Ia Gauai Atu i Upu a Perofeta
I le avea ai o ni e umia le perisitua o le Ekalesia, o lo tatou tiutetauave paia o le mulimuli i lo tatou perofeta.
Ou uso pele o le perisitua, ou te faafetai lava ina ua tatou mafuta i lenei sauniga o le konafesi aoao i lenei aso iloga o le talafaasolopito.
Tatou te faamanuina i latou sa lamatia o latou ola ina ia laveaiina mai i latou sa i tulaga matautia.1 Ina ua ou asiasi atu i Kalefonia i Saute i le taimi o le malaia faataumaoi o le matagi o Santa Ana i le faaiuga o le tausaga talu ai, e lua ni lagona na ou sau ma au. Muamua, o le ala na fesoasoani atu ai tagata o le Ekalesia ia i latou sa manaomia le fesoasoani. O le lona lua, o lo latou agaga faafetai i le au fuimu. Sa faamatala e se tasi e ona ia se fale sa i ai, le mea sa ia vaai o fai e le au fuimu. Fai mai a ia, o le matagi o Santa Ana e agi mai le toafa vevela agai atu i le sami. A oo loa ina amata ola se afi, ona feula atu lea e nei matagi o toafa vevela le mumu o le afi i le saoasaoa e oo atu i le 60 po o le 70 maila (97–113 km) i le itula. Sa faamatala e lea tagata lona agaga faafetai ma le talisapaia a o ia matauina le au fuimu o tutu ma a latou faagaau i tua atu o se vaega taalaelae ma faasasaga atu i se afi musaesae ua oo atu i le 10 futu (3m) le maualuga o faaifoifo ane i o latou luga i se saosaoa maoae. Sa mafai e nei alii ma tamaitai totoa ona laveai tagata ma fale, a o i ai i latou i tulaga patino matautia e le aunoa.
Mai lea taimi i lea taimi, i le avea ai ma tagata taitoatasi faapea foi se ekalesia, tatou te feagai ma vaitau o faigata ma mea matautia. O nisi e vave ona alu a’e e pei o se afi. O isi e tuaiti ma e toetoe lava ina le iloa lo latou oo mai i o tatou luga. O nisi e manaomia ai ni faatinoga totoa ae o le tele lava e tau le iloa. O le ala tatou te tali atu ai e taua. O lo’u faamoemoega i lenei afiafi o le toe faamamafa atu lea i e umia le perisitua, le taua o le gauai atu i upu a perofeta. O le auala mautinoa lea e tasi e tali atu ai i tulaga matautia faaletino ma faaleagaga o soo se ituaiga. E ono fesoasoani ni nai faapupulaga.
E toatele outou sa auai i se malaga sopo umi ma ua silafia ai ma talisapaia le laveaiga matautia o vaega o taavaletosolima a Uili ma Matini. Na muamua ou iloa lenei laveaiga a o ou talavou. Sa aumai e lou tina ia te au se tusi na tusia e Orson F. Whitney, lea na avea ma Aposetolo i se taimi mulimuli ane.2 O le tusi a Elder Whitney ua ou masani ai i le taumafaiga lototoa na tomatauina e Polika Iaga e laveai ai vaega o taavaletosolima. Sa lofituina i latou i afa o le taumalulu i mauga valevalenoa o Wyoming. O nisi na maliliu a o nisi e toatele sa toetoe ina maliliu. Na oo ina silafia e Polika Iaga lo latou tulaga sa i ai, ma i le konafesi aoao ia Oketopa i le 1856, na faatonuina ai le Au Paia ina ia tuu mea uma ae laveai mai i latou sa pa’ulia i laufanua valevalenoa.3
Sa maoae le tali atu. Sa tusia e Elder Whitney, “ O alii totoa e ala i lo latou lotonuu—aua sa faamata’uina o latou lava ola ma sa latou sagai atu ma le lototetele i afa o le taumalulu i laufanua valevalenoa—ua faaolaolaina ai i latou lava, ma manumalo ai i le lotofaafetai e le uma o le fiaselau o e na mautinoa le faasaoina mai le faafanoina ona o la latou faatinoga na talafeauga lelei.”4
