Manatu Popole mo le Tasi
O Iesu Keriso o lo tatou faataitaiga sili. Sa siomia o ia e motu o tagata ma sa fetalai atu i le toatele, ae sa manatu popole lava o Ia i taimi uma mo le toatasi.
Ou te faafetai lava mo le avanoa ua tatou faatasi ai i lenei Maota Autu matagofie mo Konafesi. E ui lava i le toatele o lenei aofia, a o se tulaga lotomaulalo le iloa ua na o sina vaegamea o le faitau miliona lea e lei silasila, faafofoga, ma faitau i upu ua tautalagia i lenei konafesi maoae.
O le mea moni, o le a tatou misia la tatou pele o Peresitene Gordon B. Hinckley. Ae ui i lea, o i tatou uma o ni tagata ua lelei teisi atu, ona o ana uunaiga. Ua malosi teisi le Ekalesia ona o lana taitaiga. E moni, ua lelei teisi atu le lalolagi ona sa i ai se taitai e pei o Peresitene Gordon B. Hinckley.
Ou te fia faia ni nai upu e uiga i lo tatou Au Peresitene Sili fou.
Ua loa ona ou masani ia Peresitene Monson. O ia o se toa o Isaraelu o le na muai faauuina e pulefaamalumalu i lenei Ekalesia. Ua lauiloa o ia i ana tala ma faataoto faatosina loto, ae o i matou ua malamalama lelei ia te ia, o lona soifuaga o se faatusa moni ma se faataitaiga o faatatauga o na tala. E ui la o se faaamuia mo ia le toatele o tagata iloga ma aloaia o lenei lalolagi e silafia ma faamamaluina o ia, ae o se saafiafiga e sili atu foi ona o le toatele o tagata lē taualoa latou te ta’uina o ia o le uo.
I lona loto, o Peresitene Monson e agalelei ma agaalofa. O ana saunoaga ma galuega ua faaalia ai lona manatu popole mo le tasi.
O Peresitene Eyring o se tamalii atamai, poto, ma faaleagaga. Ua lauiloa ma faaaloalogia o ia e le gata i totonu o le Ekalesia ae o i latou foi e le auai i la tatou ekalesia. O ia o le ituaiga tagata, a saunoa, e faalologo uma tagata. Ua ia faaopoopoina le maualuga i le suafa, Eyring.
Sa ou masani ia Peresitene Uchtdorf a o ou auauna atu i se Peresitene o le Eria i Europa. Mai lava i le taimi na ou feiloai ai ia te ia, na ou iloaina o ia o se tamalii e mamao lana tofā loloto faaleagaga ma maoae ona agavaa. Na ou iloaina sa mataituina o ia e le Alii. O le luasefulutolu tausaga talu ai, na faamamaluina ai au e tuuina atu ia te ia le valaauga a le Alii e tautua o se peresitene o le siteki i Frankfurt, Siamani. A o ou toe vaavaai atu i le aluga o tausaga, ua ou matauina ai, o mea uma sa i lalo o lana taitaiga na manuia. O loo i ai le Alii ia te ia. A ou mafaufau ia Peresitene Uchtdorf, e lua lava upu e oo mai i lo’u mafaufau: Alles wohl—i le faaSiamani o lona uiga “O loo lelei mea uma.”
O soo moni o Iesu Keriso e manatu popole i taimi uma mo le toatasi. O Iesu Keriso o lo tatou faataitaiga sili. Sa siomia o ia e motu o tagata ma sa fetalai atu i le toatele, ae sa manatu popole lava o Ia i taimi uma mo le toatasi. “Aua ua sau le Atalii o le tagata e faaola i le na le iloa,”1 na Ia fetalai ai. “O ai ea so outou e ana mamoe e selau, afai e le iloa le tasi, e le tuua e ia le ivagafulu ma le iva i le vao, a e alu ma saili i le na leiloa, seia maua?”2
O lenei aoaoga e faatatau ia i latou uma o e mulimuli ia te Ia. Ua poloaiina i tatou e saili i latou ua leiloloa. E tatau ona avea i tatou ma leoleo i o tatou uso. E le mafai ona tatou lafoaia lenei tiute ua tuuina mai e lo tatou Faaola. E tatau ona tatou manatu popole mo le tasi.
