Elder James J. Hamula

O Le Fitugafulu

Afai e i ai se mea e tauaogaina ai au mo lenei valaauga o le molimau lea na ou mauaina i le 18 o tausaga a o ou saunia mo se misiona,” o le saunoaga lea a Elder James Joseph Hamula. “Na ou maua se aafiaga ofoofogia lea na ou maua ai se molimau malosi i le paia o le Alii ma Lana Ekalesia.”

Na soifua mai i le aso 20 o Novema, 1957, i Long Beach, Kalefonia, ISA, i ona matua o Joseph ma Joyce Hamula, e manatua e Elder Hamula le faitauina o le tala i le Uluai Faaaliga. Sa ia faitau i le fia iloa e le taulealea o Iosefa Samita po o le a le mea e sao, ma sa ia lagonaina e moomia foi ona ia alu atu i le Alii i le tatalo. “O lea sa ou tootuli ai i tafatafa o lo’u moega ma tatalo faatauanau atu i le lagi. Ma o le tali mai na ou maua ai se tali sa matuai manino ma e leai ma se sese e pei o soo se mea na ou oo i ai i le olaga. Na ou tu i luga ma le iloaina e moni le Ekalesia.”

Ina ua maea le auauna atu ai i le Misiona a Siamani Munich, sa faapea loa ona faauu mai ia Elder Hamula mai le Iunivesite o Polika Iaga ma se faailoga i faiga faaupufai ma le filosofia. Ona ia maua lea o se faailoga o le matuaofaiva o faatufugaga i le filosofia o faiga faaupufai ma se faailoga faafomai o tulafono, na maua mai foi i le BYU. I le taimi o lona valaauga i le Korama Muamua a Fitugafulu, sa galue o ia o se loia i Mesa, Arizona, ISA.

O Arizona lea na feiloai ai Elder Hamula ma lona faletua o Joyce Anderson. Sa faaipoipoina i laua i le Malumalu o Mesa Arizona i le aso 27 o Aperila, 1984, ma o loo avea nei ma ni matua o se fanau e toaono. O le la fanau tama laiti e toalua, o se masaga, sa fananau mai a o auauna atu ia Elder Hamula o se peresitene o le Misiona a Uosigitone D.C. i Saute.

Sa auauna atu foi Elder Hamula o se epikopo, peresitene o le siteki, ma se Fitugafulu Eria. “O o’u aafiaga uma i le Ekalesia o ni toe faaleleia ia o lena aafiaga tupito a o avea au ma se alii talavou e 18 tausaga a o o’u sauniuni mo la’u misiona,” na ia saunoa ai. “O le faavae lena o le mea atoa.”