O se tasi o mafuaaga na tuu mai ai e lo’u tina le tusi ia te au, ona sa faapitoa lava ona ta’ua e Elder Whitney le tama o le tama o le tama o lo’u tina, o David Patten Kimball, o le sa auai i le laveaiga ina o 17 tausaga o lona matua. Sa tauivi le au laveai uma ma le kiona mafiafia ma le taumalulu maatiati mai Sate Leki e oo atu i le Vaitafe Suamalie i Wyoming. I se osigataulaga patino maoae, sa fesoasoani ai David ma ana uo e la’u le toatele o paionia e ui atu i le Vaitafe Suamalie ua to’a le aisa.5 O lenei tala moni sa matua faagaeetia ai lava au. Sa ou manao e faamaonia lo’u tuuto atu i le Alii e ala i se faatinoga maoae. E ui i lea, i se ma talanoaga ma lo’u tamamatua, sa ia faamatala mai ai ina ua auina atu e Peresitene Polika Iaga ia David ma isi alii talavou i la latou misiona laveai, sa faatonuina i latou e Peresitene Iaga, ina ia latou faia mea uma latou te mafaia ina ia laveai ai le vaega o taavaletosolima tusa pe lamatia ai o latou lava ola.6 O a latou faatinoga o le lotototoa, sa patino lava i le “mulimuli i le perofeta o Polika Iaga” ma ina o latou faia, sa faaali atu lo latou faatuatua i le Alii, o Iesu Keriso. Sa ta’u mai e lo’u tamamatua, o le tuuto atu e le aunoa, ma le faatuatua i le fautuaga a se perofeta, o le lesona tonu lava lea e tatau ona ou aoaoina mai le auaunaga a le tama o le tama o le tama o lo’u tina. E faapei o le lototoa o David ma ana uo na fesoasoani ai e laveai paionia, o le toa foi i aso nei le mulimuli i fautuaga a lo tatou perofeta.
Ua faapupula mai e se tala e faamatala soo mai i le Feagaiga Tuai, lenei mataupu faavae. O Naamanu, o se taitai iloga i Suria, sa mafatia i le lepela. Sa iloa e ia o loo i ai le perofeta o Elisaia i Isaraelu, ma e atonu e mafai ona ia faamalolo ia te ia. Na auina atu e Elisaia se avefeau ma se faatonuga ia Naamanu e alu e taele faafitu i le vaitafe o Ioritana. O le taimi muamua, na le fiafia Naamanu i lenei fautuaga. E ui i lea, sa fai atu lana auauna, “Ana fai atu atu e le perofeta se mea tele ia te oe, e te le faia ea?” Ona mulimuli ai lea o Naamanu i le fautuaga a le perofeta o Elisaia ma ua alu ma fufui faafitu i le vaitafe o Ioritana, ona mama ai lea o ia.7
E faapei foi o Naamanu, atonu foi tou te mananao outou na alii talavou o loo umia le perisitua e “fai ni mea tetele” pe auai i le faatinoina o se mea iloga e pei o le laveaiga o taavaletosolima. Peitai, e tatau ona outou filifili ma le mausali e mulimuli i le fautuaga a le perofeta. Sa toe faamautinoa mai e le Au Peresitene Sili lana tautinoga e faateleina le agavaa o tupulaga talavou o e ua fautuaina mai mo le galuega faafaifeautalai. O le tausisia o outou ia saoloto mai agasala a le lalolagi, ma ia maua le tulaga maualuga faatonuina o le auaunaga faafaifeautalai e tatau ona avea lena ma se tasi o sini. O le saunia o outou lava ia maua se valaauga mai le perofeta e folafola atu le talalelei ma laveai faaleagaga mai nisi o fanau a le Tama Faalelagi, o le a maoae ma lotonuu. E mafai ona outou ausia lenei luitau.
