Faaolataga ma le Faaeaga

Elder Russell M. Nelson

O Le Korama a Aposetolo e Toasefululua

I le fuafuaga e faavavau a le Atua, o le faaolataga o se tulaga e faaletagata lava ia; o le faaeaga o se tulaga e faaleaiga.

Ma le agaga faafetai matou te faafeiloai atu ai ia Elder D. Todd Christofferson i le Korama a Aposetolo e Toasefululua. Matou te lagolagoina ma le loto atoa lenei Au Peresitene Sili lelei ma i latou uma na valaauina.

Uso e ma tuafafine, ina ua tatou maua le tala i le tuumalo o Peresitene Gordon B. Hinckley, na tatou taufai tofu maua se lagona loloto o le faanoanoa. Ae peitai, i le iloaina ua i ai i aao o le Alii lona taunuuga, na tatou lagonaina ai le suia o o tatou lagona mai le faanoanoa i le agaga faafetai. Tatou te matua faafetai lava mo mea ua tatou aoaoina mai i lenei perofeta maoae a le Atua.

O le asō, i lenei potopotoga paia, ua tatou au faatasi ma le finagalo o le Alii, o le na fetalai mai “o le a le tuuina atu se tasi e alu atu ma tu e talai la’u talalelei, pe atiina ae la’u ekalesia, vagana ua faauuina o ia e se … tasi o i ai le pule, ma e lauiloa e le ekalesia o ia te ia le pule ma ua uma ona faauuina i le ala e masani ai e i latou o e taitai i le ekalesia.”¹ O lenei tulafono o le finagalo au faatasi² ua faatinoina, ma o le a agai i luma le Ekalesia i lona ala ua faamatalaina.

Ua lagolagoina e tagata o le ekalesia i le lalolagi atoa ia Peresitene Thomas S. Monson ma ona fesoasoani agavaa. “E le toe tagata ese i [tatou] po o e ua aumau, a ua nuu faatasi ma le au paia, o le aiga foi o le Atua;

“O loo ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.”³

Na faaali mai e le Alii le pogai “na ia tuuina mai foi nisi e fai ma aposetolo; o isi foi e fai ma perofeta.” Ina “ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso:

“Seia tatou oo atu o i tatou uma lava ma le loto gatasi i le faatuatua ma le iloa lelei o le Alo o le Atua.”⁴

O lea la, o le galuega a le au Aposetolo—o le Au Peresitene Sili ma le Toasefululua—o le aumaia o lena lotogatasi i le faatuatua ma ia folafola atu lo tatou iloa lelei o le Matai. O la tatou galuega o le faamanuiaina o olaga o i latou o e o le a aoao ma mulimuli i le “ala e silisili lava” a le Alii.⁵ Ma e tatau ona tatou fesoasoani atu i tagata e saunia mo o latou faaolataga ma faaeaga folafolaina.

Fai mai le mataupu faavae lona tolu o le faatuatua e faapea “e faaolaina tagata uma lava i le togiola a Keriso, pe a tausia poloaiga ma sauniga o le Talalelei.”

Ina faasaoina—po o le mauaina o le faaolataga—o lona uiga ia faasaoina mai le oti faaletino ma le oti faaleagaga. Talu ai ona o le Toetu o Iesu Keriso, o le a toetutu uma ai tagata ma faasaoina mai le oti faaletino. E mafai foi ona faasaoina tagata mai le oti faaleagaga o le tagata lava ia, e ala i le Togiola a Iesu Keriso, e ala i lo latou faatuatua ia te Ia, e ala i le ola i le usiusitai i tulafono ma sauniga o Lana talalelei, ma auauna atu ia te Ia.

Ina ia faaeaina—po o le mauaina o le faaeaga—e faatatau lea i le tulaga aupito maualuga o le fiafia ma le mamalu i le malo selesitila. O nei faamanuiaga e mafai ona oo mai ia i tatou pe a tatou tuua lenei olaga maaleale ma le faaletino. O le taimi e saunia ai mo lo tatou faaolataga ma le faaeaga mulimuli o le taimi nei.⁶

O se vaega o lena sauniuniga, e ao ai i se tagata ona faalogo ma malamalama i le talalelei. O le mafuaaga lenei, ua auina atu ai le talalelei a Iesu Keriso i “atunuu uma, ma ituaiga, ma gagana eseese, ma nuu.”⁷

Tiutetauave o le Tagata Lava Ia

I tausaga ua mavae, sa ma feiloai ai ma se tupu o se ituaiga i Aferika. Ina ua ia silafia sa aoaoina o ia e se Aposetolo a le Alii, sa matuai faagaeetia lava o ia. Na ia saunoa mai o le a matuai toatele tagata o lona nuu o le a papatiso pe a faapea na te poloaiina ai i latou. Sa ou faafetai atu ia te ia mo lona agalelei, ae sa ou faamalamalama atu i ai, e le o le auala lena e galue ai le Alii.

