Dua na Vinivo ni Vakamau kei na dua na Vakatutu

Mai vei Jane McBride Choate

“Na vakamau e ivakaro ni Kalou” (V&V 49:15).

E dabe toka o Lori ena nona idavodavo na tuakana ni tawana tiko vakaoti o Karyn na nona kato ni valetabu. Sa na vakamau tiko nikua o Karyn.

Sa nanamaki tiko o Lori ki na soqo ni vakamau ena yakavi o ya, ia e yalorarawa talega. Na ganena qase, ka sa kaulotu oti mai, ena rawa ni lako ki loma ni valetabu vata kei Karyn. Oi rau talega na nona itubutbu e rawa ni rau lako. Ia o Lori kei rau na ganena gone ena sega ni rawa ni ratou curu.

“Au diva ga me rawa niu tiko vata kei iko ena loma ni valetabu,” e kaya o Lori.

E rai cake mai o Karyn ena nona vakasosolo tiko. “O au talega, ia ko na tikoga e tautuba. Ena dua na siga au na lako vata kei iko ki na valetabu ena gauna o na vakamau kina.”

Sa sega tale ni yalorarawa o Lori, ia e vakasamataka tale tiko e dua na ka. “O kila vakacava ni o vinakata mo vakamautaki Matt?” a taroga.

A dabe sobu e yasai Lori o Karyn. “Ena dua na gauna balavu sa oti au kila kina ni tiko e dua na nona inaki na Turaga me baleti au. Niu sotavi Matt au kila ni rawa ni keirau vakataucokotaka na inaki o ya.”

“O sa vakacavara beka na inaki o ya? E taroga o Lori.

E kurea na uluna o Karyn ni sega. “Keirau vinakata kei Matt me keirau vakaluveni, vakaotia na neirau vuli, kei na vuqa tale.”

E raica o Lori na ivinivo vulavula totoka ni vakamau ka lili toka ena kovate ni sulu nei Karyn. “Sa rairai vinaka dina na nomu ivinivo,” e kaya.

E matadredredre o Karyn. “Oqori tale e dua na tiki ni inaki,” e kaya. “Au dau vinakata tu ga meu vakamau ena valetabu, sa gadrevi kina me maqosa na noqu ivinivo.”

Ena vica na auwa ka tarava e sarava toka o Lori na nodrau lako mai tuba ena valetabu o Karyn kei Matt. E serau na matadrau.

E cici yani vei Karyn o Lori ka mokota.

Ena vica na macawa ka tarava a taura e dua na itaba o Lori ena meli. Na kedrau itaba o Karyn kei Matt ni rau tucake tu ena mata ni valetabu. E vola tu o Karyn e cake, “E tiko na nona inaki na Tamada Vakalomalagi ena vukumu.”

E biuta ko Lori na itaba ena nona drowa. E yalataka vua ni dua na siga ena lako ki na valetabu ka me tiko talega vua na iserau vata a raica ena matai tuakana.