Kosipeli ena Noqu Bula
iTalanoa nei Nifai, Noqu iTalanoa
Na qiri mai nei Jake e voroka na utoqu, ia au kunea na inuinui ena ivakaraitaki ni dua na parofita makawa.
Ni oti e vica na yabaki na kena mai cava noqu vuli ena koliji, au raici au niu dabe vata toka kei na so tale na itabagone qase cake ena lotu vakamatavuvale ena noqu tabanalevu. Keimami a sureti ki na vale ni dua na daunivakasala ni mataveiliutaki ni neitou iteki, ka soli lesoni kina na marama watina.
Eda wilika tiko na itukutuku kei Nifai kei iratou na tuakana ena nodratou lai kauta mai na veleti varasa mai vei Lepani (raica 1 Nifai 3–5). E kaya neitou qasenivuli me baleta na yaloqaqa kei na veivakaukauwataki e vakaraitaka o Nifai. Oti e a qai rai cake ki na neitou iwasewase lailai. E curubasika nona wanono.
“A lesi vei Nifai kei iratou na tuakana e dua na itavi dredre,” e dusimaka mai. “A taura e vica na veivakatovolei, sega ni dua vei ira oqori me rawarawa. Ia e sa yaga na sasaga veivakaukauwataki. Na ka e yaco ni tiko na ivolanikalou, ena tarova nona matavuvale o Nifai mai na ‘[vaka]matei kei na [vaka]rusai ni ra sa sega ni vakabauta’ (1 Nifai 4:13).
“Era na tu na ‘veibolebole’ ena nomuni dui bula,” a tomana. “E rawa mo na vakaraitaka na veivakaukauwataki ena kena rawati nomu vuli. E rairai o na kacivi mo vakaraitaka na yaloqaqa ena nomu veigadivi tiko. Na solibula cava ga, na vakataotaki, na toso imuri, na kavoro ni uto—na cava ga e yaga me taqomaka nomu matavuvale mai muri ka maroroi ira mai na vakamatei ena sega ni vakabauta—lesu tale ka kauta mai na veleti.”
Sa dua na ivakatautauvata totoka, au vakasamataka Au maroroya ena noqu ivakananumi me baleta na kena vakalesui tale mai. Ena gauna ko ya au sega ni vakila ni noqu bula e tu kina e vuqa na veivakataotaki. A sa oti na noqu vuli, au a sa maurautaka tu noqu cakacaka ka keirau sa veigadivi tiko kei na dua na turaga totoka—a itokani ena dua na gauna balavu ka sa yaco me keirau vakabibitaka vata sara vakalevu eso na ka—rauta me va na vula. Au sega ni tadra na noqu marautaka vakalevu na veika sa yaco tiko.
Ni oti e vica na vula neirau veitokani vata tiko kei Jake (sa veisau na yaca) sa toso vinaka sara tiko. Ia e rau sa sere na itibutubu nei Jake ena vica na yabaki yani ki liu, kei na nodrau veibiu e se tarai koya tiko ga vakatitobu. E rerevaka tiko o koya kevaka me keirau vakamau, ena rawa ni tini koso ga me vakataki rau nona itubutubu.
Au tukuna vua niu sa tu vakarau meu solia vua na gauna—me levu sara kevaka e gadreva—me vakamatatataka nona vakasama kei na yalona. Keirau veivosakitaka ni vakatulewa me yavutaki ena vakabauta ka sega ena rere. Keirau veivosakitaka na itavi ni galala ni digidigi kei na nona sega ni dodonu me nanuma tiko ni na rawa ni veisautaki talega na nona sala me ka ni rarawa na sala rau sa tu kina na nona itubutubu. Ka keirau veivosakitaka talega na Jisu Karisito kei na kena rawa vua na iVakabula me vakabula na lomada.
A vakaceguiya na nona lomatarotaro e so na neirau veivosaki, eso kei na neirau veitokani era a tomani me vakaeliu. Ena nona qiriti au mai ena yakavi ni Vakarauwai me keirau sa tawase, e vakurabuitaki au sara ga vakalevu. E tukuna vei au ni sega ni rawa me raici koya me vakamautaki au—se kivua e dua tale. E sa sega sara ga ni vakabauta tale na vakamau.
Ena auwa ka tarava keirau taleva na veika keirau a sa veivosakitaka oti, ia sa sega ni rawa meu cikevi koya. A vakasolokakana mai, “Vosoti au,” qai biuta sobu na talevoni. Au dabe galugalu ena noqu idavodavo, qeqera na waini mataqu, ka veilecayaki sara ga.
Dede ga vakalailai a tukituki mai ena rumu ni moce o noqu itokani keirau rumu vata. “O lako mai ki na koniferedi ni iteki?” a taroga. Au sega soti ni vinakata meu lako ki na dua na vanua se cakava e dua na ka, ia au dara e dua na vinivo kau vodo ena nona motoka.
