Aafiaga o le Konafesi
O le Aso Gafua na sosoo ma le konafesi aoao, na maua ai e i latou e faaaogaina le LDS Gems, o se i-meli musuia i aso taitasi, se valaaulia ina ia faasoa mai ia aafiaga na maua i le potopotoga paia ma isi sauniga o le konafesi. O i-meli o loo i lalo o loo fai ma sui o le silia ma le 1,200 o tali na maua e mekasini a le Ekalesia.
I le taeao o le Aso Toonai a o lei amataina le konafesi, sa pisi lo matou aiga i a matou fuafuaga o le Aso Toonai, ae amata loa ona faasalalau mai i le matou televise ia ata ma leo o le Aufaipese a le Tapeneko i le tatalaina o le konafesi aoao. Sa matou faapotopoto ma le ma fanau tama e toalua ma taumafai ia “faaaloalo” i laua mo le tatalo amata. Ina ua susu mai Peresitene Uchtdorf i le pulelaa e amata le potopotoga paia, sa suia le faalogona i lo matou fale. Sa tootutuli uma i matou e toafa i luma o le televise, sa faatumulia lo matou fale i le Agaga. Sa ou tau lagona le maasiasi ona ua matou i ai i lenei taimi paia ma o matou ofu faalesaumausau i totonu o se potu ua matuai gasu uma i taaloga sa faia ai. Ae, ina ua matou tutulai e sii o matou lima i le lagolagoina, sa faatumulia lo’u loto i le olioli. Na iu ina ua tutu uma i luga lo matou aiga, e oo lava i le pepe sa sii lona lima taumatau, ma sa i ai se lagona paia lea e masani ona lagonaina e se tasi i totonu o le malumalu. Sa matou tutu faatasi ma molimauina le sa’o o le mea na faamautuina mai e le Agaga.
I se taimi mulimuli ane, sa toe amata foi le pisapisao o tamaiti ona ma kiina lea i luga le leo e faalogologo ai i failauga, ae o lena taimi puupuu sa tumau ai le filemu i lo matou fale ma o matou loto.
Christina N., Iuta, ISA
E le mafai ona lava au upu e faamatala ai ou lagona sa i ai i lenei konafesi. Sa matuai malosi lava le Agaga; sa mafai ona ou matamata i lo’u fale, ma sa mafai ona ou lagona le siomia o au e le Agaga. E lei leva talu ona ou toe toaga mai, ma o le vaavaai atu ia Peresitene Monson o toe faafeiloai mai au i totonu o le lafu sa ou lagona ai e pei lava o loo talanoa sao mai ia te au. Sa ou fiafia i lauga uma. Sa fetalai mai le Tama Faalelagi e auala mai ia i latou, ma sa mafai ona ou matuai lagonaina. Ou te iloa ou te le atoatoa, ae ua ou matuai lagonaina le moomia ona ou toe foi i le lotu ina ia mafai ona fafaga ai au ma toe faia se amataga fou. Sa le mafai ona lava ni mea na ou maua i le konafesi i lenei taimi. Ua uma ona ou toe foi i luga o le Initoneti ma toe faalogologo i ai. Ua ou faamoemoe ou te auai atu i la’u uarota i le vaiaso a sau.
Jeanne U.
O se mea matagofie le faalogologo atu i savali o le konafesi, aemaise lava o le perofeta soifua, o Peresitene Monson, e ui lava i le tulaga faapea o lea ou te i ai i le isi itu o le lalolagi i se atunuu e lei mafai lava ona talaiina ai le talalelei. Ae o tekinolosi, ua mafai ai ona ou auai ma lagonaina le Agaga ma faamalamalamaina ai. Ae peitai, o le faalogo atu i fautuaga na tuuina mai faapea ma molimau na fofogaina, na faateteleina ai lo’u moomoo ina ia mafai e o tatou uso ma tuafafine uma ona tofo i le anoanoai o faamanuiaga o le talalelei. Ou te tatalo ina ia vave ona tupu lena mea.
Janryll F.
O le taimi sili ona mamana o le konafesi ia te au o le saunoaga lea na tuuina mai e Peresitene Uchtdorf e uiga i le vaalele na pa lea na tupu i le Anetatika. Na matuai taia ai lava au i le mafaia e se mea faapea le faatauvaa ona i ai sona aafiaga tele lea e mafai ona i ai ni taunuuga umi e le mafai ona suia. Na faaalia mai ai foi faapea e tusa lava po o le a le mafai ona tatou o ese mai le ala sao ma le vaapiapi, e moomia lava ona tatou tautino atu ua tatou sese ma saili le faamagaloga mai lo tatou Tama Faavavau alofa. E matuai manatu popole o Ia mo lo tatou soifua manuia ma e alofa ia i tatou pe a mafai ona tatou talia o tatou sese, aoao mai ai, ma tutupu ae ai faaleagaga mai nei sese.
