Era Vosa vei Keda
Yaco me dua na Tamata iVakarau Uasivi Ena Gauna Oqo
Mai na “Be a Quality Person,” Ensign, Fepe. 1993, 64–67; pagitueti ena kena ivakarau.
E dua na bula uasivi sa ikoya na gagadre levu duadua ni Kalou vei keda. E dodonu me bulataki vakavinaka na bula ena ituvaki cava ga eda tu kina E sega ni dodonu meda waraka meda qai yaco me dua na tamata ivakarau uasivi. ……
O ikeda taucoko e dodonu meda bula ena veika e dodonu meda vakaliuca taumada kei na kena inaki. Kakua ni vakadredretaka nomu cakacaka vakai-iko. E daumaka cake, mo ni raitayaloyalotaki kemuni kevaka o ni sa bulataka tiko na kosipeli i Jisu Karisito se sega.
Au taleitaka na sala ni bula e vakamacalataka o Carol Clark, na noqu itokani, … ena nona kaya ni bolebole vakatamata sa ikoya me kakua ni waraki tiko na kena yaco ia me bulataki vakalevu, taucoko, ka rekitaki. Na inaki sa ikoya mo ni kakua ni waraka na tamata dodonu ia mo ni o koya na tamata dodonu.
“Na marautaki vakaidina ni bula sa ikoya na kena levei na veika e vakalatilati ena kena se marautaki tikoga na vakanuinui ni veika kece ena yaco me vaka noda gagadre. … Au tusanaka ena galala ni noqu bulataka noqu tadra ka ra sega ni yaco e sa vakadeitaka me dua na veivakayarayaraki veivakamalumalumutaki, yalomalua baleta ni sa rui dredre sara ga. Ia e tu vei keda na veika me caka kina na ka oqo, baleta ni sa vakakina, e rawa meu toso ki liu, ena gauna mada ga oqo au sega ni kunea rawa e dua meu lomana—dua na ka au vinakata vakalevu cake ena bula mai na veika tale eso sai koya na bula savasava duadua ga. ……
“Ena vulaikatakata sa oti au vakatukutuku kivua e dua na itokani sega ni–Yalododonu Edaidai niu sa oca, sega ni lasa, bula tu me vaka e dua na misini livaliva. Sega ni duavata kei au, a sauma lesu mai, ‘Na cava o nanuma ena ka oqo? Na vakatovotovo ni dua na drama? Carol, oqo na nomu bula. Walia.’ Au a namaka me tavia na tabaqu vakaveitokani kei na dua na vosa ni yalololoma. Kena veibasai, au ciqoma e dua na wainimate ni veika dina. O koya, na kena dodonu, e dina sara ga. Au sega ni solia tiko na yaga ni noqu bula, kau sega ni vakila me dua na kena yaga. Au lako ivale, wilika tale na vakatautauvatani ni dauteitei kei na taledi, ka veisautaka noqu bula” (A Singular Life, vola o. Carol L. Clark and Blythe Darlyn Thatcher [1987], 35–36).
Kemuni na taciqu kei na ganequ, veisautaka nomuni bula, kevaka e gadrevi na ka oqori. Kakua ni wawa. Ia, mo ni vakayagataka nomuni bula ena veiqaravi, vuli ka, vakatorocaketaki yadudua, lomana na tamata kecega, kei na so tale na ivakarau vakaibalebale. Me dua na nomu inaki ni bula ena veisiga. … …
… Au vakatututaka mo ni lako mai ka kila na Tamamuni mai Lomalagi. Lako mai ka lomani Koya. Dau nanuma e veigauna ni o Koya e lomani kemuni ka na dusimaki kemuni ka na tokoni kemuni kevaka walega mo ni solia Vua e dua na gauna. Okati Koya ena nomu vakatulewa. Okati Koya ena mosi ni utomuni kei na kavoro ni utomuni. Okati Koya ena nomuni vola na lisi ni yaya ni nomuni cakacaka e yaga vei kemuni. “Raica me vakarautaki koya na tamata ena bula oqo me na lesu tale vua na Kalou; io oqo na bula me kitaka kina na tamata [kei na yalewa] na nona cakacaka kecega” (Alama 34:32).
Ena nomuni tovolea mo ni yaco mo ni dua na tamata ivakarau uasivi, veitaratara e veisiga vata kei na Tamamuni Vakalomalagi ni kila tu na veika kece e baleti kemuni. E kila tu nomuni taledi, nomuni kaukauwa, kei na nomuni malumalumu. Nomuni tiko e vuravura ena gauna oqo mo ni vakatorocaketaka ka vakasavasavataka na veitovo oqo. Au yalataka ni na vukei kemuni o Koya. E kila tu o Koya na nomuni gagadre.
iTaba droini mai vei Craig Dimond