Na o Ni Nai Tikeri Lava
O le eseesega i le va o le fiafia ma le faanoanoa … e masani lava ona mafua i sina sese e na o ni nai tikeri lava.
O’u uso pele, ua ou lagonaina le malosi ma le agalelei a o tatou faapotopoto o le au perisitua a le Atua. Ou te alofa ia te outou. Ou te faamemelo ia te outou. Faafetai atu mo lo outou faatuatua, o a outou tatalo, ma lo outou naunautai e auauna atu i le Alii.
Ua lua nei masina talu ona valaauina au e Peresitene Thomas S. Monson e avea ma Fesoasoani Lua i le Au Peresitene Sili o le Ekalesia. Ou te mautinoa o lenei mea na matuai ofo ai le toatele, ma na matuai faateia ai foi au. O le mea moni lava ia, ou te faapea atu atonu o au le tagata i le lalolagi na tulua i le ofo tele, ae na sili lo’u toalua.
I le aso na feiloai ai le Korama a le Toasefululua i totonu o le malumalu e lagolagoina ia Peresitene Monson ma faauuina ma vaetofia e avea ma perofeta, tagatavaai, ma talifaaaliga ma Peresitene O Le Ekalesia a Iesu Keriso o le Au Paia o Aso e Gata Ai, sa ou lagonaina le olioli i le mauaina o le avanoa e sii ai lo’u lima e lagolagoina la’u uo pele ma lo’u taitai.
Ina ua maea ona lagolagoina ia Peresitene Monson, sa ia faasilasila mai loa ona fesoasoani.
O Peresitene Eyring, e le o se mea e ofo ai. O ia o se tamalii ua lauiloa ma tulagaese—o se filifiliga lelei tele e avea ma Fesoasoani Muamua. E maeu lo’u alofa ma lo’u faananau mo ia.
Ona faasilasila mai lea e Peresitene Monson o lona Fesoasoani Lua. O se igoa e matuai ese lava lo’u masani ai. O lo’u igoa.
Sa ou autilo solo i le potu, ona ou te le o mautinoa pe o sao la’u faalogo. Peitai, o laufofoga fiafia o o’u uso ma le silasila alofa mai ia Peresitene Monson na ou mautinoa ai o le a toe suia foi lo’u olaga.
Ua tatou misia uma lava Peresitene Hinckley. O le a ia faamanuiaina pea lava pea o tatou olaga.
O Peresitene Monson o le perofeta a le Atua mo o tatou taimi; ou te faamamalu ia te ia ma tuuina atu lo’u loto, manatu, mafaufau, ma le malosi atoa i lenei galuega tele.
I le 1979 na tuuvaaese ai se vaalele laupasese tele lava ma ni tagata se 257 i Niu Sila mo se malaga maimoa i le Anetatika ma toe foi mai. Ae peitai, e le iloa e pailate, sa i ai se tasi na toe fetuunaia ia le faatulagaga o le faigamalaga i le na o le lua lava ni nai tikeri. O lenei mea sese na mafua ai ona oo atu le vaalele i le 28 maila (45km) i sasae mai le mea na fuafua pailate e oo i ai. A o latou taulalata atu i le Anetatika, sa faaifoifo loa e pailate le vaa agai i lalo ina ia mafai e pasese ona maua se vaaiga matagofie o le laufanua. E ui lava o ni pailate ua lava le silafia, ae e leai se tasi na alu muamua i se malaga faapenei, ma e leai ma se tasi na iloaina o faatulagaga sese lea ua mafua ai ona faasaga sao lo latou alavaa i le Mauga o Erepasi, o se mauga mu o loo ola e oo i le 12,000 futu (3,700 mita) le maualuga pe a sasao a’e mai le laueleele e ufitia i le aisa.
