Tu Masani Amiotonu
Pe o tatou fatuina ea i totonu o o tatou aiga ni aganuu o le a faigofie ai e a tatou fanau ona mulimuli i perofeta soifua?
Mo se vaitaimi umi e mafai ona ou manatuaina, sa i ai i le lima agavale o lo’u tama se mama penina manaia lanumumu. Na faapea ona tuufaasolo atu i lo’u tuagane e toatasi. Ou te matea, o le a avea ma se tu masani i totonu o le matou aiga—o se measina e tuufaasolo atu mai lea augatupulaga i lea augatupulaga. O le a avea o se tu masani matagofie, faatasi ai ma ni lagona mananaia e manatuaina ai.
E tofu i tatou uma ma ni tu masani i totonu o o tatou aiga. O nisi o na tu masani o ni mea faalelalolagi. O nisi e i ai ni uiga loloto. O tu masani e sili ona taua e fesootai ma ituaiga olaga o loo tatou ola ai, ma o le a tumau pea pe a mavae atu i tatou a o faatosinaina ma faatonutonuina ai olaga o a tatou fanau. I le Tusi a Mamona, tatou te faitau ai e uiga i sa Lamana o e na matuai aafia i tu masani a o latou tama. Fai mai le Tupu o Peniamina, o i latou o se nuu na le iloa se mea e uiga i aoaoga o le talalelei “ma ua le talitonu i ai pe a aoaoina atu ia te i latou, ona o uputuu le tonu a o latou tama” (Mosaea 1:5).
O a ni ituaiga tu masani ua tatou maua? O nisi [tu masani] atonu e afua mai i o tatou tamā ma ua tatou tuufaasoloina atu nei i a tatou lava fanau. Pe o ni tu masani ia ua tatou mananao i ai? Pe o ni tu masani ua faavae i faiga amiotonu ma le faatuatua? Pe o le tele lava o ni mea faalelalolagi, po o ni mea e faavavau? Pe o tatou fatuina ea ma le iloa lelei ni tu masani amiotonu, pe ua na o lo tatou taliaina lava o mea e tutupu ia i tatou i le olaga? Pe o fatuina ea a tatou tu masani ina ia tali atu i leo vavaō o le lalolagi, pe o faaosofiaina e le leo itiiti ma le malu o le Agaga? Pe o tatou fatuina ea i totonu o o tatou aiga ni aganuu o le a faigofie ai e a tatou fanau ona mulimuli i perofeta soifua, pe o ia tu masani o le a atili ai ona faigata mo i latou?
E faapefea ona tatou iloiloina a tatou aganuu e tatau ona i ai? Ua tuuina mai e tusitusiga paia se mamanu lelei lava. I le Mosaea 5:15 o loo faapea mai, “O le mea lea, ou te manao ai ina ia outou tutumau ma le le mafaagaeetia, ia fua mai pea i galuega lelei.”
Ou te fiafia lava i lenei mea aua ua tatou iloa o tu masani, e tutupu mai i le aluga o taimi a o tatou faia pea lava pea ia amioga e tasi. A o tatou tutumau ma le lē masuia i le faia o mea lelei, o le a faapea ona mauaa a tatou tu masani i le amiotonu. Ae e i ai la’u fesili. E faapefea ona tatou iloa le mea e lelei po o le, sili atu foi ona taua, o le mea ua lava lona lelei? O le isi mau o loo aumaia ai se isi faamatalaga mo i tatou o loo maua lea i le 3 Nifae 6:14. O loo ta’u mai ai e uiga i se nuu “o e na faaliliuina mai i le faatuatua moni; ua le mafafai ona te’a ese ai, aua ua mausali i latou, ma ua mautu ma le le mafaagaeetia, ua loto ina tausi i poloaiga a le Atua ma le filiga uma.”
Ua tatou iloa o lo tatou liua i le “faatuatua moni” e muamua atu i lo tatou mafai ona tumau mausali, mautu, ma le le mafaagaeetia i le tausiga o poloaiga. O lenei liua o se talitonuga mausali ia Iesu Keriso i le avea ai ma o tatou Togiola. O se molimau i lenei mea o loo maua i le Tusi a Mamona, o se tasi molimau ia Iesu Keriso. E vaavaalua ma le Tusi Paia i le folafolaina atu o le paia ma le misiona a Iesu Keriso, faapea foi ma le moni o se Tama o i le Lagi soifua. O perofeta uma o loo ta’ua i nei tusi paia ua tuuina mai a latou molimau patino e uiga i nei mea, faapea foi ma ni aoaoga i auala e tatau ona tatou ola ai ina ia tatou agavaa mo le Togiola ma maua le filemu ma le fiafia o le tagata lava ia.
