Taro & Kena isau
“E rawa vakacava mena savasava tikoga na noqu vakasama ni vakavolivoliti au tu na veika tawasavasava?”
E vaka me sa sega ni rawa mo ni lako ki na dua na vanua nikua me sega ni o ni raici ira na tamata me vakamadua tu nodra isulusulu, ke sega ena matanavotu ena niusiveva se retio yaloyalo. Ena veigauna ena sega ni rawa mo ni lewa na veika e tu vakavolivoliti kemuni, ia e rawa mo ni lewa nomuni vakasama.
Kevaka o ni raica e dua na tamata e vakamadua tu nona isulusulu e rawa mo ni rai tani vakatotolo se kauti kemuni tani mai na ituvaki oqori. Kevaka e lako mai ena vakanananu e dua na vakasama dukadukali, digitaka me kakua ni tiko kina, ia kena dodonu mo ni biliga tani ena savasava ni vakanananu. “Mo qarauna me savasava tikoga na nomu vakanananu; ia … ena sala vata voli ga kei iko na Yalo Tabu” (V&V 121:45–46). Ni savasava nomuni vakanananu ena vukei kemuni mo ni mamarau ka na tiko vata kei kemuni na veivakayarayarataki ni Yalo.
Vakaitovotaki kemuni e veigauna me savasava tu ga kina nomuni vananananu. Tovolea mo ni tu vata ga kei ira na tamata e kilikili nodra isulusulu, ka levea na ituvaki e rawa mo ni raica kina na isulusulu vakamadua. Masuta na Tamada Vakalomalagi me vukei iko. Wiligusutaka na sere se ivolanikalou me rawa ni o ni nanuma na veika vinaka ena gauna o ni temaki kina. Wilika wasoma na ivolanikalou, ka lako ki na valetabu kevaka e rawa. Ni oti o ya ena gauna o ni raica kina e dua e vakamadua tu nona isulusulu, e rawa mo ni nanuma e dua na ka e daumaka.
Eda Sega ni Vakavuravura
E dodonu meda nanuma ni da tiko e vuravura ia eda sega ni vakavuravura. Eda luvena tagane kei na yalewa uasivi na Tamada lomani Vakalomalagi. E vakavuna oqo, na meca e temaki keda vakalevu sara, ia e dodonu meda kaukauwa cake mai na veitemaki. Na tamata vakavuravura e rawa me vakamadua nodra isulusulu, nodra sega ni kila ni yagodra sa ikoya e dua na valetabu vakamareqeti. Ia o ira na Yalododonu Edaidai e tu vei ira na kila ka oqo. Sa ikoya, e dodonu meda maroroi keda ka taukena na itagede cecere ni bula vakayalo ka makare sese. Kevaka e valuta noda vakasama na vakanananu ca, e dodonu meda vakasaqara vakatotolo na veivuke ni Tamada Vakalomalagi ena masumasu, baleta ni sega tale e dua e vinaka cake me vukei keda me vakataki Koya.
Dayana H., yabaki 19, São Paulo, Brazil
Kereya Nomu iTokani me Veivuke
Me vaka niu Yalododonu Edaidai duadua ga ena ika ono ni itagede ena noqu koronivuli, au sotava na ivakarau ni vosa, vakamadua, kei na vakaukauwataki ni veimurimuri vakailawalawa. Ia ena itekitekivu ni yabaki, au vakamacalataka kivei ira noqu itokani na noqu itagede kei na noqu vakamuria veitalia ga se ituvaki cava au tu kina. Era sa vulica mai na veivula sa oti me baleta na yaga ni noqu Lotu. Era na vukei kemuni o ira nomuni itokani kevaka o ni vakamacalataka na kemuni yaga kei na nomuni itagede kivei ira. Nodra itovo noqu itokani, isulusulu kei na vosa sa veisau sara ga me vinaka cake. Au sa vulica ni kevaka era nomuni itokani dina; era na vukei kemuni ni mo nanuma na vakasama savasava ka ra na vukei kemuni mo ni tudei ena sala dodonu ka qiqo.