O le asō, ou te fia talanoa atu e uiga ia i latou o e ua leiloloa—ua leiloloa nisi ona e ese i latou, o nisi ona ua vaivai, o nisi ona ua se.
Ua leiloloa nisi ona e ese i latou. Latou te lagonaina e pei e le tutusa i latou [ma isi tagata uma]. Masalo ona e ese i latou, e oo ai ina latou o ese malie atu mai le lafu. Atonu e ese o latou foliga, amioga, mafaufauga, ma la latou talanoa nai lo i latou o loo siomia i latou, ma o nisi taimi o le mafuaaga lena latou te manatu ai e le tutusa i latou [ma isi tagata]. Latou te faia ai se faaiuga e le manaomia i latou.
E o faatasi ma lenei manatu sese ia le talitonuga sese e faapea, o tagata uma o le Ekalesia e tatau ona tutusa o latou foliga, o le talanoa, ma ia tutusa uma. E le’i faaaināina e le Alii le lalolagi i se aufaili o tagata olaola, ma faatauaina tama’i foafoa o le lalolagi. E taua uma lava ia mea fai faaili ma e faaopoopo ai le mananaia o leo eseese o le tuufaatasiga o musika. E i ai lava ni tulaga e eseese ai fanau uma a le Tama Faalelagi, ae e tofu lava le tagata ma lona leo matagofie e faaopoopo atu i le loloto ma le matagofie o le mea atoa.
O lenei eseesega o le foafoaga lava ia, o se molimau i le matuai faatauaina e le Alii o Lana fanau. Na te le faasilia se tasi tagata nai lo le isi, ae “E talai atu e ia ia latou o mai ia te ia ia tofusia i latou i lona agalelei; ua le faafiti i se tasi e sau ia te ia, o tagata uli ma tagata papae, o e pologa ma e saoloto, o tane atoa ma fafine … e tutusa tagata uma i le Atua.”3
Ou te manatua a o ou laitiiti, sa i ai se tamaitiiti e matua atu sa le atoatoa lona malosi i le tino ma le mafaufau. Na faaletonu lana tautala ma sa faigata ona savali. Na masani ona taufaalili i ai tamaiti. Sa latou tauemu ma taufaifai ia te ia seia oo ina tagi i nisi o taimi.
O loo ou manatuaina lava lona leo: “Ese le tou le alolofa ia te a’u,” o lana tala lea. Ae sa latou tauemu pea lava ia te ia, tulei ma fai ulaga e uiga ia te ia.
I se tasi aso, na uma ai lo’u onosai. E ui lava ina sa na o le fitu o’u tausaga, ae na tuuina mai e le Alii ia te au le lototele ou te tu atu ai i a’u uo.
“Aua lava nei pa’i se isi ia te ia,” na ou fai atu ai ia i latou. “Soia le faaliliina o ia. Ia agalelei i ai. O ia o se atalii o le Atua!”
Sa solomuli a’u uo ma o ese loa.
Sa ou mafaufau i lena taimi pe mata o le a faaleaga e lo’u lototoa la matou faauooga. Ae peitai, e ese le mea na tupu ai. Mai lava i lena aso, na atili ai lo matou vavalalata ma a’u uo. Sa latou faaalia le agalelei tele mo le tamaitiiti. Na avea i latou ma ni tagata na sili atu ona lelei. Ou te iloa, latou te lei toe taufaifai lava ia te ia.
Uso e ma tuafafine, ana faapea tatou te faaali atu le agaalofa tele mo i latou e ese mai ia i tatou, semanu e tuumāmāina le tele o faafitauli ma le faanoanoa i le lalolagi i aso nei. E mautinoa lava o le a avea atili o tatou aiga ma le Ekalesia o se nofoaga paia ma faalelagi.
O nisi ua leiloloa ona ua vaivai. E faigofie lava ona lagona le lofituina. E leitioa a tatou vaivai, ona o le mamafa ma le faigata o o tatou taimi ma le popole tatou te fetaiai i aso taitasi. E toatele latou te lagonaina le lotovaivai ona ua latou le ausia o latou faamoemoega. O isi ua lagona lava le vaivai tele e tuuina atu ni o latou sao. Ma o lea, a o agai i luma le lafu, e faifai malie lava, toetoe ina a le iloa atu, le pauu atu i tua o isi.
