Afafine o le Atua
E leai lava se tiute i le olaga e sili atu ona taua ma sili atu ona faavavau nai lo le tulaga faaletina.
Uso e ma tuafafine, talu ai nei lava na faia ai se taotoga o lo’u toalua o Barbara i lona papatua ma ua le mafai ai ona ia toe sii se mea, pe mimilo, pe punou foi. O lea la, ua sili atu ona tele lo’u siisii, femilosa’i, ma le punou i le taimi nei nai lo se isi lava taimi muamua–ma ua atili ai lo’u talisapaia o mea o loo faia e tamaitai, aemaise lava o tina i totonu o o tatou aiga.
E ui lava ina nonofo tamaitai i totonu o aiga i le tele o tulaga eseese—faaipoipo, nofofua, maliu le tane, pe tetea foi, o nisi o loo i ai se fanau ma o nisi foi e leai [ni fanau]—ae e alofaina i latou e le Atua, ma ua i ai Sana fuafuaga mo Ona afafine amiotonu ina ia maua faamanuiaga aupito maualuga o le faavavau.
O le afiafi nei e fia taulai atu la’u tautalaga i tina, aemaise lava i tina talavou.
A o avea au ma se tamā talavou, sa ou iloaina le mamafatu o le matafaioi o le tulaga faatina. Sa ou auauna atu o se fesoasoani ma sosoo ai o se epikopo mo se umi e sefulu tausaga. I lena taimi, sa faamanuiaina i ma’ua i le toaono o le ma fanau e toafitu. E masani lava, e oo atu i le taimi ou te oo atu ai i le fale i afiafi o Aso Sa ua matuai vaivai lava Barbara. Sa taumafai o ia e faamatala mai le tulaga na oo i ai a o nonofo i le laina pito i tua i le lotu faamanatuga ma lo ma aiga laiti. Ona oo mai lea o le aso na faamaloloina ai a’u. Ina ua uma le taimi e nofo ai i luga i le tulaga mo le sefulu tausaga, sa matou nonofo nei faatasi ma lo’u aiga i lena nofoa umi i le pito i tua.
Sa saunia e le aufaipese a tina o le uarota ia musika, ma ou iloa ai le tuua na o a’u ma le ma fanau e toaono. Ou te lei pisi lava i lo’u olaga atoa. Na faamaulu i o’u lima uma e lua ni papeti lima, ma sa leai se aoga tele o lena faiga. Na masaa le siriō, ma na ou matamuli lava i lena mea. Na foliga mai sa le lelei foi ona faafilemu tamaiti e tusiata e valivali e pei ona sa tatau ona i ai.
A o matou tauivi ma le fanau i le taimi o le sauniga, sa ou tilotilo i luga ia Barbara, ma sa tilotilo mai ia te au ma ataata. Sa ou aoaoina ai mo au lava ia le matuai talisapaiaina o mea uma o loo faia lelei ma le faamaoni e outou tina pele!
I se augatupulaga mulimuli ane, i le avea ai ma se tamamatua, ua ou vaaia ai le osigataulaga o loo faia e o’u afafine i le tausiga o a latou fanau. Ma o le taimi nei, i se isi lava foi augatupulaga mulimuli ane, o loo ou vaaia ma le maofa avega a fanau teine a fanau a la’u fanau a o latou tomatauina a latou fanau i lenei lalolagi pisi ma le faamalie gata.
Ina ua maea ona matauina ma le mataalofa augatupulaga e tolu o tina ma mafaufau atu i lo’u lava tina pele, ua ou iloa ma le mautinoa e leai lava se tiute i le olaga e sili atu ona taua ma sili atu ona faavavau nai lo le tulaga o le avea ma tina.
E leai lava se auala atoatoa se tasi e avea ai ma se tina lelei. E tulaga ese lava ia tulaga taitasi. E tofu lava foi tina ma luitau eseese, tomai ma gafatia eseese, ma e mautinoa lava e eseese fanau. O le filifiliga e ese ma faapitoa mo tina taitasi faapea foi ma aiga taitasi. O le toatele lava o loo mafai ona avea ma ni “tina i le aso atoa,” i tausaga o le popofou o olaga tuputupu ae o a latou fanau, ma e toatele foi isi e fia faapena. O nisi e mafai ona faigaluega faavaitaimi pe faigaluega tumau foi; o isi e mafai ona faigaluega i le fale; o isi e mafai ona vaevae o latou olaga i taimi o le fale ma le aiga ma le galuega. O le mea e sili ai e alofa tele se tina i lana fanau ma, ina ia ogatasi ma lona tuuto atu i le Atua ma lana tane, na te faatauaina muamua i latou nai lo isi mea uma.
