Matuai Faamanuiaina Lava
Ua faamalolosia a tatou molimau. Ou te talitonu ua faateleina lo tatou naunau uma e ola i mataupu faavae o le talalelei a Iesu Keriso.
Ua leva se taimi o ou auai i konafesi. Peitai, ou te lei lagonaina muamua so’u matuai faamanuiaina e pei ona i ai i lenei sauniga. Ua tatou maua ni savali tuusao mai le tele o failauga, ae na tofu pa’ia e failauga taitasi se mataupu taua tele. Ua tatou maua se laoai o taumafa matagofie o le faatuatua, o le alofa, ma timaiga. Ia tatou faaaogaina nei mea i o tatou olaga.
Uso Ballard, i ni nai tausaga ua mavae, sa alu ai si o’u toalua pele i le falemai. Sa ia tusia se faamanatu ona tuu ai lea mo le fanau: “Le fanau pele, aua nei tuua Papa e tago i le ogaumu faavevela [microwave]”—ona sosoo ai lea ma le koma liliu, “po o le ogaumu, po o le masini fufuluipu, po o le masini faamamago lavalava.” Ua ta maasiasi lava e faaopoopo atu isi mea i lena lisi.
Ou te manatu o Uso Uchtdorf lea na saunoa, “Ua e faamatala atu i le aofia i le aso e uiga i lou tupuaga i le itu o lou tina. Ae faapefea le itu o lou tama?” O lea o le a ou faaiu atu ai la i se upu se tasi pe lua e uiga i le itu o lo’u tama.
O le tama o lo’u tama na sau mai Suetena, a o lona toalua e mai Egelani. Sa feiloai i laua i luga o le vaa na malaga mai ai. Sa faatalitali o ia sei matua le tamaitai, ona faamalamalama lea i ai la te faaipoipo. Sa faaipoipoina i laua i le Malumalu o Sate Leki, ma sa ia tusia i lana tusi o talaga, “O le aso o le aso aupito sili lea ona fiafia o lo’u olaga. Sa ma faaipoipo ai ma la’u manamea mo le olaga nei ma le faavavau i le malumalu paia.”
I le tolu aso mulimuli ane ai, i le aso 23 o Aperila, 1898, na ia tusia ai, “Na ou alu i le nofoaafi i Rio Grande Western Depot e ui atu i Siketinevia, i le mea na valaauina au ou te faamisiona ai.” Na malaga o ia i Suetena, ae tuua ai lana manamea faatoa tolu aso talu ona faaipoipo i ai.
O lana tusi o talaaga, sa tusia i se penitala, na aumaia ia te au e se uso o lo’u tama, o lē sa filifilia a’u e tuu i ai le tusi talaaga a lona tama. O le tusiga aupito lata mai lava o loo tusia ai o le, “Ua susu o’u vae.” Ae o le tusiga aupito manaia lava o loo faapea mai: “O le aso na ma o ai i le fale o Janssom. O le manaia ia o se meaai na ia saunia mo i maua. O ia o se kuka lelei.” Ona ia faapea mai lea, “Sa pepese uma tamaiti pe iliina se fagufagu pe faia se siva, ona ia totogiina lea o lana sefuluai. E lima korona [tupe Suetena] mo le Alii, tasi mo la’u soa o Elder Ipson, ma le tasi mo au.” Ona sosoo ai lea ma le lisi o igoa o tamaiti.
Ina ua ou faitauina lena mea i le tusi o talaaga, sa i ai le igoa o le tama o lo’u toalua, o se tasi sa i ai i lena aiga, atonu sa usu sana pese, o lē na avea ma tamā o se afafine lava e toatasi, le teine lea sa ou faaipoipo i ai.
O le aso muamua lava na ou vaai ai ia Frances, sa ou iloaina ua ou maua le tagata sa’o. Na aumaia faatasi i maua e le Alii i se taimi mulimuli ane, ma sa ou talosagaina o ia ma te o e tafafao. Na ou alu i lo latou aiga e aumoe i ai. Sa ia faailoa atu au i lona tama, ona faapea mai lea o lona tama, “ ‘Monson’—o se igoa Suetena lena, a ea?”
Sa ou fai atu, “Ioe.”
Sa ia fai mai, “Lelei.”
Ona alu lea o ia i se tasi potu ma aumai se ata o ni faifeautalai se toalua e fai o la’ua pulou ma a la kopi o le Tusi a Mamona.
“E te lua aiga ma le Monson lea,” na ia fai mai ai, “o Elias Monson?”
Sa ou fai atu, “Ioe, o le uso o le tama o lo’u tama. Sa faamisiona foi o ia i Suetena.”
Sa tagi lona tama. E tagi gofie o ia. Sa ia fai mai, “O ia ma lana soa o faifeautalai na sa aoaoina le talalelei i lo’u tina ma lo’u tama ma o’u uso uma ma tuafafine ma a’u foi.” Sa sogi mai o ia i lo’u alafau. Ona tagi ai lea o lona tina, ma sa sogi mai foi o ia i lo’u alafau. Ona ou autilotilo solo ai lea mo Frances. Sa fai mai o ia, “Se’i ou alu e aumai lo’u ofu mafanafana.”
