Faatuatua ma le Tautoga ma le Feagaiga o le Perisitua
Ia agai i luma i le faatuatua i le tausiga o a outou feagaiga ma le Atua ma ia outou mauaina le folafolaga na Ia tuuina mai ia te outou faatasi ma se tautoga
O lo’u faamoemoega i le afiafi nei o le fesoasoani atu lea ia te outou ina ia outou ola ae ma le mautinoa tou te mafaia ma o le a outou ola agavaa mo faamanuiaga o le tautoga ma le feagaiga o le perisitua. Talu ai ona o le taua o taunuuga e mafai ona oo i ai lena tautoga ma le feagaiga, o lea e ono moomia ai le faamalosia e le aunoa o lo outou faatuatua mautinoa.
Na matuai faamanino lelei mai e le Alii ia na taunuuga. O le ola agavaa mo folafolaga o le tautoga ma le feagaiga e aumaia ai le meaalofa sili o meaalofa uma a le Atua: ola faavavau. O se faamoemoega lena o le Perisitua Mekisateko. O le tausia o feagaiga pe a tatou mauaina le perisitua ma le faafouina i sauniga o le malumalu, ua folafola mai ai ia i tatou i se tautoga na osia e lo tatou Tama Faalelagi, o Elohima, e faapea o le a tatou maua le atoatoaga o Lona mamalu ma ola ai e pei ona soifua ai o Ia. O le a tatou maua le faamanuiaga o le faamauina i se aiga e faavavau faatasi ai ma le folafolaga o le uluola e faavavau.
E pei ona outou faamoemoeina, o le le mafai ona maua o ia faamanuiaga o le a aumaia ai ni taunuuga matautia. Na matuai manino mai foi le Alii i lena vaega. O upu nei e masani ona faitauina atu i alii talavou e o latou taitai pe a latou latalata atu i le taimi e mafai ai ona latou maua le perisitua Mekisateko. Atonu o le a e manatuaina ou lagona ina ua e faatoa faalogo i ai. O afioga nei a le Faaola, o Iesu Keriso, na tuuina mai ia i tatou e auala mai i le Perofeta o Iosefa Samita:
“O i latou uma o e maua lenei perisitua ua talia a’u, ua faapea mai ai le Alii;
“Aua o le talia a’u auauna, ua talia a’u;
“O le foi na te talia a’u ua talia lo’u Tama;
“O le foi na te talia lo’u Tama ua talia le malo o lo’u Tama; o lea o le a tuuina atu ai ia te ia mea uma o i ai i lo’u Tama.
“E tusa lenei mea ma le tautoga ma le feagaiga lea e a le perisitua.
“O lea, o i latou uma o e maua le perisitua, ua maua lenei tautoga ma feagaiga a lo’u Tama, na te le mafai ona solia, e le malueina foi.
“A o se solia lenei feagaiga ina ua mavae ona maua e ia, ma matua liliuese mai ai, o le a na le maua le faamagaloina o agasala i lenei lalolagi po o le lalolagi a sau.
“Oi talofa foi ia i latou uma o e le oo mai i lenei perisitua ua outou maua, ou te faamauina nei ia te outou o loo faatasi mai i lenei aso, i lo’u lava leo mai le lagi; ua ou tuuina atu foi i ‘au a le lagi ma a’u agelu lo outou tausiga.
