaega eseese o le lalolagi faatasi ai ma tagata lelei o e na faalagolago i aso uma i le Alii mo o latou manaoga faaletino na sili ona moomia. O i latou ia na faia ni laa o le faatuatua e totogi a latou sefuluai ma molimau mai o loo toina mai pupuni o le lagi ia i latou. Ou te manatua se tamā faamaoni i Filipaina, na faamatalaina lona totogiina o se sefuluai itiiti i le epikopo i se tasi Aso Sa, ona ia taitaiina lea o lana fanau i le fale mai le lotu, ma le iloa lelei na leai sa latou meaai. A o latou savavali atu, na pau mai se ‘ulu lapoa mai se laau i o latou luma tonu lava. Sa vave ona ia tepa a’e i luga ma faafetai atu i le Atua mo le toina mai o pupuni o le lagi ma le aumaia ia te ia o se ‘ulu e fafaga ai lana fanau.
Ua tatou ola i se vaitaimi luitauina o le tamaoaiga. Ae peitai, a tatou toe tepa i tua i tausaga ua mavae, ona tatou iloa ai lea sa i ai, ma o le a faaauau pea ona i ai, taimi e matuai manuia ai ma taimi e le lelei ai tulaga tautupe. Peitai, e ui lava i tulaga tatou te oo i ai, ae a totogi muamua a tatou tautinoga i le Alii ona faaaoga lea o le poto ma le faautauta lelei; o le a fesoasoani mai le Alii ia i tatou e faasoasoa punaoa ua Ia tuuina mai.
Na saunoa Peresitene Heber J. Grant e faapea, “Ou te fia fai atu ia te outou, afai o le a outou faamoani i le Alii, totogi a outou sefuluai ma tausi Ana poloaiga, o le a le gata ina Ia faamanuia ia te outou i le malamalama ma musumusuga a Lona Agaga Paia, ae o le a faamanuiaina foi outou i talā ma sene; o le a mafai ona outou totogiina a outou aitalafu, ma o le a liligi mai e le Alii le anoanoai o faamanuiaga faaletino i o outou luga.”4
I le 1936, i le ogaoga o le Pau Tele o le Tamaoaiga i totonu o le Iunaite Setete, a o taumafai tagata e faasoasoa le utiuti o seleni, na lapataiina ai e Elder John A. Widtsoe le Au Paia ina ia totogi a latou sefuluai ona o faamanuiaga faaleagaga latou te maua ai. Na saunoa o ia: “O le usiusitai i le tulafono o le sefuluai … e aumaia ai se olioli loloto i totonu … lea e leai lava se isi auala e maua ai… . O le a manino atili mataupu faavae o le upumoni… . faigofie atu foi ona tatalo… . E atili mataalia ai lagona o le faaleagaga [ma] … e avea atili ai le tagata e pei o lona Tama oi le Lagi.”5
Sa faasoa mai e se tina i Aferika i Sisifo lana molimau e uiga i le sefuluai. O ia o se tagata sa faatau atu ni ana oloa i le maketi. O aso uma lava e foi mai ai i le fale, faitau ese lana sefuluai, ona tuu lea i se nofoaga faapitoa. Ma a oo i le Aso Sa na te aveina atu ai ma le faatuatua i lona epikopo. Sa ia faasoa mai le ala na ola ai lana pisinisi ma le ala na faamanuiaina ai lona aiga i le ola maloloina ma le malosi ma sa lava a latou meaai. Ma faatasi ai ma ona loimata sa fai mai ai o ia, “Ae o le faamanuiaga silisili lava o le alolofa o la’u fanau i le Alii ma o i matou o se aiga e faavavau.”
Sa malamalama lenei tina lotomaualalo o se tasi o faamanuiaga silisili o le avea ma se tagata e totogi atoa le sefuluai, o le avanoa lea e ulufale atu ai i le maota o le Alii ma auai i sauniga paia e mafai ai e aiga ona faatasia e faavavau.
A tatou totogiina ma le faamaoni a tatou sefuluai, e moni lava o le a toina mai [e le Alii] pupuni o le lagi mo tatou ma sasaa mai le manuia, ina seia silisili ona tele. Ou te manao ia te outou taitoatasi ia outou silafia, ae maise lava i la’u fanau ma fanau a la’u fanau, ua ou iloa, e pei ona iloa e lo’u tamamatua, afai tou te totogiina i taimi uma se sefuluai faamaoni, o le a faamanuia outou e le Alii. O le teugatupe aupito sili lea ona lelei o le a outou faia. Ou te molimau atu ai i le suafa o Iesu Keriso, amene.