O Faitaulaga Sili Pulefaamalumalu e Toatolu
O le a oo mai ia i tatou le poto ma le malosi pe a tatou vaavaai atu i le Au Peresitene Sili e fai ma o tatou faaa’oa’o ma mamanu o a tatou taitaiga.
O se faamanuiaga ma se avanoa mo i tatou le lagolagoina o Peresitene Thomas S. Monson, Peresitene Henry B. Eyring ma Peresitene Dieter F. Uchtdorf o le Au Peresitene Sili fou o le Ekalesia a le Alii.
Na muamua ou iloaina le taua o le Au Peresitene Sili a o ou laitiiti ma ola ae i Kanata i Sisifo. Pe a ou alu i le fale o Tinamatua ma Tamamatua Walker, e faafeiloaia lo’u ulufale atu i se ata faavaa o le Au Peresitene Sili o le Ekalesia. Ou te manatua lelei lava. Na foliga mai sa latou tutu o ni leoleo, e faafeiloai i tagata uma e ulufale atu.
O le ata lanu matagofie o Peresitene Siaosi Alapati Samita ma ona fesoasoani o J. Reuben Clark Jr. ma Tavita O. MaKei. I le ata o loo latou tutu faatasi ai i talaane o se kelope tele o le lalolagi. Sa ou fiafia lava i le ata. O i latou o ni tamalii aulelei ma le malualii; sa ou iloaina i latou o se perofeta a le Atua ma ona fesoasoani.
O lena ata na tautau i le faapaologa pito i luma o le fale o ou matua matutua, na i ai se aafiaga mamana ia te au. Sa ou nofo i se nuu laitiiti o Raymond lea sa nonofo ai ou matua matutua. Sa mafai lava ona ou savali atu i lo laua fale, o lea sa ou asiasi soo ai i ai. Ou te manatua sa masani ona ou tutu filemu na o au i le faapaologa ma tilotilo atu ma le faaaloalo i lena ata o le Au Peresitene Sili. Ou te manatuaina lou tau mafaufau pe aisea na manatu ai ou matua matutua e taua tele le faamamalu o le Au Peresitene Sili ma tuu faapitoa ai lena ata i lo laua fale. O le a vaaia e tagata uma e ulufale atu i ai. Atonu o le mea aupito taua, i le la fanau ma fanau a le la fanau o se faamanatu i taimi uma o le mea sa sili ona taua i loto ma soifuaga o Tinamatua ma Tamamatua.
O tausaga mulimuli ane sa ou faapea ifo ai, o le faaalia o le ata o le Au Peresitene Sili sa tutusa lava ma le saunoaga matagofie a Iosua: “Ina filifili ia outou i le aso nei po o ai tou te auauna i ai; … a o au nei ma lo’u aiga, matou te auauna ia Ieova” (Iosua 24:15).
Na silafia e i latou uma na ulu atu i le fale o James ma Fannye Walker, na tusia i o laua loto ia upu “A o matou nei ma lo matou aiga, matou te auauna ia Ieova.” I le avea ai ma se tama a se la tama, sa ou iloaina, ma ou te le’i faagaloina lava.
A o ou laitiiti ou te lei malamalama lelei i le taua o le i ai o ni tagata se toatolu i le Au Peresitene Sili, ae le o se peresitene e toatasi. E moni, na ou iloaina, na filifilia e Iesu ia Peteru, Iakopo, ma Ioane, ae le na o Peteru. Na ou iloaina o lotama sa avea ma se tasi o alii e toatolu i le au epikopo, na avea o se fesoasoani ia Epikopo J. O. Hicken. Na ou iloaina o lo’u tamamatua sa avea ma peresitene o le siteki ma sa i ai ni ona fesoasoani se toalua sa tutu i ona tafatafa (o Peresitene John Allen ma Peresitene Leslie Palmer).
I soo se tulaga lava—o se au peresitene—e le faapea e na o le toatasi se alii e avea o se taitai, ae e toatolu e taitai faatasi. O le Peraimeri na ou aoaoina ai Mataupu Faavae o le Faatuatua ma sa iu ina ou fiafia i ai. O Mataupu Faavae o le Faatuatua e tuuina atu i o tatou tagata talavou le mafanafana ma le lototele a o latou aoao i aoaoga faavae autu o le Ekalesia. Na ou iloaina i lena taimi “e ao ina valaauina le tagata e le Atua, i le valoaga, ma le faaee atu o lima o e o i ai le pule, e talai atu ai le talalelei ma faia sauniga o i ai” (Mataupu Faavae o le Faatuatua 1:5).
O le 1835 na faaali mai ai e le Alii i le Perofeta o Iosefa Samita le faatulagaga sa’o o au peresitene i le Ekalesia:
“Ona e tatau ai e i ai peresitene, po o taitai pulefaamalumalu… .
