Ann M. Dibb
Fesoasoani Lua i le Au Peresitene Aoao o Tamaitai Talavou
Ina ua fesiligia po o a ni aafiaga na sili ona saunia ai o ia mo le valaauina e avea ma fesoasoani lua i le au peresitene aoao o Tamaitai Talavou, sa tali Ann Monson Dibb ma le ataata ma se ata leotele, “O le avea ma tina! Ma le avea ma se afafine!” Na vave ona ia faaopoopo mai, “Ma le faaaogaina o aoaoga a le Faaola i lo’u olaga.”
Na soifua mai i le Aai o Sate Leki, Iuta, ISA, i le aso 30 o Iuni, 1954, i ona matua o Thomas S. Monson ma Frances J. Monson, ma sa aoaoina Sister Dibb i le tele o aafiaga matagofie e faapea “e manatu mai le Tama Faalelagi i mea e te moomia” ae ia “tatou faatuatua i le Alii ma Lana fuafuaga.”
E faamoemoe o ia o le a faaaoga e tamaitai talavou se tasi o mau e sili ona ia fiafia i ai, Faataoto 3:5–7: “Ia e faatuatua ia Ieova ma lou loto atoa; ae aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”
A o aoga i le Iunivesite o Polika Iaga, sa feiloai atu ai Sister Dibb i lona toalua i le lumanai, o Roger Dibb, o le sa ia faaipoipo atu i ai i le Malumalu o Sate Leki i le aso 5 o Mati, 1974. O i laua o ni matua o se fanau e toafa. Sa taulai atu le malosi o Sister Dibb i le tausiga o le aiga. Ae peitai, a o faasolo ina matutua lana fanau ma na ia lagonaina ua sao le taimi, sa amata loa ona ave ni ana vasega i tausaga taitasi, ma iu ai lava ina ua faauu ma se faailoga i aoaoga tulagalua.
E tele valaauga o le Ekalesia sa auauna atu ai Sister Dibb i ausilali taitasi. Sa auauna atu o ia i le fono faatonu aoao a Tamaitai Talavou a o lei valaauina i le au peresitene aoao o Tamaitai Talavou.
E talitonu o ia o le upumoni e tagitagi i tagata uma, ma e mafai ona tatou lagonaina uma le Agaga e ala i aoaoga a o tatou taitai. “Na ou aoaoina a o avea ma se tamaitai talavou e faapea e mafai ona e faatuatua i le molimau a se perofeta a o e taumafai ina ia maua sau oe lava molimau,” na ia saunoa ai. “E maua e tagata uma lena avanoa pe afai e tatalaina lou loto ma e te manao ia aoaoina e le Agaga.”