Elder Rafael E. Pino

O Le Fitugafulu

Mo Elder Rafael Eduardo Pino, o le malosi o lana molimau ma le mana o lona talitonuga o Iesu o le Keriso e toe foi lava i tua i ni elemene autu se lua. O se tasi o ia elemene o le faitauina lea o le Tusi a Mamona mo le taimi muamua i le 17 o tausaga.

“Na talosaga mai faifeautalai ia te au e faitau na o ni nai fuaiupu, na ia saunoa ai, “ae sa le mafai ona ou tuu le faitauina. Sa ou tauaveina le tusi i soo se mea ou te alu i ai. O taimi uma ou te faitauina ai, ou te faalogoina ai lava na lagona e tasi o le olioli ma le filemu. O au o se molimau e faapea o le faiga na faavaeina e le Atua e faamaonia ai le moni o le Tusi a Mamona, e matuai aoga lava, e pei ona fai mai ai le Moronae 10. Na ou maua se molimau o le Tusi a Mamona e moni e ala i le mana o le Agaga Paia.”

O le ki lona lua mo Elder Pino o le auauna atu lea i se misiona i le Misiona a Venezuela Maracaibo. E ui lava sa auauna atu ia Elder Pino i le tele o valaauga o le ekalesia a o lei lagolagoina i le Korama Muamua a Fitugafulu, e aofia ai le avea ma se epikopo, fautua maualuga, peresitene o le siteki, peresitene o le misiona, ma le Fitugafulu Eria, ae vave tele ona ia faamamafaina le taua o lana auaunaga faafaifeautalai. “O valaauga taitasi e fesoaosani e saunia ai oe mo le auaunaga i le lumanai,” na ia saunoa ai, “ae o mea e sili ona taua ia te au o loo i ai o latou aa i le misiona. O loo o’u mauaina pea faamanuiaga mai le auauna atu i se misiona.”

Na soifua mai Elder Pino i Valencia, Venezuela, i le aso 27 o Oketopa, 1955, i ona matua o Arturo Pino ma Josefina Gimenez de Pino. Na ia maua se tusi faamaonia i le pulega i Caracas, Venezuela. Sa galue Elder Pino mo le Ekalesia i le tele o tulaga talu mai le 1980. Sa faamauina i laua ma lona faletua o Patricia Monica Villa Dassler, i le Malumalu o Uosigitone D.C. i le aso 31 o Mati, 1981. O i laua o ni matua o se fanau e toatolu.