Savavali i le Malamalama
E te faia filifiliga i aso taitasi ma e toetoe lava o itula taitasi e ono taofia ai oe mai lou savali i le malamalama pe alu ese mai ai foi ma agai atu i le pogisa.
Mo i tatou taitoatasi, o le olaga o se faigamalaga. Sa mamanuina e le Tama Faalelagi mo i tatou ona o le alofa. Ua tofu i tatou ma poto masani po o aafiaga ma uiga e tulaga ese, peitai o la tatou faigamalaga na amata mai i le nofoaga e tasi a e tatou te lei fananau mai i lenei lalolagi.
Na aoaoina uma lava i tatou e Elohima, le Tama o o tatou agaga. Sa tatou alolofa ia te Ia ma sa tatou mananao ina ia avea faapei o Ia ma ia mau faatasi ma Ia e faavavau. Sa Ia ta’u manino mai ia i tatou mea e manaomia ina ia tatou maua ai lena olioli. E ao ona i ai so tatou tino faitino faatasi ai ma tofotofoga uma o le a aumaia ai. O le a tatou mama’i, ma ua i ai i totonu o o tatou tino faagasologa e iu ai lava ina oti. O le a i ai foi i o tatou tino ni faanaunauga malolosi mo le faamaliega faaletino.
Sa faamalamalama mai e le Tama Faalelagi ia i tatou mea e manaomia mo le faigamalaga mai le mea sa tatou i ai ina ia toe mafuta ma Ia e faavavau ma ola ai i le olaga o loo Ia soifua ai. O le a tatou malaga i le olaga e aunoa ma se manatua o le taimi na tatou mafuta ai ma Ia i le lalolagi o agaga. Ma na pau lava le auala e toe foi atu ai ia te Ia, o lo tatou faatoilaloina lea o le oti faaletino ma aafiaga o le agasala, lea e oo mai ona o lo tatou solia o poloaiga. Sa Ia ta’u mai ia i tatou e le mafai ona tatou faatoilaloina aafiaga o le oti po o le agasala e i tatou lava—e aunoa ma le i ai o so tatou Faaola, o le na te talaia noataga o le oti ma saunia se ala mo i tatou e fufulu mama ai mai agasala ia e mautinoa o le a tatou faia.
Ua outou iloa mai tusitusiga paia na faaalia mai e le Atua e ala mai i perofeta, sa i ai se fouvalega i le lalolagi o agaga ina ua tuuina mai ia i tatou le fuafuaga mo la tatou faigamalaga. O i latou na fouvale, sa le mananao e talia ma faalagolago i se Faaola pe talia se tulaga le mautinoa ne’i o latou le toe foi atu i le Tama Faalelagi. O outou uma taitoatasi o nisi o e na totoa, faatuatua, ma faamaoni i lena taua. Sa outou taliaina le Faaola ma le fuafuaga mo lenei faigamalaga e toe foi atu ai i le olioli i le afioaga o lo tatou Tama Faalelagi.
Ua ofoofogia outou mai e sa filifilia le mea sa’o i le taua i le lalolagi o agaga. Sa outou agavaa e o mai i le olaga nei ma faia lenei faigamalaga i se taimi ua i ai le talalelei a Iesu Keriso i le fogaeleele. Ma mai le faitau piliona o fanau a le Tama Faalelagi o loo ola nei, sa faamanuiaina outou ina ua maua le talalelei a Iesu Keriso ma Lana Ekalesia moni. A o se mafuaaga sili atu o lo outou ofoofogia, o lo outou faalogologo mai i lenei po, o lona uiga ua outou filifili e faia le faigamalaga o le olaga a o savavali i le malamalama.
O fanau taitasi a le Tama Faalelagi e fananau mai i le lalolagi e tuuina atu i lona fanau mai, e avea o se meaalofa maua fua, le Malamalama o Keriso. Ua outou lagonaina lena mea. O le lagona lea po o le a le mea e sa’o ma po o le a foi le mea e sese, po o le a le mea e moni ma po o le a foi le mea e le moni. Na i ai lava lena mea ia te oe talu ona amata lau faigamalaga o le olaga. O le mea moni ina ua papatisoina oe ma talia le Agaga Paia, o se faamaoniga lena sa e filifili e savali i le malamalama o Keriso.
Ina ua faamauina oe e avea o se tagata o le Ekalesia, sa tuuina atu ia te oe le aia tatau e avea ai le Agaga Paia ma au soa. O le Agaga Paia o se faapogai mamana lea o le malamalama e iloa ai le upumoni, e mulimuli ai ma alofa i le Alii o Iesu Keriso, ma maua ai lou auala e toe foi atu ai i le Atua pe a mavae lenei olaga.