E faagaeetia lava au i le toatele o tina o e ua iloa le taua o le taulai atu i mea e pau le taimi e mafai ai ona fai o se vaitaimi faapitoa o le olaga. Afai e nofo se tamaitiiti faatasi ma ona matua mo le 18 pe 19 tausaga, o lena umi e na o le tasi vaefa o le olaga o se matua. Ae o le taimi e aupito sili ona taua i le tuputupu ae, o tausaga ia o le talutalu fou o le olaga o se tamaitiiti, ua faatusaina lea i le itiiti ifo ma le tasi vaesefulu o le olaga masani o se matua. E taua tele lo tatou taulai atu i a tatou fanau i le taimi puupuu tatou te faatasi ai ma i latou ma ia saili, faatasi ai ma le fesoasoani a le Alii, e aoao i latou i mea uma tatou te mafaia ae latou te lei tuua o tatou aiga. O lenei galuega e faavavau lona taua e fitoitonu lea i tina ma tama o se paaga tutusa. Ou te faafetai lava ona o nei aso ua toatele tamā ua sili atu ona aofia ai i le vaaiga o a latou fanau. Ae ou te talitonu o lagona faanatura ma le mamafa o aafiaga o le faafaileleina e tina o a latou fanau, o le a avea pea ma vaega autu i lo latou soifua manuia. I upu o le folafolaga i le aiga, “O le uluai matafaioi a tina o le faafaileleina lea o a latou fanau” (O Le Aiga: O Se Folafolaga i le Lalolagi,” Liahona, Oke. 2004, 49).
E tatau ona tatou manatua o le tautino atu atoatoa i le tulaga faatina ma le tuuina o le faamuamua i fanau e mafai ona faigata. E ala i o’u lava aafiaga i augatupulaga e fa i lo matou aiga, ma e ala i talanoaga ma tina o fanau iti i le Ekalesia atoa, ua ou iloa ai se mea e uiga i lagona o tina lea e o faatasi ma lona tautino atu ina ia i ai i le fale faatasi ma lana fanau laiti. E i ai taimi o le olioli tele ma le faamalieina tele, ae i ai foi taimi o se lagona o le le atoatoa, o le fai toatasi o galuega masani, ma le le fiafia. Atonu e oo i tina se lagona e itiiti pe le talisapaia foi le filifiliga ua latou faia. O nisi taimi, o tane foi e foliga mai latou te le iloa ma se mea e uiga i le mamafa o loo feagai ma a latou ava.
I le avea ai ma se Ekalesia, e matuai tele lo matou faaaloalo ma le agaga faafetai mo outou tina o fanau laiti. Matou te mananao ina ia outou fiafia ma faamanuiaina i o outou aiga ma ia outou maua le faamaoniga ma le lagolago o loo manaomia ma tatau ai mo outou. Ma o le asō, sei ou fesili atu, ma tali faapuupuu atu i ni fesili se fa. E ui ina e foliga mai e matuai faatauvaa lava a’u tali, ae afai e faia nei mea faatauvaa, o le a mafai ona sili atu le tauia o le olaga o se tina.
O le fesili muamua: O le a se mea e mafai ona e faia, i le avea ai ma se tina talavou, e faaitiitia ai le mamafa ae ia faateleina ai lou fiafia i lou aiga?
Muamua, ia iloa o le olioli i le tulaga faatina e oo mai i ni taimi pupuu. O le a i ai taimi faigata ma taimi le fiafia. Ae i le ogatotonu o luitau, o loo i ai taimi susulu o le olioli ma le faamalieina.