A o faaauau pea ona felelei atu ia nei pailate, o le paepae o le kiona ma le aisa o loo ufitia ai le mauga mu faatasi ma le papae o ao o loo i luga ae, na foliga mai ai e pei lava o la e felelei i luga a’e o le eleele laugatasi. E oo atu i le taimi ua faailoilo mai ai e masini le lapataiga e faapea ua fai si saoasaoa tele ona latalata ae o le laueleele, ae ua fai lava si tuai. Na taia le vaalele i le autafa o le mauga mu, ma maliliu uma ai i latou sa malaga ai.
O se faalavelave matautia na mafua ona o se tamai mea sese—sa na o ni nai tikeri lava.1
I le gasologa o tausaga i le auauna ai i le Alii ma le anoanoai o faatalanoaga, sa ou aoaoina ai o le eseesega i le va o le fiafia ma le faanoanoa i tagata taitoatasi, ulugalii faaipoipo, ma aiga e masani lava ona mafua i sina sese e na o ni nai tikeri lava.
Saulo, le Tupu o Isaraelu
O le tala ia Saulo, le tupu o Isaraelu, o loo faataitai mai ai le tulaga lenei. Sa amata le soifuaga o Saulo i se folafolaga maoae, ae sa i ai sona taunuuga le manuia ma le matautia. I le amataga, o Saulo “o se taulealea aulelei, … e leai se tagata o le fanauga a Isaraelu e sili ona aulelei ia te ia.”2 O Saulo na filifilia lava o ia e le Atua e avea ma tupu.3 Sa ia te ia tulaga lelei uma—e maualuga o ia,4 ma e sau o ia mai se aiga tulelei.5
E moni sa i ai vaivaiga o Saulo, ae na folafola atu e le Alii o le a Ia faamanuia, lagolago, ma faauluola ia te ia. O loo tau mai e tusitusiga paia ia i tatou e faapea na folafola atu e le Atua la te faatasi ma ia e le aunoa,6 liliu lona loto,7 ma liua o ia e peiseai o se isi tagata.8
Ina ua ia mauaina le fesoasoani a le Alii, sa avea Saulo ma se tupu maoae. Sa ia tuufaatasia Isaraelu ma faatoilaloina ia sa Amoni, o e na ave faamalosia o latou eleele.9 E lei leva ae feagai o ia ma se faafitauli e sili atu—o le au Filisitia, o e sa i ai se autau tele lava faatasi ai ma kariota ma tagata tietie solofanua ma “tagata e pei o le oneone i le matafaga ona toatele.”10 Sa matuai fefefe tagata o Isaraelu i tagata Filisitia o lea na latou “lalafi ai i ana, ma le vao talatala, ma gaoa, ma olo maualuluga.”11
Sa manaomia e le tupu talavou le fesoasoani. Na auina atu le poloai mai le perofeta o Samuelu e faatali mai mo ia ma o le a oo atu le perofeta ina ia osia se taulaga ma saili se fautuaga mai le Alii. Sa faatalitali Saulo mo aso e fitu, ae lei oo atu lava le perofeta o Samuelu. Sa iu ina ua lagona e Saulo ua le mafai ona toe faatali. O lea sa ia faapotopoto mai ai le nuu ma sa ia faia se mea e le o ia te ia se pule o le perisitua e faia ai—sa osia e ia lava se taulaga.
Ina ua taunuu atu Samuelu, sa matuai faanoanoa lava o ia. “Ua e valea i le mea ua e faia,” na ia fai atu ai. Ana fai e onosai laitiiti lava le tupu fou ma aua nei alu ese mai le ala o le Alii, ana fai e mulimuli i le faatulagaga na faaalia mai o le perisitua, semanu e faatuina e le Alii lona malo e faavavau. “A o lenei,” na fai atu ai Samuelu, “e le tumau lou malo.”12
I lena lava aso, na iloa ai e le perofeta o Samuelu se vaivaiga tuga i uiga o Saulo. Ina ua uunaia e le malosi mai fafo, sa lei maua e Saulo le lotopulea e tumau ai i le ala, faatuatua i le Alii ma Lana perofeta, ma mulimuli i le faatulagaga ua faavaeina e le Atua.
