Laulaututu e fai ma Molimau
E mafai … ona outou laulaututu e fai ma molimau a le Atua e ala i le faafaileleina o se agaga o le faatuatua, alofa, filemu, ma le molimau i o outou aiga i le taimi nei.
A o ou tulai atu i lenei pulelaa, ou te vaai faalemafaufau i foliga o tamaitai talavou uma i le lalolagi. E ese lo’u alofa ia te outou! Ae sili ai lava ona ou fiafia e folafola atu faatasi ma outou o le a tatou “laulaututu e fai ma molimau a le Atua i aso uma, ma mea uma, atoa ma nuu uma.”1 E faapefea ona tatou faia o lenei mea? A o o’u tautala atu, ou te tatalo ia taialaina i tatou e le Agaga, ma molimau mai ia i tatou taitoatasi i le auala e mafai ai ona tatou laulaututu e fai ma molimau a le Atua.
A o faamisiona le ma fanau, sa latou aoaoina e faapea a tatou laulaututu e fai ma molimau ia Iesu Keriso, o le a faamautuina e le Agaga Paia lena molimau. O se tasi o le ma fanau teine, sa i ai sana tagata sailiili ofoofogia, e igoa ia JieLei. Sa usitaia e lenei tamaitai talavou matua ia poloaiga fou uma lava sa aoaoina ai o ia, e tusa lava po o le a le faigata. O ia o se tamaitai aoga sa tauivi e tau posiposi lana faasoa i mea tautupe, ae sa amata ona ia totogiina ana sefuluai ina ua ia aoao e uiga i lena tulafono. O lana galuega faavaitaimi sa manaomia ai lona faigaluega i le Aso Sa, ae sa ia maua le lototele e talosagaina ai lona falefaigaluega pe mafai ona sui ona itula i se isi aso, ina ia mafai ai ona auai o ia i le sauniga faamanatuga.
E ui lava i lona maelega, ae sa leai se molimau mautu a JieLei i le Tusi a Mamona. Sa iloa e le ma tama teine ma lana soa na te manaomia se molimau mai le Agaga e faamautu ai lona moni, o lea sa la saunia ai se lesona mo ia e uiga i le Agaga Paia. A o la galulue i ai, sa foliga mai e lei maua se faalogona sa’o. Ina ua latou tatalo e uiga i ai, sa latou maua le uunaiga e sui, ae ia tuu atu se lesona e uiga ia Iesu Keriso.
Ina ua oo mai le taimi na atofaina mo le feiloaiga, sa amata e nei faifeautalai ona aoao ia JieLei e uiga ia Iesu Keriso. Sa amata ona tafe ifo loimata i ona alafau. Sa na o lona fesilisili pea, “O le a lenei lagona ou te faalogoina?” Ona la molimau atu lea ia te ia, o le Agaga. O le mea tonu lava lea sa la mananao ia tupu, lea ua tupu. O le taimi lava lena, sa manatua ai e le ma tama teine, o se tasi o matafaioi maoae a le Agaga Paia, o se molimau lea ia Keriso. O Iesu lava Ia na fetalai, “O le Fesoasoani, o le Agaga Paia lea, … e avea o ia ma molimau ia te au.”2 Sa iloa e le tama teine a o tu atu o ia e avea ma se molimau ia Iesu Keriso, sa faapea ona faamautuina e le Agaga Paia. E mafai foi ona tatou laulaututu e avea ma molimau a o “tatou talatala ia Keriso, tatou te olioli ia Keriso, ma tatou talai atu Keriso” ma vaavaai atu ia te Ia o le puna mo le “faamagaloina o a [tatou] agasala.”3
Sa faapotopoto e le Tupu amiotonu o Peniamina i le Tusi a Mamona lona nuu e o mai i le malumalu ina ia mafai ai ona ia talanoa atu i ai e uiga ia Keriso ma folafola atu i ai Keriso. Sa ia aoaoina lona nuu e uiga i le agalelei o le Alii, o le mana, poto, onosai, ma le mea sili ona taua, o le Togiola lea. A o ia tu atu e fai ma molimau, sa tuuina atu e le Agaga ia i latou e faapea o Iesu Keriso o le Faaola, e faapei ona faia ia JieLei. Ona apoapoai atu lea o le Tupu o Peniamina i lona nuu ina ia tumau mausali i lo latou faatuatua ia Keriso. Sa alalaga tagata uma:
“Ua matou talitonu i upu uma ua e fetalai mai ai ia te i matou … ona o le Agaga o le Atua … , na ia faaliliuina a matou amio ma o matou loto, ua le toe i ai so matou manatu e fai amio leaga, a e fia fai pea lava le amio lelei… .