Ua faamanatu mai ia i tatou e le tusitala o Anna Quindlen e aua nei o tatou nanati e faatea ese nei taimi pupuu. Fai mai o ia: “O le mea sese pito tele na ou faia (o se matua) o le mea sese lea e toatele i tatou e faia… . E lei lava se taimi na ou nofonofo ai i lena taimi. Ua matuai manino mai lenei mea i le taimi nei ae ua sola lena taimi, ua na o ata pue o loo maua ai. O loo i ai se ata se tasi o [la’u fanau e toatolu] o loo nonofo i le mutia i luga o se ie soosoo i le paolo o se faaluega i se aso o le taumafanafana, o lo latou matutua o le ono, fa, ma le tasi tausaga. Ma ou te moomoo maimau pe ana ou manatua a matou meaai na ai, ma mea na matou talanoa i ai, ma o latou leo, ma o latou foliga ina ua latou momoe i lena po. Maimau pe ana ou le faananati e fai le isi mea: meaai o le afiafi, taele, tusi faitau, ma le moe. Maimau pe ana ou faatauaina atili le taimi na ou faia ai nei mea ae aua ou te popole tele e faauma nei mea [ina ia mafai ai ona ou faia se isi mea]” (Loud and Clear [2004], 10–11).
Lua, aua le soona faia ni fuafuaga faatulagaina mo oe po o lau fanau. Ua tatou ola i se lalolagi e tumu i mea eseese e filifili ai. Afai tatou te le faaeteete, o le a tumu minute uma i fegalegaleaiga, vasega, taimi o faamalositino, kalapu o tusi faitau, faiga o tusi fatufatu [scrapbooks], valaauga o le Ekalesia, musika, taaloga, o le Initoneti, ma polokalama o le televise tatou te fiafia i ai. Na faamatala mai ia te au e se tasi tina se taimi na i ai ni fuafuaga faatulagaina se 29 a lana fanau i vaiaso uma lava: o lesona musika, Sikauti, siva, Liki a le Au Laiti, tolauapiga e taitasi aso, soka, tusigaata ma isi mea. Na ia lagonaina le pei o ia o avetaavale laupasese. Mulimuli ane, sa ia taloina se fono faaleaiga ma faasilasila atu “e i ai isi mea e tatau ona tuu; ua leai se taimi mo i tatou lava, ma ua leai se taimi o le tasi mo le isi.” E manaomia e aiga ni taimi avanoa pe afai e manaomia ona faaleleia mafutaga ma ia faatino ai ni tiute moni faamatua. Faaavanoa le taimi e faalogo ai, talie, ma taaalo faatasi.
Tolu, e tusa lava pe e te taumafai e aveese isi tiute faaopoopo, tuafafine, ia faaavanoa se taimi mo oe lava, e atiina ae ai au taleni ma mea e te fiafia i ai. Filifili se mea se tasi pe lua e te manao e aoao pe fai, o le a faapea ona faatamaoaigaina ai lou olaga, ma ia mautinoa e faaavanoa lou taimi e fai ai. E le mafai ona asu mai se vai mai se vaieli matūtū, ma afai e te le o tuueseina sina taimi mo mea e fafagaina ai oe, o le a saga faaitiitia ai mea e te tuuina atu i isi, po o lau fanau foi. Aloese mai soo se ituaiga o mea e faasaina, ma le manatu sese e faapea o le a fesoasoani e te ausia ai ni mea se tele. Ma aua nei faatagaina oe lava e maua i mea faamaumau taimi, faapē faiai, o mea e pei o ata faasolo o le televise pe o le alu o le taimi i le Initoneti. Ia liliu atu i le Alii i le faatuatua, ma o le a e iloa ai le mea e ao ona fai ma le auala e fai ai.
Fa, tatalo, suesue, ma aoao atu le talalelei. Ia tatalo ma le loto atoa mo lau fanau ma lou tiute o se tina. O matua e mafai ona tuuina atu se ituaiga talosaga tulaga ese ma matagofie, aua o loo latou tatalo atu i Matua Faavavau o i tatou uma. O loo i ai se mana maoae i se tatalo e faapea atu, “O i maua o matua o loo vaaia ia fanau a Lau Afio, faamolemole le Tama; fesoasoani mai ia i ma’ua ia tausi i latou i mea ua finagalo lau Afio e tausi ai i latou.”
O le fesili lona lua: O a nisi mea e mafai ona faia e se tane e lagolago ai lana ava, le tina o le la fanau?
Muamua, ia faaali atu le faateleina o le talisapaia ma tuu atu le lagolago tele mo mea e faia e lou toalua i aso uma. Ia matau vaega uma, ma fai soo atu—faafetai lava. Ia faatulaga ni afiafi lua te mafuta ai, na o oulua lava e toalua.
