iTukutuku ni Mataveiliutaki Taumada
Dua na Cakacaka Levu niKalou
6 ni Epereli, 1830
Ena dua na drau walusagavulu na yabaki sa oti eratou a tauyavutaka kina na Lotu i Jisu Karisito ni Yalododonu Edaidai o Josefa Simici, Oliver Cowdery, kei na vica tale. Sa dua dina na soqoni rawarawa ka vakayalo.E vola vakaoqo o Josefa ni oti na sakaramede, “sa veicurumi sara ga na Yalo Tabu,—ni so era parofisai, ka keimami vakalagilagia na Turaga ka marau vata.”1
Sega ni kilai e vuravura na ka e yaco ena siga o ya; sega ni tabaki ena niusiveva ka sega ni bau kacivaki. Ia, e marau o lomalagi ka vakalagilagi na Kalou —ni ena siga o ya, a suka mai kina ki vuravura na Lotu i Jisu Karisito!
Solomon Chamberlain
Mai na siga o ya me yacova mai edai, e milioni na luvena tagane kei na yalewa na Tamada Vakalomalagi ka ra sa vakasinaiti ena vakabauta era sa vakamuria na veivakauqeti ni Yalo Tabu me ra sa tobudromuci ena waitabu ni papitaiso. Dua vei ira oqori o Solomon Chamberlain.
O Solomon e tamata bula vakayalo ka dau masu wasoma ena nona saga tiko me vosoti nona ivalavala ca ka kereya tiko vua na Tamada Vakalomalagi me tuberi koya yani kina ka dina. Ena yabaki 1816, e a raica kina e dua na raivotu o Solomon ni na bula tiko me na raica na tauyavu ni Lotu i Jisu Karisito e vuravura ena ituvatuva vaka-iapositolo.
Vica na yabaki e muri e a soko tiko yani o Solomon ki Kenada ena dua na waqa ka laki kele e Palmyra, e dua na koro lailai mai Niu Ioka. Eke e a vakauqeti vakaukauwa na yalona me sa sobu mada. Ni sega ni kila na vuni nona sobu sa tekivu me veitalanoa sara kei ira na itaukei. Sega ni dede sa rogoca sara o koya na italanoa ni dua na “iVolatabu koula.” Tukuna o koya ni rua na vosa o ya, “e sokonu sara ga na yagoqu [mai] na doka ni uluqu me yaco sara ki na mua ni iqaqalo ni yavaqu.”
Na nona vakatataro e kauti koya sara ki na nodratou vale na Smith, ka veitalanoa sara kei iratou na tiko rawa me baleta na itukutuku rogorogo vinaka ni kosipeli vakalesuimai. Ni oti e rua na siga ni nona tiko e kea ka sa ciqoma kina na ivakadinadina ni ka dina sa qai toso yani o Solomon ena nona ilakolako ki Kenada, ka kauta vata yani e 64 na drau ni iVola i Momani ka se qai taba vou ka se bera ni vakawaqataki. Na veivanua kece e lako kina, e vakavulici ira na tamata, “o ira na iveta e cake kei ira e ra, ira na vutuniyau kei ira na dravudravua me ra vakavakarau baleta na cakacaka levu ni Kalou sa vakarau basika mai.”2
Dua na Cakacaka Levu ni Kalou
Mai na siga o ya ena Epereli 1830, e milioni era sa kunea na dina ni kosipeli vakalesuimai ka ra sa toburaki ena wai ni papitaiso. Au vakadiianadinataka ni sa tu tale e vuravura na “cakacaka levu ni Kalou” oqo. Au vakadinadinataka ni wanonova tiko na Nona Lotu na Turaga, ka liutaki tiko mai vua na Nona parofita o Peresitedi Thomas S. Monson. E sega walega ni veivakalougatataki duatani ni bula donuya na iotioti ni gauna oqo. Oqo na gauna lagilagi, era sa raica oti mai na parofita makawa kei ira na agolosi ni le vuqa. E wanonova tiko na Nona Lotu na Turaga. E nanumi ira talega o ira era vakataki Solomon Chamberlain ni ra vakamuria na veivakauqeti ni Yalo Tabu ka duavata kei ira na tuakana kei na ganena ena veiyasai vuravura me ra sa vukea na kena vakatetei na cakacaka levu ni Kalou oqo.
Veitaba o Matthew Reier ka tauri ena vanua e caka kina na Josefa Simici: Na Parofita ni Veivakalesuimai
Veitaba o Mathew Reier: droini mai vei Maryn Roos
Tabana ni Gone