Rawa Ka na iLavo Vure ni Vuli Ni Oti e Ciwa na Yabaki
A tubu cake mai vakaluveniyali mai Nairobi e Kenya o Tyson Kemege, ka a tauvi koya tu mai na polio, ka se sega vakadua ni se bau moce mai kina ena meteresi ka kalougata ke kana vakarua ena dua na siga. E dau vakayagataka voli ga e rua na ititoko kau me veilakoyaki voli kina.
A mani nanuma sara me sa laki vulica na tekinolaji ni itukutuku ena Kenya Augustana College, ia ni sega tu na nona matavuvale ka sega na ilavo, sa vaka me na sega ni rawa.
A lewena na Lotu o Brother Kemege ena vica na yabaki sa oti ni oti toka ga na nona vuli torocake, a veitaratara sara kei na dua na veiwatini daukaulotu ka tukuna vei rau na nona gagadre oqo. Rau a qai veivosakitaki koya vei iratou na komiti ni iLavo Vure ni Vuli (PEF). A vukei koya na nona taura mai vakadinau mai na LVV (PEF) na nona icurucuru ki koronivuli.
“O au e dua na tamata kalougata e vuravura,” e dau tukuna o Brother Kemege vei rau na daukaulotu.
A laki peresitedi sara ni soqosoqo ni gonevuli o Brother Kemege ena Augustana Univesiti ka sa rua tiko na nona ilesielsi ena nona tabanalevu.
Ni mai oti e ciwa na yabaki na nona kacivaka o Peresitedi Gordon B. Hinckley (1910–2008) na LVV (PEF), era sa mai vukei rawa kina e 38,000 ena 42 na matanitu. Se cava ga na leqa vakailavo e vuravura raraba, e rawa ka vakavinaka tiko na LVV (PEF) ka sa vukei ira tiko vakataki Tyson Kemege me ra vuli, drotani mai na dravudravua, ka veivuke ena nodra itikotiko.
Era sa cakacaka tiko ena gauna oqo e sivia e 87 na pasede era a vukei mai na LVV (PEF) era a vakacavara rawa na nodra vuli.
Valuti ni Bolebole
Ena kena sega ni vakayavalati rawa na parokaramu oqo ena leqa vakailavo e vuravura, era kaya o ira na kena iliuliu ni tiko eso na bolebole me na valuti rawa. E dua vei ira na bolebole ni parokaramu oqo o ya na kena levu cake tikoga ga era vukei tiko kina.
E kaya oqo o Elder John K. Carmack, e dua na lewe tudei ni Vitusagavulu ka dairekita iliuliu ni ilavo vure, “Na veivakataotaki me na namaki tiko ka valuti sa ikoya na kena ka dau yaco sala vata tiko na tubu totolo ni rawa ka kei na sasaga e vuravura raraba. Eso vei ira na dredre oqo e oka kina na kena vunautaki yani, ka vakatakilai na veika e lavaki kina kei na kena rawati, ka ra vukei o ira na kena gonevuli.”
E cicivaki tiko na parokaramu oqo mai na itikotiko liu ni Lotu e vica toka ga na kena vakailesilesi vakailawalawa, oka kina eso na kena vakailesilesi, veiwatini daukaulotu, kei ira na volodia ni vanua. E rau veiliutaki tiko kina e rua na lewe tudei ni Vakaitutu Raraba, o Elder Carmack kei Elder Richard E. Cook.
Ena kena gadrevi me veiqaravi raraba yani na parokaramu oqo, era cakacaka vata kina o iratou na LVV (PEF), na daukaulotu vata kei ira na Mataveiliutaki ni iWasewase mera vakavulici ira kina na kena iliuliu, mera na qai laki cakacaka vata sara kei ira na iliuliu ni vanua mera laki vakavulica ka tokoni ira na nodra qasenivuli, vakailesilesi, volodia, kei ira na vakaitavi.
“Sa yaco tikoga me dua na cakacaka vou,” e kaya o Rex Allen, na dairekita ni vuli kei na veitaratara ni parokaramu. “E vou kecega na kena cakacaka raraba, ka sa ka bibi sara na veitaratara kei na vuli.”
Na Kena Cicivaki
E rawa na parokaramu oqo mai na nodra lomasoli mai vakailavo e drau na udolu na tamata ki na ilavo vure oqo. E vakayagataki na ilavo oqo mera tokoni kina o ira na vakaitavi.