Ua matou fia osi le feagaiga ma lo tatou Atua … ma usiusitai i ana poloaiga i mea uma na te poloaiina ai i matou.”4
Na osia e le nuu o le Tupu o Peniamina se feagaiga e usiusitai poloaiga i poloaiga a le Atua, e faapei foi o i tatou taitoatasi.
Afai tou te tausia lena feagaiga, o le a outou laulaututu atu e fai ma molimau i a outou tupulaga. Talu ai nei lava, na manatuaina ai e la’u lava fanau ma o latou taitoalua ia taimi i le gasologa o tausaga, na latou tutu atu ai mo mea sa’o e ui i le uunai mai o a latou tupulaga. O le tasi e le taitai ona auai i tauvaga a le au tapuai i Aso Sa; o le isi na fai i lona pule i le galuega e le faigaluega i le aso Sapati. O le isi sa matua musu lava e matamata i se ata tifaga ponokalafi i se fale o se uo ae na o le 11 ona tausaga; o le tasi sa musu e matamata ma tamaiti o lana vasega i mekasini ponokalafi. Na inosia uma i latou mo sina taimi talu mai lena taimi. O le isi tamaitiiti sa musu e talia ma e ilitata i gagana leaga, lē mafaufau, ma le masoa i lona siosiomaga faigaluega. O le tasi sa teena le ava malosi na gaoi mai e lana uo mai le pusa sa loka a ona matua. O le isi, e na o ia le tagata o le Au Paia o Aso e Gata Ai i lana vasega, na tu i luga e faatino sana galuega na tuuina atu o le Igilisi i le vasega ae i’u ane ua tali atu i fesili e uiga i le Tusi a Mamona. O loo faaauau pea lava e a ma fanau ua faaipoipo ona fanauina fanau e ui i faitioga faalelalolagi.
O taimi faapenei semanu e mafai ona latou lagonaina le tuuatoatasi; ae peitai a o latou laulaututu atu e fai ma molimau, sa latou lagonaina le mafutaga ma le faatasi atu o le Agaga Paia. Sa faaauupegaina foi i latou i faamanuiaga e maua mai i le usiusitai i poloaiga a le Atua. Ua Ia folafola mai ia te i tatou: “Aua e te fefe; aua ou te ia te oe: aua le fetepatepai; aua o au o lou Atua: ou te faamalosia oe; e moni, ou te fesoasoani ia te oe; e moni, ou te taofia oe i lo’u lima taumatau e i ai le amiotonu.”5
Sa lagolagoina moni lava la’u fanau i Lona aao a o latou avea ma molimau o le Atua e ala i le tutu mausali i le tausiga o Ana poloaiga. Ua faamanuiaina ma faamalosia a’u i a latou faataitaiga.
A o outou laulaututu e fai ma molimau i totonu o o outou aiga, o le a outou faamalolosia o outou aiga. E tele naua taimi tatou te mafaufau ai i le fuaitau o loo i le autu a Tamaitai Talavou, “ia faamalosia le aiga ma le auaiga,”6 e le gata ina faatatau i tiutetauave o tamaitai talavou i le lumanai pe afai e avea o ni ava ma ni tina, ae e faatatau foi i o latou tiutetauave o ni afafine ma uso i o latou aiga iinei ma le taimi nei.