Peitai o le agaga sa taitaia le fouvalega i le muai olaga, o loo tetee lava i le fuafuaga ma e manao ina ia e faanoanoa. E manao ia aua lava nei e maua lou auala e te toe foi atu ai. O lena fili o lou agaga ua iloa lelei oe ma ou uiga lelei. Ua ia iloa afai e mafai ona ia faaliliu ese mai oe mai le savali ai i le malamalama, e mafai ona ia pueina ma taofia oe mai lou fesoasoani atu i isi a o alu le faigamalaga. Ua ia iloa lou lelei ma lou malosi e aoao atu ai ma uunaia le fiaselau o fanau a le Tama Faalelagi i lenei olaga, ma le fiaafe i augatupulaga o le a mulimuli mai i lou ala. Afai na te mafai ona tata’i ese mai oe mai le malamalama i lau faigamalaga, e mafai ona ia faataumaoia ma aumaia le faanoanoa i le toatele.
O le mea moni ona o lea e te faalogologo mai i le taimi nei, o le faamaoniga lea o loo silafia e le Atua lou taua tele ma ua e filifili e savali i le malamalama ua Ia ofoina mai mo oe. E le faigofie i taimi uma ona iloa manino na filifiliga. E te faia filifiliga i aso taitasi ma e toetoe lava o itula taitasi e ono taofia ai oe mai lou savali ai i le malamalama pe alu ese mai ai foi ma agai atu i le pogisa. O nisi o filifiliga aupito taua, o mea ia e gauai i ai lou loto.
E anoanoai mea atonu e te manatu faapea e manaomia. Mo se faataitaiga, o i tatou uma lava e i ai taimi e mananao ai i se faamaoniga a isi tagata. O i tatou uma lava e lagonaina le manaomia o ni uo. O i tatou uma lava o loo saili mo ni nai faamaoniga o i tatou o ni tagata e taua. Tatou te faia filifiliga e faalagolago i na manaoga. O nisi e ono taitai ese ai i tatou mai le malamalama ua ofoina mai e le Atua e avea ma taiala. O nisi e ono faamalamalama atili ai lena malamalama lea e mafai ai ona tatou maua ai le ala.
A o o’u toe tepa i tua, ua ou iloa ai ou te le i malamalama i le taua o nisi o na manaoga ma filifiliga. Sa ou manao ia tofi au i au afeleti. Sa ou manao ia lelei la’u aoga. Sa ou manao ia maua ni uo lelei ma le faamaoni. Ma ina ua ou faia filifiliga na faapogai mai i na manaoga, e sili atu nai lo le mea sa ou iloaina, a le o lo’u alu ese ai mai le malamalama po o le agai atu i ai.
O nisi o mea sa ou faataunuuina ma nisi o au uo, o sao autu na o lo’u iloaina o le malamalama. O isi, e sili atu nai lo le mea sa ou iloaina i lena taimi, sa toso malie ese maia au mai le malamalama. I ala taua ma le mausali, o filifiliga sa ou faia e faamalie ai o’u manao mo se mafutaga faalesoa ma se lagona i le iloaina sa aveatu ai au agai i le malamalama po o le aveeseina mai ai foi o au mai le malamalama e taiala ai lo’u ala.
Ua leva lava ona aumai e le Tama Faalelagi ia i tatou e ala mai i Ana perofeta se auala e iloa ai po o le fea filifiliga e sili ona taua ae pe aisea foi—ma le auala e faia ai.
O le aotelega sili ou te iloa o loo maua lea i upu a Moronae ina ua ia ta’ua upu a lona tama o Mamona. E na o lo’u moomoo maimau e pe a na ou malamalama lelei i ai i le taimi na ou pei ai o outou, ma ou te tatalo ina ia molimoli atu e le Alii i o outou loto i le po nei.
“A e peitai, faauta, o le mea ua mai le Atua, e valaau atu ma taufaalata ia faia mea lelei. O lenei; o mea uma ua valaau atu ma taufaalata ia faia mea lelei, ma ia alofa atu i le Atua, ma ia auauna ia te ia, e mai le Atua ia.
“O lenei, ia outou, ou uso pele e, ina nei faapea outou, e mai le Atua le mea ua leaga, pe faapea, e mai le tiapolo le mea lelei mai le Atua.
“Aua faauta, ou uso e, ua tuuina atu ia te outou ia faamasino, ina ia iloa ai e outou le lelei ma le leaga; o le ala foi e faamasino ai, ua manino, e pei o le malamalama o le ao ai le pouliuli o le po.”1
Ua ta’u mai e tusitusiga paia le faapogai ma le mana o le malamalama.
“Aua faauta, ua foaiina mai le Agaga o Keriso i tagata uma lava, ina ia iloa ai e i latou le lelei ma le leaga; o lea ua ou faailoa atu ai ia te outou le ala e faamasino ai; aua o mea uma ua valaau atu ia faia le lelei, ma ua faaoleole atu ia faatuatua ia Keriso, ua aauina atu ai i le mana ma le mea foaifuaina mai a Keriso; o lea tou te iloa ai ma le malamalama atoatoa e mai le Atua ia.
