Elder José A. Teixeira
O Le Fitugafulu
O Elder José Augusto Teixeira o le Korama Muamua a Fitugafulu o se vaega o le seleselega lea na vaaia ina ua faatagaina ia faifeautalai o le Au Paia o Aso e Gata Ai i totonu o Potukale i le taufaaiuiuga o le 1975. I le 1976, sa faailoa atu ai i ona matua, o Fernando Teixeira ma Benilde Teixeira, ma le toatele o le aiga ia le talalelei toefuataiina, ma sa papatisoina le aiga atoa i le 1977.
A o lei oo i lena taimi, sa auai atu pea e le aunoa ia Elder Teixeira i lana lotu, e lagolago atu i ai i taimi o tapuaiga, ma faia mea uma e faamoemoeina mai se talavou ua talitonu. Ae sa i ai pea ana fesili e uiga i lona faatuatuaga.
Ina ua valaaulia o ia e faifeautalai e faitau le Tusi a Mamona ma tatalo e uiga i ai, sa ia faia lava. “O le amataga lena o la’u molimau i le Tusi a Mamona ma Iosefa Samita,” na ia saunoa ai.
Na soifua mai Elder Teixeira i le aso 24 o Fepuari, 1961, i Vila Real, Potukale, ae na ola ae i le aai o le iunivesite tuai o Coimbra, lea na ia auai atu ai i le Ekalesia i le 16 o tausaga. E pei lava o tagata uma e liliu mai, sa ia feagai ma faaiuga e uiga i uo. Ae o le mea e lelei ai, e lei leva ae talia e ana no ana faatulagaga fou. “Latou te iloa pe a ou oo atu i totonu o le lio ma e leai ma ni mea e mafai ona faia,” na te toe manatuaina ai.
Ina ua mavae le auaunaga i le Misiona a Potukale Lisbon, sa faatasi atu loa ia Elder Teixeira i le Fua Vaaleletau a Potukale ma sa faamautu i Oeiras o se vaega o se iunite faavaomalo a le NATO. A o i ai iina, sa valaauina ai o ia e avea ma faatonu o le va i fafo a le Ekalesia mo le atunuu. I se fonotaga faaleaoaoga, sa ia feiloai atu ai i le taitai faamaopoopo o le va i fafo a le siteki o Lisbon, o Filomena Lopes Teles Grilo, e nofo foi i Oeiras. Sa faaipoipoina i laua i le Malumalu o Bern Suiselani i le aso 5 o Iuni, 1984, ma o matua o ni atalii se toalua ma se afafine e toatasi.
E i ai faailoga o Elder Teixeira i le tausitusi ma le puleaina o pisinisi ma a o lei oo i lona valaauga lenei, sa avea o ia ma pule faavaomalo mo le Ekalesia, sa faamautu i Frankfurt, Siamani. Sa auauna atu Elder Teixeira o se peresitene o le itu, peresitene o le siteki, Fitugafulu Eria, ma peresitene o le Misiona a Pasila São Paulo i Saute.