“E mai le Perisitua faaMekisateko, e toatolu faitaulaga sili pulefaamalumalu, e filifilia e le faapotopotoga, ma tofia ma faauuina i lea tofiga, ma lagolagoina i le faalagolago, faatuatua, ma le tatalo a le ekalesia, e fai ma korama o le Au Peresitene o le Ekalesia” (MFF 107:21–22).
“O le korama o peresitene e toatolu” (MFF 107:29)—e le o se peresitene ma sui peresitene e toalua ae o faitaulaga sili pulefaamalumalu. O se korama o peresitene e toatolu—o le Au Peresitene Sili o le Ekalesia a le Alii.
E le faatulagaina e le lalolagi ia lava faapenei, ae o le faiga lenei e faatulaga ma fuafuaina ai e le Alii Lana Ekalesia.
E manatua ai le mau:
“Aua o ou manatu e le o outou manatu, o ou ala e le o outou ala, ua fetalai mai ai Ieova.
“Aua e pei ona sili ona maualuga o le lagi i le lalolagi, ua faapena ona sili ona maualuga o ou ala i o outou ala, ma ou manatu e sili i o outou manatu” (Isaia 55:8–9).
E tusa o le vaitaimi o lou aso fanau e fitu a’i ou tausaga, na ou iloa ai sina mea itiiti e uiga i ē e sui i le Au Peresitene ina ua maliu Peresitene Siaosi Alapati Samita. O se taimi mulimuli ane na sui ai le ata i le faapaologa o Tinamatua ma Tamamatua i se ata matagofie o Peresitene Tavita O. MaKei ma ona fesoasoani o Stephen L. Richards ma J. Reuben Clark Jr.
Ona o au o se tamaitiiti, sa mautinoa lava ou te lei malamalama i le taua a’ia’i po o le faagasologa o tagata e sui i le Au Peresitene—ae na ou iloaina ua maliu le perofeta ma sa faapea ona taitaiina i matou e se perofeta fou a le Atua, faatasi ma ni fesoasoani se toalua i ona autafa.
I le 13 o ou tausaga sa valaauina ai au i le ofisa o Epikopo Murray Holt, ma sa ia tuuina mai ai se valaauga ia te au e avea ma se peresitene o le korama a tiakono. Sa ia saunoa mai ia te au e manaomia ona ou alu i le fale ma tatalo po o ai e tatau ona avea ma ou fesoasoani. Sa ia aoaoina au e faapea, o le a fesoasoani mai le Alii i lau filifiliga. Sa [fesoasoani] mai o Ia. Ona ou aoao lea e uiga i fesoasoani, ma amata ai ona ou iloa le mafuaaga na finagalo ai le Alii e taitai Lana Ekalesia e au peresitene, ae le na o peresitene. Sa ou alofa lava i ou fesoasoani i le korama a tiakono, ma sa matou tatalo ma galulue malolosi e fesoasoani i tama o la matou korama. Na aoao mai e Epikopo Holt ia te au le mamanu o au peresitene ma auala e tatau ona faatautaia ma galulue ai se au peresitene i le Ekalesia a le Alii.
Ina ua ou auauna mulimuli ane o se peresitene i isi korama, sa ou iloaina le taua o fesoasoani, ma na ou iloaina o le a fesoasoani mai le Alii ia te au e filifilia i latou—e pei lava ona aoao ai au e lo’u epikopo.
I le avea ai ma se peresitene o le korama a tiakono ma mulimuli ane o se epikopo ma se peresitene o le siteki, na ou iloa ai po o le a lava le poto, malamalama po o le tomai na ou maua, o le a faapea ona matuai faalauteleina pe a ou faaaofiaina ou fesoasoani i soo se filifiliga na manaomia ona fai. Na ou iloaina o faamanuiaga o le auauna faatasi o se au peresitene sa matagofie ma faateleina.
Na iu ina ou malamalama i le pogai na finagalo ai le Alii e tatau ona taitaiina Lana Ekalesia e faitaulaga sili pulefaamalumalu e toatolu, ma le mafuaaga o le a faatulagaina ai lena ituaiga o taitaiga i le tele lava o vaega o le Ekalesia.
Ua fetalai mai le Alii, “Ou te tuuina atu ia te outou se faatusa i mea uma, ina ia le faaseseina outou” (MFF 52:14). Ua Ia tuuina mai ia i tatou le mamanu o tulaga faaleautaitai. Ua Ia tuuina mai ia i tatou le mamanu o tulaga faaleautaitai. Na aoao mai e Peresitene Gordon B. Hinckley: O faalapotopotoga uma a le Ekalesia, e pulefaamalumalu ai se au peresitene e toatolu e i ai, sei vagana ai le Au Fitugafulu [ma le Toasefululua]” (Teachings of Gordon B. Hinckley, 94).