Celia N., yabaki 12, Virginia, Amerika
Veivuke ni Masumasu
Au raica ni noqu sasaga meu rawata na vakanananu savasava, na masumasu sa ikoya na kena isau dina ena kena maroroi e dua na vakasama savasava ka rawa me veivakayarayarataki na Yalo me tiko vata kei au ena vanua cava ga au lako kina. Noqu masumasu e veimataka me vukei au na Tamada Vakalomalag me tu vei au na vakanananu savasava ka dusimaki au ena loma ni siga taucoko ka vakavinavinakataki Koya ena veibogi e solia vei au e dua na veiwekani vinaka cake sara vata kei Koya ka vukea noqu vakayawaki au mai na veika vakamadua ka maroroya noqu itagede. E dua na masu ena veimataka kei na bogi e rawa me vukei kemuni mo ni sureta na Yalo me tiko vata kei kemuni ena nomuni sotava na meca vakavuravura. “Ia mo dou tudei sara, ka kakua ni yavala, mo dou uasivi cake ena cakacaka vinaka, ena gauna kecega” (Mosaia 5:15).
Gunnar R.,yabaki 16, Wisconsin, Amerika
Eda Sa Valetabu
Ena gauna e vakamadua kina nodra isulusulu na tamata era tu vakavolivoliti iko, kakua ni vakalewai ira, ni gadrevi me tu vei kemuni na vakanananu vinaka. Mo ivakaraitaki kivei ira ena nomuni vakaraitaka ni o ni vakamuria na itagede ni Lotu. Ka vukei ira na tamata ena nomuni lomani ira ka tukuna vei ira ni Tamada Vakalomalagi e lomani ira ka vinakati ira me ra bula savasava ena ivalavala kei na kena vakanananu. Na makare sese sa ikoya e yaga sara ena noda vakabulai, baleta ni o keda eda valetabu ni noda Kalou.
Maricris B., yabaki 19, Quezon, Yatu Filipaini
Bulataka na iVakavuvuli Vakosipeli
Au kila ni rawa me makare sese noda vakanananu mai na noda vulica na ivolanikalou ka cakacakataka na kedra ivakavuvuli. Ena noda cakacakataka na ka yaga taucoko ka dau vakatavulici ena lotu, ena noda wilika na Me iSakisaki ni iTabagone, kei na noda lako ki na valetabu, e rawa ni da rawata na makare sese ni vakanananu.
Jossi O.,yabaki 16, Antioquia, Colombia
Na Vakanananu E Vaka e dua na Tavata
Vunautaka Na Noqu Kosipeli e tiko kina e dua na iwase ka tukuna tiko baleta na ivalavala dodonu. E kaya ni noda vakasama e tautauvata e dua na tavata ni dua na vale ni sarasara. Ena tavata oqo, e dua walega na tamata e rawa me vakaitavi kina ena dua na gauna. Ena gauna e makare sese kina noda vakasama, na vakanananu savasava, noda vakasama ena vakatabakidua tu ga ena vakanananu oqo, kei na ituvaki ni noda vakasama e sega ni rawa me vesuka na vakanananu sega ni taucoko. Na ivalavala dodonu sa ikoya e dua na dodoliga nei Jisu Karisito ka tukuni vei keda meda vakatorocaketaka. Eda vulica ena lotu ni dodonu meda vakasamataka e veigauna na veika savasava, ia ena gauna e temaki keda kina eso na ka dukadukali, e rawa me da lagata noda sere taleitaki se vakasamataka noda ivolanikalou taleitaki. Na vatuka ni veivuke uasivi duadua e rawa me kunei ena 2 Nifai 32:9: “Mo dou dau masu tikoga ka kakua ni ceguoca.”
Elder McEachron, yabaki 21, Tabana ni Kalotu na Brazil João Pessoa
Vakasamataki ira na Tani me ra Luve ni Kalou
O ni lewa se mo ni ciqoma vakacava na veika o ni raica. E baleta walega ni dua na ka e sa tiko e kea, e sega ni dodonu mo ni tokona ena tavata ni nomuni vakasama. Mo ni digitaka na ka mo ni vakanananutaka; ni digitaka mo ni vakasavasavataki ira. Levea nomuni raica na ka vakamadua ena kena levu o ni rawata, ka dau vakaisulu maqosa. Oti qai vakasamataki ira o ni dau veitaratara vata me vaka era luve ni Kalou, vata kei na rawa ka vakalou, e lomani ira vakayadua na Tamada mai Lomalagi. Ena noqu raici ira eso me vaka ni ra luve ni Kalou, au dau rarawataka e veigauna na vakamadua ni isulusulu au sotava.
Amy S., yabaki 19, Utah, Amerika