Vakalougatataki Ira na Lewenilotu na iDusidusi Vou ni iSoqosoqo ni Veivukei
Ena ono na vula sa oti sa mai vakaraitaka kina o Julie B. Beck, na peresitedi raraba ni iSoqosoqo ni Veivukei na idusidusi vou ni iSoqosoqo ni Veivukei ena soqoni raraba ni iSoqosoqo ni Veivukei, ka laurai ni sa vakalougatataki tiko kina na nodra bula na marama e vuravura taucoko.
A taleitaki sara vakalevu na idusidusi vou oqo, a kaya o Sister Beck, ka vakaraitaka tiko kina ni sa rawa vei ira na marama lewenilotu e vuravura raraba mera tuvanaka na nodra dui soqoni e ganiti ira yadudua, ka solia e levu na galala ki na Lotu oqo e sega ni dau vakatabakiduataka e dua na mataqali itovo se vanua.
“Oqo e dua na ikalawa levu ki na dua na isoqosoqo e vuravura raraba me vakaoqo,” a kaya o Sister Beck. “Keimami lomani ira na marama, keimami nuitaki ira tiko na marama, ka keimami kila ni kevaka era na vakataudeitaka na ka oqo me ka ni vakabauta kei na talairawarawa, era na sega ni kune cala kina.”
Na vosa nei Sister Beck “Na iSoqosoqo ni Veivukei: E Dua na Cakacaka Tabu” (Liaona, Nov. 2009, 110) e dodonu me sa lawatu ni kena dau vakayacori na soqoni, ka rawa vei ira na iliuliu ni iSoqosoqo ni Veivukei mera kere ivakasala mai vei ira na iliuliu ni matabete me baleta na lawatu oqo.
Veisau Raraba
Sa mai vakadeitaki ni dodonu vei ira na daunivakasala ni iSoqosoqo ni Veivukei mera vakamuria na ituvatuva ni matabete ka mera vakatokai me imatai se ikarua ni daunivakasala. Na ilesilesi se itutu ka kilai taumada me iliuliu ni vakabulabulataki ni vuvale, matavuvale, kei na tamata yadudua me sa vakatokai me kodineita ni soqoni ni iSoqosoqo ni Veivukei. O koya e nona na ilesilesi oqo me na tuvanaka na soqoni ni iSoqosoqo ni Veivukei e dau vakayacori ena loma ni macawa me ratou veiliutaki kina na mataveiliutaki.
iDusidusi ni Soqoni ni iSoqosoqo ni Veivukei
Ena nona vosa, a kaya kina o Sister Beck ni a kilai taumada tu na veisoqoni oqo me “vakabulabulataki ni vuvale, matavuvale kei na tamata yadudua” ka sa na mai vakatokai vakarawarawa oqo me soqoni ni iSoqosoqo ni Veivukei.
A vakamacalataka o Sister Beck na ituvatuva me na dau raica tiko kina o peresitedi ni iSoqosoqo ni Veivukei na veisoqoni ni iSoqosoqo ni Veivukei ka kere ivakasala mai vei bisopi se peresitedi ni tabana, sa ikoya ena dau vakadonuya na ituvatuva kece ni soqoni.
Sa itavi nei peresitedi ni iSoqosoqo ni Veivukei me liutaka na soqoni taucoko, ia sa rawa vua me kerei imatai se ikarua ni daunivakasala—se vakatututaka e dua na marama ena tabanalevu se tabana me kacivi me—kodineita ni soqoni. E dodonu me na dau tiko ena veisoqoni taucoko e dua vei iratou na mataveiliutaki.
Me na dau vakayacori vakavula na soqoni, ia sa rawa me vakavulatolu, ena dua tale na siga ka sega ni Siga Tabu se yakavi ni Moniti. Ena vakatau vei bisopi se peresitedi ni tabana kei peresitedi ni Soqosoqo ni Veivukei na gauna ni soqoni, ka sega ni dodonu mera vakasaurarataki na marama mera tiko ena soqoni taucoko oqo.
Me ratou dau raica tiko na mataveiliutaki ni Soqosoqo ni Veivukei na bibi ni gauna, ilavo, veitaqomaki, kei na yawa ni vanua e lakovi mai ni dau tuvanaki na soqoni eso.
E dodonu me dau vakatabakiduataki ena soqoni na “ilesilesi ni yalololoma kei na vakayaco ka” ni iSoqosoqo ni Veivukei, ka toroi cake na vakabauta kei na ivalavala savasava ni tamata yadudua ka vukei na nodra gagadre vakayago ka vakayalo ni tamata yadudua kei na matavuvale.
Sa nodratou itavi na mataveiliutaki ni iSoqosoqo ni Veivukei me vakaliuci tiko na veiulutaga ena mana tiko kina na inaki ni iSoqosoqo ni Veivukei; na soqoni sa rawa me dua ga na kena ulutaga se vidai kina eso tale na kalasi se itaviqaravi. O ira na qasenivuli mera lewe ga ni tabanalevu se iteki o ya.
“Ni qaravi vakadodonu na bose ni iSoqosoqo ni Veivukei, ena toroya cake na nodra gugumatua na iSoqosoqo ni Veivukei me ra cakacaka vata vagumatua kei ira na iliuliu ni matabete ena veitabanalevu,” a kaya o Sister Beck.