Sa matuia le pa’ū o si a’u pele o Frances i ni nai tausaga talu ai. Sa ave o ia i le falemai. Pe tusa ma le 18 aso na le iloa ai e ia se mea. Sa ou nofo i ona autafa. Sa leai se musele o lona tino na migoi. Sa fetagisi le fanau, sa fetagisi fanau a le fanau, ma sa ou tagi foi. Sa leai sina migoi.
Ona oo lea i se tasi aso, sa pulapula mai ona mata. Sa ou faatuina se matati’a o le vave ona ou oo atu i ona autafa. Sa ou sogi atu ma opo mai o ia, ma faapea atu, “Ua e fo’i mai. Ou te alofa ia te oe.” Ona fai mai lea o ia, “Ou te alofa foi ia te oe, Tom, ae ua i ai le faafitauli tuga.” Sa ou mafaufau, O le a sou iloa i le faafitauli, Frances? Fai mai a ia, “Ua galo ia te au ona lafo le ta lafoga o tupe maua i le kuata lona fa.”
Sa ou fai atu ia te ia, “Frances, a na faapea e muamua e ta’u maia le mea lena ae e te lei sogi mai ia te au ma ta’u mai e te alofa ia te au, atonu ou te tuua ai lava oe iinei.”
Uso e, ia tatou taulimaina ma le mamalu ma le faaaloalo o tatou taitoalua. O i latou o a tatou soa e faavavau. Tuafafine, faamamalu i a outou tane. Latou te manaomia e faalogo mai i se upu lelei. Latou te manaomia se soisoi atu ma le agalelei. Latou te manaomia se faailoa atu manaia o le alofa moni.
Sei taatia lo’u aiga mo sina minute, o’u uso e ma tuafafine, o se konafesi matagofie tele lenei. Ua faamalamalamaina i tatou i savali atamamai ma le musuia. Ua faamalolosia a tatou molimau. Ou te talitonu ua faateleina lo tatou naunau uma e ola i mataupu faavae o le talalelei a Iesu Keriso.
E le gata ina ua faamanuiaina i tatou i saunoaga matagofie sa tuuina mai; ae ua faagaeetia foi i tatou i musika matagofie sa saunia. Ua matuai faamanuiaina lava i tatou i le Ekalesia e i latou ua faasoa mai ma i tatou a latou taleni faamusika. Sa matua matagofie faatinoga a aufaipese uma i nei aso e lua.
Ou te faailoa atu lo’u alofa tele mo outou uma sa auai i le faatinoina, ma i latou uma foi sa faafofoga mai. Sa ou lagonaina lava a outou tatalo mo au, ma lagolagoina ai ma faamanuiaina i masina e lua talu ona tuua i tatou e la tatou pele o Peresitene Hinckley. Ou te toe faapea atu, ua ou talisapaia lava la outou palota lagolago
E le lava lo’u faaali atu o lo’u agaga faafetai mo le Toefuataiga o le talalelei i nei aso e gata ai, ma lona uiga i lo’u olaga. Ua tofu uunaia i tatou ma faatulagaina olaga a o tatou mulimuli i le Faaola ma gauai atu i mataupu faavae o Lana talalelei.
Ia te outou na o matua, ou te fai atu, ia faaali atu lo outou alolofa i a outou fanau. Ua outou iloa tou te alolofa ia i latou, ae ia faamautinoa ua latou iloaina foi. E taua tele i latou. Tuu atu ina ia latou iloa. Valaau atu i le Tama Faalelagi mo se fesoasoani, a o outou taulimaina mea latou te manaomia i aso taitasi, ma a o outou feagai ma luitau ia e oo mai ma le le mafuafuaina ma tulaga faamatua. Tou te manaomia isi mea e sili atu nai lo lou lava atamai e faafaileleina ai i latou.
Matou te faamalo atu i o tatou tupulaga talavou ofoofogia, o e o loo faasagatau atu i amioleaga i le lalolagi, ma o loo ola i poloaiga i le mea sili latou te mafaia.
Ia te outou ua mafai ona ulu atu i le malumalu, ou te fia fautuaina outou ina ulu soo atu i ai. O le faia o lena mea o le a fesoasoani e faamalolosia ai ulugalii ma aiga.
Ia tatou feagaleleia’i, ia taufai iloa e le tasi le mea e manaomia e le isi, ma taumafai e fesoasoani i lena tulaga.
O’u uso e ma tuafafine pele, ou te alofa ia te outou, ma ou te tatalo mo outou. Faamolemole tatalo mai mo au. Ona tatou taufai selesele faatasi ai lea o faamanuiaga a lo tatou Tama Faalelagi o loo teuina mo i tatou taitoatasi. O la’u tatalo lea, ma la’u olega a o ou faaopoopo atu ai foi ma la’u molimau. E moni lenei galuega. I le suafa o Iesu Keriso, amene.