I le talafaasolopito atoa, ua faamanuiaina e se Tama Faalelagi alofa ma Lona Alo, o Iesu Keriso, lea o loo avea ma ao o le Ekalesia, i tatou i ni perofeta o loo fautua mai ma lapatai mai e uiga i tulaga matautia i le lumanai.8 I le Mataupu Faavae ma Feagaiga vaega e 21, a o fetalai patino i le perofeta, na tautino mai ai e le Alii, “… ia outou gauai i ana upu uma ma poloaiga o le a tuuina atu e ia ia te outou e pei ona ia maua, ma savavali i o’u luma i le paia atoatoa; aua o lana upu o le a outou talia, e pei lava o loo alu atu mai ia te au, i le onosai uma ma le faatuatua.”9
Sa tatou maua le avanoa e le laumaua i le taeao analeila i se potopotoga paia e lagolagoina ai Peresitene Thomas S. Monson o lo tatou perofeta, tagatavaai, ma talifaaaliga ma o le Peresitene lona 16 o le Ekalesia i lenei tisipenisione. I se taimi mulimuli ane i lenei sauniga perisitua o le konafesi, o le a faamanuiaina ai i tatou e faalogologo atu i lana uluai saunoaga i le konafesi aoao, o le peresitene o le Ekalesia. O le a tatou mananao e lagolagoina o ia faatasi ma o tatou loto ma a tatou aga, a o tatou gauai atu ma le faaeteete i mea na te aoao mai ma mea tatou te lagonaina.
O lo’u alofa ma le agaga talisapaia o lo tatou perofeta talu ai nei, o Peresitene Gordon B. Hinckley, ua toto i le taele o lo’u loto ma o le a tumau pea ia te au e oo atu i le faavavau. Ae e faapei lava ona i ai o se avanoa i o tatou loto mo fanau uma lava e oo mai i o tatou aiga, e faapena foi lo tatou alolofa ma le naunautai mo perofeta taitasi e tofia e le Alii e taitai Lana Ekalesia.
E musuia perofeta ina ia saunia mo i tatou ni tomatauga faaperofeta e puipuia ai i tatou mai mea matautia. Mo se faataitaiga, o Peresitene Heber J. Grant, le perofeta mai le 1918 e oo atu i le 1945, sa musuia o ia e faamamafa le tausiga o le Upu o le Poto,10 le mataupu faavae ua i ai ma se folafolaga na faaalia mai e le Alii i le Perofeta o Iosefa.11 Sa ia faamamafa mai le taua o le lē ulaula po o le inu ava malosi ma sa faatonuina epikopo ina ia toe iloiloina nei mataupu faavae i le taimi o faatalanoaga mo pepa faataga o le malumalu.
O le taimi lena sa taliaina ai le ulaula e tagata, o se aga e talafeagai, ma e manaia. Sa taliaina e le galuega faafomai le ulaula faatasi ai ma sina popolega laitiiti, aua e lei faia i lena taimi ni suesuega faasaienitisi i le sootaga o le ulaula tapaa ma le tele o ituaiga kanesa. Sa fautua mai ma le malosi Peresitene Grant, ma sa oo ina lauiloa i tatou o ni tagata e faasa ai le inu ava malosi ma le ulaula.
Na amata mai i le taufaaiuiuga o le 1960, na matua salalau ai fualaau faasaina i le lalolagi atoa. Sa faataumaoi le aafiaga i le tele o tupulaga talavou. E ui ina sa i ai ni tagata o le ekalesia sa faatuiese, o le toatele lava o talavou o le Au Paia o Aso e Gata Ai sa mafai ona aloese mai le faaaogaina faataumaoi o fualaau faasaina.