Sa fesoasoani lo’u lava tina e faamalosi lona aiga ma lona auaiga i lona talavou. O ia o le ulumatua i se aiga e le toaaga i le lotu, ae sa fanau mai ma le meaalofa o le faatuatua. E alu lava na o ia i le Peraimeri ma le Mutuale. Sa agavaa o ia mo se faaipoipoga i le malumalu a o lei taitai ona mafai ona ulu atu ona matua. Na avea o ia ma se faataitaiga o le amiotonu, se molimau mausali, o lana faataitaiga lea na fesoasoani e faamalolosia ai ona matua ma nai ona tei. E mafai foi e outou na tamaitai talavou ona laulaututu e fai ma molimau a le Atua e ala i le faafaileleina o se agaga o le faatuatua, alofa, filemu, ma le molimau i o outou aiga i le taimi nei, ma saunia ai outou e faia lena lava mea e tasi pe a outou faavaeina o outou lava aiga i le lumanai. O au o se fua na maua mai i se tamaitai amiotonu talavou o lē sa “tutumau ma le le mafagaeetia, ma fua mai pea i galuega lelei.”7
Tatou te avea foi ma molimau ia Iesu Keriso a o tatou olioli ia te Ia. A o aoao atili le nuu o le Tupu o Peniamina e uiga ia Iesu sa latou fai mai, “O mea na fetalai mai ai lo matou tupu ia te i matou [ua] ala ai ona matou maua lenei malamalama tele, o loo ua matou olioli ai ma le fiafia e faapea ona matua tele.”8 A oo ina tatou olioli i lo tatou Faaola, tatou te manatua o Ia ma Ana faamanuiaga sili mo i tatou. Tatou te laulaututu e fai ma molimau pe a tatou faaali atu le lotofaafetai ma faasusulu atu ai le olioli. A o lagiina e tamaitai talavou le viiga amata o lenei sauniga, “Tou te lei vaai ea o mea uma tou te manaomia ua toina mai, i mea ua ia faauuina?”9
Talu ai nei lava sa ou aoaoina ai e uiga i ni tamaitai talavou se toalua o e, a o la ola ai i poloaiga ma faasusulu atu le olioli o le talalelei, sa laulaututu atu e fai ma molimau i le Atua. O le tala lenei sa faamatalaina e se tina faamisiona sinia i le NAF.
Fai mai a ia, i ni tausaga ua mavae o lona olaga a o i ai i le fale o loo faia sana auli i se tasi aso ma matamata se ata faasolo, ma ula lana sikareti, ae tuitui atu lona lona faitotoa. Ina ua ia tatalaina, sa i ai ni alii se toalua e ofutino papae ma fusiua, ma sa faailoa mai e se tasi o i laua o ia o lona epikopo. Fai mai lea alii, a o ia tatalo, sa ia lagona le musuiaina o ia ina ia talosagaina o ia e avea ma faiaoga i Tamaitai Talavou. Sa tau atu e lenei tamaitai i ai, sa papatiso o ia i le sefulu o ona tausaga, ae e lei toaga lava o ia i le lotu. Sa foliga e lei ano [le epikopo] i ai ae sa ia faaali atu ia te ia le tusi lesona ma faamatala i ai le mea o le a latou feiloai ai i le po o le Aso Lulu. Ona fai atu lea o ia ma le malosi, “E le mafai ona ou faiaoga i le ta’i 16 tausaga; ou te le o toaga atu, ae ou te ulaula foi.” Ona fai atu lea o le [epikopo] “O le a uma lou le toaga, ma ia oo atu i le Aso Lulu ua tuu lau ulaula.” Ona tuumuli lea o ia.
Fai mai lea tamaitai, “Ou te manatua lo’u ee i luga i lo’u ita, ae sa le mafai ona ou teena le uunaiga e faitau le tusi lesona. O le mea moni sa ou matua fia iloa lava, o lea sa ou faitau ai mai le amataga e oo i le faaiuga, ona ou taulotoina ai lea o upu taitasi o lena lesona.
