O Aafiaga Faapitoa
O la tatou faigamalaga patino i le olaga tatou te maua ai le tele o aafiaga faapitoa lea e avea ma faavae o le faatuatua ma le molimau.
Ou te fia faaopoopo atu la’u tautinoga ma la’u molimau i lenei aso faapitoa e faapea o Peresitene Thomas S. Monson o le Perofeta a le Alii i le lalolagi. Ou te faafetai i lo’u mauaina o lenei avanoa e lauga atu ai i le konafesi aoao.
Ou te faafetai, e pei foi o outou, mo le aafiaga ua tatou maua i lenei konafesi logologoa i le talafaasolopito a o tatou lagolagoina, i se ala faatulagaina lelei, lo tatou perofeta fou, o le Au Peresitene Sili, ma isi taitai o le Ekalesia.
O lenei ituaiga o aafiaga e faamalolosia ai a tatou molimau ma faateleina ai lo tatou faatuatua i le iloa e sa’o lava, o le Ekalesia moni lenei ma le ola a le Alii.
O la tatou faigamalaga patino i le olaga tatou te maua ai le tele o aafiaga faapitoa lea e avea ma faavae o le faatuatua ma le molimau. O nei aafiaga e oo mai ia i tatou i le anoanoai o auala eseese ma taimi e lei fuafuaina. E mafai ona avea o ni mea mamana faaleagaga e tutupu po o ni nai taimi iti e faamalamalamaina ai. O nisi aafiaga e oo mai o ni luitau matuia ma mafatiaga faigata e tofotofo ai lo tatou tomai e taulimaina ai. E tusa lava po o le a le aafiaga, e aumaia e aafiaga taitasi se avanoa mo le tuputupu ae patino, le poto e sili atu, ma i le tele lava o tulaga, o le auaunaga ma le malamalama sili atu ma le alofa i isi. E pei ona fetalai le Alii i le Perofeta o Iosefa Samita i se ala faamautinoa i le taimi o se tasi o ona tofotofoga iloga i le Falepuipui o Liperate, “E tuuina atu ia te oe le poto masani ona o ia mea uma, ma avea mou lelei” (MFF 122:7).
A o faatupulaia ia aafiaga i o tatou olaga, latou te faaopoopo maia le malosi ma le lagolagosua o le tasi i le isi. E faapei lava ona lagolago e piliki o o tatou fale le fale atoa, e faapena foi, ona avea aafiaga o o tatou olaga patino ma faavae o a tatou molimau ma faaopoopo mai ai i lo tatou faatuatua i le Alii o Iesu Keriso.
Ua faapupula mai e le konafesi lenei le taua o se soifuaga e tumu i aafiaga. A o tatou mulimuli i fautuaga poto a o tatou taitai ma maofa i a latou aoaoga ma le agaga, pe o se mea ea e ofo ai le filifilia e le Alii o Lana Aposetolo sinia, ina ua mavae tausaga o tapenaga, e avea ma Ana perofeta filifilia?
O loo tau mai e lo’u faamanuiaga faapeteriaka o le a tuuina mai ia te au ni aafiaga faapitoa e faamalosia ai la’u molimau. Uso e ma tuafafine, mafaufau i aafiaga faapitoa ua faamanuiaina ai oe i lou olaga lea na e maua ai le talitonuga maumaututu ma le olioli i lou loto. E te manatua le taimi na e faatoa iloa ai o Iosefa Samita o le perofeta a le Atua o le Toefuataiga? E te manatua le taimi ina ua e taliaina le lui a Moronae ma iloa e moni lava o le Tusi a Mamona o se tasi lea o molimau ia Iesu Keriso? E te manatua le taimi na e mauaina ai se tali i tatalo faatauanau ma iloa ai e silafia e lou Tama Faalelagi oe ma alofa ia te oe lava ia? A o e mafaufau loloto i na aafiaga faapitoa, pe latou te le tuuina atu ea ia te oe se lagona o le faafetai ma le faamoemoe mautu e fetuleni atu i luma ma le faatuatua faafouina ma le naunautai?
E le i leva talu ai na ma maua ai ma Sister Rasband se aafiaga o le a ma le faagaloina lava. Sa tofia au ou te pulefaamalumalu i ni konafesi faalesiteki se lua i Peru. A o ma i ai iina, sa ma o i le aai o Puno, e i luga o Atumauga o Andes i le Vaituloto o Titicaca. I le maualuga e 12,000 futu i luga ae o le sami, sa ma maofa lava i lenei aai faatauvaa ma le matagofie, e tu matilatila i le vaituloto o Andes. Sa matou feiloai ma peresitene o siteki i le eria, ma sa faia sa matou faeasaite matagofie ma le fiaselau o tupulaga talavou mai le eria o Puno.
I se tasi taeao, sa valaaulia i maua ma te asiasi i se vaega toaitiiti o tagata o le ekalesia i le nuu, e nonofo i motu opeopea o le Vaituloto o Titicaca. O tagata e nonofo ai iina e faaigoa o Initia Uros o Polevia ma Peru.