E lagona e tagata uma le vaivai ma le lelavava i se taimi. E foliga mai ua sili atu i le taimi lenei nai lo le taimi sa ou laitiiti ai. Na silafia e Iosefa Samita, Polika Iaga, e oo foi ia Iesu Keriso le uiga o le vaivai. Ou te le manao e ta’u faatauvaaina le avega o loo tauaveina e tagata o le Ekalesia i o latou tauau pe ou te ta’umāmāina foi ia luitau faalelagona ma faaleagaga o loo latou feagai. O nei tulaga e mafai ona mamafatu ma e masani lava ona faigata ona tauaveina.
Ae peitai, e i ai sa’u molimau i le mana faafouina o le talalelei a Iesu Keriso. Na folafola mai e le perofeta o Isaia e faapea, o le Alii, “na te avatua le malosi i e ua vaivai; a o e ua leai se malosi, na te faatuputele i ai le malosi.”4 Pe a ou lagona le vaivai, ou te mafaufau i upu a le Perofeta o Iosefa Samita:
“O le a tatou le fai pea ea i lenei galuega sili? Ia agai i luma a e aua le solomuli. Ia loto toa, uso e; ma ia agai atu, agai atu pea i le manumalo! Ia olioli o outou loto ma ia sili ona fiafia. Ia alaga le lalolagi i pesega… .
“… Ia vivii atu le vao ma laau uma o le fanua i le Alii; … ma ia alalaga faatasi atalii uma o le Atua ma le olioli!”5
Mo outou tagata o le Ekalesia o e ua tausolomuli ona o lagona o le le atoatoa, ou te aioi atu ia te outou ina ia agai i luma, uunai atu ia ma tulei. E tusa lava pe tou te manatu e itiiti sina mea ua faaopoopo atu e lou malosi, o loo manaomia lava oe e le Ekalesia. O loo manaomia oe e le Alii. Ia manatua e masani lava ona filifili e le Alii “mea faatauvaa o le lalolagi” ina ia faataunuu ai Ona faamoemoega.6
Ia te i latou uma o e ua vaivai, ia faalototeleina outou i fetalaiga faamafanafana a le Faaola: “Ia outou o mai ia te au, o outou uma o e tigaina ma mafatia i avega, o a’u foi e malolo ai outou.”7 Ia tatou faalagolago i lena folafolaga. E mafai e le mana o le Atua ona faatumulia o tatou agaga ma tino i le malosi ma le naunautai. Ou te uunaia outou e saili i lenei faamanuiaga mai le Alii.
Ia faalatalata atu ia te Ia, ona faalatalata mai lea o Ia ia te outou, aua ua Ia folafola mai e faapea “a o e faatalitali ia Ieova, e toe faafouina lo latou malosi; latou te sii ae apaau e pei o aeto; latou te femoei, ae le vaivai; latou te savavali ae le tigaina.”8
Afai tatou te faaali atu le manatu popole mo i latou o e ua vaivai, ua tatou “fesoasoani i e vaivai, ia sii ae lima o loo tautau i lalo, ma faamalosia tulivae vaivai.”9 O taitai alolofa o le Ekalesia e mataala i tapulaa o tagata taitoatasi, ae e naunau foi e faaaoga tagata o le ekalesia i le mamao e oo i ai lo latou malosi ma agavaa. O taitai latou te aoao atu ma lagolagoina ae latou te le aumaia le fai faamalosi e “faatelelise pe galue ai ia sili atu” i lo le mea e mafai e le malosi.10
Ia manatua, o nisi taimi o i latou o e na sili ona telegese i le amataga mai, e uma ane ua sili atu le mamao o le tulaga ua oo i ai.
O nisi ua leiloloa ona ua se i latou. Sei vagana ai lava le Alii, a o i tatou uma lava e faia ni mea sese. O le fesili e le o le pe tatou te see ma pauu, ae, o le a faapefea ona tatou tali atu i ai? O nisi e sē ese mai le lafu, pe a uma ona latou faia o ni mea sese. E le o se mea lelei lea. Pe tou te lei silafia o le Ekalesia o se nofoaga mo tagata e le atoatoa e faatasitasi ai—e ui lava i o latou faaletonu i le olaga nei—e avea ai ma ni tagata e lelei teisi atu? O Aso Sa uma lava i falelotu uma i le lalolagi atoa, tatou te maua ai ni tagata soifua, o alii, tamaitai, ma tamaiti e le atoatoa o e feiloai faatasi i le usoga ma le alofa mama o loo taumafai e avea o ni tagata e sili atu ona lelei, e aoao e uiga i le Agaga, ma tuuina atu le faamalosiau ma le lagolago i isi. Ou te le’i vaai lava i se faailo i faitotoa o o tatou falelotu o faapea mai ai, “E Faatapulaa le Ulufale Mai: E Na o Tagata E Atoatoa.”