“E oo atu i le Aso Lulu e lei i ai so’u manatu ou te alu, ae na tei lava ua ou tietie agai atu i le falelotu, ma lo’u matuai fefe lava. E lei i ai lava se isi taimi muamua na ou fefe ai i se mea. Sa ou ola ae i nofoaga e feoma’i ai le au matitiva, e faatasi ona faasalaina au, ma sa ou laveaiina lo’u tama mai le sela [falepuipui]. Ae o lea ua tei lava ua ou i ai i le Mutuale, ma faasilasila atu o au o le fautua fou o le Lora. Sa ou saofai i luma o ni teineiti se toalua o le Lora ma tuuina atu upu taitasi o le lesona, e oo lava i vaega sa faapea mai, ‘Ia fesili la’ia i ai …’ Na uma loa le lesona o’u alu loa i le fale ma na ou tagi atu ai lava iina e oo lelei lava i le fale.
“Na mavae ni nai aso ma sa toe i ai foi se isi tuitui i le faitotoa, ma sa ou manatu, ‘Ta’i lelei. Ua sau le epikopo e avatu lana tusi lesona.’ Sa ou tatalaina le faitotoa, ma sa tutu mai ai iina na teineiti lalelei e toalua o le Lora, na uu e le tasi ni fugalaau, a o le isi o ni kuki. Sa la valaaulia au matou te o i le lotu i le Aso Sa, ma sa ou alu. Sa ou fiafia i na teineiti. Sa la amata i le aoao mai lea ia te au e uiga i le Ekalesia, le uarota, ma le vasega. Sa la aoao mai ia te au le su’isu’i, faitauina o tusitusiga paia, ma le laumata fiafia.
“Na amata ona matou aoaoina faatasi isi teineiti o le vasega e lei o mai. Sa matou aoaoina i latou i soo se mea lava matou te maua ai—i taavale, malae tapolo, o polotito. I totonu o le ono masina, ua 14 i latou ua o mai, ma a o lei atoa se tausaga a ua toaaga uma mai teineiti e 16 sa i ai i le tauvalaauga. Sa matou talie ma fetagisi faatasi. Sa matou aoao e tatalo, suesue i le talalelei, ma auauna atu i isi.”10
O nei tamaitai talavou totoa e toalua sa laulaututu e fai ma molimau o le upumoni ma le amiotonu, ma le lelei ma le olioli i le talalelei.
Ina ua tofia au e avea ma Peresitene Aoao o Tamaitai Talavou, sa ou mauaina se faamanuiaga ina ua vaetofia au, o le a faamalosia lo’u faatuatua ia Iesu Keriso e ala i la’u auaunaga. Ua siomia au e ni tamaitai totoa: o o’u fesoasoani ma le fono faatonu,
o au peresitene o isi ausilali, ma e na muamua atu ia te au—o e sa avea muamua peresitene aoao o Tamaitai Talavou. Sa latou laulaututu e fai ma molimau ia Iesu Keriso e ala i o latou soifuaga o ni faataitaiga ma la latou tautua le faatuaoia.
O le faamalosia e nei tamaitai, o tagata o lo’u aiga, ma tamaitai talavou ma taitai ua tumau ma le mausali i le lalolagi atoa, ua ou lagona ai “ua vagavagaia e le faapotopotoga o e matamata mai e faapea ona toatele.” Ua fesoasoani lena ia te au ou te “tamoe ma le onosai i le ala tanu o i [o’u] luma, ma vaavaai atu ia Iesu o le na te taitaiina ma le na te faaatoatoaina lo tatou faatuatua.”11
O le folafolaga o le faatuatua faateleina i le faamanuiaga o lo’u vaetofiaina, ua faataunuuina aua ua ou maua le avanoa ou te tu ai e fai ma molimau ia te Ia i aso uma ma nofoaga uma. Ua ou tautalatala ia te Ia, talai atu o Ia, ma olioli ia te Ia. Afai ou te lagona ua le lava a’u upu, e faamautuina e Lona Agaga. A ou lagona lo’u fefe po o le le talafeauga, e faamalosia au ma lagolagoina au e Lona aao silisiliese. Ou te iloa Na te faamanuiaina i tatou taitoatasi pe a tatou laulaututu e fai ma molimau. O le a Ia “le tuulafoaiina lava”12 i tatou.
Ia tatou uunai atu pea i luma, ma ia tumau le faatuatua ia Keriso, ia laulaututu e fai ma molimau ia te Ia i taimi uma ma mea uma, ma i nofoaga uma, o la’u tatalo lea i le suafa o Iesu Keriso, amene.