“Ou te tuuina atu nei foi ia te outou le poloaiga ia faaeteete ia te outou lava, ma gauai ma le filiga i upu o le ola faavavau.”1
O lenei afai e pei outou o au i le taimi muamua na faatoa ou faalogo ai i na upu a o avea ai ma se alii talavou, o le luitau o le taliaina o le perisitua Mekisateko sa mafai ona foliga mai sa faalotovaivaiina ai. E le itiiti ifo ma le lua mafuaaga e tatau ai ona e mautinoa nai lo le lotovaivai i faasalaga o le a mulimuli mai i le toilalo e tausia le tautoga ma le feagaiga po o le filifili e le taliaina. E tusa lava pe e te taliaina le tautoga ma le feagaiga ma iloa ai ua faigata tele, pe e te toilalo foi e taliaina, e tutusa lava le faasalaga. O lea la, e le tau fesiligia, o lou auala sili ona lelei e faapea ia te au o le taliaina lea o le perisitua paia ma taumafai ma o tatou loto atoa e tausia ona feagaiga. Afai tatou te filifili e aua ne’i taliaina, e mautinoa lava lo tatou le mauaina o le avanoa mo le ola faavavau. Afai tatou te taliaina, o le a faamanuiaina i tatou i le fesoasoani mai o le Atua, ma o le a tatou maua le ola faavavau.
Ae e i ai se isi mafuaaga ia filifili ai nei o le a e taumafai ma lou loto atoa ina ia agavaa mo lena tautoga ma le feagaiga, ma ia maua le faatuatua o le a e manuia. Ua folafola atu e le Atua ia te oe le fesoasoani ma le mana, ma afai e faaaoga lou faatuatua, o le a e manuia ai.
Sei ou faamatalaina atu nisi o faamanuiaga o le a e mauaina a o e agai i luma i le faatuatua.
Muamua, o le mea moni lava faapea ua ofoina atu ia te oe le tautoga ma le feagaiga o se faamaoniga lea ua filifilia oe e le Atua i le iloaina lea o lou mana ma le malosi. Na Ia silafiaina oe talu ona oulua mafuta ma Ia i le lalolagi o agaga. O Lona muai silafiaina o lou malosi ua Ia faatagaina ai oe ina ia e sailia le Ekalesia moni a Iesu Keriso ma ofoina atu i ai le perisitua. E mafai ona e lagonaina le mautinoa aua ua ia te oe le faamaoniga o Lona mautinoaina o oe.
Lona lua, a o e taumafai e tausia au feagaiga ua folafola mai e le Faaola Lana lava fesoasoani. Ua Ia fetalai mai faapea a o e agai i luma i le faamamaluina o le perisitua, “Ou te i ai foi, aua ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u Agaga o le a i o outou loto, e siomia foi outou e a’u agelu, e lagolagoina outou.”2
E i ai taimi e te moomia ai le faamautinoaga, e pei o au, ina ia e maua le malosi e faafetaiaia ai au matafaioi i lenei perisitua paia. Na muai silafia e le Alii lou moomia o le faamautinoaga. Na Ia fetalai, “Aua ai se faamaoni i le maua o nei perisitua e lua ua ou tautala atu ai, ma le faalauteleina o lo latou valaaulia, ua faapaiaina e le Agaga i le faafouina o o latou tino.”3
Ua ou vaaia le faataunuuina o lena folafolaga i lo’u lava olaga faapea ma olaga o isi. Sa auauna se tasi o a’u uo o se peresitene o le misiona. Na ia tau mai ia te au faapea i le faaiuga o aso taitasi a o ia auauna atu sa toetoe a le mafai ona ia oo atu i le fogafale i luga i lona moega i le po ma mafaufau pe na te toe maua le malosi e feagai ai ma le isi aso. Ona oo lea i le taeao, sa ia iloaina le toefuataiina o lona malosi ma lona lototele. Ua outou vaaia i soifuaga o perofeta ua loa soifua o e foliga mai e faafouina lava i taimi taitasi uma e tutulai atu ai e molimau atu i le Alii o Iesu Keriso ma le talalelei toefuataiina. O se folafolaga lenei mo i latou o e agai i luma ma le faatuatua i la latou auaunaga i le perisitua.
