Elder Allan F. Packer

O Le Fitugafulu

E manatua e Elder Allan Forrest Packer a o laitiiti pe tusa o le 10 po o le 12 tausaga, na te lei lagonaina le mauaina o ni tali i ana tatalo. I se tasi aso a o la galulue ma lona tama, o Boyd K. Packer, lea ua avea nei ma Peresitene o le Korama a Aposetolo e Toasefululua, sa faapea ona faamatala atu i ai e Allan lona popolega.

Sa aoaoina o ia e lona tama i se tala faatusa, e faapea e le faaaogaina e pailate a latou palasuti i taimi uma e felelei ai, ae o loo latou faataitaia pea ona ofuina. Sa uunaia e Peresitene Packer lona atalii ina ia faaauau pea ona tatalo, ia onosoai, ma ia maua le faatuatua e faapea afai na te moomia se tali, o le a ia mauaina lava.

“O lena lesona sa fesoasoani ia te au i popofou o le atiina ae o la’u molimau,” na saunoa ai Elder Packer, lea e lei leva talu ona valaauina i le Korama Muamua a Fitugafulu.

Na soifua mai Elder Packer i Brigham City, Iuta, ISA, i le aso 7 o Iulai, 1948, i ona matua o Boyd Kenneth Packer ma Donna Smith Packer. E ui o i laua ma lona faletua o Terri Bennett Packer, o ni tagatanuu moni o Iuta, ae sa la feiloai i Boston, Massachusetts, ISA, a o la aooga ai i se aoga maualuga. Ina ua maea le misiona a Elder Packer i le Misiona a Andes ma Colombia-Venesuela, sa faaipoipo loa i laua ma Terri i le Malumalu o Sate Leki i le aso 1 o Iuni, 1970. O i laua o ni matua o se fanau e 8 ma ua 17 fanau a le la fanau.

Na maua e Elder Packer se faailoga o le tagata malaga i le enisinia o tekinolosi faaeletonika mai le Iunivesite o Polika Iaga. Sa faigaluega o ia i pisinisi ma galue foi o se sui peresitene mo le tele o kamupani.

Sa auauna atu foi Elder Packer i le anoanoai o valaauga o le Ekalesia, e aofia ai le epikopo, Taitai Sikauti, fesoasoani i se au peresitene o le siteki, peresitene o le Misiona a Sepania Málaga, ma se sui o le aufono faatonu o Alii Talavou.

“Ou te iloa e moni le galuega,” na saunoa ai Elder Packer. “O le Faaola o lo tatou Togiola ia. Na Ia tatala le faitotoa ma tuu mai ia i tatou le avanoa e toe foi atu ai i lo tatou Tama. Ua faamamaluina lava au i le mafai ona fesoasoani atu ia te Ia e fai Lana galuega.”