E le gata i lea, o ausilali i tulaga uma, e taitai e se peresitene ma fesoasoani e toalua. O faamanuiaga uma ma penefiti o le auauna atu faatasi o se au peresitene, e faatatau i ausilali uma faapea foi i korama o le perisitua.
O i tatou uma o e o loo auauna atu i au peresitene i soo se vaega o le Ekalesia, e tatau ona tagai atu i le Au Peresitene Sili e fai ma o tatou mamanu, ma le faataitaiga o loo tatou sailia e mulimuli ai ao faatinoina o tatou tiute. E tatau ona tatou taumafai e avea faapei o i latou ma ia galulue faatasi i le alofa ma le lotogatasi e pei ona latou faia.
Sa masani ona saunoa Peresitene Gordon B. Hinckley i le taua o fesoasoani. Na ia saunoa, “Na tuu e le Alii i laua [fesoasoani] iina mo se faamoemoega” (Teachings of Gordon B. Hinckley [1997], 94).
Na faaopoopo mai Peresitene Hinckley e faapea: “O taeao uma lava sei vagana ai Aso Gafua, e fono ai le Au Peresitene Sili, pe a matou i ai i le aai. Ou te fai atu ia Peresitene Faust e faailoa mai ana mataupu ona matou talanoaina lea ma fai i ai se faaiuga. Ona ou fai atu foi lea ia Peresitene Monson e faailoa mai ana mataupu ona matou talanoaina foi lea ma fai i ai se faaiuga. Ona ou tuuina atu lea o ni aitema na ou manao e faailoa atu ma matou talanoaina ma fai i ai se faaiuga. Matou te galulue faatasi… . E le mafai ona avea oe ma se tagata e gaoioi toatasi i se au peresitene. Fesoasoani— o se mea manaia tele ia fesoasoani. Latou te faasaoina oe mai le faia o mea sese, e fesoasoani ia te oe ia fai ia mea sao” (Teachings of Gordon B. Hinckley, 95; tagai foi “In … Counselors There is Safety,” Ensign, Nov. 1990, 48–51).
Na faamatalaina e se fesoasoani o Peresitene Iosefa F. Samita le ala e manatunatu ai le Au Peresitene Sili: “A oo mai se mataupu i luma [o le Peresitene o le Ekalesia] ina ia faamasinoina, latou te talanoaina ma ona fesoasoani ma latou te iloiloina ma le totoa seia oo ina tutusa a latou faaiuga” (Anthon H. Lund, i le Conference Report, Iuni 1919, 19; ua faatusilima mea e faamamafa).
O le tulaga lena e tatau ona avea ma a tatou mamanu i au peresitene.
Ua aoaoina i tatou i faaaliga ina ia fai a tatou filifiliga i korama ma au peresitene “ma le amiotonu uma, i le paia, ma le maulalo o le loto, agamalu ma le faapalepale, ma i le faatuatua, ma le loto mama, ma le poto, faautauta, onosai, amioatua, ma le agalelei ma le alofa faa-uso” (MFF 107:30).
Ua tuuina mai e le Alii ia i tatou le mamanu.
Ua tatou lagolagoina i le asō le Au Peresitene Sili fou o le Ekalesia. O le a latou aoaoina i tatou ma faaali mai ia i tatou le mamanu e tatau ona tatou mulimuli ai. O le a oo mai ia i tatou le poto ma le malosi pe a tatou vaavaai atu i le Au Peresitene Sili e fai ma o tatou faataitaiga ma mamanu o a tatou taitaiga.
O le a oo mai i o tatou aiga faamanuiaga e tele a o tatou aoaoina a tatou fanau ma fanau a fanau ia alolofa ma lagolago i taitai o le Ekalesia. A o avea au ma se tamaitiiti ma lo’u tutu ai i le fale o ou matua matutua, na ou iloaina sa taitaiina i matou e ni auauna a le Atua, o e na tuu iina e le Alii e taitaiina i matou.
Ma ua ou iloaina nei. Ou te molimau atu o le galuega lenei a le Alii o Iesu Keriso ma o loo taitaiina i tatou e Ana aposetolo ma perofeta. Ou te molimau atu o le aposetolo sinia, o Peresitene Thomas S. Monson, ua valaauina e le Atua ma faatasi ai ma ona fesoasoani tamalii e toalua i ona tafatafa, o le a latou taitaiina i tatou e tusa ai ma le mafaufau ma le finagalo o le Alii, o Le e ana lenei Ekalesia. I le suafa paia o Iesu Keriso, amene.