Ua folafola atu foi ia te oe faapea o le a tuuina atu ia te oe le mana e molimau atu ai ma i lena faagasologa o le a faamamaina ai oe ma faamalosia ai oe mo le ola faavavau lea na folafola atu ia te oe:
“Aua o le a ou faamagalo a outou agasala i lenei poloaiga—ina ia outou tumau pea i o outou mafaufau i le paia ma le agaga o le tatalo, i le tautino atu o molimau i le lalolagi atoa e uiga i mea uma ua faaali atu ia te outou.
“O lea, ina o atu ai ia outou i le lalolagi uma; soo se mea foi tou te le mafai ona o atu i ai, ia outou auina atu, ina ia oo atu le molimau mai ia te outou i le lalolagi atoa i tagata uma.”4
Faatasi ai ma lena folafolaga ua faamamaluina ai oe e le Alii i le faapea atu ia te oe, “O outou o i latou ia na foaiina mai e lo’u Tama ia te a’u; o a’u uo outou.”5
O loo i ai se isi faamanuiaga matagofie lea o le a faamalosiauina ai oe a o e tausia au feagaiga o le perisitua. O le auaunaga i le perisitua o le a saunia ai outou mo le nonofo ai i aiga e faavavau. O le a suia ai outou lagona i le uiga o le avea ma se tane po o se tama po o se atalii po o se uso. O lena suiga i lou loto o le a oo mai a o e lagonaina le faatupulaia o lou faatuatua ma avea ai folafolaga o le ola faavavau e ala i le perisitua Mekisateko ma mea moni ia te oe.
O le mea lena na tupu ia Parley P. Pratt ina ua faatoa aoaoina o ia e le Perofeta o Iosefa Samita i le aoaoga faavae o aiga e faavavau. Na tusia e Parley P. Pratt:
“O le taimi lenei na ou maua ai mai ia te ia le manatu muamua lava i le faavavau o faalapotopotoga faaleaiga, ma o le faatasiga e faavavau o itupa i ni mafutaga tumau e le mafaamatalaina ma e leai se tasi e iloa le auala e faatauaina ai sei vagana o e ua matuai malamalama lelei, o e ua faapaiaina, ma loto mama, ma o loo i ai lea i le faavae o mea lelei uma ina ia taua ai o le fiafia… .
“O ia na ou aoaoina mai ai o le avā o i lo’u loto e mafai ona faamautuina ia te au i le olaga nei ma le faavavau atoa, ma o saafiafiga ma moomooga alofa lea e taua ia i tatou mo isi, e mapuna mai i le punavai o le alofa paia e faavavau.
“O ia na ou aoaoina mai ai e mafai ona tatou totoina ma faatupuina nei lagona ma faateleina i le tulaga lava e tasi e oo atu lava i le faavavau; ae o le taunuuga o a tatou mafutaga e faavavau o le a avea ma ni fanau e pei o le anoanoai o fetu o le lagi po o le oneone o le matafaga… .
“Sa ou alofa muamua ae ou te le iloa le mafuaaga. Ae ua ou alofa nei—ma se loto mama—ma se lagona ua siitia ma faaeaina… . Sa ou lagona e moni lava o le Atua o lo’u Tama Faalelagi ma o Iesu o lo’u uso ma o le avā o lo’u loto o se soa e ola pea ma faavavau; o se agelu avefeau na auina mai ia te au o se faamafanafana, ma o se palealii o le mamalu ua tuuina mai ia te au e faavavau ma faavavau lava.”6
O au o se molimau tino o le auaunaga faaleperisitua e faia i le faatuatua e i ai ona aafiaga e suia ai o tatou loto ma lagona. O se alii talavou o lagona mai a’u upu i le asō e mafai ona ia mautinoa e faapea o le faamamaluina o lona perisitua o le a puipuia ai o ia mai faaosoosoga o le agasala o le feusuai lea ua taatele i le lalolagi o loo tatou nonofo ai. O le a mafaia e le perisitua Arona o loo faalogo mai ia te au i le afiafi nei, a o ia faatupuina lona faatuatua i le taui mautinoa o le ola faavavau e ala i le perisitua faavavau, ona ia maua le mana e vaai atu ai i afafine o le Atua i lo latou taua moni ma le folafolaga o ni fanau e avea ma se mafuaaga o le a ia tumau ai i le mama.
