Veivuke me Vakayacori

Mai vei Richard M. Romney

Mekesini ni Lotu

Oqori na veika era tukuna na goneyalewa oqo mai Idia ena kena vakavurea vei ira kece na lewe ni tabana na nodra cakacaka rawarawa ni veiqaravi e dua na yalo nanamaki ki na lotu vakamatavuvale.

Era a vinakata na goneyalewa ena Tabana o Chennai na iKarua, ena Tikina o Chennai e Idia, me ra vakauqeti ira na lewe ni tabana me ra dau cakava na nodra lotu vakamatavuvale. E sega ni dede sa basika e dua na vakasama rawarawa ia e mana. Era cakava na ivolakabi me vaka na qiqi kei na dua na ka me cowiri toka kina me kilai tiko kina na ilesilesi ni masu, soli lesoni, kei koya me vakarautaka na “ivakalomavinaka.”

E rawarawa wale na qiqi pepa ia e duiroka. Era a caka ena dua na nodra itaviqaravi na Gone Yalewa e valenilotu ena dua na yakavi, e caka me vakaitaukeitaki na qiqi yadua ena kena biu kina na matavuvale me na vakayagataki kina. Erau a marau vakalevu cake sara o Sushmitha Santhosh Kumar, yabaki 15, kei na tacina o Sujeetha, yabaki 14, e rua na goneyalewa, ena nodrau kila me vaka ni rau se qai lewena vou na Lotu kei na nodrau matavuvale, sa na nodratou na imatai ni qiqi.

“Ni oti na Muavata keimami a lako yani vakailawalawa ki na nodratou vale ka solia na qiqi vei tamadratou,” e kaya o Daisy Daniel, yabaki 16. “Eratou marautaka na lewe ni matavuvale taucoko.” Eratou sa veitalanoa oti na matavuvale kei rau na daukaulotu me baleta na lotu vakamatavuvale, ka solia na qiqi e dua tale na veivakauqeti vou me ratou talemuria na veika eratou sa vulica.

Era cakava na goneyalewa na qiqi me rauta na nodra veimatavuvale yadua na gone ena Lalai ena tabana. Era qai cakava eso tale na qiqi me soli vei ira na daukaulotu me ra solia yani vei ira na lewenilotu vou.

“E vuqa vei keimami ena tabana keimami lewenilotu vou, ka sega ni matau vei keimami na lotu vakamatavuvale,” e kaya ko Daisy. “Ia e tiko na noqu ivakadinadina ni lotu vakamatavuvale ena vukei ira na gone kei ira na itubutubu me ra cakacaka vata, kau nuitaka ni ena veigauna kece era dau raica kina na qiqi na veimatavuvale oqo, era na vakasamataka, ‘Io, era lomani kedatou na lewe ni nodatou lotu ka ra solia mai kina na ivakananumi oqo, mai tou lotu vakamatavuvale.’” Sa yalataka o koya ni sega ni dede sa na yaco me ka ni veimacawa vei ira e vuqa na tamata ena tabana na lotu vakamatavuvale.

Dua na Veiqaravi Vinaka ena Basika kina e Dua Tale

Na qaravi ni lotu vakamatavuvale e dua ga vei ira na vica vata na cakacaka ni veiqaravi era sa qarava rawa na goneyalewa oqo. Ena nodra sasaga me ra vukea e dua na marama yada me kakua soti ni dau galili, era a ukutaka na goneyalewa e dua na basikete ka ra vakatawana ena vuqa na ivola volai e liga. “E sega ni dua me qaravi koya,” e kaya ko Daisy. “O koya keimami vinakata kina me keimami vakananuma vua ni ra dau vakananumi koya tiko na lewe ni tabana.” Era a kauta vua na basikete o ira na goneyalewa ka vakamacalataka vua ni rawa ni wilika e yadua na ivola ena veisiga me matadredredre kina.

Na basikete ivola oqo e basika kina e dua tale na vakasama. Era nakita na goneyalewa me ra vola ivola ni veivakacaucautaki vei ira vakataki ira.“Keimami dui vola tiko e dua na ivola totoka ki vua tale e dua ga vei keimami,” e vakamacalataka o Monisha Kalai Selvam, yabaki 13.