O le atiina ae o le faatuatua i le Alii o se tulaga e patino i le tagata lava ia. O le salamo foi o se tulaga e patino i le tagata lava ia. E mafai ona papatisoina na o le tagata e toatasi ma maua le Agaga Paia. O i tatou uma ua fananau mai taitoatasi; e faapena foi, e taitoatasi i tatou ma “toe fanaufouina”⁸ taitoatasi. O le faaolataga o se tulaga e patino i le tagata lava ia.

Tiutetauave o Aiga

O le alualu i luma o le tagata lava ia e faafaileleina i totonu o le aiga, “o le totonugalemu lea o fuafuaga a Le Foafoa mo le taunuuga e faavavau o Lana fanau.”⁹ O le aiga e tatau ona avea ma fale su’esu’e o le Atua mo le alofa ma le auauna atu. O iina e tatau ai i se tane ona alofa i lana ava, o se ava e ao ona alofa i lana tane, ma o matua ma fanau e tatau ona alofa le tasi i le isi.

Ua matuai faateteleina le osofaia o le aiga. Afai e toilalo aiga, o le a faapea foi ona toilalo le tele o vaega faaupufai, faaletamaoaiga, ma le vafealoai. Ma afai e toilalo aiga, e le mafai foi ona ausia o latou faamoemoega mamalu e faavavau.

E finagalo lo tatou Tama Faalelagi i tane ma ava ina ia faamaoni a’ia’i le tasi i le isi, ma ia faataua ma tausi a latou fanau o se tofi lea mai le Alii.¹⁰ O se aiga faapena tatou te suesue ai i tusitusiga paia ma tatalo faatasi. Ma ia tumau lo tatou tepa taulai atu i le malumalu. O iina tatou te maua ai faamanuiaga aupito maualuluga ua saunia e le Atua mo Lana fanau faamaoni.

Faafetai i le fuafuaga sili o le fiafia a le Atua,¹¹ ua mafai ai e aiga ona faatasia e faavavau—o ni tagata faaeaina. Ua tautino mai e lo tatou Tama Faalelagi, “O la’u galuega ma lo’u mamalu lenei—ia faataunuu le faaofuina o le tagata i le tino ola pea ma le ola faavavau.”¹² O Ona faamoemoega uma nei na mafai ona faataunuuina e ala i le Togiola a Lona Alo Pele o Iesu Keriso. O Lana Togiola ua avea ai le toetu ma se mea moni ma le ola e faavavau o se avanoa e mafai ona maua e i latou uma o le a soifua mai.

E oo mai le toetu po o le tino ola pea, i alii ma tamaitai uma o se meaalofa e le faatuaoia.

O le ola faavavau, po o le mamalu selesitila, po o le faaeaga, o se meaalofa e faatuaoia. O tulaga o lenei meaalofa ua uma ona faatulagaina e le Alii, o le na fetalai, “Afai e te tausi i a’u poloaiga ma tumau e oo i le iuga o le a e maua le olaga faavavau, o le meaalofa sili lea i lo meaalofa uma a le Atua.”¹³ O na aiaiga e agavaa ai e aofia ai le faatuatua i le Alii, salamo, papatisoga, mauaina o le Agaga Paia, ma tumau faamaoni i sauniga ma feagaiga o le malumalu.

E leai se tane i lenei Ekalesia e mafai ona maua le tikeri aupito maualuga o le mamalu selesitila e aunoa ma se tamaitai agavaa ua faamauina ia te ia.¹⁴ O lenei sauniga faalemalumalu e maua ai le faaeaga mulimuli mo i la’ua uma.

E mafai ona faamaloloina mai i tatou i valaauga faale-Ekalesia. Ae e le mafai ona faamaloloina i tatou i le avea ai ma ni matua. Mai lava i uluai aso o le talafaasolopito o le tagata, na poloaiina ai e le Alii ia matua ina ia aoao le talalelei i a latou fanau.¹⁵ Na tusia e Mose: “Ia e … matua aoao soo … lau fanau, ma ia e tautalatala ai [i afioga a le Atua] pe a e nofo i lou fale, pe a e savali foi i le ala, pe a e taoto, pe a e tulai foi.”¹⁶

I o tatou aso, ua faaopoopo mai le Alii, “E taitaiina a outou fanau i le malamalama ma le upumoni.”¹⁷ O le Ekalesia e ao ona fesoasoani atu ae aua nei suitulaga i matua i lo latou tiutetauave o le aoaoina o a latou fanau.

I nei aso i le faateteleina o le ola le mama ma le avea o ponokalafi ma vaisū, ua i ai i matua se tiutetauave paia o le aoao o a latou fanau i le taua o le Atua i o latou olaga.¹⁸ O na mea faatiapolo, e matuai faatafunaina ai faamoemoega paia, ma e ao lava ona matuai teena malosi e fanau a le Atua.