Ena gauna keirau yaco yani kina na imatai ni tamata au raica sa ikoya na marama a solia na lesoni ena lotu ni matavuvale o ya ena vica na vula sa oti. E sega ni dua vei keirau e tukuna e dua na ka, ia e sota na matai keirau, ka lako mai noqu vakasama, au rogoca e dua na domo ni kaciva na yacaqu ka kaya, “Lesu tale ka kauta mai na veleti.”
Ia au kila taucoko ni kena ibalebale na veivakauqeti. E sega walega ni baleta e dua na parofita e liu me lesuva mai e dua na itukutuku vakamareqeti. E baleti au talega. E kena ibalebale ni dina ga e sega ni vakabauta na vakamau o Jake, e se rawa tikoga vei au. Au rawa niu vakanuinuitaka ka masulaka ka cakacakataka—sega ni dua na sala e gadrevi, vakalevutaki ni gagadre ena vakabauta, cakacakataka ni oka kina na vakavakarautaki au e veisiga baleta ni oqo na ituvatuva ni Kalou me baleti ira na Luvena. E sega ni kena ibalebale meu lesu tale kivei Jake ka tiko vata kaya me yacova niu sa “vakayarayarataki koya” ena vakasama ni vakamau, ka sega talega ni kena ibalebale me sa tekivu sara ga oqo meu sa veigadivi tale kei na dua e vou. E sa donu vei au me dua noqu gauna ni rarawa ka vakabulai.
Ia ena gauna o ya a rawa meu levea na vakatoqiqi ena lomalomani koya. Au rawa ni saqata na veivakatovolei meu matadredredre me baleti Jake—se o ira na tagane vakararaba. Au rawa ni vakasaqaqara itokani ka ra vakabauta na vakamau ka vakanamata tu kina. Kau rawa talega, meu vakataki Nifai, vakabauta na Tamada Vakalomalagi dauloloma ka sega ni solia na ivakaro—kevaka me tauri na itukutuku makawa ni ivolanikalou se vakamau ka bucina na matavuvale—ka sega ni vakarautaki e dua na sala me da rawata kina
Au se tovolea tikoga meu vakavatukanataka na ka oqo —au se bera ni rawata sara—na itagede. Au se bera ni vakamau, ia au vakavinavinakataka na veigadivi vinaka au sa sotava—na veika e sotavi e vakavutuniyautaki mai na vakavinakataki ni kena kilai na tomani ni itavi ka vakayagataki ena inaki savasava.
Au vakila talega na vakacegu mai na vakadeitaki ni kila na veika e vakatavulica o Elder Richard G. Scott ena Kuoramu ni iApositolo Le Tinikarua me baleta na ituvatuva ni nona vakadeitaki koya tu o Nifai. E kaya kina:
“Ni oti e rua na sasaga qai sega ni rawa, e yalodei tu ga o Nifai. A qasiva na loma ni koro ki na vale i Lepani ka sega ni saumi taucoko na taro. A dikeva, ‘A sa kauti au yani na Yalo Tabu; ia au sega ni kila na ka meu na laki kitaka,’ tomana nona vakaraitaka, ‘Ia au sa lako ga.’ (1 Ni. 4:6–7; vakuri ena matanivola kala.)
“A tu vakarau o Nifai me tovolea tale ena dua na gauna, me solia tale nona igu taucoko. A vakamacalataka nona vakabauta ni na vukei. A besetaka me vakayalolailaitaki. Ia me vaka ni sa vakayacora, e tu vua na yalodei vua na Turaga, a talairawarawa, ka vakayagataka vakadodonu nona galala ni digidigi, a ciqoma na veidusimaki. A vakauqeti vakaveitarataravi me rawata, kei na vosa nei tinana ‘a … vakaukauwataki iratou [me] ratou rawata kina na ka sa vakarota vei iratou na Turaga.’ (1 Ni. 5:8; vakuri ena matanivola kala.)”1
Na ivakavuvuli ni gugumatua sa ikoya e sega ni vakaiyalayala ki na matanitu ni veigadivi, e kena dodonu. E vakayagataki talega kivei ira e dau tauvi ira na kedra mate ka ra sega ni vakadeitaka kevaka e rawa me ra ciqoma ena marau e dua tale na siga vakasinaiti ena mosi; ki na dua na veiwatini erau tovolea tiko me rau cakacakataka na veibolebole ena nodrau vakamau; kivei ira na itubutubu ka ra masulaka tiko ena vica vata na yabaki me baleta e dua na luvedrau ka sa lakosese tu; kivua e dua na gone yabaki tinivakacaca ka sotava tiko na itovo veibasai ni nona vakabauta e koronivuli; kivei ira na daukaulotu era cakacaka e veisiga ka sega ni vakatavulici e dua na lesoni. Ena so na sala o ikeda kece sara eda sa vakaroti meda lesu tale ka lai kauta mai na veleti.
Me vakataki Nifai, eda rawata. Ena yaloqaqa, kei na vakabauta, e rawa meda rawata kece na veika e vakarota vei keda na Turaga.
Droini mai vei Michael Parker