Me Bula Balavu na Lotu Vakamatavuvale!

Ena veika oqo kei na veiitaviqaravi tale eso, era sa vulica tiko kina na goneyalewa ena Tabana ko Chennai na iKarua ni veicakacaka rawarawa ni veiqaravi ena rawa ni kauti ira mai na tamata me ra voleka vua na iVakabula. Ena rawa me ra na dau nanuma tu vakabalavu na lewe ni tabana na qiqi ni lotu vakamatavuvale baleta ni ra lewe levu sara era a ciqoma ka ra sa vakayagataka sara tikoga. Ia kevaka ena mani sega ni tudei sara na ivakananumi oqo ni qiqi, e sega talega ni dua na kena leqa.

“Na tamata kecega e rawa ni ra cakava ga na nodra qiqi se na ivolakabi se ra dabe kei na peni kei na pepa ka ra tuva,” e kaya o Daisy. “Keimami kila ga ni lotu vakamatavuvale sa bibi sara vei keda kece, ka keimami via veivuke ena kena vakayacori.”

E Veivuke Talega na iVolanikalou

Na ivolanikalou talega e dua na tiki bibi ni lotu vakamatavuvale—tarogi ira ga na cauravou ena Tabana o Chennai na iKarua. Ni rogovaki mai na kena vaka tiko na kama ni veigasau na lotu vakamatavuvale ena nodra tabana, era nanuma me ra vaqara na ivolanikalou ka na rawa, ena nodra veituberi na itubutubu, me vakayagataki ena lesoni. Oqo eso era a vakatura:

E kaya ko Karthikeyan Venkatesan, yabaki 18, na Alma 32:21, 28 era ivolanikalou vinaka ni lesoni ni vakabauta. “E vakatautauvatataka o Alama na vosa ni Kalou ki na dua na sorenikau, e rawarawa ni da veitalanoataka na sorenikau kei na kedra tubu,” e kaya o koya. “Sa vukei au na ivolanikalou oqo meu vakalevutaka na noqu vakabauta, me rawa niu wasea na kena ivakadinadina vei ira na tani.”

Na ganena yabaki 16, o Meganathan, e cega na Alama 36:3, e dua na ivolanikalou ka vakavuvulitaka na veivakabauti. “E kaya ko Alama ni kevaka o vakabauta na Kalou, ena vukei iko ko Koya,” e kaya o Meganathan. “Sa dodonu me da biuta na noda veivakabauti vei Tamada Vakalomalagi; e rawa ni vukei iko ko Koya ena veileqa kecega.”

E wilika o Daniel Stephen, yabaki 15, na 3 Nifai 18:20 ka kaya ni rawa ni vakayagataki ena lesoni ni masu. “Au taleitaka na ivolanikalou o ya baleta ni kaya ni veika kecega e dodonu, eda kereya vei Tamada, ena yacai Jisu Karisito, eda na rawata. Kakua ni kereya na ka ca se na ka lialia; kereya na veika vinaka. Kevaka o vakamuria tiko na Yalo, oqori ena vukei iko mo kila na veika mo kereya.” peresitedi ni Cauravou

E kaya o Bharath Raj Ramesh Babu, yabaki 19, ni na vakayagataka na 1 Nifai 19:9 ena dua na lesoni me baleti Jisu Karisito. “E kaya na ivolanikalou ni na kaya ko vuravura ni sega ni dua na ka o Jisu Karisito ia ena yalovinaka ga ka vosota vakadede ko Koya ena vukudra. E vakaraitaka na loloma vei ira na tamata kecega, veitalia na veika era kitaka Vua, sa vakavulici au oqori meu dau yalovinaka cake.”

Era levu sara tu na ivolanikalou e rawa ni vakayagataki ena lesoni ni lotu vakamatavuvale. Veitalanoataka kei na nomu matavuvale. Na ivolanikalou cava dou na vakayagataka?

Veitaba o Richard M. Romney

Karthikeyan

Meganathan

Daniel

Bharath Raj