O le usitai i le Upu o le Poto na aumaia ai i o tatou tagata, aemaise lava o tatou tupulaga talavou se tui puipui e faasaga i le faaaogaina o fualaau faasaina. O aoaoga ma le mea na faamamafa mai e se perofeta na faasaoina mai ai augatupulaga o tupulaga talavou mai toatuga matautia faalesoifua maloloina ma tulaga matautia o amio. O le tausia o le Upu o le Poto i le taimi nei o le a faasaolotoina ai outou mai nisi o tulaga matautia ogaoga e mafai ona outou feagai i lenei olaga.
O nisi taimi e aoaoina i tatou e perofeta i tomatauga po o faamuamua faaperofeta, e saunia ai se puipuiga mo i tatou i le taimi nei ma le lumanai. Mo se faataitaiga, o Peresitene Tavita O. MaKei o le perofeta mai le 1951 e oo atu i le 1970. O se tasi o itu taua na taulai i ai o lana faamamafa lea e uiga i le aiga. Sa ia aoao mai e leai se manuia i le olaga e mafai ona suitulaga i le toilalo i totonu o le aiga.12 Sa ia fautuaina tagata o le ekalesia ina ia faamalolosi aiga e ala i le faateleina o le olaga faalelotu. O ana aoaoga o se puipuiga lea mai le nutipalaina o le faavae o le faaipoipoga lea na oo mai ina ua mavae lona maliu.13 O le aoaoga a Peresitene MaKei na mafua ai ona faamalolosia e le Au Paia o Aso e Gata Ai a latou tautinoga i le aiga ma le faaipoipoga e faavavau.
I le avea ai o ni e umia le perisitua o le Ekalesia, o lo tatou tiutetauave paia o le mulimuli i lo tatou perofeta. Ua tatou lagolagoina Peresitene Monson ma ona fesoasoani, o Peresitene Eyring ma Peresitene Uchtdorf.
Matou te mananao ia te outou le tupulaga talavou ia outou iloa sa saunia Peresitene Thomas S. Monson e le Alii mai lava i lona talavou e avea ma perofeta.14 Ina ua mavae ona ia tautua i le neivi i le faaiuga o le Taua Lona Lua a le Lalolagi, sa faauuina o ia e avea ma epikopo i le 22 o ona tausaga, ona auauna ai lea i se au peresitene o le siteki. I le 32 o ona tausaga, sa avea ai o se peresitene o le misiona i Kanata faatasi ma lana manamea ma lana soa, o Frances Monson. Sa tofia o ia e fai ma Aposetolo e Peresitene MaKei ina ua na o le 36 tausaga o lona matua. O ia o se tamalii aupito laitiiti na tofia e avea ma se Aposetolo i le 98 tausaga ua mavae atu, ma ua silia ma le 44 tausaga o ia auauna ai. O tausaga e 22 talu ai, sa avea ai o ia ma se fesoasoani ia Peresitene Ezra Taft Benson, Howard W. Hunter, ma Gordon B. Hinckley.15
O loo aumai i le vaega e 81 o le Mataupu Faavae ma Feagaiga ni faatonuga i se fesoasoani i le Au Peresitene Sili. O loo i ai mataupu faavae taua faaleperisitua. O le faatonuga muamua o le “faamaoni i le faufautua.” Sa faamaoni Peresitene Monson i le faufautua i perofeta taitasi e toatolu sa ia auauna i ai. O le finagalo tasi o le Au Peresitene Sili ia latou faaiuga taua uma, na avea lena ma se faataitaiga ia i tatou uma o ni e umia le perisitua i le faatinoina o le faafoeina o le Ekalesia.
