Vakasama ni Lotu Vakamatavuvale

Na ilavelave oqo era tiko kina na veiitukutuku kei na itaviqaravi ka rawa me vakayagataki ena lotu vakamatavuvale. Oqo e vica na kena ivakaraitaki.

“Yaco me Tamata Yaga ni Gauna Oqo,” t. 45: Vakaraitaka eso na ka (me vakataka e dua na penikau, iVola i Momani, Liaona, pea ivava), ka sureti iratou na nomu matavuvale mera tuvanaka ira me tekivu mai na kena e yaga duadua. Me veivosakitaki na sala e digi kina na ituvatuva o ya. Na ituvaki cava e cecere cake kina na bula ni dua na tamata? Vakayaloqaqataki iratou yadudua na nomu matavuvale mera cakava e dua na ka talei me rawa ni ra tamata uasivi sara kina.

“Ena Mataka Caca ni Siga Tabu,” t. 56: Sureti iratou nomu matavuvale me ratou vakasamataka mada e dua e toka tikivi iratou ka rawa ni sikovi se vukei. Tuvanaka na veika mo cakava vua. Wilika na Mosaia 18:7–10, ka veivosakitaka na nodra vukei na tamata sa ikoya e dua na sala ni noda maroroya tiko na noda veiyalayalati ni papitaiso.

“Ni ra Sega ni Qalo Rawa na Ga,” t. 58: Vola na lawa eso ni nomudou matavuvale, ka veivosakitaka na sala era taqomaka kina na nomudou matavuvale. Ka vola talega eso na ivakaro ni Tamada Vakalomalagi, ka veivosakitaka na kena rawa ni taqomaki keda vakayago ka vakayalo.

Na Lotu Vakamatavuvale Mamarau

Ena vica na yabaki sa oti, a kerei keitou o watiqu me keitou vakarautaka e dua na lotu vakamatavuvale totoka sara. A kerea o luvei keirau yalewa yabaki va me lagata na “Au Luve ni Kalou.” A cabora na idolamasu o luvei keirau tagane yabaki 10. Keitou a vakila kina na kaukauwa kei na veivakacegui totoka ni Yalotabu.

A wasea kina o watiqu eso na vakasama mai vei ira na iliuliu ni Lotu ka vakayaloqaqataki keitou me keitou duabau tikoga ena kosipeli i Jisu Karisito. A qai solia e dua na veivakalougatataki vakatama vei luvei keirau yalewa. Au a masulaki talega vata kei tinaqu, ka iotioti sara o neirau cauravou. Ni bera ni tabaka na uluna, a vakaraitaka o watiqu na nona vakavinavinakataka na matabete ka vakayaloqaqataki koya me bula kilikili kaya na kaukauwa oqo.

Ni oti toka vakalailai e dua veimama na yabaki, a kaya kina vakaoqo o luvei keirau goneyalewa, “Me tou cakava tale mada na lotu vakamatavuvale vaka tou a cakava ena dua na gauna o ya.” Ena noqu kila na ka e vakasamataka tiko, au a tarogi koya ga yani. A kaya mai, “Na gauna tou a veitagici kina vakalevu ka tou mamarau!”

Marlúcia Souza de Jesus Costa, Bahia, Brazil

Na Nomudou Lotu Vakamatavuvale Talei

Vakauta na italanoa ni nomudou lotu vakamatavuvale talei duadua ki na [e-mail] .