I le ala lava lea e tasi, o le faatuatua i le tautoga ma le feagaiga o le a taitai atu ai i tatou ina ia atiina ae ni lagona o le alofa mama lea e taua i se aiga e faavavau. O se tasi o folafolaga na tatou faia a o tatou taliaina le perisitua o le tausia lea o isi.
Sa ou vaaia le vavega i lena faatupulaia i le alofa mama i loto o e umia le perisitua. E faapena foi le toatele o outou. E faapea foi le toatele o e le auai i le Ekalesia. Sa ou i totonu o le ofisa o Peresitene Gordon B. Hinckley ina ua ta’u atu ia te ia e tali se telefoni. Sa puupuu lana talanoa i le telefoni ona toe taliu mai lea i le ma talanoaga. Ae sa ia faaalu se taimi e faamatala mai ai. Sa ia fai mai o le telefoni mai le peresitene o le Iunaite Setete o loo lele a’e i luga o Iuta i le Vaalele o le Air Force One e agai atu i Uosigitone. Sa valaau mai le peresitene o le Iunaite Setete e faafetai mai ia Peresitene Hinckley mo le mea na faia e le au perisitua ina ua mavae le faatafunaga a le afa. Na saunoa le peresitene o le Iunaite Setete e faapea o se vavega lava lo tatou mafaia ona maua vave ni tagata se toatele, sa matuai galulue lelei faatasi. Na ia viia o tatou tagata i le faapea mai tatou te iloa ona faataunuu ni mea.
Atonu sa faagaeetia le peresitene o le Iunaite Setete i le mea sa ia manatu o ni o tatou tomai maoae o se faalapotopotoga. O se vaega lena o le vavega. Ae o le mafuaaga tele lava o le vavega o le fia selau pe atonu foi e fiaafe le au perisitua sa i ai le faatuatua i le tautoga ma le feagaiga o le perisitua. E le o le auala na faatulagaina ai i latou na mafua ai le eseesega: o le faatuatua i le tautoga ma le feagaiga o le Perisitua na uunaia ai i latou ina ia o atu i ni mea mamao, nonofo ai mo ni itula uumi, ma onosaia ia faigata i le avea ai ma ni sui o le Alii o Iesu Keriso i le tausia o i latou o loo moomia tele le fesoasoani.
Sa latou i ai i le faagasologa o le tuuina atu o le auaunaga faaleperisitua e atiina ae ai le mana ma le agaga o le alofa mama e moomia ina ia avea ai ma ni tane, tama, atalii, ma uso maoae i aiga iinei ma aiga e faavavau. O na faataitaiga o le auaunaga faaleperisitua ua tutupu i lo tatou aapa atu i tagata, i le avea ai ma uso ma tuafafine i le aiga o le Atua i le salafa o le lalolagi mai lea taimi i lea taimi.
O la’u tatalo ina ia outou filifili i le afiafi nei, faapea ma aso uma, ina ia agai i luma i le faatuatua i le tausiga o a outou feagaiga ma le Atua ma ia outou mauaina le folafolaga na Ia tuuina mai ia te outou faatasi ma se tautoga. E mafai ona outou faia i ni mea faigofie. Afai tou te feiloai ma la outou korama, e mafai ona outou fuafua e vaai atu ia i latou o ni uso i le aiga o le Atua. O le a i ai se tasi i le korama po o le vaega a le perisitua o loo moomia le fesoasoani. Atonu na te le mafai ona faaali atu. Atonu e te le vaaia i ou mata. Ae o loo silafia e le Atua ma ua valaaulia oe ina ia avea ma Ana auauna e fesoasoani atu ia te ia.