Orion H., Colorado, ISA
Na fesili mai sau uo mamae i le aoga po o a au mea na fai i le faaiuga o le vaiaso. Na ou tau atu i ai, ma o le autu o le konafesi aoao na maua ai le auala mo ana fesili toe tulitatao e uiga i o’u talitonuga ma le Tusi a Mamona. Sa mafai ona ou faaaogaina ia Mataupu Faavae o le Faatuatua e faasoa atu ai nisi o eseesega taua o la tatou Ekalesia mai i isi lotu Kerisiano, ma sa mafai ona ou faamalamalama manino atu i ai le Tusi a Mamona ma lona sootaga i le Tusi Paia.
Ou te matuai faafetai mo lenei avanoa na ou maua! Ua ou iloa na taialaina au e le Agaga i au tali i ana fesili, ma ana le seanoa le konafesi aoao, semanu ou te le maua le agaga sao e saunia ai e tali ia fesili.
Ellie W., Egelani
I le avea ai ma se tagata liliu mai i le 1972, sa ou le toe toaga mo le silia ma le 20 tausaga. Sa ou toe toaga mai pe tusa ma le 10 tausaga talu ai ma ua faamauina au i le malumalu i lo’u toalua o se alii foi na liliu mai. Ou te alofa ia Peresitene Hinckley ma sa ou lagonaina e leai se perofeta e mafai ona tauaveina lona tulaga. A o tuuina mai ia Peresitene Monson mo lo tatou lagolagoina, sa tau oso lo’u ita ma lo’u le fiafia, aua ou te manatu e le mafai ona ia faia le galuega. E maeu lo’u faauamalo sa i ai! Ina ua tulai Peresitene Monson e saunoa, sa ou vaai totoa atu i ona mata ma mata’i ana gaoioiga uma. Sa i ai le susulu ma le pupula lava lea e tasi i ona mata lea sa i la’u pele o Peresitene Hinckley! Sa lofituina au i le olioli ma le iloa o loo i ai le Agaga Paia i lenei tamalii—o la’u perofeta fou, o le tagatavaai, ma le talifaaaliga.
Mary Lou R., Niu Mekisiko, ISA
Sa uunaia au e le Agaga i le taimi o le konafesi ina ia suia lo’u olaga. E ui lava sa ou “toaga” i le Ekalesia i lo’u olaga atoa, ae lei matuai uunaia atoatoa au e le Agaga e pei ona sa i ai i lenei konafesi. Na ou lagonaina o savali uma sa faatatau mai ia te au. O le a ou aapa atu i lo’u aiga ma uo ma talosagaina se faamagaloga mo soo se mea sese na ou faia ia i latou ma faamagalo atu i isi o e na faatiga mai ia te au. O le a ou faia i isi e pei ona ou manao e faia mai ia te au ma mulimuli i le faataitaiga a le Faaola i le latalata e sili ona ou mafaia ai.
Delbert C., ISA
E feauauai lo matou aiga i tiute o le afiafi faaleaiga. O lo’u toalua o le Aso Gafua na sosoo ma le konafesi. I le taimi o le sauniga o le afiafi o le Aso Sa, na tuu mai ai e Elder Zwick se lesona i le tausisia o o tatou faatulagaga. Na faaaoga e lo’u toalua lenei lauga e toe faamamafa ai le moomia ona tausisia o o tatou faatulagaga. Na ou kopiina le faila MP3 mai le Uepi saite. Sa matou nonofo faatasi o se aiga ma toe faalogologo atu i le lauga. Na matou maua ai se avanoa e toe aumaia ai autu o le filifilia o uo, faia o faaiuga lelei, ma le faia o se fuafuaga o le olaga faatasi ma lo ma atalii e 14 tausaga le matua.
Gwen D., Uosigitone, ISA
I le taimi o le potopotoga paia, sa ou lagonaina ai le faamanuiaina, faalotomaualaloina, ma le faafetai i le mafai ona ou i ai i lo’u fale ma auai faatasi atu, ma tulai ma sii lo’u lima e lagolago ai lo tatou perofeta fou, o Peresitene Monson. Na maligi o’u loimata ina ua mafai e la’u tama tama, e lei leva ona atoa le 12 ma ua i ai le Perisitua Arona faapea ma la’u tama teine o loo i Tamaitai Talavou ona faia le mea lava lea e tasi. O le matagofie o le Agaga lea sa matuai malosi lava le faamautuina i lo’u loto o Thomas S. Monson o le tagata lea ua finagalo le Alii ia i ai i le ao o Lana Ekalesia i aso nei! E leai se masalosalo i lo’u manatu i le paia o lona valaauga paia.
Maridee H., Niu Mekisiko, ISA
I le avea ai ma se tagata nofotoatasi, i le taimi o le lauga a Elder Ballard, na ootia lo’u mafaufau ma lo’u loto i auala e mafai ona ou saunia ai au ina ia sili atu lo’u alofa i lo’u toalua i le lumanai ma sili atu ona auauna ia te ia ma tauaveina ana avega, ina ia mafai ona mama. E leai se mea i lo’u olaga i le taimi nei ua sili atu ona taua nai lo le sailia o se toalua e mafai ona ou faaipoipo i ai i le malumalu ma tausia se aiga ina ia iloa ma viia ai o ia. Ua ou fiafia lava ma tulimatai atu e alofa ia te ia ma lo’u loto atoa, manatu atoa, mafaufau atoa, ma le malosi atoa.
Mike S., Florida, ISA