O le faatonuga lona lua o le “talai atu le talalelei.” O Peresitene Monson o se faifeautalai maoae i lona soifuaga atoa. O lana taumafaiga patino faafaifeautalai, o lana galuega faafoe i le Matagaluega o Faifeautalai, ma lona tofia ma aoaoina o peresitene o misiona, sa faia ma le naunautai. Sa tele sona sao i le taiala fou a faifeautalai, o le Talai La’u Talalelei. E le gata i lona sao taua i le anotusi, ae sa ia musuiaina le tuu i ai o tala moni ina ia tulai mai se taiala ola. Faatasi ai ma lona silafia maoae i mea tau lolomitusi, sa ia faaleleia atili ai le mamanu ma le faataotoga. O ia moni lava o se faifeautalai maoae.
O le faatonuga lona tolu e faitauina, “O lea, ia faamaoni ai; ia tumau i le tofiga ua ou tofia ai oe; ia fesoasoani i e vaivai, ia sii a’e lima o loo tautau i lalo, ma faamalosia tulivae vaivai.”16 O le toatele o o tatou uso ma tuafafine e feagai ma faafitauli faataumaoi i o latou olaga. O lo tatou aapa atu ia te i latou e faapei o Keriso, o ni taitai perisitua, matua, uo, ma faiaoga o aiga, e mafai ai ona pei o le au laveai o le vaega o taavaletosolima.
O taumafaiga laveai a Peresitene Monson i le itu lea, o se faaaoaoga patino. I le avea ai ma se epikopo, sa ia aoao ai e auauna atu i tagata o lana uarota. Sa ia fesootai ma auauna atu ia latou fanau ma fanau a fanau. E ui lava i lona pisi tele, sa mafai lava ona ia saunoa i falelauasiga o tina e 84 ua oti a latou tane, o e sa i ai i lana uarota a o avea o ia ma epikopo.
Sa ia aapa atu i se ala ofoofogia ma le patino ia i latou e manaomia le fesoasoani. O tausaga e tele na ia faafoeina ai taumafaiga fesoasoani mo tagata, ua faamanuiaina ai tagata i le lalolagi atoa, e le gata i tagata o le ekalesia ae faapea foi i latou e le auai i la tatou tapuaiga. O lana misiona patino e faa-Keriso ma ua avatu ai le mafanafana ma le filemu i tagata e le mafaitaulia. Sa fai mai se tasi o au uo na maliu se atalii o lona atalii i se faalavelave matautia, o lona loto faavauvau sa toetoe lava ina a le malamalama ai. O le galuega auauna atu a Peresitene Monson ia te ia na liua ai le loto faavauvau i le filemu e le oo i ai se malamalama. O lana taumafaiga e auauna atu ia lava ia i latou o e mamai ma puapuagatia, e tulaga ese.
Sa faia e Peresitene Monson le mea sili na te mafaia e “ … fesoasoani i e vaivai, si’i ae lima o loo tautau i lalo, ma faamalosia tulivae vaivai.” Sa ia faalauteleina lona valaauga o se fesoasoani i le Au Peresitene Sili i se ala ofoofogia. Sa ia tautino atu ma le finagalo toa le suafa o Iesu Keriso i le lalolagi uma, o le uluai tiutetauave lea o Aposetolo uma.
I le avea ai ma se uso fou i le Toasefululua i le taimi nei, a o ou auai i le toe faatulagaina muamua ua ou auai o le Au Peresitene Sili i se afeafe aupito aluga o le Malumalu o Sate Leki ia Fepuari na tea atu nei, sa ou iloa ai le faamautinoaga a le Agaga a o lagolagoina taitoatasi ma aufaatasi e le Toasefulululua ia Peresitene Monson o le perofeta a le Alii ma Peresitene o le Ekalesia.
Ou te faafetai lava i lo tatou Tama i le Lagi, o le e alofa ia i tatou, ma mo Lona Alo, o Iesu Keriso. O Ia o lo tatou Faaola, ma o Ia o lo tatou Laveai tupito mai matautia faaletino ma faaleagaga o le olaga, e ala i le Togiola. O Ia o lo tatou faufautua i le Tama. Ou te molimau atu ai i le suafa o Iesu Keriso, amene.