E tatau foi ona tatou aoaoina a tatou fanau ia ava i o latou matua. Fai mai le tulafono e lima: “Ia e ava i lou tama ma lou tina: ina ia faalevaleva ai ou aso i le nuu o le a foaiina mai e Ieova lou Atua ia te oe.”¹⁹

O a ni auala e sili ona lelei e aoao ai a tatou fanau? Ua tuuina mai e le Alii ia i tatou ni faatonuga faapitoa:

“E le tatau ona faatumauina se mana po o se uunaiina e le pule o le perisitua, tau lava i le tauanau atu, i le faapalepale, le agalelei, ma le agamalu, ma le alofa faamaoni;

“I le agalelei, ma le malamalama mama, e matua faalauteleina ai le agaga e aunoa ma le pepelo, e aunoa ma le faa’ole’ole—

“I le aoai faamalosi atu i aso e tatau ai, pe a uunaiina e le Agaga Paia; a e faaali atu mulimuli le alofa faateleina i le ua e aoaiina, ina nei fai oe e ia mona fili.”²⁰

Pe a manaomia ona faasa’o se tamaitiiti, e mafai ona e fesili ifo ia te oe lava, “O le a se tala po o se mea e mafai ona ou faia ina ia tauanau ai o ia e filifili se ala e lelei atu?” Pe a tuuina atu le faasa’oga moomia, ia faia ma le filemu, faalilolilo, agaalofa, ae aua le faalauaiteleina. Afai e manaomia se aoaiga, ia vave faaali atu se alofa faateleina ina ia aua nei tumau ai ni lagona o le le fiafia. Ina ia tauanau atu, e tatau ona faamaoni lou alofa ma ia faavae au aoaoga i aoaoga faavae paia ma mataupu faavae sa’o.

Aua le taumafai e pulea lau fanau. Ae, ia faalogo atu ia i latou, fesoasoani ia i latou ia aoao i le talalelei, musuia i latou, ma taitai atu i latou i le ola e faavavau. O outou o sui o le Atua i le tausiga o fanau ua Ia tuuina atu ia te outou. Ia i ai Lona aafiaga paia i o outou loto a o outou aoao atu ma faatauanau atu.

Augatuaa

Soo se talanoaga e uiga i tiutetauave faaleaiga e saunia ai mo le faaeaga, o le a le atoatoa pe afai e na o le tina, tama, ma le fanau e aofia ai. Ae faapefea ia matua o matua ma isi tuaa? Ua faaali mai e le Alii e faapea, e le mafai lava ona faaatoatoaina i tatou e aunoa ma i latou; po o i latou foi e aunoa ma i tatou e le mafai lava ona faaatoatoaina.²¹ O sauniga o le faamauga e taua i le faaeaga. E tatau ona faamauina se ava i lana tane; e tatau foi ona faamauina le fanau i o latou matua; o i tatou uma e manaomia ona tatou fesootai atu i o tatou augatuaa.²²

Ae faapefea i latou o e e le mafai ona faaipoipo i lenei olaga, pe o i latou o e e le mafai ona faamauina i o latou matua i le olaga nei? Ua tatou iloa o le a faamasinoina e le Alii i tatou taitoatasi e tusa ma manaoga o o tatou loto, faapea ma a tatou galuega,²³ ma o faamanuiaga o le faaeaga o le a tuuina atu ia i latou uma o e agavaa.²⁴

O i tatou o fanau o le feagaiga ua sili atu ona alofaina. Ua toto i o tatou loto ia folafolaga na faia ia Tama Aperaamo, Isaako, ma Iakopo. Na fetalai mai le Alii:

“Aua o suli moni outou, e tusa ma le tino, na natia foi mai le lalolagi faatasi ma Keriso i le Atua… .

“O lea, amuia outou afai tou te tumau pea i lo’u lelei, o le malamalama i Nuu Ese, i lenei foi perisitua, o se faaola i lou nuu o Isaraelu.”²⁵

O le olaga lenei o le taimi lea e saunia ai mo le faaolataga ma le faaeaga.²⁶ I le fuafuaga e faavavau a le Atua, o le faaolataga o se tulaga e faaletagata lava ia; o le faaeaga o se tulaga e faaleaiga.

I le avea ai ma fanau o le feagaiga, ua tatou faatasia i lenei taeao i le potopotoga paia. Ua taulai atu o tatou manatu i faalagiga paia o perofeta ma aposetolo. Ae peitai, o le tiutetauave mulimuli o le saunia mo le faaolataga ma le faaeaga mulimuli e fitoi tonu lea i tagata taitoatasi, e tali mo filifiliga taitasi, e fai ma sui o lona lava aiga, e tauaveina le isi faalagiga paia o le tina, tama, afafine, atalii, tinamatua, po o le tamamatua.

I na matafaioi taua, tau ina ia tatou agai atu i luma i le faatuatua, e taitaia e Iesu Keriso, o le ana lenei Ekalesia, ma Lana perofeta o loo ala mai ai Ana fetalaiga, ou te ole atu ai i le suafa o Iesu Keriso, amene.