E mafai ona pei oe o le uso a perisitua lea o taimi uma lava ou te vaai i ai i le matou auaunaga faaleperisitua e fesili mai lava, “O a mai Tinamatua?” Ou te iloa e lei vaai lava o ia i le tina o lo’u toalua. Ae sa ia iloaina lona ma’i ma le matua o lona soifua. E le mafai ona ou tauina atu ia te outou le tele o le aoga ia te au o le vaaia lea o le aao o le Atua o aapa mai ia te au ma lo’u toalua i le lagolago mai ma le faamafanafana mai e ala mai i sē o loo umia le perisitua. E mafai ona e maua lena lava aafiaga i taimi uma tou te faatasitasi ai ma le au perisitua, pe afai tou te mafaufau pea lava i lau feagaiga ina ia sii i luga ma fesoasoani ia i latou o e ua tautau i lalo o latou lima ma e o loo tauaveina ni avega mamafa. A e faia, o le a e atiina ae ia uiga tonu lava na o le a e agavaa ai e avea o se tagata o se aiga e faavavau.
E i ai se isi mea e mafai ona e faia. E mafai ona e suesueina le afioga a le Atua, e le mo na o oe lava, ae ina ia avea ma se sui o le Alii o Iesu Keriso i le lalolagi uma. Afai e te faateleina lou mana e aoao atu ai le talalelei, ua e agavaa foi e fesoasoani atu i le Tama Faalelagi i le faapotopotoina mai o Ana fanau. A o e faia lena mea, o le a oo mai le isi faamanuiaga. Afai e tulai mai le manaoga i le olaga faaleaiga i lenei lalolagi, po o le lalolagi a sau, ina ia toe aumaia ni mamoe ua leiloloa, o le a e maua le mana e sili atu nai lo le mea e mafai ona e iloaina.
O loo faamatala mai e le Alii lena faamanuiaga matagofie i le Alema 13:6: “Ma ua faapea ina ua valaauina i lenei faiva paia, ma ua tofia o le faitaulaga sili i le tofiga mai le Atua, e aoao atu ai ana poloaiga i le fanauga a tagata, ina ia ulu atu ai foi i latou i lona malologa.”
E mafai ona e maua le lagona mautinoa i lau auaunaga faatasi ai ma lenei folafolaga o le faamanuiaina:
“O lenei, ina ua faapaiaina i latou e le Agaga Paia, ina ua faasinasinaina foi o latou ofu, ina ua mama ma le le pona i luma o le Atua, ua le mafai ona vaai i le agasala, seiloga ua inoino i ai; ma ua toatele nisi, e matua toatele lava o e ua faamamaina, ma ua ulu atu i latou i le malologa o le Alii lo latou Atua.
“O lenei foi, o’u uso e, o lo’u manao ia outou faamaulaloina outou lava i luma o le Atua, ma ia fua mai i fua e tatau ma le salamo ina ia ulu atu foi outou i lona malologa.”7
Ou te molimau atu o loo soifua le Atua le Tama. Ua outou osi feagaiga ma Ia. Ua Ia ofoina mai se tautoga, o se folafolaga o le ola faavavau, lea e le mafai ona Ia solia. Ou te molimau atu ia te outou o le perisitua o le mana lea mai le Atua na auala mai i Lona Alo o Iesu Keriso na foafoaina ai lalolagi. Ou te molimau atu e finagalo le Atua ina ia e manuia ma ia foi atu i le aiga e toe mafuta faatasi ma Ia i aiga e faavavau. Ou te molimau atu ia te outou o le Ekalesia moni lenei a Iesu Keriso. O loo i ai i totonu ia ki o le perisitua. O le perisitua lena ua faamamaluina ai oe e le Atua. Ou te folafola atu ia te oe Na te silafia ou malosiaga ma ua lava ma totoe faatasi ai ma lou faatuatua atoa e te maua ai le faamoemoe i le ola faavavau mo outou, ma o outou aiga, e faavavau. I le suafa o Iesu Keriso, amene.