Talu ai ona o o tatou le atoatoa, o lea tatou te manaomia ai le Ekalesia a le Alii. O iina lea e aoaoina ai Ana aoaoga faavae togiola ma faataunuu ai Ana sauniga faaola. O le Ekalesia e uunaia ma faatosinaina i tatou ia avea o ni tagata e sili atu ona lelei ma fiafia. O se nofoaga foi e mafai ona faamaumau ai o tatou tagata i le auauna atu i isi.
Ua silafia e le Alii o le a tatou faia ni mea sese. O le pogai lena na puapuagatia ai o Ia mo a tatou agasala. E finagalo o Ia ina ia tatou toe tutulai ma taumafai e fai le mea sili. E olioli agelu a le Atua i se tagata agasala e toatasi ae salamo.
Ia te outou o e ua se ese ona o le faatausuai, pe le mafai ea ona tuuese lou lototiga ma lou ita? Pe le mafai ea ona faatumulia lou loto i le alofa? O loo i ai se avanoa mo outou iinei. Susu mai ma mafuta faatasi ma le lafu, ia faapaia o outou tulaga gafatia, taleni ma tomai. O outou tagata o le a sili ona lelei ai ma o le a faamanuiaina isi i au faataitaiga.
Ia te outou o e ua se ese ona o atugaluga i aoaoga faavae, e le mafai ona matou faatoese mo le upu moni. E le mafai ona matou teena ia aoaoga faavae ua tuuina mai ia i tatou e le Alii lava Ia. O lenei lava mataupu, e le mafai ona matou fetuunaia.
Ua ou malamalama o nisi taimi e le tutusa ai lagona o tagata i aoaoga faavae. E oo lava ina latou ta’ua e faapea e faavalevalea. Ae, ou te toe ta’uina atu upu a le Aposetolo o Paulo, o le na faapea mai, o nisi taimi e foliga mai ai mea faaleagaga o ni mea faavalevalea i le tagata. Ae ui i lea, “o le vaivai foi o le Atua e sili lona malosi i tagata.”11
O le mea moni, o mea a le Agaga e faaalia mai e le Agaga. “Ae le talia e le tagata faaletino o mea a le Agaga o le Atua: aua o mea valea ia ia te ia, na te le mafai ona iloa: aua e faamasinoina faaleagaga.”12
Matou te tautino atu o loo i ai i le fogaeleele i aso nei le talalelei a Iesu Keriso. Na Ia aoao mai e uiga i aoaoga a Lona Tama e faapea, “Ai se tasi e fia fai lona finagalo, e iloa ai e ia le mataupu pe mai le Atua, pe ou te tautala fua lava a’u.”13
Ua ou iloa o outou taitoatasi o loo i ai se atugaluga mo se tasi e pele. Tuu atu le faamalosiauga, auaunaga, ma le lagolago ia i latou. Alolofa ia i latou. Ia agalelei atu ia i latou. I nisi o tulaga, o le a latou toe foi mai. O nisi, e leai. Ae, i tulaga uma, ia tatou agavaa pea mo le suafa o loo tatou tauaveina i o tatou lava luga, o Iesu Keriso lea.
I tagata uma o loo nofoia lenei lalolagi matagofie, ou te sii ae lo’u leo ma tuuina atu se molimau faamaoni o loo soifua le Atua ma o Iesu o le Keriso, o lo tatou Faaola ma le Tupu! Na Ia toefuataiina mai Lana upumoni ma Lana talalelei e ala mai i le Perofeta o Iosefa Samita. E fetalai mai o Ia i Ana perofeta ma aposetolo. O Peresitene Thomas S. Monson ua faauuina e le Alii ma ua ia taitaia Lana Ekalesia i aso nei, ou te molimau atu ai i le suafa o Iesu Keriso, amene.