Aoaoga Faavitio
O se vitio sa faaali i le taimi o le sauniga aoao a Tamaitai Talavou, sa laualuga ai se apoapoaiga mai ia Peresitene Thomas S. Monson—faapea foi ni faamatalaga mai se vaega o tamaitai talavou ma lo latou taitai e uiga i se aafiaga sa latou maua a o aoao e saili ma mauaina le faatomatauga a le Alii.
Sister Clayton
I le taumafanafana talu ai sa i ai se fesili faanatinati taua lava a o tatou tamaitai talavou. Sa latou fia iloa po o le a le tulaga aloaia o le Ekalesia e faatatau i ofu taele. Peitai nai lo le tuuina atu i ai o se tali sa faamoemoe matou te tuu atu i ai e i matou lava, sa tonu ia i matou o le a matou atamamai teisi, i le avea ai ma o latou taitai, ia fesoasoani latou te sailia mo i latou lava le tali e ala i le tatalo atu i le Atua. E mafai ona latou fesili atu; e mafai ona latou sailia mo i latou lava ma latou maua ai se malamalama i le lagona ma le ala e maua ai faamatalaga mai le lagi mo le tagata lava ia, ina ia mafai ai ona latou toe faia lena lava mea i o latou olaga i se taimi mulimuli ane.
Tamaitai Talavou Muamua
O le taimi muamua, sa na ona ou mafaufau lava, “Ia, ua lelei. Ua na o se tasi foi o galuega atofa e ave i le fale e mafaufau i ai.”
Tamaitai Talavou Lua
Sa fesoasoani lena aafiaga ou te latalata atili ai i le Tama Faalelagi.
Tamaitai Talavou Muamua
O le a fesoasoani foi ia te au pe a ou matua ma i ai sa’u fanau teine.
Tamaitai Talavou Tolu
O le taimi lava na amata ai ona ou matuai saili mo le tali, na vave lava ona oo mai.
Sister Clayton
A tatou tilotilo i lenei mea mai se itu faaaoaoga faavae, e leai lava se isi punavai faavae sili atu nai lo tusitusiga paia.
Tamaitai Talavou Tolu
O le taimi muamua, sa ou matuai taumafai lava e sue le tali i tusitusiga paia, ae na foliga mai e le maua ai.
Tamaitai Talavou Muamua
Ae ina ua ou suaina le loloto o le mataupu sa ou lagonaina e au lava ia, sa ou manao e aoao atili ma maua nisi mea se tele.
Tamaitai Talavou Tolu
Sa atili tele ai mau sa ou tau i ai e uiga i le tausaafia, e pei o le ava amiolelei e tausaafia, ma o le taimi muamua, sa leai sona uiga ia te au. Ona ou tatalo ai lea—sa ou faamoemoe ia maua ni tali patino e ala i le tatalo ae ou te lei mauaina. Ona ou iloa ai lea, ina ua uma ona ou maua la’u tali, sa na ona aumaia le Agaga e le tatalo, ae o la lava sa i ai le tali i tusitusiga paia, o le [tausaafia] ua le na o se uiga faaalia.
Tamaitai Talavou Lua
Sa ou maua ni tali, ae o le mea moni, e lei patino aua sa tatau lava ona ou faia i taimi uma la’u vaega ma ou aoao e au lava ia.
Tamaitai Talavou Tolu
Ma sa ou faamoemoe e ta’u mai faapea, “O le ofu lea e tatau ona fai. O le ofu lea e le tatau ona fai.” Ou te lei manao [e faapea] aua o lona uiga o la’u lava filifiliga ma e lei i ai foi ia te au tulafono patino. Ae ou te matua faafetai lava ona o le tali lena sa ou maua aua, ou te manatu e sili atu lena ona talafeagai mo teineiti i le lalolagi atoa.
Tamaitai Talavou Muamua
Sa na ona ou lagona ai lo’u latalata atili i lo’u Tama Faalelagi ma … , sa naunau lo’u loto, aemaise lava faatasi ai ma nei teineiti, o mea uma lava sa latou faia e saili ai a latou tali, sa momomo lo’u loto mo i latou uma, sa ou matuai alofa lava ia i latou uma.
Sister Clayton
A o tatou galulue faatasi ai i lenei faiga ma fefaasoaai o tatou loto ma maua musumusuga ma lagonaina le aafiaga o le Agaga, sa oo ina avea i tatou ma ni tagata ua ese lava. Sa latou iloaina e amanaia e le Tama Faalelagi le mea o loo latou popole i ai. Sa latou iloaina e alofa o Ia ia te i latou. Sa latou iloaina soo se mea lava latou te ole atu ai, o le a faafofoga mai lava o Ia ma o le a Ia tali mai foi.
Tamaitai Talavou Tolu
Ua ou manatu o lena faiga ua ou iloaina ai o le mauaina o tali e le o se mea e na o le faa-tasi i le olaga, o se mea e mafai ona ou faaaogaina i taimi uma. Ma ina ia mafai ona maua mai o na tali, e tatau ona ou tumau mausali i le faia o a’u tatalo ma le faitauina o au tusitusiga paia ma tausisia pea e le aunoa lena Agaga ia te au.
Tamaitai Talavou Muamua
E mafai ona ou tatalo atu ia te Ia i soo se taimi lava ou te manaomia ai ma e i ai lava o Ia iina mo au, tusa lava po o le a. E i ai pea lava pea o Ia i o’u autafa, ma e fesoasoani pea lava pea o Ia ia te au i soo se tulaga.
Tamaitai Talavou Lua
Soo se taimi ou te lagonaina ai le faanoanoa pe soo se taimi foi ou te manaomia ai le fesoasoani, e mafai lava ona ou ole atu ia te Ia e le aunoa.
Tamaitai Talavou Muamua
Ou te iloa lo’u tagata, ma ou te iloa le mea ou te talitonu i ai, ma ou te iloa o’u lagona pe a ou ofuina ituaiga o lavalava sao. Ma ou te iloa afai ou te faia lavalava talafeagai e mafai ona ou latalata atili i lou Tama Faalelagi ma latalata atili atu i le Agaga.
Tamaitai Talavou Tolu
O se mea ofoofogia lou iloa, mo se faataitaiga ina ua ou toe tilotilo i la’u tusi talaaga i aso ua mavae, ma iloa ai e toetoe lava o aso uma sa tali mai a’u tatalo ma a’u fesili e le Alii.
Peresitene Thomas S. Monson
E mafai ona tatou maua upumoni i tusitusiga paia, o aoaoga a perofeta, ma faatonuga mai o tatou matua, ma musumusuga tatou te maua pe a tootutuli o tatou tulivae ma sailia le fesoasoani a le Atua.
O nisi taimi o tali aupito sili e mafai ona maua e le autalavou i fesili o le olaga, e maua pe a tootutuli i o latou tulivae ma valaau atu i lo tatou Tama Faalelagi.
Ma ou te molimau atu afai o le a latou manatua e silafia i latou e le Alii ma o le a tali mai ia latou tatalo, o le a mafai ona latou taulimaina luitau uma e oo mai ia te i latou.