Mai na Veiyasai Vuravura

Vakaraitaki na Mataveiliutaki Vou ni iWasewase ni Tokalau kei Iurope

E ratou sa mai vakaraitaka na Mataveiliutaki Taumada ni sa veisau na Mataveiliutaki ni iWasewase ni Tokalau kei Iurope ena gauna sara ga oqo. Sa mai lesi kina o Elder Kevin W. Pearson, na iMatai ni Daunivakasala ena Mataveiliutaki ni iWasewase ki na itikotiko liu ni Lotu ena dua na itutu vou ena Tabacakacaka ni Kaulotu. Ena tomana tikoga o Elder Wolfgang H. Paul na nona itutu ni Peresitedi ni iwasewase, ka sa iMatai ni Daunivakasala o Elder Gregory A. Schwitzer ena Vitusagavulu kei Elder Alexsandr N. Manzhos, ena Vitusagavulu ni iWasewase, me iKarua ni Daunivakasala.

Digitaki na Vanua me Tara kina na Valetabu e Philadelphia Pennsylvania

Eratou sa mai vakaraitaka na Mataveiliutaki Taumada ena Noveba ni 2009 ni na tara tiko na Valetabu e Philadelphia Pennsylvania ena 1739 Vine Street mai Philadelphia. Na vanua oqo e toka tikiva na Vine Street Expressway ka volekata toka na Courts Building ka toka veibasai kei na Logan Square, e dua na isakisaki ni vanua o Philadelphia. A vakaraitaka na veika baleta na valetabu oqo o Peresitedi Thomas S. Monson ena Okotova ni 2008. Ena gauna oqo era sa veiqaravi tiko kina e rauta ni 130 na valetabu e vuravura taucoko, ka sa kacivaki se era sa tara tale tiko e 21.

Kacivaki na Tikinisiga ni Valetabu mai Vancouver

Ena dola raraba tiko na Valetabu mai Vancouver British Columbia mai na ika 9 ki na 24 ni Epereli, 2010 vakavo ga ena Siga Tabu, ka na vakayacori e dua na veivakamarautaki vakavanua ena ika 1 ni Me. Ena Siga Tabu na ika 2 ni Me ena tolu tiko na gauna ni kena vakatabui, o ya ena 9:00 ena mataka, 12:00 ena siga levu, kei na 3:00 ena yakavi. Ena kaburaki raraba tiko na tolu na gauna oqo ki na veivalenilotu era tiko ena tikina ni valetabu oqo. Ena qai tekivu tiko na veiqaravi ni valetabu oqo ena siga e tarava.