O Mea Sese Laiti e Mafai ona Tele se Aafiaga i o Tatou Olaga
O le eseesega o nai tikeri, e pei ona i ai i le malaga i le Anetatika, po o le toilalo o Saulo e tumau i le fautuaga a le perofeta mo sina taimi, e mafai ona foliga mai o se mea itiiti. Ae e oo lava i nai sese laiti, i le tele o taimi, e mafai ona oo mai ai suiga iloga i o tatou olaga.
Sei o’u faasoaina atu ia te outou le auala na ou aoao atu ai le mataupu faavae lava lea e tasi i pailate talavou.
A faapea la o lea e te tuuvaaese mai se malaevaalele i le ekueta, e faamoemoe e faataamilo i le kelope, ae o lou alavaa ua sese ese i le na o le tasi lava le tikeri. E oo mai i le taimi e te toe taliu mai ai i le itulagi lava lea, faamata o le a sou mamao ese mai le mea na e amata atu ai? I ni nai maila? I se fia selau maila? E mafai ona e maofa i le tali. O se sese i se tikeri e tasi e toetoe ai lava a 500 maila (800 km) lou sese ese mai le ala sao, pe tasi le itula e lele ai se vaalele tele (jet).
E leai se tagata e manao i lona olaga ia taunuu i puapuaga. Ae o le toatele lava ua masani ai, e pei o pailate ma le pasese o le malaga maimoa, tatou te tuuvaaese atu ma lo tatou faamoemoe o se faigamalaga manaia, ae faatoa iloa mulimuli ane ua tuai, o se tamai mea sese lava i nai tikeri e mafua ai ona tatou oo atu i se taunuuga o le faatafunaga faaleagaga.
Pe I Ai se Lesona mo o Tatou Olaga i Nei Faaa’oa’oga?
O nai mea sese laiti ma nai see ese laiti mai aoaoga faavae o le talalelei a Iesu Keriso e mafai ona aumaia ai ni taunuuga faanoanoa i o tatou olaga. O lea e matuai taua ai lava lo tatou lotopulea ma vave faia ni faaiuga e faasa’o ai ina ia toe foi atu ai i luga o le ala sao ae aua le faatalitali pe faamoemoe o le a faasa’oina e mea sese i latou lava.
O le umi ona tatou faatuai e faasa’o, o le tele foi lena o le a oo i ai ni suiga e moomia, ma o le umi foi lena ona toe foi mai i luga o le ala sao—e oo lava i le tulaga e ono faamalumalu mai ai ni faigata.
O outou alii o le perisitua ua tuuina atu ia te outou se tiutetauave tele. Mafaufau i ai: ua tuuina atu e lo tatou Tama Faalelagi ia te outou tiakono, aoao, ma ositaulaga talavou ia “ki o asiasiga ma galuega a agelu ma le talalelei sauniuni.”13 O outou alii o le Perisitua Mekisateko ua outou mauaina se tautoga ma se feagaiga lea ua folafola atu ai ia te outou mea uma o loo i le Tama pe afai e te faalauteleina lou perisitua.14
Ua faamanatu mai e le Alii ia i tatou e faapea ‘aua o le ua foaiina atu i ai mea e tele e sueina mai ia te ia mea e tele.”15 O i latou o e tauaveina le perisitua a le Atua ua i ai se tiutetauave tele ina ia avea ma faaa’oa’o o le lelei i le lalolagi. Tatou te ola e tusa ai ma nei faamoemoega pe a vave ona tatou iloaina ia tulaga matautia ma aafiaga ia e faaosoosoina i tatou ina ia o ese mai le ala a le Alii ma pe a tatou mulimuli ma le lototoa i uunaiga a le Agaga Paia ina ia faia ni faasaoga o le a toe faafoi mai ai i tatou i luga o le ala.