“A o mea uma e faaoleole i tagata ia faia le amioleaga, aua foi le faatuatua ia Keriso, a ia faafitia o ia, ma le le auauna i le Atua, ona iloa ai lea e outou ma le malamalama atoatoa e mai le tiapolo lava ia, aua o le ala lea e galue ai le tiapolo, aua na te le faaoleole i se tagata ia faia mea lelei, e leai lava; e le faia foi e ana agelu, pe faia e i latou o e gauai atu ia te ia.”2
Ua mafai nei ona ou iloa, ua mafai ona sili atu nai lo le taimi sa ou talavou ai, le auala sa tatau ona ou faaaogaina ai lena taiala. Sa i ai au taaalo sa i ai tagata taaalo ma faiaoga sa uunaia au ina ia ou faia mea lelei. Sa i ai foi nisi sa le faapena. Sa i ai uo, o nisi o i latou e le o ni tagata o le Ekalesia a Iesu Keriso, o a latou faataitaiga sa uunaia ai au ou te faia mea lelei ma manatua ai le Faaola.
Sa i ai i latou sa matou aooga ma faiaoga sa ou sailia a latou faamaoniga ma faauoga, ma sa ou manao ai e faia mea lelei ma faalauteleina o’u lagona mo le Faaola. Sa faamanuiaina au i lo’u mauaina o lo’u ala. Ae semanu e sili atu a’u taumafaiga pe a na ou malamalama i le taua o au filifiliga ma le auala e filifili ai.
Sa silafia e Mamona lena mea. Pe a na ou faitauina ma le matua faaeteete ana upu i le Tusi a Mamona ma isi upu faapena, semanu e sili atu ona faamanuiaina au ma puipuia. O upu nei a Mamona:
“ … ona ua outou iloa le malamalama tou te faamasino atu ai, o lea malamalama foi o le malamalama o Keriso, ia outou, ne’i outou faamasino atu ma le sese, aua o le faamasinoga tou te faamasino atu ai, e faamasinoina ai outou.
“O le mea lea … ia outou sailiili ma le filiga i le malamalama o Keriso, ina ia outou iloa le lelei mai le leaga; afai tou te fetagofi atu i mea lelei uma lava, a e le tauleagaina ai, e moni, e fai outou ma fanau a Keriso.
“O lenei foi … e mafai faapefea ona outou fetagofi atu i mea lelei uma?”3
O le faatuatua e mafai ai ona outou fetagofi atu ai i mea lelei uma. Ou te tatalo ma lo’u loto atoa ina ia faateleina lou faatuatua, o oe o se afafine o se Atua alofa. Ou te molimau atu o oe o se tasi o le au totoa, lea ua e taunuu mai ai i le vaega ua e i ai nei o lenei faigamalaga o le olaga. E faapei lava ona makaina oe o se taulaiga e le fili o le amiotonu, e faapena foi ona puipuia oe ma leoleoina e lou Tama Faalelagi ma le Alii o Iesu Keriso. La te silafia oe. La te silafia autau uma ma tagata taitoatasi o loo siomia ai oe. La te silafia le mea o loo i le lumanai mo oe. Ma ua La silafia filifiliga e te faia, o faanaunauga e te filifili e faamalie ai, ma tulaga o loo siomia ai oe o le a faia se eseesega tele e tausisia ai lou savali i le malamalama. Ou te molimau atu, o le Agaga o Keriso ma le Agaga Paia, o le a mafai ai ona e savali ma le mautinoa i soo se faigata o le a oo mai. Ona o lou taua tele, o le a ono ogaoga ai nisi o ou tofotofoga. E le manaomia ona e lotovaivai pe fefe. Ua saunia i taimi uma le ala e te ui atu ai i faigata ma o le a e maua pe afai e te faaaogaina le faatuatua.
E tatau ona i ai lou faatuatua e tatalo ai. E tatau ona i ai lou faatuatua e mafaufau loloto ai i afioga a le Atua. E tatau ona i ai lou faatuatua e faia ai na mea, ma e alu ai i nofoaga na e valaaulia ai le Agaga o Keriso ma le Agaga Paia.
Ou te folafola atu i totonu o nai aso o le a sosoo ai, o le a e lagonaina le malamalama mai o le Agaga o Keriso ma le Agaga Paia i lou olaga i aso taitasi. Afai e te savali i le malamalama, o le a e lagonaina i lena taimi se vaega o le mafanafana ma le fiafia lea o le a i’u ina avea mou, pe a toe foi atu i le aiga moni faatasi ma le fiaselau ma atonu e fiaafe isi o le a e aumaia, o e sa savavali i le malamalama aua sa e faia.
O le Ekalesia moni lenei a Iesu Keriso. O loo i ai se perofeta soifua, o Thomas S. Monson. Ma o loo i ai foi auauna moni ma agelu e fesoasoani ia te oe i luga o le ala ua faamalamalamaina. Ou te molimau atu ai i le suafa o Iesu Keriso, amene.