Elder Jorge F. Zeballos

O Le Fitugafulu

Ina ua faatoa mavae le 12 tausaga talu ona soifua mai Elder Jorge Fernando Zeballos i le aso 19 o Iulai, 1955, ae taunuu atu uluai faifeautalai o le Au Paia o Aso e Gata Ai i lona nuu o Ovalle, Chile, i le 1967.

O le feoai solo o nei tagata Amerika i Matu i le nuu na mafua ai lona fia iloa, e pei ona faia i se faatalanoaga manaia ma i latou i le nusipepa. Ina ua amata ona taaalo faifeautalai i se liki pasiketipolo i le lotoifale, sa taumulimuli loa ia Jorge, o se tasi sa fiafia i le pasiketipolo, i a latou taaloga ma le naunautai.

Ina ua tau atu e se uo i le aoga i le taulealea o Jorge e faapea ua latou auai ma lona aiga i le lotu a faifeautalai, sa talosaga atu loa Jorge pe mafai ona alu atu foi ma ia. Sa ia auai atu ma le faamaoni i sauniga mo masina e fitu ae lei iloa e faifeautalai o Jorge e lei faia ana lesona pe lei papatisoina foi. Faatasi ai ma le faatagaga a ona matua, o Alberto Zeballos ma Ines Zeballos, e lei leva ae suia lena mea.

Mulimuli ane, a o i ai i le Iunivesite o Santa Maria i Valparaiso, sa feiloai atu ai Jorge ia Carmen Gloria Valenzuela. “Ina ua ou faatoa vaai lava ia te ia, na ou iloaina o le a ou faaipoipo ia te ia,” na ia toe manatua ai. “Sa matuai ese lava, aua o lea ua maua lo’u valaauga faamisiona, ae le auai o ia i le Ekalesia.” I ni nai vaiaso ae ona taliaina ia lesona a faifeautalai, ma sa ia papatisoina o ia a o lei malaga ese atu e faamisiona i le Misiona a Chile Concepción.

Sa fesootai lava ia Jorge ma Carmen i le taimi o lana misiona, ma sa amataina ai se faauoga mautu i se taimi mulimuli ane, ma sa faaipoipoina i laua i le aso 26 o Iuni, 1982, i le Malumalu o Sao Paulo Pasila. O i laua o ni matua o se fanau e toalima.

E i ai se faailoga o Elder Zeballos mo le enisinia o vaalele mai le Iunivesite o Santa Maria ma se faailoga o le matuaofaiva i le puleaina o pisinisi mai le Iunivesite o Polika Iaga. A o lei valaauina o ia e avea ma peresitene o le Misiona a Chile Concepción i Saute i le 2005, sa avea o ia ma pule o mataupu a se faalapotopotoga mo se kamupani eli maina i Chile. O Elder Zeballos, lea faatoa valaauina i le Korama Muamua a Fitugafulu, sa avea foi ma epikopo, peresitene o le siteki, sui risone, ma se Fitugafulu Eria.