Qiria na Lori ni Valenibula!

Simon Heal, Queensland, Ositerelia

Ena 1991 noqu ubia tiko na dela ni neitou vale, au vakila e dua na mosi kaukauwa ena mataqu imawi. Na mosi, e vakilai ni vaka na malamala ni kau, sa robota wavokita noqu qavokavoka. Au tomana tikoga noqu cakacaka me yacova niu sa veilecayaki, ka vakaukauwataki au meu laki vakacegu kina noqu rumu ni moce.

Niu davo sobu ga, sa rogo mai na domo lailai, ka vakauqeti au ena nona tukuna na Yalo, “Duri cake, kua ni moce.”

Ena noqu tugana na ivakasala kei na vakanananu me baleta na ka e dodonu meu cakava, sa lomaqu meu lai kauta mai e dua na vuanikau e a vakayagataka o tinaqu me baleta na mosi ni ulu kaukauwa. Au lako yani ki nodrau rumu noqu itubutubu ka kunea sara na vuanikau, ia niu se qai tekivu dolava na kena tavaya, sa rogo tale mai na domo: “Kua ni gunuva e dua vei ira oqori.”

Ni oti ga e dua na gauna lekaleka, sa rogo tale mai na domo ena ikatolu ni gauna: “E gadrevi mo qiria na lori ni valenibula—ena gauna oqo!”

E se bera vakadua meu bau qiria na veiqaravi ni leqa tubukoso, ia au sa qiria sara vakatotolo. A yaco sara mai e dua na lori ni tauvimate, kei na rua na dauveivuke vakavuniwai erau biuti au ena dua na idavodavo laveti. Na iotioti ni ka au nanuma sa ikoya ni rau taroga na yacaqu. Oti sa boko na cina.

Ni oti o ya au sa yadra cake mai ena tabana ni veiqaravi bibi e valenibula. Au se malumalumu tikoga ka bikai tu ena wainimate ni veivakamoceri, ia au nanuma noqu vakila na liga e uluqu ena noqu vakalougatataki mai vei tamaqu kei na noqu bisopi. Au rogoca na vosa “Ena vakalesui mai vei iko na bula, me vaka ga a sega ni dua na ka e yaco.”

Ni oti e tolu na siga ena tabana ni veiqaravi bibi kei na va tale na siga me kena ikuri ena tabana ni valenibula, sa qai rawa meu lesu tale ki vale. Oti sara ga qori au sa qai kila ni tauvi au tiko e dua na mate ni mona. Na dauniveisele ka seleti au e qai tukuna vei au e muri niu sa “voleka sara ga ni mate” ka rawa sara ga meu mate kevaka meu a gunuva na vuanikau ni mosi ni ulu kaukauwa.

Nikua au sa kaukauwa ka bulabula vinaka, kau vakavinavinakataka na Turaga ena nona dusimaka noqu vakasama ena siga o ya. Au sa vauci ena valetabu vua na marama watiqu lomani, ka sa lima na luvei keirau totoka.

Au vakavinavinakataka na Tamaqu Vakalomalagi kei na noqu iVakabula, o Jisu Karisito, me baleta na cakamana ni soli ni bula. Au tovolea ena veisiga yadua meu vakayagataka taucoko na gauna era sa solia vei au, kau sa vakavinavinakataka noqu nanuma na veivakayarayarataki ni veitaqomaki ni domo ni Yalo.

Na mosi ena mataqu imawi sa dewa yani ena noqu qavokavoka taucoko. Niu sa dau davo sobu ga, na domo vakanomodi, lailai e uqeti au: “Duri cake. Kua ni moce.”