iVakasala vei ira na GoneyalewaME BALETA na Veigadivi
E ka marautaki na veigadivi! E madigi vinaka vei iko na veigadivi mo vakatubura ka vakarabailevutaka kina na nomu veitokani kei ira na cauravou. O Elder Robert D. Hales ena Kuoramu ni iApositolo Le Tinikarua a solia e dua na ivakamacala rawarawa ka kena ibalebale vinaka sara ga na itokani: “O ira na itokani sai ira era vakarawarawataka na bulataki ni kosipeli nei Jisu Karisito.”1 Veigadivi kei ira na cauravou era tokona mo dua na tamata vinaka cake. “Mo kemu ituvaki uasivi duadua” me rawa kina mo dauniveivakayarayarataki vinaka sara vei ira o veigadivi kaya.2
Yaco mo Vakataki Koya o na Vinakata mo Veigadivi Kaya
E rawa ni o tekivu ena gauna oqo mo vakatorocaketaka na ivakarau vinaka me na veirawai kina na kemu irairai ka taleitaki.
-
Matadredredre! Io, matadredredre ka mamarau. Ena veirawai na nomu matadredredre ka vukei ira na tani me ra marautaka na nomu veitokani.
-
Mo bulabula vakayalo. Cakava na veika ka na kauta vakavoleka yani vua na Yalo Tabu me rawa kina ni nomu itokani tudei ko Koya.
-
Me ituvaki vinaka tu na yagomu. Qarauna vinaka na yagomu, dau yavavala, ka dau kana vinaka. Sauni iko vinaka tu.
-
Vakarabailevutaka na veika o dautaleitaka kei na nomu taledi. Vakasaqara na ka ni vuli kece o rawata. Wilika na veivola vivinaka, vakarogoca na sere kei na ivakatagi vivinaka, kila na veika e yaco tiko ena noda vanua, se vulica e dua tale na vosa.
-
Vakaivakarautaki iko me vaka e dua na luvena yalewa na Kalou. Kakua ni vosa vakadodonu tu ga yani, domoilevu, kosakosa, se dauvakacilava na ka. O a raica beka na ivakarau vakaoqo ena iyaloyalo yavala ia e sega ni veiraurau kei na dua na goneyalewa ka kila deivaki tu na nona itutu vaka luvena yalewa na Kalou.
-
Vakavinakataka na nomu bula ni veikilai raraba. Dau veikauwaitaki, dau veiciqomi, ka dau vukea na nodra leqa e so tale. Vakatovotovotaka na dau veivosaki e matanavotu. Vulica na ivalavala kei na ivakarau vinaka. Na veika kece oqo ena vukea mo yaco mo tamata era taleitaka e so tale me ra dau tiko kaya.
-
Dau taleitaki ira na tamata. Dau taleitaki ira tale eso kei na veika era dau taleitaka na cakava. Taroga na taro eso ka na vukea na nodra logavinaka ka vukei iko mo kilai ira vakavinaka cake. Dau vakarorogo vinaka.
-
Biuta na iyalayala. Kakua ni vakatara vei ira tale eso me ra vakayaco lomadra vei iko. Maroroya na nomu savasava.
-
Bulataka na ivakatagedegede ena Me iSakisaki ni iTabagone. Kakua ni vakataratutu mo wasea kei ira o veigadivi kaya na veivakatagedegede oqo. Kakua ni vakalolovirataka na nomu ivakatagedegede vua e dua. Kevaka e namaka vei iko e dua na ka oqori, e sega ni kilikili kaya o koya me nomu itokani se mo drau veitau.
-
Vukei ira e so tale me ra kedra ituvaki vinaka duadua. Me ra yaco me vinaka cake ni oti nodra veigadivi kei iko. Kevaka mada ga e sega soti ni levu na nomu madigi ni veigadivi, sa rawa mo na dau matadredre tu ga ka vakasaqara e so na itokani vovou. Dau nanuma na veika vinaka. Na veika dredre mada ga ena veigadivi era rawa ni veivuke ena tubu. O ira kece o sotavi ira era rawa ni vakavuavuai vinakataka na nomu bula, sa rawa mo na vakalougatataki ira tale eso ena kemu ituvaki vinaka duadua.
Digia Vakavuku O Ira mo Veigadivi Kaya
Na veigadivi sa madigi ni nodra kilai na gonetagane ena vakavakarau ki na vakawati. Qarauni ira vinaka o digi ira mo veigadivi kaya. Na gauna o sa vakasamataka kina na veigadivi kei na dua na cauravou, vakadeitaka ni cecere tu na nona ivakatagedegede ka ni na dau vukei iko tikoga ena nomu bulataka na kosipeli i Jisu Karisito. Oqo e so na taro o na via tarogi iko beka kina:
-
E qaqaco beka ka vinaka na nona itovo ni bula?
-
E tamata dina, dau vakabauti, ka nuitaki beka?
-
E dau dina li?
-
E dau vakarokoroko ka yalovinaka vei ira tale eso vakakina koi au?
-
E sega beka ni dau nanumi koya ga?
-
E dau rokovi rau beka na noqu itubutubu ka dokai rau na nona?
-
E dau doka beka na nona itutu vakabete?
-
E dau vakauqeti au beka meu solia na noqu vinaka duadua?
-
E kilikili kaya beka na curuma na valetabu?
Dau marautaka ka yaco mo ka ni marau ena veigadivi, ena nomu veikilai tiko kei ira tale eso. Navuca na veiitavi qaravi me vakayacori. E so na itavi qaravi lasa sara ena vakasara tu ga na vakasaqari vata ni dua na kuro na kena rawarawa. Se na vakasamataki ni dua na madigi ni veiqaravi. O na rawa ni kilai kemu isa vakavinaka cake ena vakayacori ni itavi qaravi mai na dabe tu ga ka sara iyaloyalo tiko.
Era dau kaya na noda parofita, “Ena veigadivi, rokovi koya drau veigadivi kaya, ka namaki koya me rokovi iko vakakina.”3 Keimami kila ni o ni na veivakayarayarataki vinaka sara ki na nodra bula na gonetagane o ni veigadivi kei ira—kei ira kece na nomu itokani era na sarava tiko na nomu ivakaraitaki dodonu.
Ena nomu tomana tiko na nomu vakarabailevutaka na nomu isolisoli kei na taledi, digidigi vakavuku ena nomu veitokani kei ira tale eso, ka dauveivakayarayarataki ki na veika dodonu, era na veiyabaki vinaka, rawati kina e vuqa na ka, ka marautaki vakalevu sara na nomu veiyabaki ni veigadivi. Sa ikoya oqo na gauna mo raica cake kina na veika mo raica, namaka na vinaka duadua, ka yaco mo rawata rawa na veika kece sara ka namaka vei iko o Tamada Vakalomalagi. O luvena yalewa na Tamada Vakalomalagi; E lomani iko, ka sa vakakina koi keimami.
iTaba ni Valetabu e Montreal Quebec © Laurent Lucuix