O loo faaliliuina lenei konafesi i gagana e 92 ma faasalalauina atu i atunuu 96 e ala i le vavega o tekinolosi faaonaponei. O le toatele o outou le usoga o loo auai i le konafesi aoao e ala i le Initoneti. O tekinolosi fou e pei o lenei ua mafaia ai ona faasalalauina atu i le lalolagi le savali o le talalelei. O Uepi saite a le Ekalesia o ni faataitaiga lelei ia o le auala e mafai ona outou faaaogaina lenei tekinolosi e avea ma punaoa matagofie o musumusuga, fesoasoaniga, ma le aoaoina. E mafai ona avea ma faamanuiaga mo outou o umia le perisitua, o outou aiga, ma le Ekalesia.
Ae ia mataala. O nei lava foi tekinolosi e mafai ona faatagaina ia aafiaga leaga e ulufale atu i o outou aiga. O nei mailei matautia na o se kiliki lava o le mausi lona mamao ese. O ponokalafi, uiga malolosi soona fai, o le le faapalepale, ma le le amioatua ua faaumatia ai aiga, faaipoipoga, ma olaga taitoatasi. O nei mea matautia o loo tufatufaina atu e auala atu i ala eseese o faasalalauga, e aofia ai mekasini, tusi, televise, tifaga, ma musika, e faapea foi i le Initoneti. O le a fesoasoani le Alii ia te outou ina ia iloa ma aloese ai mai na mea leaga. O le vave ona iloaina le tulaga matautia ma se toe faasaoga manino o le auala lea o le a tausisia ai outou i le malamalama o le talalelei. O nai faaiuga laiti e mafai ona tau atu ai i ni taunuuga tetele.
O le ulufale atu i se saite ese lē mautinoa o talatalanoaga i luga o le Initoneti e mafai ona tatai atu ai oe i le ogatotonu o se afa matamataita. O le tuu o se komepiuta i se potu e tu ese e le mafai e le toatele o le aiga ona sao atu i ai e mafai ona avea ma amataga o se faigamalaga taufaasese ma le matautia.
Ae o loo moomia e le Alii e le gata i gaoioiga faatino i fafo, ae faapea foi i o outou manatu ma lagona i totonu ina ia latalata atu i le agaga o le tulafono16 e manaomia e le Atua le “loto ma le mafaufau matala.”17
O i tatou o le au perisitua a le Atua, ua i ai le tiutetauave ma le mana o le taitaiga e le tagata o ia lava: “E le tatau ona ou poloai atu i mea uma” na poloai mai ai le Alii. “E tatau i tagata ona galulue ma le naunautai i mea lelei, ma faia mea e tele i lo latou lava loto malie, ma faataunuuina le amiotonu tele; aua o i totonu ia i latou le mana latou te pulea ai i latou lava.”18
Na silafia e lo tatou Tama Faalelagi ae tatou te lei o mai i lenei olaga faaletino o le a i ai malosiaga faafeagai o le a taumafai e faaosooso i tatou ina ia o ese mai lo tatou ala, “aua ua agasala tagata uma lava, ma ua le oo i le viiga mai le Atua.”19 O le mafuaaga lena na Ia saunia ai se auala mo i tatou e faia ai faasaoga. E auala mai i le faiga alofa o le salamo faamaoni ma le Togiola a Iesu Keriso, e mafai ai ona faamagaloina a tatou agasala ma o le a tatou “le fano, ae maua le ola e faavavau.”20
O lo tatou naunautai ia salamo e faaalia ai lo tatou faafetai mo le meaalofa a le Atua ma mo le alofa ma le taulaga a le Faaola mo i tatou. O poloaiga ma feagaiga o le perisitua e aumai ai se tofotofoga o le faatuatua, usiusitai, ma le alofa mo le Atua ma Iesu Keriso, ae sili atu ona taua, e maua ai se avanoa e tofotofo ai i le alofa mai le Atua ma maua ai se fuataga atoa o le olioli i lenei olaga ma le olaga a sau.