Lua, ia i ai se taimi masani lua te talanoa ai ma lou toalua e uiga i manaoga o tamaiti taitoatasi ma po o le a se mea e mafai ona e faia e fesoasoani atu ai.
Tolu, tuu atu i lou toalua se “aso e malolo ai” mai lea taimi i lea taimi. Suitulaga oe i le vaaiga o le aiga ae tuu atu i lou toalua se taimi e malolo ai mai ona tiutetauave o aso uma. O lou suitulaga mo sina taimi o le a matuai faaleleia ai lou talisapaia o mea o loo faia e lou toalua i aso uma. Atonu e te ono faia le tele o le siisii, femilosai, ma le punou!
Fa, sau i le fale mai le galuega ma ia galulue malosi ma lou aiga. Aua nei faamuamuaina lau galuega, au uo, po o taaloga i luma atu o le faalogo atu, taaalo faatasi, ma aoaoina lau fanau.
O le fesili lona tolu: O le a se mea e mafai ona fai e fanau, e oo lava i le fanau iti? O outou fanau, faamolemole ia faalogo lelei lava i mea faigofie nei e mafai ona outou faia e fesoasoani ai i o outou tina.
E mafai ona e teuina au meataalo pe a uma ona e taalo ai, ma a faasolo ina e matua teisi, e mafai ona e tapenaina lou moega, fesoasoani i ipu, ma fai isi feau—e aunoa ma le tau faatonuina.
E mafai ona e fai atu soo faafetai lava pe a uma ona e ai, pe a faitau atu se tala ia te oe pe a sauni e te moe, pe a teu foi ou lavalava mama i totonu o lau pusa.
Ae o le mea sili lava, e mafai ona e fusiina lou tina ma ta’u soo atu ia te ia e te alofa ia te ia.
O le fesili mulimuli: O le a se mea e mafai ona fai e le Ekalesia?
E tele mea e mafai ona ofo atu e le Ekalesia i tina ma aiga, ae mo lo’u faamoemoega i le asō, ou te fautua atu ai i au epikopo ma sui o le aufono a le uarota ina faapitoa ona mataala ma magafagafa i le faaaogaina o taimi ma punaoa e talosagaina mai tina talavou ma o latou aiga. Ia iloa i latou ma ia faautauta i mea e te saunoa atu ia i latou e fai i lenei taimi o o latou olaga. O le fautuaga a Alema i lona atalii o Helamana e faatatau foi ia i tatou i aso nei: “Faauta, ou te fai atu ia te oe, o mea faatauvaa ma mea faavalea ua faataunuuina ai mea tetele” (Alema 37:6).
Ou te faamoemoe ia aua lava nei tau mafaufau outou uma o tuafafine pele, o e ua faaipoipo pe nofofua, pe o ai so outou taua i le silafaga a le Alii faapea ma taitai o le Ekalesia. Matou te alolofa ia te outou. Matou te faaaloalo ia te outou ma talisapaia a outou uunaiga i le faasaosaoina o le aiga ma le fesoasoani i le tuputupu ae ma le taua faaleagaga o le Ekalesia. Ia tatou manatua “o le aiga o le totonugalemu lea o fuafuaga a Le Foafoa, mo le taunuuga e faavavau o Lana fanau” (“O Le Aiga: O Se Folafolaga i le Lalolagi”). O tusitusiga paia ma aoaoga a perofeta ma aposetolo, e fesoasoani i tagata uma o le aiga e saunia faatasi ai i le taimi nei ina ia faatasia i le faavavau atoa. Ou te tatalo ia faaauau ona faamanuia pea e le Atua ia tamaitai o le Ekalesia ina ia maua le olioli ma le fiafia i lo latou tiutetauave paia o ni afafine o le Atua.
O lenei, i le faaiuga, e fia faaopoopo atu la’u molimau i le valaauga faaperofeta o Peresitene Monson. Na ou masani ia te ia a o 22 ona tausaga ae 21 au. Ua 58 tausaga. Na ou vaaia ai le aao o le Alii o saunia o ia mo lenei vaitaimi e pulefaamalumalu i le Ekalesia i le avea ai ma perofeta ma Peresitene. Ma e faaopoopo atu la’u molimau i isi molimau uma na fofogaina i lenei konafesi, o Iesu o le Keriso, ma o Lana Ekalesia lenei. O loo tatou faia Lana galuega, ou te molimau atu ai i le suafa o le Alii o Iesu Keriso, amene.