Na ta’u mai ia i maua e faapea e i ai ni nai aiga o le Au Paia o Aso e Gata Ai ua auau faatasi ma fausia so latou lava tamai motu opeopea fou. Sa ma malaga ma le sagisagi fiafia i se vaa i le motu ma sa faafeiloaia ma le agalelei i maua e nei tagata ofoofogia o le ekalesia.
Sa ma siiina a latou pepe sa aui i ni palanikeke felanulanuai sili ona mananaia sa su’ilima. Sa ma aai i i’a na latou maua i lena lava aso mai le vaituloto, ma sa saunia ma le matua faaeteete lava ma faasoasoa ma le agalelei. Na ma vaai i a latou oloa e faatau atu ma faiva alofilima ma meaalofa e fetufaai ai le tasi ma le isi.
A o matou talatalanoa, sa ma iloaina ai e 45 minute e taualo atu ai ma toe taualo mai a latou fanau i paopao i Puno mo le seminare ma le aoga i aso taitasi. Sa matuai o ma fiafia lava aua e iloa lelei e nei tagata ia tusitusiga paia, ua malamalama i ai, ma fiafia i ai. Sa latou faaali mai ia i maua ma le naunautai o latou pepa faataga o loo aoga mo le malumalu, ua uma ona faia faaeega paia ma faamauina i le Malumalu o Cochabamba Polevia.
A e ma te lei tuumuliese, sa talosaga mai se tasi o tina pe mafai ona matou tootutuli ma i latou ma fai se tatalo faaleaiga. Ou te manatua lelei lo’u tootuli faatasi ma nei Au Paia faatuatua i luga o vao ofe galemulemu. A o matou tootutuli, sa talosaga mai pe mafai ona ou faia le tatalo, ma faaaoga ai le Perisitua Mekisateko, e faapaia ai lo latou motu fou ma le fale.
Sa matua faalotomaulaloina au ona o iina i lena motu opeopea o le Vaituloto o Titicaca, na talosaga mai ai ia te au nei aiga faatuatua o le Au Paia o Aso e Gata Ai, ou te tatalo mo le tamai motu o Apu Inti ma ole atu i le Alii ina ia faamanuia ia fale ma aiga o Lujano ma Jallahui.
A o ou mafaufau i lenei aafiaga faapitoa na faamanuiaina ai i maua e le Alii, ou te iloa sa faaopoopo mai ai se poloka faufale fou i lo’u fale o le faatuatua. E tele taimi ou te mafaufau ai i lena aafiaga i Puno, o se tasi o faamanatu o le faataunuuina o lo’u faamanuiaga faapeteriaka.
Mai le faatomuaga o le Mataupu Faavae ma Feagaiga, na tusia i le 1831, o loo muai ta’u mai ai le faalautelega o le galuega a le Alii i o tatou taimi, na faaalia mai ai e le Alii:
“A e peitai ia mafai ona taitoatasi le tagata ma tautala atu i le suafa o le Atua le Alii, o le Faaola lava o le lalolagi.
“Ina ia mafai ona faalauteleina foi le faatuatua i le lalolagi;
“Ina ia mafai ona faatuina a’u feagaiga faavavau;
“Ina ia mafai ona folafola atu le atoatoa o la’u tala lelei e e vaivai ma lotomaulalo e oo i tuluiga o le lalolagi” (MFF 1:20–23).
Uso e ma tuafafine, o tagata vaivai ma le faatauvaa o le Ekalesia, e pei o oe ma au, o loo aveina atu le talalelei i tuluiga o le lalolagi, i Puno, Peru, ma isi nofoaga maotua. O loo faateleina le faatuatua i tagata o le feagaiga a le Atua, ma ou te talitonu, e ala mai i le i ai o se teugaoa a le tagata lava ia o na aafiaga taua, e mafai ai ona tupu se faatelega o le faatuatua mo i tatou taitoatasi.
Na saunoa mai Peresitene Monson: “Ua poloai mai le [Alii]. Ma o i latou e usiusitai ia te Ia, pe latou te atamamai pe faatauvaa, o le a Ia faaalia o Ia lava i galuega mamafa, o feteenaiga, o puapuaga o le a latou feagai a o mafuta atu ia te Ia; ma o le a latou iloa ai i mea latou te oo i ai, Po o Ai o Ia” (I le “O le Ala a le Matai,” Liahona, Ian. 2003, 7; siitia mai ia Albert Schweitzer, The Quest of the Historical Jesus [1948], 401; faamamafa faaopoopo).
I nei aso i le tele o faasoesa faalelalolagi i o tatou olaga, a oo ina foliga mai ua lofituina i tatou i tofotofoga ma faigata, ia tatou manatua o tatou lava aafiaga faapitoa, faaleagaga. O nei poloka faufale o le faatuatua o le a tatou maua ai le talitonuga maumaututu ma le faamautinoaga o se Tama o i le Lagi alofa ma amanaia i tatou, o lo tatou Faaola o Iesu Keriso, ma la La’ua Ekalesia toefuataiina moni ma le ola. Ou te molimau atu ai i le suafa o Iesu Keriso, amene.