E na o le tasi lava le auala e mafai ai ona liua le tagata lava ia. E auala mai i se molimau a le Agaga a o tatou suesue i nei lava mau o loo molimau mai ia Iesu Keriso. E oo mai a o tatou tatalo ma anapopogi. E oo mai pe a i ai lo tatou naunautaiga loloto e iloa le upumoni. O lo tatou faamoemoega e tatau ona i ai, o le saili lea o le upumoni, nai lo le faamaonia o a tatou amioga e ala i le saili masei i tusitusiga paia, i aoaoga a perofeta, po o le Ekalesia lava ia. O a tatou taumafaiga e tatau ona agai atu i le lagonaina o musumusuga a le Agaga, nai lo le usitai i manatu o le lalolagi. E tatau ona tatou naunau e tatala o tatou loto ma mafaufau, talia le auala a le Alii, ma afai e manaomia, sui o tatou olaga. E oo mai le liua o le tagata lava ia a o amata ona tatou ola i le mea o loo finagalo le Alii tatou te ola ai—ia tutumau ma le le mafaagaeetia i le tausiga o poloaiga uma, ae le na o poloaiga e fetaui [ma i tatou]. Ona avea ai lea o lenei mea ma se faagasologa o le toe faaleleia, a o tatou taumafai ia sili atu le lelei o aso taitasi nai lo le aso ua mavae. O lea, e avea ai a tatou tu masani ma ni tu masani o le amiotonu.
Ou te valaaulia i tatou uma e faaavanoa sina taimi e mafaufau ai i tu masani o o tatou olaga ae pe o faapefea ona aafia ai o tatou aiga. O a tatou tu masani i le tausia o le Aso Sapati, tatalo faaleaiga, suesueina faaleaiga o tusitusiga paia, auaunaga ma le toaaga i le Ekalesia, faapea foi ma mamanu o le faaaloalo ma le faamaoni i le aiga, o le a faapea ona i ai se aafiaga tele i a tatou fanau ma o latou lumanai. Afai o loo faavae o tatou tulaga faamātua i aoaoga a tusitusiga paia ma perofeta o aso e gata ai, e le mafai lava ona tatou sese. Afai o taimi uma e tulai mai ai se luitau e muamua lava ma e tatau ona liliu atu o tatou loto i lo tatou Tama o i le Lagi mo le taitaiga, o le a tatou i ai i se tulaga saogalemu. Afai ua iloa e a tatou fanau le tulaga tatou te tutu ai, ma o taimi uma tatou te tutu ai i le itu a le Alii, ua tatou iloa, ua tatou i ai i le itu e tatau ona tatou i ai.
O lenei, o le mea taua lava o lo tatou galulue pea e fai nei mea. Tatou te le atoatoa ai, ma e le o taimi uma o le a tali lelei mai ai o tatou aiga, ae o le a tatou fausia se faavae malosi o tu masani amiotonu e mafai ona faalagolago i ai a tatou fanau. E mafai ona latou pipii i lena faavae pe a oo ina faigata le olaga, ma e mafai ona latou toe foi atu i lena faavae pe afai o le a latou se ese i se taimi.
I le faaiuga o le soifua o lo’u tama, e tele atu mea nai lo na o se mama penina lanumumu sa ia tuufaasoloina mai ia i matou, o lana fanau. Na vaivai lona tino, ae o le mea moni, sa tulai o ia o se poutu o le malosi, o se faataitaiga o le amiotonu ma le upumoni. E ui ina ua matou le toe faatasi, ae o lona lava soifuaga sa maua ai tu masani ua faapea ona faamalolosia ai i matou i le asō. Sa “tutumau ma le le mafaagaeetia [o Ia], ua loto e tausi i poloaiga a le Atua ma le filiga uma.”
Pe mafai ona tatou faia lenei mea mo a tatou fanau? O le a le talatuu o loo tatou tuuina atu ia i latou i le taimi nei? O le a le talatuu mo a taeao? E mafai ona amata atu ia i tatou. Pe o le a tumu ea o latou loto ma olaga i tu masani e faigofie ai ona latou talia ma mulimuli i le Alii ma perofeta o aso e gata ai? Pe o le a mafai ea e i tatou i le avea ai o ni aiga ona maua faamanuiaga ua folafolaina, “ina ia faamaufaailogaina outou mōna e Keriso, le Alii le Atua pule aoao, ina ia aveina atu outou i le lagi, ina ia outou maua le olataga e tumau ma le ola faavavau” (Mosaea 5:15)?
Uso e ma tuagane, ou te iloa tatou te mafaia! Ou te iloa e alofa le Atua ia i tatou ma o loo faatalitali mai e fesoasoani ia tatou o atu ia te Ia. E mafai e i tatou taitoatasi ona iloa ua moni nei mea. Ua ou iloa e moni! Ou te iloa o loo soifua le Atua; o Iesu Keriso o Lona Alo ma lo tatou Togiola. E moni le talalelei a Iesu Keriso; o loo i ai ma o loo molimau mai ai tusitusiga paia. Ma o loo i ai so tatou perofeta moni ma soifua i aso nei—o Peresitene Thomas S. Monson. Na saunia o ia ma aumaia i nei aso e taitaia le Ekalesia a le Alii.
A o tatou “tutumau ma le le mafaagaeetia” i le tausiga o poloaiga a le Alii, o le a tatou maua faamanuiaga o le lagi mo i tatou lava ma mo o tatou aiga.
Ou te tatalo ina ia tatou lagonaina lenei [savali] i le taele o o tatou loto ma o tatou olaga, i le suafa o Iesu Keriso, amene.