Baleti ira na na vakaitavi, e tekivu na cakacaka oqo ena ituvatuva ni vakavakarau e curuma mai na parokaramu ni vuli ena inisitute ka dodonu me lewena taumada mai o koya. Ena veivuke ni valenivolavola ni vaqara cakacaka ni YDE (LDS), e gadrevi vei ira na vakaitavi mera taura na vuli “Tuvatuva mo Rawa Ka” (“Planning for Success”) kei na vuli ni cakacaka ni bera ni ra kere dinau mai ena gaunisala vakarautaki tu ena kompiuta.
Ni sa vakadonui na dinau, era na vuli na vakaitavi ka tiko na gauna mera na sauma lesu kina na nodra dinau me rawa ni ra laki vukei kina o ira talega era via kere dinau mai ena ilavo vure. Ena veiyabaki e sivia na $2.5 na milioni na ilavo ni Amerika era dau sauma lesu mai o ira na gonevuli.
E kaya o Elder Carmack ni sa gugumatua sara tiko na parokaramu oqo sega walega ni nodra veitokoni mai vakailavo na lewenilotu ia sa vuku talega ni veiliutaki totoka. “Na tama ni iLavo Vure ni Vuli (Perpetual Education Fund) o Gordon B. Hinckley,” a kaya o koya, “ia sa cecere vakakina na veitokoni kei na gumatua nei Peresitedi [Thomas S.] Monson me vakataki Peresitedi Hinckley sara ga. Sa balavu talega mai na nona veiqaravi kina o [Peresitedi Monson] ka veidusimaki tiko kina vakaparofita ena siga nikua.”
Na Vuana
Ena nona a tavoca na parokaramu oqo o Peresitedi Hinckley ena koniferedi raraba ni Epereli 2001 a kaya kina: “Ni ra sa na kila ka vakacakacaka, o ira na goneyalewa kei ira na cauravou oqo sa rawa kina vei ira kei na itabatamata mai muri mera valuta na dravudravua oqo. Era na sautu ena nodra qarava na nodra matavuvale. Era na veiqaravi ena Lotu ka tubu cake ena veiliutaki kei na ilesilesi. Era na sauma na nodra dinau ka me rawa ni ra vakalougatataki talega kina eso tale, me vaka ni ra sa kalougata kina o ira.” (“The Perpetual Education Fund,” Liahona, July 2001, 60; Ensign, May 2001, 51).
Era sa raica tiko na iliuliu ena parokaramu oqo na kena sa mana tiko na veika a tukuna o Peresitedi Hinckley. E yacova sara na 10 ki na 15 na pasede era veiliutaki tiko ena Lotu ena gauna oqo ena so na vanua e veiqaravi tiko kina na LVV (PEF) era a vukei taumada ena uma-ilavo oqo.
“Oqo e sega ni tatadra walega,” a tomana o Peresitedi Hinckley. “Sa tu oqo na ivurevure era yalovinaka ka lomasoli mai kina o ira na wekada totoka ka dauloloma. Sa tu oqo na kena ituvatuva. Era sa tiko na kena vakailesilesi kei ira na tamata yalodina ni Turaga me na mana kina. Oqo e dua na sasaga levu ni volodia ka sega ni sauma kina na Lotu e dua na ka. Sa noda masu ena yalomalua kei na vakavinavinaka ni na vakavuavuai vinakataka na Kalou na sasaga oqo ka na kauta mai na veivakalougatataki e vutuniyau ka totoka, vei ira na udolu na tamata me vaka a yaco ki na isoqosoqo taumada, na iLavo Vure ni Biu Vanua (Perpetual Emigration Fund), a vakalougatataki ira e udolu era a vukei kina.”
Sa oti oqo e ciwa na yabaki, e tubu tikoga na parokaramu oqo, ka rawa ga, me vaka e kaya o Brother Allen, “mai na lomasoli cecere kei na vakabauta e uasivi sara.”
Sa rawa mera vakalougatataki o ira na lewenilotu …
ena nodra votai talega ena vua ni iLavo Vure ni Vuli (Perpetual Education Fund) …
ka mera sauma lesu mera na laki vakalougatataki talega kina eso tale.
iVakaraitaki mai vei Brad Teare