O nei poloaiga ma feagaiga a le Atua e pei o ni faatonuga faasinoala o se faigamalaga mai le lagi ma o le a taitai saogalemu atu ai i tatou i lo tatou taunuuga e faavavau. O se taunuuga e matagofie ma mamalu e sili atu nai lo mea uma ua tatou iloa. O se taumafaiga e aoga. E aoga le faia o faaiuga e faasa’osa’o ai i le taimi nei ona tumau ai lea i luga o le ala.
Manatua: o le a le faatumulia le lagi ia i latou e lei faia lava ni mea sese, ae o i latou o e na iloaina ua latou se ese mai le ala ma sa latou faasa’oina o latou ala ina ia toe foi atu ai i le malamalama o le upumoni o le talalelei.
O le faatele lava ona tatou faatauaina o afioga a perofeta ma faaa’oa’o i ai, o le lelei foi lena o le a tatou iloaina pe a tatou se ese mai le ala—e tusa lava pe na o ni nai tikeri.
Ae Faapefea Pe Afai Ua Tatou Matuai Sese Mamao Ese Lava?
O lenei, uso e, ua i ai i latou o e ua mumusu e faia ni faasaoga talafeagai ma ua talitonu nei ua matuai mamao ese i latou mai le ala o le Alii ma ua le mafai ai ona toe foi mai. Mo i latou na, matou te folafola atu i ai le tala e lelei, o le talalelei lea o le togiola ma le faaolataga. E tusa lava po o le a lou matuai mamao ese mai le ala, e tusa lava po o le a le matuai mamao ua e se ai, ae o loo matuai mautinoa lava ma manino le ala e toe foi mai ai. Sau, o mai, ma aoao e uiga i le Tama, ia osia se taulaga o le loto momomo ma le agaga salamo. Ia faatuatua, ma talitonu i le mana faamama o le Togiola e le iu a Iesu le Keriso. Afai tatou te tautau atu a tatou agasala ma salamo mai ai, e tonu lava ma faamaoni le Atua e faamagalo ma faamama i tatou mai a tatou amioletonu uma lava.21 “E ui lava ina pei o ofu mumu a outou agasala, e sisina ia e pei o le kiona.”22
Atonu e le o se ala faigofie ma e moomia ai le loto pulea ma le naunautai, ae o lona taunuuga e mamalu e le mafaamatalaina. E te le o fuafua i se taunuuga faanoanoa. E toatele o loo naunau e lagolago atu ia te oe—o lou aiga, o epikopo ma peresitene o siteki, o ou taitai o korama ma faiaoga o aiga. Ioe, o lau uo sili lava o le Mataisau mamana naua na foafoaina le atulaulau. O Lana perisitua lena e te tauaveina. E malamalama o Ia i ou faanoanoaga. Na te silafia ou mafatiaga. O i Laua ma lou Tama o i le Lagi o le a faamanuia, faamafanafana, ma faamalosia oe; o le a La savavali i ou tafatafa ma tauave oe a o e tauivi ina ia faasa’oina lou ala.
O’u uso pele, o outou o ni atalii filifilia ma le taua o le Tama Faalelagi. Ua Ia tuuina atu ia te outou le mana paia o le perisitua. Faamolemole aua ne’i o outou se ese mai le ala, e tusa lava pe na o ni nai tikeri. Ia faalogo ma usitai i le Alii lou Atua ma o le a Ia faia mo oe le mea na Ia folafola atu Na te faia mo Saulo: O le a Ia tuuina atu ia te oe se loto fou, avea oe ma se tagata fou, ma o le a mafuta pea lava ma oe.
Ou te molimau atu i lo tatou Tama Faalelagi, o le na te silafia ma alofa ia te oe. Ou te molimau atu ia Iesu Keriso o lo tatou Faaola, o le ao o lenei Ekalesia. O Peresitene Thomas S. Monson o le perofeta a le Atua i aso nei. Ou te momoli atu o’u alofaaga ma la’u faafetai mo outou o au uo pele ma o’u uso o le perisitua. I le suafa o Iesu Keriso, amene.